Kapitlu Tnax

Faraġ għall-​Poplu t’Alla

Isaija 51:1-23

1. Xi prospetti koroh għandhom quddiemhom Ġerusalemm u l-​abitanti tagħha, u madankollu x’tama hemm?

 SEBGĦIN sena—għomor normali taʼ bniedem—daqshekk se jdum fil-​jasar f’Babilonja l-​ġens taʼ Ġuda. (Salm 90:10; Ġeremija 25:11; 29:10) Il-​biċċa l-​kbira mill-​Iżraelin li jittieħdu fil-​jasar se jixjieħu u jmutu f’Babilonja. Aħseb ftit kemm se jiġu umiljati mit-​tinbix u t-​twaqqigħ għaċ-​ċajt taʼ l-​għedewwa tagħhom. Aħseb ftit, ukoll, dwar it-​tmaqdir li se jaqaʼ fuq Alla tagħhom, Jehovah, meta l-​belt li fuqha poġġa ismu tibqaʼ ħerba għal dan iż-​żmien kollu. (Neħemija 1:9; Salm 132:13; 137:1-3) It-​tempju maħbub, li kien mimli bil-​glorja t’Alla meta ġie dedikat minn Salamun, se jinqered. (2 Kronaki 7:1-3) Xi prospetti koroh! Imma permezz taʼ Isaija, Jehovah jipprofetizza li kollox se jerġaʼ jiġi kif kien qabel. (Isaija 43:14; 44:26-28) F’kapitlu 51 tal-​ktieb taʼ Isaija, insibu profeziji oħrajn dwar din it-​tema taʼ faraġ u serħan il-​moħħ.

2. (a) Jehovah, permezz taʼ Isaija, lil min jindirizzah il-​messaġġ taʼ faraġ tiegħu? (b) Il-​Lhud leali kif ‘jiġru wara t-​tjieba’?

² Lil dawk f’Ġuda li jagħtuh widen minn qalbhom, Jehovah jgħidilhom: “Isimgħuni, intom li tiġru wara l-​ġustizzja [“t-​tjieba,” “NW”]; intom li tfittxu lill-​Mulej.” (Isaija 51:1a) Il-​‘ġiri wara t-​tjieba’ jfisser azzjoni. Dawk  li qegħdin ‘jiġru wara t-​tjieba’ mhux biss se jgħidu li huma l-​poplu t’Alla, imma wkoll se jistinkaw biex biż-​żelu jimxu fit-​tjieba u jgħixu fi qbil mar-​rieda t’Alla. (Salm 34:16 [34:15, NW]; Proverbji 21:21) Huma se jħarsu lejn Jehovah bħala l-​uniku Sors tat-​tjieba, u se ‘jfittxu lill-​Mulej’ Jehovah. (Salm 11:7; 145:17) Dan ma jfissirx li mhux se jkunu diġà jafu min hu Jehovah jew kif se jersqu lejh bit-​talb. Minflok, se jagħmlu ħilithom biex jersqu eqreb lejh, iqimuh, jitolbuh, u jfittxu d-​direzzjoni tiegħu f’kulma jagħmlu.

3, 4. (a) Min hu “l-​blata” li minnha nqatgħu l-​Lhud, u min hi “l-​barriera” li minnha ttieħdu? (b) Il-​fatt li jiftakru fl-​oriġini tagħhom għala se jfarraġhom lil-​Lhud?

³ Madankollu, f’Ġuda, dawk li verament jiġru wara t-​tjieba huma ftit, u dan jistaʼ jġagħalhom iħossuhom qalbhom maqtugħa u skuraġġiti għall-​aħħar. Għalhekk, waqt li juża t-​tixbiha taʼ barriera, Jehovah jinkuraġġihom: “Ħarsu lejn il-​blata mnejn inqtajtu, lejn il-​barriera mnejn itteħidtu. Ħarsu lejn Abraham missierkom, u lejn Sara li wilditkom. Meta kien waħdu jien sejjaħtlu, u beriktu u kattartu bis-​sħiħ.” (Isaija 51:1b, 2) “Il-​blata” li minnha nqatgħu l-​Lhud tirreferi għal Abraham, persunaġġ storiku li l-​ġens taʼ Iżrael huwa kburi ħafna bih. (Mattew 3:9; Ġwann 8:33, 39) Hu l-​antenat ewlieni, is-​sors uman, tal-​ġens. “Il-​barriera” hija Sara, li minn ġufha ġie Iżakk, missier Iżrael.

⁴ Abraham u Sara kienu xjaħu u ma kellhomx tfal. Madankollu, Jehovah wiegħed li jbierek lil Abraham u ‘jkattru bis-​sħiħ.’ (Ġenesi 17:1-6, 15-17) Peress li Alla ġedded il-​qawwiet ġenerattivi tagħhom, Abraham u Sara wildu tifel fi xjuħithom, u minnu ħareġ il-​ġens tal-​patt m’Alla. B’hekk, lil dan ir-​raġel wieħed, Jehovah  għamlu missier taʼ ġens kbir li l-​għadd tiegħu ma setax jingħadd daqskemm ma jistgħux jingħaddu l-​kwiekeb tas-​smewwiet. (Ġenesi 15:5; Atti 7:5) Jekk Jehovah setaʼ b’dan il-​mod jieħu lil Abraham minn pajjiż imbiegħed u jifformah f’ġens setgħan, ċertament li jistaʼ jwettaq il-​wegħda tiegħu li jeħles lill-​membri tal-​fdal leali mill-​jasar f’Babilonja, jiħodhom lura lejn art twelidhom, u mill-​ġdid jifformahom f’ġens kbir. Il-​wegħda t’Alla lil Abraham twettqet; il-​wegħda tiegħu lil dawn il-​Lhud li qegħdin fil-​jasar se titwettaq ukoll.

5. (a) Abraham u Sara lil min jiffiguraw? Spjega. (b) Fit-​twettiq finali, min huma dawk li joriġinaw mill-​“blata”?

⁵ Il-​qtugħ tal-​blat simboliku li jissemma f’Isaija 51:1, 2  x’aktarx li jistaʼ jiġi applikat mod ieħor. F’Dewteronomju 32:18, Jehovah jissejjaħ ‘il-​Blata li nisslet u wildet’ lil Iżrael. F’din l-​espressjoni jintuża l-​istess verb Ebrajk bħal dak li jidher f’Isaija 51:2 rigward Sara li tiled lil Iżrael. Għaldaqstant, Abraham jiffigura profetikament lil Jehovah, Abraham Akbar. Sara, mart Abraham, tiffigura l-​organizzazzjoni universali u ċelestjali taʼ ħlejjaq spirti taʼ Jehovah, li fl-​Iskrittura Mqaddsa hi rappreżentata bħala l-​mara t’Alla. (Ġenesi 3:15; Apokalissi 12:1, 5) Fit-​twettiq finali taʼ dan il-​kliem mill-​profezija taʼ Isaija, il-​ġens li joħroġ mill-​“blata” huwa “Iżrael taʼ Alla,” il-​kongregazzjoni taʼ Kristjani midlukin bl-​ispirtu, li twieldet nhar Pentekoste tas-​sena 33 E.K. Bħalma ddiskutejna fil-​kapitli taʼ qabel f’dan il-​ktieb, fl-​1918 dan il-​ġens waqaʼ fil-​jasar taħt Babilonja imma fl-​1919 inġieb lura għal stat taʼ riżq spiritwali.—Galatin 3:26-29; 4:28; 6:16.

6. (a) X’hemm merfugħ għall-​pajjiż taʼ Ġuda, u liema tiġdid se jkun hemm bżonn? (b) Isaija 51:3 jfakkarna f’liema tiġdid li seħħ fi żmienna?

⁶ Il-​faraġ li Jehovah jagħti lil Sijon, jew Ġerusalemm, ma jinkludix biss wegħda li jkollha ġens numeruż. Naqraw: “Il-​Mulej iħenn għal Sijon; iħenn għall-​ħrieb kollha tagħha. Jagħmel Għeden mid-​deżert u ġnien tal-​Mulej mix-​xagħri tagħha. Fiha jinsabu ferħ u hena, tifħir u għana bid-​daqq.” (Isaija 51:3) Matul is-​70 sena li jdum ħerba, il-​pajjiż taʼ Ġuda se jerġaʼ jsir deżert, miżgħud b’xewk, għollieq, u ħxejjex salvaġġi oħrajn. (Isaija 64:9 [64:10, NW]; Ġeremija 4:26; 9:9-11 [9:10-12, NW]) Għalhekk, minbarra li Ġuda tissetilja f’artha mill-​ġdid, se jkun hemm bżonn ukoll it-​tiġdid tal-​pajjiż, li se jinbidel fi ġnien bħal taʼ Għeden, b’għelieqi għammiela u ġonna tal-​frott imsoqqijin sew. L-​art  se tkun tidher qisha qed tifraħ. Meta jitqabbel maʼ kif kien ħerba matul l-​eżilju, il-​pajjiż se jkun qisu ġenna taʼ l-​art. Il-​membri tal-​fdal midluk taʼ l-​Iżrael t’Alla wkoll daħlu f’ġenna f’sens spiritwali fl-​1919.—Isaija 11:6-9; 35:1-7.

Raġunijiet għal Fiduċja f’Jehovah

7, 8. (a) Xi tfisser is-​sejħa taʼ Jehovah biex jingħata widen? (b) Għala huwa importanti li Ġuda tagħti kas Jehovah?

⁷ Waqt li jerġaʼ jinsisti biex jisimgħu minnu, Jehovah jgħid: “Ismaʼ minni, poplu tiegħi, u int, ġensi, agħtini widen. Għax tagħlim joħroġ mingħandi; u s-​sewwa tiegħi jkun dawl għall-​popli. Qorbot il-​ġustizzja tiegħi; ħarġet is-​salvazzjoni tiegħi. Driegħi jagħmel ħaqq mill-​popli; fija jittamaw il-​gżejjer, u ’l driegħi jistennew.”—Isaija 51:4, 5.

⁸ Is-​sejħa taʼ Jehovah lill-​ġens biex jagħtih widen tfisser iktar milli sempliċement jismaʼ l-​messaġġ tiegħu. Tfisser li jrid joqgħod attent bl-​iskop li jaġixxi fuq dak li jismaʼ. (Salm 49:2 [49:1, NW]; 78:1) Il-​ġens irid japprezza li Jehovah hu s-​Sors taʼ l-​istruzzjoni, il-​ġustizzja, u s-​salvazzjoni. Hu biss huwa s-​Sors tat-​tidwil spiritwali. (2 Korintin 4:6) Hu l-​Imħallef aħħari tal-​bnedmin. Il-​liġijiet u d-​deċiżjonijiet ġudizzjarji li ġejjin mingħand Jehovah huma dawl għal dawk li jħallu lilhom infushom jiġu gwidati minnhom.—Salm 43:3; 119:105; Proverbji 6:23.

9. Minbarra l-​poplu f’patt m’Alla, min se jibbenefika mill-​atti taʼ salvazzjoni minn Jehovah?

⁹ Dan kollu jrid ikun minnu mhux biss rigward il-​poplu f’patt m’Alla imma wkoll rigward in-​nies li għandhom dispożizzjoni tajba, jgħixu fejn jgħixu,  saħansitra fuq l-​iktar gżejjer imbegħdin tal-​baħar. Il-​fiduċja tagħhom f’Alla u fl-​abbiltà tiegħu li jaġixxi għan-​nom tal-​qaddejja leali tiegħu u li jsalvahom mhix se tkun taʼ diżappunt. Is-​setgħa, jew qawwa, tiegħu rappreżentata minn driegħu, hi ċerta; ħadd ma jistaʼ jwaqqafha. (Isaija 40:10; Luqa 1:51, 52) Illum bl-​istess mod, ix-​xogħol taʼ l-​ippridkar żeluż mill-​membri li fadal taʼ l-​Iżrael t’Alla wassal lil miljuni sħaħ, ħafna minnhom minn gżejjer imbegħdin tal-​baħar, biex iduru lejn Jehovah u jpoġġu fidi fih.

10. (a) Is-​Sultan Nabukodonosor liema verità se jiġi sforzat jagħraf? (b) Liema “smewwiet” u “art” se jintemmu?

¹⁰ Jehovah mbagħad jirreferi għal verità li s-​Sultan Nabukodonosor taʼ Babilonja se jkollu jagħrafha. Ħadd u xejn fost dawk li hemm fis-​sema jew fuq l-​art ma jistaʼ jwaqqaf lil Jehovah milli jwettaq ir-​rieda Tiegħu. (Danjel 4:31, 32 [4:34, 35, NW]) Naqraw: “Erfgħu għajnejkom lejn is-​smewwiet, u ħarsu lejn l-​art hawn taħt. Is-​smewwiet jgħibu bħad-​duħħan, l-​art bħal-​libsa titherra; u jmut bħan-​nemus min jgħammar fiha. Imma s-​salvazzjoni tiegħi tibqaʼ għal dejjem, u l-​ġustizzja tiegħi ma tonqos qatt.” (Isaija 51:6) Għalkemm m’hijiex il-​politika tas-​slaten Babiloniżi li jħallu lill-​ilsiera jmorru  lura lejn pajjiżhom, ħadd u xejn m’hu se jfixkel lil Jehovah milli jsalva lill-​poplu tiegħu. (Isaija 14:16, 17) Is-​“smewwiet” taʼ Babilonja, jew il-​qawwiet li jaħkmu tagħha, se jgħibu fit-​telfa. L-​“art” Babiloniża, is-​sudditi taʼ dawn il-​qawwiet li jaħkmu, se tispiċċa bil-​mod il-​mod. Iva, saħansitra l-​akbar qawwa li teżisti ma tistax tieqaf kontra s-​setgħa taʼ Jehovah jew iżżommu milli jwettaq atti taʼ salvazzjoni.

11. It-​twettiq sħiħ tal-​profezija li s-​“smewwiet” u l-​“art” taʼ Babilonja se jinġiebu fi tmiem għala huwa inkuraġġanti għall-​Kristjani llum?

¹¹ Kemm hu inkuraġġanti għall-​Kristjani llum li jkunu jafu li dan il-​kliem profetiku twettaq bis-​sħiħ! Għala? Għaliex l-​appostlu Pietru uża espressjonijiet simili dwar ġrajja li għad trid isseħħ. Hu tkellem dwar jum Jehovah li riesaq b’għaġla kbira, li permezz tiegħu “s-​smewwiet jinħarqu u jinħallu, u l-​elementi tad-​dinja jinqerdu bin-​nar.” Imbagħad qal: “Skond il-​wegħda tiegħu, nistennew smewwiet ġodda u art ġdida, li fihom tgħammar il-​ġustizzja.” (2 Pietru 3:12, 13; Isaija 34:4; Apokalissi 6:12-14) Għalkemm il-​ġnus setgħanin u l-​ħakkiema tagħhom li huma fl-​għoli bħall-​kwiekeb jistgħu jisfidaw lil Jehovah, fiż-​żmien stabbilit minnu dawn se jinġiebu fix-​xejn—se jgħaffiġhom qisu qed jgħaffeġ insett. (Salm 2:1-9) Huwa l-​gvern taʼ tjieba t’Alla biss li se jaħkem għal dejjem, fuq soċjetà umana taʼ tjieba.—Danjel 2:44; Apokalissi 21:1-4.

12. Il-​qaddejja t’Alla għala m’għandhomx għalfejn jibżgħu meta jiġu mgħajrin minn bnedmin li jopponuhom?

¹² Waqt li jkellem lin-​‘nies li qegħdin jiġru wara t-​tjieba,’ Jehovah issa jgħid: “Isimgħuni, intom li tagħrfu l-​ġustizzja; poplu li għandek il-​liġi tiegħi f’qalbek. La tibżgħux mit-​tagħjir tan-​nies; u minn tkasbirhom la  tiregħxux. Għax bħal biċċa drapp tikolhom il-​kamla, u bħas-​suf jikolhom il-​wirdien. Il-​ġustizzja tiegħi tibqaʼ għal dejjem; u s-​salvazzjoni tiegħi minn nisel għal nisel.” (Isaija 51:7, 8) Dawk li qegħdin jafdaw f’Jehovah se jiġu mgħajrin u mkasbrin minħabba l-​waqfa kuraġġuża tagħhom, imma din m’hijiex xi ħaġa li jridu jibżgħu minnha. Dawk li jkasbruhom huma sempliċi bnedmin tad-​demm u l-​laħam li se ‘jittieklu,’ sewwa sew bħalma biċċa drapp tas-​suf tittiekel mill-​kamla. a Bħal-​Lhud leali tal-​qedem, il-​Kristjani veri llum m’għandhomx għalfejn jibżgħu minn dawk li jopponuhom. Jehovah, dak Alla etern, hu s-​salvazzjoni tagħhom. (Salm 37:1, 2) It-​tkasbir mingħand l-​għedewwa t’Alla qiegħed bħala evidenza li n-​nies taʼ Jehovah għandhom l-​ispirtu tiegħu.—Mattew 5:11, 12; 10:24-31.

13, 14. X’inhu ffigurat mill-​espressjonijiet “Raħab” u “Dragun,” u kif jiġi ‘mqattaʼ biċċiet’ u ‘minfud’?

¹³ Bħallikieku qed isejjaħ lil Jehovah biex jaġixxi għan-​nom tal-​poplu mjassar Tiegħu, Isaija jgħid: “Stenbaħ, stenbaħ, xidd il-​qawwa, driegħ il-​Mulej! Stenbaħ bħal fi żmien il-​qedem, fiż-​żminijiet li ilhom li għaddew. M’hux int kont li għamilt bċejjeċ lil Raħab, li niffidt lid-​Dragun? M’hux int li nixxift il-​baħar, l-​ilma taʼ l-​abbissi l-​kbar? M’hux int li għamilt triq fl-​ibħra, biex jgħaddu l-​mifdija?”—Isaija 51:9, 10.

¹⁴ L-​eżempji storiċi li jitkellem dwarhom Isaija huma magħżulin tajjeb. Kull Iżraeli jaf kif il-​ġens ġie meħlus mill-​Eġittu u kif għadda minn ġol-​Baħar l-​Aħmar. (Eżodu 12:24-27; 14:26-31) L-​espressjonijiet “Raħab” u  “Dragun” jirreferu għall-​Eġittu taħt Fargħun li ma riedx iħalli lil Iżrael joħroġ mill-​Eġittu. (Salm 74:13; 87:4; Isaija 30:7) Peress li kien jibda mill-​bokka tax-​Xmara Nil u jibqaʼ sejjer fit-​tul għal mijiet taʼ kilometri mal-​Wied fertili tax-​Xmara Nil, l-​Eġittu tal-​qedem kien jixbah lil serpent mostruż. (Eżekjel 29:3) Imma dan il-​mostru tqattaʼ biċċiet meta Jehovah sawwab l-​Għaxar Kastigi fuqu. Ġie minfud, ferut bl-​ikrah, u mdgħajjef meta l-​eżerċtu tiegħu nqered fl-​ilmijiet tal-​Baħar l-​Aħmar. Iva, Jehovah wera l-​qawwa taʼ driegħu mill-​mod kif ittratta maʼ l-​Eġittu. Se jkun hu inqas ansjuż li jiġġieled għall-​poplu tiegħu eżiljat f’Babilonja?

15. (a) Meta u kif se jgħibu n-​niket u t-​tnehid taʼ Sijon? (b) In-​niket u t-​tnehid meta għabu għall-​Iżrael t’Alla fi żmienna?

¹⁵ Waqt li issa tħares ’il quddiem lejn il-​ħelsien taʼ Iżrael minn Babilonja, il-​profezija tissokta: “Lura jerġgħu l-​mifdija tal-​Mulej, u jidħlu f’Sijon b’għajat taʼ ferħ. Iroxx fuqhom hena għal dejjem; hena u ferħ jiksbu, u jgħibu n-​niket u t-​tnehid!” (Isaija 51:11) Hi kemm hi taʼ niket is-​sitwazzjoni tagħhom f’Babilonja, dawk li jfittxu t-​tjieba taʼ Jehovah għandhom prospetti glorjużi. Se jiġi żmien meta n-​niket u t-​tnehid se jgħibu. Għajat taʼ ferħ, hena u ferħ—dawn se jinstemgħu minn xofftejn il-​mifdijin. Fit-​twettiq modern taʼ dan il-​kliem profetiku, l-​Iżrael t’Alla ġie meħlus mill-​jasar f’Babilonja fl-​1919. Huma rritornaw lejn il-​qasam spiritwali tagħhom b’hena kbir—hena li għadu sejjer fi żmienna.

16. Xi prezz jitħallas sabiex jinfdew il-​Lhud?

¹⁶ X’se jkun il-​prezz tal-​fidwa tal-​Lhud? Il-​profezija taʼ Isaija diġà rrivelat li Jehovah jagħti “l-​Eġittu b’fidwa tiegħek, l-​Etjopja u ’l Seba għalik.” (Isaija 43:1-4, KŻ) Dan se jseħħ iktar tard. Wara li jikkonkwista lil Babilonja u  jeħles lill-​ilsiera Lhud, l-​Imperu Persjan se jikkonkwista lill-​Eġittu, lill-​Etjopja, u lil Seba. Dawn se jingħataw minflok l-​Iżraelin. Dan hu fi qbil mal-​prinċipju li nsibu fi Proverbji 21:18: “Iħallas il-​ħażin għall-​fidwa tal-​ġust; u t-​traditur għal min hu leali.”

Iktar Serħan il-​Moħħ

17. Il-​Lhud għala m’għandhomx għalfejn jibżgħu mill-​qilla taʼ Babilonja?

¹⁷ Jehovah jkompli jserraħ moħħ il-​poplu tiegħu: “Jiena, jien hu li nfarraġkom! Min int biex tibżaʼ minn bniedem li jmut? Minn bin Adam li bħal ħaxix jitqies? Int insejt il-​Mulej il-​ħallieq tiegħek, li firex is-​smewwiet, u sejjes l-​art. Il-​jum kollu kont imbeżżaʼ mill-​qilla taʼ l-​oppressur. Kien ifittex li jeqirdek, imma issa fejn hi l-​qilla tiegħu?” (Isaija 51:12, 13) Ġejjin snin t’eżilju. Xorta waħda, m’hemmx lok għal biżaʼ mill-​qilla taʼ Babilonja. Għalkemm dan il-​ġens, it-​tielet qawwa dinjija msemmija fil-​Bibbja, se jikkonkwista lin-​nies t’Alla u jfittex li ‘jeqridhom,’ jew iżommhom milli jaħarbu, il-​Lhud leali jafu li Jehovah bassar il-​waqgħa taʼ Babilonja taħt idejn Ċiru. (Isaija 44:8, 24-28) B’kuntrast mal-​Ħallieq—dak Alla taʼ dejjem, Jehovah—l-​abitanti taʼ Babilonja se jgħibu bħall-​ħaxix li jidbiel taħt ir-​raġġi jaħarqu tax-​xemx matul l-​istaġun tan-​nixfa. Imbagħad fejn se jkunu t-​theddid u l-​qilla tagħhom? Kemm ma jkunx għaqli min jibżaʼ mill-​bniedem u jinsa lil Jehovah, dak li għamel is-​sema u l-​art!

18. Għalkemm in-​nies tiegħu se jkunu priġunieri għal xi żmien, Jehovah kif iserrħilhom moħħhom?

¹⁸ Għalkemm in-​nies taʼ Jehovah se jkunu lsiera għal xi żmien, bħallikieku ‘milwijin’ fil-​ktajjen, il-​ħelsien tagħhom se jiġi ħabta u sabta. M’humiex se jinqerdu għalkollox f’Babilonja jew imutu bil-​ġuħ bħala  priġunieri, lanqas jispiċċaw bla ħajja f’Xeol, il-​ħofra. (Salm 30:4 [30:3, NW]; 88:4-6 [88:3-5, NW]) Jehovah jserrħilhom moħħhom: “Il-​milwi taħtha dalwaqt jinħeles, ma jmutx u ma jwaddbuhx fil-​ħofra, u lanqas ma jonqsu l-​ħobż.”—Isaija 51:14.

19. Il-​Lhud leali għala jistaʼ jkollhom fiduċja sħiħa fi kliem Jehovah?

¹⁹ Waqt li għadu jfarraġ lil Sijon, Jehovah jissokta: “Jiena hu l-​Mulej Alla tiegħek, dak li jqanqal il-​baħar, u jgargru l-​imwieġ tiegħu, Jaħweh taʼ l-​eżerċti jismu. Jien qegħedt kliemi fuq fommok, u b’dell idi għattejtek, biex frixt is-​smewwiet, u sejjist l-​art, u għedt lil Sijon: ‘Inti l-​poplu tiegħi.’” (Isaija 51:15, 16) Il-​Bibbja kemm-il darba ssemmi kif Alla għandu l-​ħila jifrex il-​qawwa tiegħu għal fuq il-​baħar u jikkontrollah. (Ġob 26:12; Salm 89:10 [89:9, NW]; Ġeremija 31:35) Hu għandu kontroll sħiħ fuq l-​elementi, bħalma wera meta ħeles lill-​poplu tiegħu mill-​Eġittu. Min jistaʼ jitqabbel, saħansitra bl-​iktar mod insinifikanti, maʼ “Jaħweh taʼ l-​eżerċti”?—Salm 24:10.

20. Liema “smewwiet” u “art” se jibdew jeżistu meta Jehovah jerġaʼ jibni lil Sijon, u liema kliem taʼ faraġ se jlissen?

²⁰ Il-​Lhud jibqgħu l-​poplu f’patt m’Alla, u Jehovah jserrħilhom moħħhom li se jirritornaw lejn art twelidhom, biex għal darb’oħra jgħixu taħt il-​Liġi tiegħu. Hemmhekk se jibnu mill-​ġdid lil Ġerusalemm u t-​tempju u jerġgħu jwettqu r-​responsabbiltajiet tagħhom taħt il-​patt li Jehovah għamel magħhom permezz taʼ Mosè. Meta l-​pajjiż jibda jimtela mill-​ġdid bl-​Iżraelin li jirritornaw u bl-​annimali domestiċi tagħhom, se tibda teżisti “art ġdida.” Fuqha se jitpoġġew “smewwiet ġodda,” sistema governattiva ġdida. (Isaija 65:17-19; Ħaggaj 1:1, 14) Jehovah se jerġaʼ jgħid lil Sijon: “Inti l-​poplu tiegħi.”

 Sejħa għal Azzjoni

21. Jehovah joħroġ liema sejħa għal azzjoni?

²¹ Wara li jkun assigura lil Sijon, Jehovah joħroġ sejħa għal azzjoni. Waqt li jitkellem bħallikieku s-​sofferenzi tagħha kienu diġà ntemmu, hu jgħid: “Stenbaħ! Stenbaħ! Qum Ġerusalemm! Int li xrobt il-​kus taʼ għadbu minn id l-​Mulej, xrobt it-​tazza tal-​mejt sal-​qiegħ.” (Isaija 51:17) Iva, Ġerusalemm trid tqum mill-​kundizzjoni diżastruża tagħha u terġaʼ tikseb il-​pożizzjoni u l-​glorja li kellha qabel. Se jiġi ż-​żmien meta hi se tkun xorbot sa qiegħ it-​tazza simbolika taʼ tpattija divina. Ma se jibqaʼ xejn mir-​rabja t’Alla lejha.

22, 23. X’se ġġarrab Ġerusalemm meta tixrob it-​tazza tar-​rabja taʼ Jehovah?

²² Minkejja dan, waqt li Ġerusalemm qed tiġi kastigata, ħadd mill-​abitanti tagħha, “uliedha,” ma se jkollu  l-​ħila jżomm lura dak li qed jiġri. (Isaija 43:5-7; Ġeremija 3:14) Tgħid il-​profezija: “Ma kellha ’l ħadd li jmexxiha, minn fost l-​ulied li wildet. Ma kien hemm ħadd li joħdilha idha, minn fost uliedha li rabbiet.” (Isaija 51:18) Kemm se ssofri taħt idejn il-​Babiloniżi! “Żewġ ħsarat laħquk,– min se jħenn għalik? – ħerba u qerda; ġuħ u xabla. Min sa jfarrġek? Uliedek mitruħa mitluqa maʼ kull kantuniera, bħal għażżiela maqbuda f’xibka. Mimlija bil-​qilla tal-​Mulej, bit-​tehdid taʼ Alla tiegħek.”—Isaija 51:19, 20.

²³ Povra Ġerusalemm! Se jkollha tissaporti “ħerba u qerda” kif ukoll “ġuħ u xabla.” Peress li ma jistgħux jiggwidawha u jżommuha fuq saqajha, “uliedha” se jkunu bla ħila, għadma u ġilda, m’għandhomx saħħa biżżejjed biex jilqgħu l-​attakk taʼ l-​invażuri Babiloniżi. Fejn jidhru, maʼ kull kantuniera, se jintelqu mitruħa,  dgħajfin, u mifnijin. (Lamentazzjonijiet 2:19; 4:1, 2) Se jkunu xorbu t-​tazza taʼ l-​għadab t’Alla u se jkunu bla saħħa bħal annimali li jinqabdu f’xibka.

24, 25. (a) Liema ħaġa mhix se tkun ripetuta għal Ġerusalemm? (b) Wara Ġerusalemm, min imissu jixrob it-​tazza tar-​rabja taʼ Jehovah?

²⁴ Imma din is-​sitwazzjoni taʼ niket se tispiċċa. Isaija jgħid b’faraġ: “Għalhekk ismaʼ din, msejkna, sakrana, imma mhux bl-​inbid. Dan jgħid sidek il-​Mulej, Alla tiegħek li jaqbeż għall-​poplu tiegħu: ‘Arani, jien neħodlok minn idek il-​kus tal-​mejt; it-​tazza taʼ għadbi ma tixrobhiex aktar. U nqegħedha f’idejn dawk li ħaqruk, dawk li qalulek: “Tgħawweġ ħa ngħaddu minn fuqek.” U int dahrek għamiltu bħal qiegħa taʼ l-​art, u bħal triq biex jgħaddu minnha n-​nies.’” (Isaija 51:21-23) Wara li jiddixxiplina lil Ġerusalemm, Jehovah lest li jitħassarha u juriha spirtu taʼ maħfra.

²⁵ Jehovah issa se jneħħi r-​rabja tiegħu minn fuq Ġerusalemm u jixħetha fuq Babilonja. Babilonja se tkun qerdet għalkollox lil Ġerusalemm u umiljatha. (Salm 137:7-9) Imma Ġerusalemm mhux se jkollha għalfejn terġaʼ tixrob minn din it-​tazza taħt idejn Babilonja jew l-​alleati tagħha. Minflok, it-​tazza se tittieħed minn id Ġerusalemm u tingħata lil dawk li ferħu bl-​għajb tagħha. (Lamentazzjonijiet 4:21, 22) Babilonja se taqaʼ, mejta bis-​sakra. (Ġeremija 51:6-8) Sadanittant, Sijon se tqum! Kif inqalbet il-​folja! Verament, Sijon tistaʼ titfarraġ bi prospett bħal dan. U l-​qaddejja taʼ Jehovah jistgħu jiġu żgurati li ismu se jitqaddes permezz taʼ l-​atti taʼ salvazzjoni tiegħu.

[Nota taʼ taħt]

[Mistoqsijiet taʼ Studju]

[Stampa f’paġna 167]

Jehovah, Abraham Akbar, hu “l-​blata” li minnha ‘nqataʼ’ l-​poplu tiegħu

[Stampa f’paġna 170]

Dawk li jopponu lill-​poplu t’Alla se jgħibu, bħal biċċa drapp mikula mill-​kamla

[Stampa f’paġna 176, 177]

Jehovah wera l-​qawwa tiegħu biex jikkontrolla l-​elementi

 [Stampa f’paġna 178]

It-​tazza li se tkun xorbot minnha Ġerusalemm se tingħata lil Babilonja u l-​alleati tagħha