Kapitlu Tlettax

‘Għajtu bil-​Ferħ Ilkoll Flimkien’!

Isaija 52:1-12

1. Il-​kliem profetiku taʼ Isaija kapitlu 52 għala huwa sors taʼ ferħ, u liema żewġ twettiqiet għandu?

 ĦELSIEN! Jistaʼ jkun hemm prospett iktar ferrieħi għal poplu li qiegħed fil-​jasar? Ladarba l-​ħelsien u t-​tiġdid huma tema ewlenija fil-​ktieb taʼ Isaija, ma niskantawx li minbarra s-​Salmi, dan il-​ktieb Bibliku fih iktar espressjonijiet taʼ ferħ minn kwalunkwe ktieb ieħor. B’mod speċjali, Isaija kapitlu 52 jagħti raġuni lin-​nies t’Alla biex jifirħu. Il-​kliem profetiku tiegħu jitwettaq fuq Ġerusalemm fis-​sena 537 Q.E.K. U għandu twettiq akbar li jinvolvi lil “Ġerusalemm taʼ fuq,” l-​organizzazzjoni taʼ Jehovah fformata minn ħlejjaq spirti fis-​sema, li kultant tiġi deskritta bħala omm u mara miżżewġa.—Galatin 4:26; Apokalissi 12:1.

“Xidd il-​Qawwa Tiegħek, Sijon!”

2. Sijon meta tistenbaħ, u dan kif iseħħ?

² Permezz taʼ Isaija, Jehovah jsejjaħ lil Sijon, il-​belt maħbuba Tiegħu: “Stenbaħ! Stenbaħ! Xidd il-​qawwa tiegħek, Sijon! Ilbes mill-​isbaħ, Ġerusalemm, belt qaddisa! Fik il-​pagan jew l-​imniġġes ma jidħolx aktar. Tfarfar mit-​trab, qum, lsira Ġerusalemm, ħoll l-​irbit minn għonqok, lsira bint Sijon!” (Isaija 52:1, 2) Minħabba li l-​abitanti tagħha qanqlu r-​rabja taʼ Jehovah, Ġerusalemm ilha ħerba 70 sena. (2 Slaten 24:4; 2 Kronaki 36:15-21; Ġeremija 25:8-11; Danjel 9:2) Issa wasal iż-​żmien biex hi tistenbaħ  mill-​perijodu twil taʼ inattività u xxidd l-​ilbiesi sbieħ tal-​ħelsien. Jehovah qanqal qalb Ċiru biex jeħles lill-​“ilsira bint Sijon” sabiex dawk li qabel kienu jgħixu f’Ġerusalemm u nisilhom ikunu jistgħu jitilqu minn Babilonja, imorru lura lejn Ġerusalemm, u jistabbilixxu mill-​ġdid il-​qima vera. Ma jrid jinstab ħadd f’Ġerusalemm li ma jkunx ċirkonċiż u nadif.—Esdra 1:1-4.

3. Il-​kongregazzjoni taʼ Kristjani midlukin għala tistaʼ tissejjaħ “bint Sijon,” u dawn f’liema sens huma meħlusin?

³ Dan il-​kliem taʼ Isaija jitwettaq ukoll fuq il-​kongregazzjoni Kristjana. Il-​kongregazzjoni taʼ Kristjani midlukin tistaʼ tiġi deskritta bħala “bint Sijon” taʼ żmienna, ladarba “Ġerusalemm taʼ fuq” hi ommhom. a Wara li nħelsu mit-​tagħlim pagan u mid-​duttrini apostati, il-​midlukin iridu jżommu waqfa nadifa quddiem Jehovah, mhux billi jkunu ċirkonċiżi fil-​ġisem, imma billi jkunu ċirkonċiżi fil-​qalb. (Ġeremija 31:33; Rumani 2:25-29) Dan jinkludi li jibqgħu nodfa spiritwalment, mentalment, u moralment quddiem Jehovah.—1 Korintin 7:18 [7:19, NW]; Efesin 2:3.

4. Għalkemm “Ġerusalemm taʼ fuq” obdietu dejjem lil Jehovah, liema esperjenzi tar-​rappreżentanti tagħha fuq l-​art jirriflettu dawk taʼ l-​abitanti taʼ Ġerusalemm tal-​qedem?

⁴ Huwa minnu li “Ġerusalemm taʼ fuq” obdietu dejjem lil Jehovah. Madankollu, matul l-​ewwel gwerra dinjija, ir-​rappreżentanti tagħha fuq l-​art—il-​Kristjani midlukin—bla ma riedu kisru l-​liġi taʼ Jehovah għaliex ma fehmux sew x’hemm involut fin-​newtralità Kristjana vera. B’riżultat taʼ dan, huma tilfu l-​favur divin u daħlu f’jasar spiritwali taħt “Babilonja l-​Kbira,” l-​imperu dinji taʼ reliġjon falza. (Apokalissi 17:5) Il-​kundizzjoni tagħhom fil-​jasar laħqet il-​quċċata f’Ġunju taʼ l-​1918  meta tmien rappreżentanti tal-​Watch Tower Society ġew mitfugħin il-​ħabs fuq akkużi foloz, inkluż it-​tradiment. F’dan il-​punt l-​ippridkar organizzat taʼ l-​aħbar tajba kważi waqaf għalkollox. Madankollu, fl-​1919 dwiet stedina qawwija biex jistenbħu spiritwalment. Il-​Kristjani midlukin bdew jisseparaw ruħhom iktar bis-​sħiħ mill-​ħmieġ morali u spiritwali taʼ Babilonja l-​Kbira. Huma qamu mit-​trab tal-​jasar, u “Ġerusalemm taʼ fuq” saret tiddi bħala “belt qaddisa” fejn il-​ħmieġ spiritwali m’huwiex permess.

5. Jehovah għala għandu kull dritt li jixtri lura lin-​nies tiegħu mingħajr ma jħallas ebda kumpens lil dawk li ħaduhom fil-​jasar?

⁵ Kemm fis-​sena 537 Q.E.K. kif ukoll fl-​1919 E.K., Jehovah kellu kull dritt li jeħles lill-​poplu tiegħu. Jispjega Isaija: “Dan jgħid il-​Mulej: ‘Kontu mibjugħa b’xejn, u mingħajr flus tinfdew.’” (Isaija 52:3) La Babilonja tal-​qedem u lanqas Babilonja l-​Kbira ma ħallsu xi ħaġa meta ħadu taħt idejhom bħala lsiera lill-​poplu f’patt m’Alla. Ladarba ma seħħ ebda negozju li jinvolvi l-​flus, Jehovah kien għadu s-​Sid legali tal-​poplu tiegħu. Kellu hu jħossu midjun lejn xi ħadd? Dażgur li le. Fiż-​żewġ każi, Jehovah setaʼ bi dritt jixtri lura lill-​adoraturi tiegħu mingħajr ma jħallas ebda kumpens lil dawk li ħaduhom fil-​jasar.—Isaija 45:13.

6. L-​għedewwa taʼ Jehovah ma tawx kas taʼ liema eżempji mill-​istorja?

⁶ L-​istorja ma kienet għallmithom xejn lill-​għedewwa taʼ Jehovah. Naqraw: “Dan jgħid sidi l-​Mulej: ‘Niżel il-​poplu tiegħi żmien ilu fl-​Eġittu, biex jgħammar hemm barrani; u l-​Assirja għakksitu għal xejn b’xejn.’” (Isaija 52:4) Il-​Fargħun taʼ l-​Eġittu xeħet fil-​jasar lill-​Iżraelin, li kienu ġew mistidnin biex jintwerew ospitalità f’pajjiżu. Imma Jehovah għarraq lill-​Fargħun u lill-​eżerċtu tiegħu fil-​Baħar l-​Aħmar. (Eżodu 1:11-14; 14:27, 28) Meta s-​Sultan Sanħerib taʼ l-​Assirja hedded lil Ġerusalemm,  l-​anġlu taʼ Jehovah qatel 185,000 mis-​suldati tas-​sultan. (Isaija 37:33-37) B’mod simili, la Babilonja tal-​qedem u lanqas Babilonja l-​Kbira ma jistgħu jiskansaw il-​konsegwenzi talli għakksu lill-​poplu t’Alla.

“Il-​Poplu Tiegħi Jagħraf Ismi”

7. Il-​jasar tan-​nies taʼ Jehovah x’effett kellu fuq ismu?

⁷ Il-​kundizzjoni taʼ jasar tal-​poplu taʼ Jehovah teffettwa lil ismu, bħalma turi l-​profezija: “Issa x’se nagħmel jien hawnhekk? Oraklu tal-​Mulej. Il-​poplu tiegħi kien meħud bla flus, u l-​ħakkiema tiegħu jiftaħru b’dan, Oraklu tal-​Mulej. Ismi mkasbar kull jum. Għalhekk il-​poplu tiegħi jagħraf ismi; jagħraf dakinhar li [jien] hu li kont ngħid: ‘Hawn jien!’” (Isaija 52:5, 6) Jehovah x’interess għandu fis-​sitwazzjoni? Għala jikkonċernah li Iżrael qiegħed fil-​jasar f’Babilonja? Jehovah jrid jaġixxi għaliex Babilonja ħadet lin-​nies tiegħu fil-​jasar u għoxiet għax trijonfat fuqhom. Dan il-​ftaħir wassal biex Babilonja tittratta l-​isem taʼ Jehovah b’nuqqas taʼ rispett. (Eżekjel 36:20, 21) Hi ma rrikonoxxietx li Ġerusalemm tinsab f’kundizzjoni taʼ ħerba minħabba li Jehovah hu nkorlat għall-​poplu tiegħu.  Minflok, Babilonja qieset il-​jasar tal-​Lhud bħala evidenza tad-​dgħjufija t’Alla tagħhom. Beltassar taʼ Babilonja, li qed jaħkem flok missieru, saħansitra jżeblaħ lil Jehovah billi juża reċipjenti mit-​tempju Tiegħu waqt festa li saret biex tonora lil xi allat Babiloniżi.—Danjel 5:1-4.

8. Isem Jehovah kif ġie trattat wara l-​mewt taʼ l-​appostli?

⁸ Dan kollu kif japplika għal “Ġerusalemm taʼ fuq”? Minn mindu l-​apostasija stabbiliet ruħha fost il-​Kristjani taʼ l-​isem, setaʼ jingħad li ‘l-​isem taʼ Alla ġie mżeblaħ fost il-​ġnus minħabba fihom.’ (Rumani 2:24; Atti 20:29, 30) Inkwantu għal dan, minħabba s-​superstizzjoni, il-​Lhud maż-​żmien bdew jevitaw l-​użu taʼ l-​isem divin. Ftit wara l-​mewt taʼ l-​appostli, Kristjani apostati għamlu bħalhom u ma baqgħux jużaw l-​isem persunali t’Alla. Mill-​apostasija żviluppa l-​Kristjaneżmu, parti kbira ferm minn Babilonja l-​Kbira. (2 Tessalonikin 2:3, 7; Apokalissi 17:5) L-​immoralità sfaċċata u l-​ħtija tad-​demm bla mistħija tal-​Kristjaneżmu rriflettew ħażin fuq isem Jehovah.—2 Pietru 2:1, 2.

9, 10. Fi żmienna, il-​poplu f’patt m’Alla sar għandu liema fehma iktar profonda dwar il-​livelli taʼ Jehovah u dwar ismu?

⁹ Meta fl-​1919 Ċiru Akbar, Ġesù Kristu, ħeles lill-​poplu f’patt m’Alla mill-​jasar taħt Babilonja l-​Kbira, huma bdew jifhmu aħjar x’kienu l-​ħtiġijiet taʼ Jehovah. Kienu diġà tnaddfu minn ħafna mit-​tagħlim tal-​Kristjaneżmu li għandu l-​għeruq fil-​paganiżmu taʼ qabel l-​era Kristjana u li jinkludi t-​Trinità, l-​immortalità tar-​ruħ, u t-​turment etern fin-​nar taʼ l-​infern. Issa kienu determinati li jeħilsu minn kull ħaġa li għamlu għax kienu ġew influwenzati minn Babilonja. Bdew jirrealizzaw ukoll l-​importanza taʼ li jżommu newtralità stretta fejn għandhom x’jaqsmu l-​kwistjonijiet li jikkaġunaw firda fid-​dinja. Huma riedu wkoll jissaffew minn kull ħtija tad-​demm li xi wħud minnhom setgħu ġabu fuqhom.

 ¹⁰ Il-​qaddejja t’Alla fi żmienna kisbu wkoll fehma iktar profonda dwar l-​importanza taʼ isem Jehovah. Fl-​1931 huma adottaw l-​isem Xhieda taʼ Jehovah, u b’hekk ħabbru pubblikament li kienu jappoġġaw lil Jehovah u lil ismu. Iktar minn hekk, permezz tal-​pubblikazzjoni tan-​New World Translation mill-​1950 ’l hawn, ix-​Xhieda taʼ Jehovah reġgħu poġġew l-​isem divin fil-​post xieraq tiegħu fil-​Bibbja. Iva, huma saru japprezzaw isem Jehovah u qegħdin jagħmluh magħruf sat-​truf taʼ l-​art.

“Min Iħabbar il-​Bxara”

11. L-​għajta “Alla tiegħek isaltan!” għala hija xierqa rigward il-​ġrajjiet li seħħew fis-​sena 537 Q.E.K.?

¹¹ Issa l-​attenzjoni tagħna tmur lura lejn Sijon meta din għadha fi stat taʼ ħerba. Jersaq messaġġier li jġib aħbar tajba: “Kemm huma sbieħ fuq il-​muntanji r-​riġlejn taʼ min iħabbar il-​bxara, taʼ min ixandar is-​sliem, taʼ min iħabbar ir-​riżq, taʼ min ixandar is-​salvazzjoni, u jgħid lil Sijon: ‘Alla tiegħek isaltan!’” (Isaija 52:7, 8a [52:7, “NW”]) Fis-​sena 537 Q.E.K., kif jistaʼ jingħad li Alla taʼ Sijon sar Sultan? Jehovah mhux minn dejjem kien Sultan? Tabilħaqq, hu s-​“Sultan taʼ l-​eternità”! (Rivelazzjoni 15:3, NW) Imma l-​għajta “Alla tiegħek isaltan!” hija xierqa għaliex il-​waqgħa taʼ Babilonja u d-​dikjarazzjoni rjali biex it-​tempju f’Ġerusalemm jinbena mill-​ġdid u l-​qima safja tiġi stabbilita mill-​ġdid hemmhekk jifformaw espressjoni ġdida taʼ l-​istat taʼ Jehovah bħala sultan.—Salm 97:1.

12. Min kien minn taʼ quddiem biex “iħabbar il-​bxara,” u kif?

¹² Fi żmien Isaija, ebda individwu jew grupp taʼ individwi ma kien identifikat bħala “min iħabbar il-​bxara.” Iżda llum l-​identità taʼ min iħabbar il-​bxara hija magħrufa. Ġesù Kristu hu l-​aqwa messaġġier tas-​sliem taʼ Jehovah. Meta kien fuq l-​art, hu ppriedka l-​aħbar tajba li kellu  jkun hemm ħelsien mill-​effetti kollha tad-​dnub li ntiret minn Adam, inkluż il-​mard u l-​mewt. (Mattew 9:35) Ġesù ħalla eżempju taʼ żelu f’li jxandar din l-​aħbar tajba taʼ xi ħaġa aħjar, billi ħataf kull opportunità biex jgħallem lin-​nies dwar is-​Saltna t’Alla. (Mattew 5:1, 2; Mark 6:34; Luqa 19:1-10; Ġwann 4:5-26) U d-​dixxipli tiegħu segwew l-​eżempju tiegħu.

13. (a) L-​appostlu Pawlu kif żied fuq it-​tifsira taʼ l-​espressjoni “Kemm huma sbieħ fuq il-​muntanji r-​riġlejn taʼ min iħabbar il-​bxara”? (b) Għala jistaʼ jingħad li riġlejn il-​messaġġiera huma “sbieħ”?

¹³ Fl-​ittra tiegħu lir-​Rumani, l-​appostlu Pawlu jikkwota Isaija 52:7 biex jenfasizza l-​importanza tax-​xogħol tax-​xandir taʼ l-​aħbar tajba. Hu jistaqsi sensiela taʼ mistoqsijiet li jqanqlu l-​ħsieb, inkluż ‘Kif jistgħu jisimgħu n-​nies jekk ma jxandrulhomx?’ Imbagħad jgħid: “Bħalma hemm miktub: ‘Kemm huma sbieħ riġlejn dawk li  jħabbru l-​ġid.’” (Rumani 10:14, 15) Pawlu b’hekk iżid l-​applikar taʼ Isaija 52:7, billi juża l-​forma fil-​plural “dawk” minflok is-​singular “min,” li tidher fit-​test oriġinali taʼ Isaija. Peress li jimitaw lil Ġesù Kristu, il-​Kristjani kollha huma messaġġiera taʼ l-​aħbar tajba tas-​sliem. Riġlejhom kif inhuma “sbieħ”? Isaija jitkellem bħallikieku l-​messaġġier riesaq lejn Ġerusalemm mill-​muntanji taʼ Ġuda fil-​qrib. Mill-​bogħod huwa impossibbli li tara riġlejn il-​messaġġier. Minflok, hawnhekk l-​enfasi qiegħda fuq il-​messaġġier, billi r-​riġlejn jirrappreżentaw lill-​messaġġier innifsu. Sewwa sew bħalma Ġesù u d-​dixxipli tiegħu kienu jidhru sbieħ għall-​ġwejdin fl-​ewwel seklu, ix-​Xhieda taʼ żmienna huma attraenti għan-​nies umlin li jagħtu kas il-​messaġġ taʼ l-​aħbar tajba li jsalva l-​ħajja.

14. Jehovah kif sar Sultan fi żmienna, u minn meta tħabbar dan lill-​bnedmin?

¹⁴ Fi żmienna, minn meta nstemgħet l-​għajta “Alla tiegħek isaltan!”? Mill-​1919 ’l hawn. F’dik is-​sena, f’konvenzjoni li saret f’Cedar Point, Ohio, J. F. Rutherford, li dak iż-​żmien kien il-​president tal-​Watch Tower Society, qanqal lis-​semmiegħa tiegħu meta kellimhom dwar is-​suġġett: “Taħdita għall-​Ħaddiema Sħabna.” Din kienet ibbażata fuq Isaija 52:7 u Apokalissi 15:2, u inkuraġġiet lil dawk kollha preżenti biex jibdew jaħdmu fix-​xogħol taʼ l-​ippridkar. B’hekk, ‘riġlejn sbieħ’ bdew jidhru fuq “il-​muntanji.” L-​ewwel il-​Kristjani midlukin u iktar tard sħabhom min-​“nagħaġ oħra” ħarġu b’mod żeluż jippridkaw l-​aħbar tajba li Jehovah kien sar Sultan. (Ġwann 10:16) Jehovah kif kien sar Sultan? Hu esprima mill-​ġdid l-​istat tiegħu bħala sultan fl-​1914 meta ħatar lil Ibnu, Ġesù Kristu, bħala Sultan fis-​Saltna tas-​sema li kienet għadha kif ġiet stabbilita. U Jehovah għamel jerġaʼ espressjoni oħra taʼ l-​istat  tiegħu bħala sultan fl-​1919 meta ħeles lil “Iżrael taʼ Alla” minn Babilonja l-​Kbira.—Galatin 6:16; Salm 47:9 [47:8, NW]; Apokalissi 11:15, 17; 19:6.

“L-​Għassiesa Tiegħek Għollew Leħinhom”

15. Min huma l-​“għassiesa” li jgħollu leħinhom fis-​sena 537 Q.E.K.?

¹⁵ L-​għajta “Alla tiegħek isaltan!” tqanqal xi rispons? Iva. Jikteb Isaija: “Ismagħha l-​għajta! L-​għassiesa tiegħek għollew leħenhom, lkoll flimkien jgħajjtu bil-​ferħ, għax raw b’għajnejhom lill-​Mulej rieġaʼ lura f’Sijon.” (Isaija 52:8b) M’hemmx għassiesa letterali li joqogħdu għassa f’Ġerusalemm fis-​sena 537 Q.E.K. biex jilqgħu lura lill-​ewwel eżiljati li jirritornaw. Il-​belt ilha ħerba 70 sena. (Ġeremija 25:11, 12) Mela l-​“għassiesa” li jgħollu leħinhom bilfors li huma dawk l-​Iżraelin li taslilhom l-​aħbar bil-​quddiem rigward li Sijon tiġi stabbilita mill-​ġdid u li jħossuhom responsabbli li jgħaddu l-​aħbar lill-​bqija minn ulied Sijon. Malli jaraw lil Jehovah jagħti lil Babilonja f’idejn Ċiru fis-​sena 539 Q.E.K., l-​għassiesa ma jibqgħalhom ebda dubju f’moħħhom li Jehovah qed jeħles lill-​poplu tiegħu. Flimkien maʼ dawk li jwieġbu għas-​sejħa tagħhom, l-​għassiesa jibqgħu jgħajtu bil-​ferħ flimkien, billi jħallu lil oħrajn jisimgħu l-​aħbar tajba.

16. L-​għassiesa lil min jaraw “b’għajnejhom,” u f’liema sens?

¹⁶ L-​għassiesa attenti jistabbilixxu relazzjoni persunali mill-​qrib maʼ Jehovah, billi ‘jarawh b’għajnejhom,’ jew bħallikieku, wiċċ imbwiċċ. (Numri 14:14) Il-​kuntatt mill-​qrib li għandhom maʼ Jehovah u bejniethom jenfasizza l-​unità tagħhom u n-​natura ferriħija tal-​messaġġ tagħhom.—1 Korintin 1:10.

17, 18. (a) Il-​klassi taʼ l-​għassies fi żmienna kif għolliet leħinha? (b) Il-​klassi taʼ l-​għassies f’liema sens għajtet flimkien?

¹⁷ Fit-​twettiq taʼ żmienna, il-​klassi taʼ l-​għassies, “l-​ilsir  leali u diskret,” tgħolli leħinha mhux biss lil dawk li diġà qegħdin fl-​organizzazzjoni viżibbli t’Alla imma wkoll lill-​barranin. (Mattew 24:45-47, NW) Fl-​1919 ħarġet sejħa biex jinġabru dawk li kien fadal mill-​midlukin, u fl-​1922 is-​sejħa kompliet titqawwa fil-​konvenzjoni li saret f’Cedar Point, Ohio, bl-​appell biex ‘jirriklamaw, jirriklamaw, jirriklamaw, lis-​Sultan u s-​saltna tiegħu.’ Mill-​1935 ’l hawn, l-​attenzjoni ntefgħet fuq il-​ġbir taʼ kotra kbira taʼ wħud bħal nagħaġ. (Apokalissi 7:9, 10) Dan l-​aħħar, l-​avviż dwar l-​istat taʼ Jehovah bħala sultan kompla  jitqawwa. Kif? Fis-​sena 2000, xi sitt miljun ruħ kienu qegħdin jieħdu sehem f’li jitkellmu dwar l-​istat taʼ Jehovah bħala sultan f’iktar minn 230 pajjiż u territorju. Iżjed minn hekk, It-​Torri taʼ l-​Għassa, l-​istrument prinċipali tal-​klassi taʼ l-​għassies, isemmaʼ dan il-​messaġġ ferrieħi f’iktar minn 130 lingwa.

¹⁸ Biex tieħu sehem f’xogħol li jgħaqqad bħal dan jeħtieġ li jkollok l-​umiltà u li tkun tħobb lill-​aħwa. Biex is-​sejħa tkun effettiva, dawk kollha li huma involuti jridu jxandru l-​istess messaġġ. F’dan il-​messaġġ iridu jispikkaw l-​isem taʼ Jehovah, il-​provvediment li għamel għall-​fidwa tal-​bnedmin, għerfu, imħabbtu, u Saltnatu. Hekk kif il-​Kristjani madwar id-​dinja kollha jaħdmu spalla maʼ spalla, ir-​rabta persunali li għandhom maʼ Jehovah tissaħħaħ biex flimkien isemmgħu l-​bxajjar taʼ ferħ.

19. (a) Il-​“ħerbiet taʼ Ġerusalemm” kif isiru ferriħin? (b) Jehovah f’liema sens ‘kixef id-​driegħ qaddis tiegħu’?

¹⁹ Peress li n-​nies t’Alla jgħajtu bil-​ferħ, anki l-​post fejn jgħammru jidher ferrieħi. Tkompli l-​profezija: “Intom, ħerbiet taʼ Ġerusalemm, għajjtu lkoll bil-​ferħ, għax farraġ il-​Mulej il-​poplu tiegħu, feda lil Ġerusalemm. Kixef il-​Mulej id-​driegħ tiegħu qaddis, quddiem il-​ġnus kollha, u raw it-​truf kollha taʼ l-​art is-​salvazzjoni taʼ Alla tagħna.” (Isaija 52:9, 10) Meta jaslu dawk li jirritornaw minn Babilonja, il-​postijiet imnikktin tal-​ħerbiet f’Ġerusalemm ikollhom dehra ferriħija għaliex issa l-​qima safja taʼ Jehovah tistaʼ tiġi stabbilita mill-​ġdid. (Isaija 35:1, 2) Jidher ċar li hawn l-​id taʼ Jehovah f’dan. Hu ‘kixef id-​driegħ qaddis tiegħu,’ bħallikieku xammar il-​kmiem sabiex jidħol għax-​xogħol li jsalva lill-​poplu tiegħu.—Esdra 1:2, 3.

20. X’irriżulta u x’għad irid jirriżulta mill-​fatt li Jehovah jikxef id-​driegħ qaddis tiegħu fi żmienna?

²⁰ F’dan il-​perijodu taʼ “l-​aħħar tad-​dinja,” Jehovah kixef  id-​driegħ qaddis tiegħu sabiex jerġaʼ jagħti l-​ħajja lill-​fdal midluk, iż-​“żewġ xhieda” tal-​ktieb taʼ l-​Apokalissi. (2 Timotju 3:1; Apokalissi 11:3, 7-13) Mill-​1919 ’l hawn, dawn iddaħħlu f’ġenna spiritwali, il-​qasam spiritwali li issa jgawduh ukoll miljuni minn sħabhom, in-​nagħaġ oħra. Meta jasal il-​waqt, Jehovah se jikxef id-​driegħ qaddis tiegħu sabiex isalva lill-​poplu tiegħu f’“Ħarmagedon.” (Apokalissi 16:14, 16) F’dak iż-​żmien, ‘it-​truf kollha taʼ l-​art jaraw is-​salvazzjoni taʼ Alla tagħna.’

Ħtieġa Urġenti

21. (a) X’inhu meħtieġ minn dawk li qegħdin ‘iġorru tagħmir il-​Mulej’? (b) Il-​Lhud li ħerġin minn Babilonja għala m’għandhomx għalfejn jibżgħu?

²¹ Dawk li joħorġu minn Babilonja biex imorru lura lejn Ġerusalemm iridu jissodisfaw ħtieġa. Jikteb Isaija: “Itilqu, itilqu, oħorġu minn hemm, tmissu xejn imniġġes. Oħorġu minn ġo nofsha! Tnaddfu, intom li ġġorru tagħmir il-​Mulej. Għax intom ma toħorġux mgħaġġla, u ma titilqux qiskom maħruba, għax jimxi quddiemkom il-​Mulej u warajkom Alla taʼ Iżrael.” (Isaija 52:11, 12) L-​Iżraelin li ħerġin minn Babilonja jridu jħallu warajhom kwalunkwe ħaġa li hi mċappsa bil-​qima falza taʼ Babilonja. Ladarba qegħdin iġorru t-​tagħmir taʼ Jehovah li kien ittieħed mit-​tempju f’Ġerusalemm, iridu jkunu nodfa, mhux biss b’mod li jidher u ċerimonjali, imma primarjament fi qlubhom. (2 Slaten 24:11-13; Esdra 1:7) Iżjed minn hekk, Jehovah miexi quddiemhom, u għalhekk m’għandhomx għalfejn jibżgħu, lanqas m’għandhom għalfejn jiġru qishom imġienen, bħallikieku xi ħadd li hu għatxan għad-​demm qed jiġri warajhom. Dak Alla taʼ Iżrael qiegħed warajhom biex iħarishom.—Esdra 8:21-23.

22. Pawlu kif jisħaq fuq il-​ħtieġa taʼ l-​indafa fost il-​Kristjani midlukin?

 ²² Kliem Isaija dwar li wieħed jibqaʼ nadif għandu twettiq ewlieni fuq in-​nisel taʼ “Ġerusalemm taʼ fuq.” Meta Pawlu wissa lill-​Kristjani Korintin biex ma jidħlux f’madmad li mhux indaqs maʼ dawk li ma jemmnux, hu kkwota l-​kliem li nsibu f’Isaija 52:11: “‘Għalhekk oħorġu minn  ġo nofshom, u nfirdu minnhom,’ jgħid il-​Mulej; ‘la tmissux l-​imniġġes.’” (2 Korintin 6:14-17) Preċiż bħall-​Iżraelin li sejrin lejn pajjiżhom minn Babilonja, il-​Kristjani jridu jżommu ’l bogħod mill-​qima falza Babiloniża.

23. Il-​qaddejja taʼ Jehovah llum b’liema mod jistinkaw biex iżommu ruħhom nodfa?

²³ Dan kien minnu b’mod partikulari dwar dawk is-​segwaċi midlukin taʼ Ġesù Kristu li ħarbu minn Babilonja l-​Kbira fl-​1919. B’mod progressiv, dawn tnaddfu minn kull ħaġa li kellha x’taqsam mal-​qima falza. (Isaija 8:19, 20; Rumani 15:4) Huma saru wkoll dejjem iktar konxji taʼ l-​importanza li jibqgħu nodfa moralment. Għalkemm ix-​Xhieda taʼ Jehovah dejjem żammew livelli morali għoljin, fl-​1952 The Watchtower kien fih artikli li enfasizzaw il-​ħtieġa li wħud immorali jiġu dixxiplinati sabiex il-​kongregazzjoni tibqaʼ nadifa. Din id-​dixxiplina tgħin ukoll lil min jiżbalja biex jirrealizza li għandu bżonn jindem sinċerament.—1 Korintin 5:6, 7, 9-13; 2 Korintin 7:8-10; 2 Ġwann 10, 11.

24. (a) Fi żmienna, x’inhu “tagħmir il-​Mulej”? (b) Il-​Kristjani llum għala huma fiduċjużi li Jehovah se jkompli jimxi quddiemhom kif ukoll ikun warajhom biex iħarishom?

²⁴ Il-​Kristjani midlukin flimkien mal-​kotra kbira taʼ nagħaġ oħra huma determinati li ma jmissu xejn li mhux nadif spiritwalment. Il-​kundizzjoni msoffija u mnaddfa tagħhom tikkwalifikahom biex iġorru “tagħmir il-​Mulej”—il-​provvedimenti prezzjużi magħmulin minn Alla għal servizz sagru fil-​ministeru minn dar għal dar u fuq studji tal-​Bibbja u f’għamliet oħrajn t’attività Kristjana. Billi jżommu waqfa nadifa, in-​nies t’Alla llum jistgħu jkunu fiduċjużi li Jehovah se jkompli jimxi quddiemhom kif ukoll ikun warajhom biex iħarishom. Bħala n-​nies nodfa t’Alla, għandhom raġunijiet bl-​abbundanza biex “ilkoll flimkien jgħajjtu bil-​ferħ”!

[Nota taʼ taħt]

[Mistoqsijiet taʼ Studju]

[Stampa f’paġna 183]

Sijon se tiġi meħlusa mill-​jasar

[Stampa f’paġna 186]

Mill-​1919 ’l hawn, ‘riġlejn sbieħ’ dehru mill-​ġdid fuq “il-​muntanji”

[Stampa f’paġna 189]

Ix-​Xhieda taʼ Jehovah jitkellmu flimkien fi qbil

[Stampa f’paġna 192]

Dawk li qegħdin ‘iġorru tagħmir il-​Mulej’ iridu jkunu nodfa moralment u spiritwalment