Kapitlu Tlieta

“Il-​Maħtur Tiegħi li Fih Qalbi Strieħet!”

Isaija 42:1-25

1, 2. Kapitlu 42 taʼ Isaija għala huwa taʼ interess għall-​Kristjani llum?

 “‘INTOM ix-​xhieda tiegħi,’ oraklu tal-​Mulej, ‘u l-​qaddej tiegħi li jiena ħtart.’” (Isaija 43:10) Din id-​dikjarazzjoni minn Jehovah, miktuba mill-​profeta Isaija fit-​tmien seklu Q.E.K., turi li fil-​qedem il-​poplu f’patt maʼ Jehovah kien ġens taʼ xhieda. Kien il-​qaddej maħtur t’Alla. Xi 2,600 sena wara, fl-​1931, Kristjani midlukin xandru pubblikament li dan il-​kliem kien japplika għalihom. Huma bdew jissejħu Xhieda taʼ Jehovah u b’qalbhom kollha aċċettaw ir-​responsabbiltajiet assoċjati maʼ li jkunu l-​qaddej t’Alla fuq l-​art.

² Ix-​Xhieda taʼ Jehovah jixtiequ b’qalbhom kollha li jogħġbu lil Alla. Għal din ir-​raġuni, kapitlu 42 tal-​ktieb taʼ Isaija huwa taʼ interess bla qjies għal kull wieħed u waħda minnhom, għax jipprovdi deskrizzjoni ħajja taʼ qaddej approvat minn Jehovah u oħra taʼ qaddej li mhux approvat minnu. Meta nikkunsidraw din il-​profezija u t-​twettiq tagħha ningħataw dehen dwar dak li jwassal għall-​approvazzjoni t’Alla u dak li jwassal għad-​diżapprovazzjoni tiegħu.

“Qegħedt l-​Ispirtu Tiegħi Fuqu”

3. Jehovah x’jipprofetizza permezz taʼ Isaija dwar “il-​qaddej tiegħi”?

³ Permezz taʼ Isaija, Jehovah jipprofetizza l-​miġja taʼ  qaddej li se jkun maħtur minnu: “Araw il-​qaddej tiegħi, li jiena nwieżen, il-​maħtur tiegħi li fih qalbi strieħet! Qegħedt l-​ispirtu tiegħi fuqu, biex iġib il-​ġustizzja lill-​ġnus. Ma jgħajjatx, ma jgħollix leħnu; ma jsemmax leħnu fil-​pjazez, qasba mġelġla ma jiksirhiex, musbieħ inemnem ma jitfihx. Iġib il-​ġustizzja fis-​sewwa. Ma jegħjiex, ma jitfarrakx, sakemm ma jwaqqafx il-​ġustizzja fuq l-​art; u l-​gżejjer imbiegħda jistennew il-​liġi tiegħu.”—Isaija 42:1-4.

4. Min hu l-​“maħtur” li kien imbassar, u dan kif nafuh?

⁴ Min hu l-​Qaddej li jissemma hawnhekk? Ma nitħallewx fl-​għama. Dan il-​kliem insibuh kwotat fl-​Evanġelju taʼ Mattew u japplika għal Ġesù Kristu. (Mattew 12:15-21) Ġesù hu l-​Qaddej maħbub, il-​“maħtur.” Jehovah meta qiegħed l-​ispirtu tiegħu fuq Ġesù? Fis-​sena 29 E.K., fil-​magħmudija taʼ Ġesù. Il-​kitba ispirata tiddeskrivi din il-​magħmudija u tgħid li wara li Ġesù ħareġ mill-​ilma, “is-​smewwiet infetħu, u niżel l-​Ispirtu s-​Santu u deher fuqu fis-​sura taʼ ħamiema. U mis-​sema ġie leħen jgħid: ‘Inti Ibni l-​għażiż: fik sibt l-​għaxqa tiegħi.’” B’dan il-​mod Jehovah nnifsu wera min kien il-​Qaddej maħbub tiegħu. Il-​ministeru taʼ Ġesù wara l-​magħmudija u x-​xogħlijiet mirakolużi li wettaq urew li l-​ispirtu taʼ Jehovah kien tabilħaqq fuqu.—Luqa 3:21, 22; 4:14-21; Mattew 3:16, 17.

“Iġib il-​Ġustizzja lill-​Ġnus”

5. Għala kien meħtieġ li tiġi ċċarata l-​ġustizzja fl-​ewwel seklu E.K.?

⁵ Il-​Maħtur minn Jehovah kellu ‘jġib,’ jew jagħmel tispikka, il-​ġustizzja vera. “Hu jxandar il-​ġustizzja lill-​ġnus.” (Mattew 12:18) Kemm kien meħtieġ dan fl-​ewwel seklu E.K.! Il-​mexxejja reliġjużi Lhud għallmu dwar il-​ġustizzja u t-​tjieba skond il-​ħarsa mgħawġa  tagħhom. Huma fittxew li jiksbu t-​tjieba billi segwew lista taʼ liġijiet ħorox—ħafna minnhom ivvintati minnhom stess. Il-​ġustizzja tagħhom ibbażata fuq il-​liġijiet kienet nieqsa minn kull ħniena u mogħdrija.

6. Ġesù b’liema mod għarrafha l-​ġustizzja vera?

⁶ B’kuntrast, Ġesù rrivela l-​ħarsa t’Alla dwar il-​ġustizzja. B’dak li għallem u bil-​mod kif għex, Ġesù wera li l-​ġustizzja vera taf tagħder u tħenn. Ikkunsidra ftit il-​Priedka famuża tiegħu taʼ fuq il-​Muntanja. (Mattew, kapitli 5-7) Xi spjegazzjoni mill-​aqwa dwar kif għandhom jiġu prattikati l-​ġustizzja u t-​tjieba! Meta naqraw ir-​rakkonti taʼ l-​Evanġelju, ma niġux aħna mqanqlin mill-​mogħdrija li wera Ġesù mal-​foqra u mal-​magħkusin? (Mattew 20:34; Mark 1:41; 6:34; Luqa 7:13) Hu wassal il-​messaġġ tiegħu taʼ faraġ għand ħafna li kienu bħal qasab imġelġel, milwi u jixxejjer ’l hawn u ’l hinn. Huma kienu bħal musbieħ inemnem li se jintefa, bl-​aħħar xrara taʼ ħajjithom kważi mitfija. Ġesù la kisser “qasba mġelġla” u lanqas tefa “musbieħ inemnem.” Minflok, il-​kliem u l-​azzjonijiet tiegħu mimlijin imħabba u mogħdrija qawwew il-​qlub tal-​ġwejdin.—Mattew 11:28-30.

7. Il-​profezija għala setgħet tgħid li Ġesù ma kellux ‘jgħajjat jew jgħolli leħnu fil-​pjazez’?

⁷ Iżda l-​profezija għala tgħid li Ġesù ma kellux ‘jgħajjat, jgħolli leħnu, jew isemmaʼ leħnu fil-​pjazez’? Għaliex ma ftaħarx bih innifsu, bħalma għamlu ħafna fi żmienu. (Mattew 6:5) Meta fejjaq wieħed imġiddem, qallu: “Qis li ma tgħid xejn lil ħadd.” (Mark 1:40-44) Ġesù ma fittixx li jkun magħruf minn kulħadd biex in-​nies jaslu għal konklużjonijiet fuq dak li jisimgħu  mingħand ħaddieħor. Hu riedhom jagħrfu għalihom infushom fuq il-​bażi taʼ evidenza soda li hu kien il-​Kristu, il-​Qaddej midluk taʼ Jehovah.

8. (a) Ġesù kif ġieb il-​“ġustizzja lill-​ġnus”? (b) It-​tixbiha taʼ Ġesù dwar is-​Samaritan li ġieb ruħu taʼ proxxmu x’tgħallimna dwar il-​ġustizzja?

⁸ Il-​Qaddej Maħtur kellu jġib “ġustizzja lill-​ġnus.” Ġesù hekk għamel. Barra li enfasizza li l-​ġustizzja divina taf tagħder, Ġesù għallem ukoll li din għandha tħaddan lin-​nies kollha. Darba minnhom Ġesù fakkar lil raġel għaref fil-​Liġi li għandu jħobb lil Alla u lill-​proxxmu tiegħu. Ir-​raġel staqsa lil Ġesù: “U l-​proxxmu tiegħi min hu?” Forsi hu stenna li Ġesù se jwieġeb: “Min hu Lhudi bħalek.” Imma Ġesù rrakkonta l-​parabbola tas-​Samaritan li ġieb ruħu taʼ proxxmu. Fil-​parabbola wieħed Samaritan għen lil raġel li qabżu fuqu xi ħallelin, waqt li Levita u qassis kienu rrifjutaw li jgħinuh. Dak li għamel il-​mistoqsija kellu jammetti li din id-​darba s-​Samaritan imżeblaħ kien il-​proxxmu, mhux il-​Levita jew il-​qassis. Ġesù temm it-​tixbiha tiegħu billi ta dan il-​parir: “Agħmel hekk int ukoll.”—Luqa 10:25-37; Levitiku 19:18.

“Ma Jegħjiex, Ma Jitfarrakx”

9. Kif se jeffettwana li nifhmu xi tfisser eżatt il-​ġustizzja vera?

⁹ Peress li Ġesù ċċara xi tfisser eżatt il-​ġustizzja vera, id-​dixxipli tiegħu tgħallmu kif juru din il-​kwalità. Hekk ukoll irridu nagħmlu aħna. L-​ewwelnett, irridu naċċettaw il-​livelli t’Alla dwar dak li hu tajjeb u dak li hu ħażin, ladarba hu għandu d-​dritt jiddetermina x’inhu ġust u taʼ tjieba. Hekk kif nistinkaw biex nagħmlu l-​affarijiet  kif irid Jehovah, il-​kondotta retta tagħna se turi b’mod ċar x’inhi l-​ġustizzja vera.—1 Pietru 2:12.

10. Li nuru l-​ġustizzja għala jinkludi li nieħdu sehem fix-​xogħol taʼ l-​ippridkar u tat-​tagħlim?

¹⁰ Il-​ġustizzja vera nuruha wkoll meta nieħdu sehem b’mod ħabrieki fl-​attività taʼ l-​ippridkar u tat-​tagħlim. B’mod ġeneruż, Jehovah pprovda għarfien li jsalva l-​ħajja dwaru nnifsu, dwar Ibnu, u dwar l-​iskopijiet tiegħu. (Ġwann 17:3) Ma tkunx ħaġa tajba jew ġusta li  nżommu dan l-​għarfien għalina biss. “Min ħaqqu l-​ġid tiċħadhulux, meta dan tistaʼ tagħmlu,” jgħid Salamun. (Proverbji 3:27) Ejja b’qalbna kollha naqsmu dak li nafu dwar Alla man-​nies kollha, hu liema hu l-​isfond razzjali, etniku, jew nazzjonali tagħhom.—Atti 10:34, 35.

11. Biex nimitaw lil Ġesù, kif għandna nittrattawhom lill-​oħrajn?

¹¹ Iżjed minn hekk, Kristjan ġenwin jittratta lill-​oħrajn kif għamel Ġesù. Ħafna llum jiffaċċjaw problemi li jaqtgħulhom qalbhom, u għalhekk jeħtieġu l-​mogħdrija u l-​inkuraġġiment. Anki xi Kristjani dedikati jistgħu jħossuhom tant imfarrkin minħabba ċ-​ċirkustanzi li jinsabu fihom li jsiru jixbhu lil qasab imġelġel jew imsiebaħ inemnmu. M’għandniex nagħtuhom l-​għajnuna tagħna? (Luqa 22:32; Atti 11:23) Xi pjaċir li tkun parti minn sħubija taʼ Kristjani veri, li jipprovaw jimitaw lil Ġesù f’li juru l-​ġustizzja!

12. Għala nistgħu nkunu fiduċjużi li l-​ġustizzja għal kulħadd dalwaqt se ssir realtà?

¹² Qatt se jkun hawn ġustizzja għal kulħadd? Iva, se jkun hawn. Il-​Maħtur minn Jehovah ‘ma jegħjiex, ma jitfarrakx, sakemm iwaqqaf il-​ġustizzja fuq l-​art.’ Fi żmien qasir is-​Sultan imqiegħed fuq it-​tron, Kristu Ġesù rxoxtat, se “jħallas lil dawk li ma jagħrfux lil Alla.” (2 Tessalonikin 1:6-9; Apokalissi 16:14-16) Is-​Saltna t’Alla se tieħu post il-​ħakma mill-​bniedem. Il-​ġustizzja u t-​tjieba se jkunu kotrana. (Proverbji 2:21, 22; Isaija 11:3-5; Danjel 2:44; 2 Pietru 3:13) Bi stennija ħerqana, il-​qaddejja taʼ Jehovah kullimkien, saħansitra dawk fil-​“gżejjer” li jinsabu f’postijiet imwarrbin, jistennew dak il-​jum.

‘Jagħmel Minnu Dawl għall-​Ġnus’

13. Jehovah x’jipprofetizza dwar il-​Qaddej Maħtur tiegħu?

¹³ Ikompli Isaija: “Dan jgħid Alla, il-​Mulej, li ħalaq u  firex is-​smewwiet, u l-​medda taʼ l-​art bil-​frott u l-​ħdura tagħha, li jagħti l-​ħajja lill-​poplu li hemm fiha, u r-​ruħ lil dawk li jgħixu fiha.” (Isaija 42:5) X’deskrizzjoni impressjonanti taʼ Jehovah, il-​Ħallieq! Din it-​tfakkira dwar is-​setgħa taʼ Jehovah tenfasizza s-​sinifikat taʼ kliemu. Jgħid Jehovah: “Jien, il-​Mulej, sejjaħtlek fis-​sewwa, qbadtek minn idek u ħaristek, u għamilt minnek patt tal-​poplu, dawl għall-​ġnus, biex int tiftaħ għajnejn l-​għomja, toħroġ lill-​ilsiera mill-​ħabs, u ’l dawk li hemm fid-​dlam minn dar l-​għeluq.”—Isaija 42:6, 7.

14. (a) X’ifisser il-​fatt li Jehovah jaqbad id il-​Qaddej li hu approvat minnu? (b) Il-​Qaddej Maħtur xi rwol għandu?

¹⁴ Il-​Ħallieq Grandjuż taʼ l-​univers, Dak li jagħti u jsostni l-​ħajja, jaqbad id il-​Qaddej Maħtur tiegħu u jwiegħdu appoġġ sħiħ u kontinwu. Kemm jassigurana dan! Barra minn hekk, Jehovah jħarsu sabiex jagħmel minnu “patt tal-​poplu.” Patt huwa kuntratt, ftehim, wegħda solenni. Huwa digriet ċert. Iva, Jehovah għamel lill-​Qaddej tiegħu “rabta mal-​poplu.”—Il-​Bibbja taʼ Karm Żammit.

15, 16. Ġesù b’liema mod qeda bħala “dawl għall-​ġnus”?

¹⁵ Bħala “dawl għall-​ġnus,” il-​Qaddej imwiegħed se jiftaħ “għajnejn l-​għomja” u jeħles lil “dawk li hemm fid-​dlam.” Ġesù għamlu dan. Billi xehed għall-​verità, hu gglorifika isem Missieru tas-​sema. (Ġwann 17:4, 6) Ġesù kixef il-​qerq reliġjuż, ippriedka l-​aħbar tajba tas-​Saltna, u fetaħ il-​bieb tal-​ħelsien spiritwali għal dawk li kienu fil-​jasar reliġjuż. (Mattew 15:3-9; Luqa 4:43; Ġwann 18:37) Hu wissa kontra li wieħed jagħmel xogħlijiet li jappartjenu lid-​dlam u espona  lil Satana bħala “missier il-​gideb” u “l-​Prinċep taʼ din id-​dinja.”—Ġwann 3:19-21; 8:44; 16:11.

¹⁶ Ġesù qal: “Jiena d-​dawl tad-​dinja.” (Ġwann 8:12) Hu wera dan b’mod taʼ l-​għaġeb meta offra l-​ħajja umana u perfetta tiegħu bħala fidwa. B’hekk, hu fetaħ it-​triq biex dawk li juru fidi jkollhom il-​maħfra tad-​dnubiet, relazzjoni approvata m’Alla, u l-​prospett taʼ ħajja eterna. (Mattew 20:28; Ġwann 3:16) Billi baqaʼ devot lejn Alla b’mod perfett matul ħajtu kollha, Ġesù appoġġa s-​sovranità taʼ Jehovah u wera li x-​Xitan hu giddieb.  Ġesù verament li ta d-​dawl lill-​għomja u ħeles lil dawk imjassrin fi dlam spiritwali.

17. B’liema modi naqdu bħala wħud li nġorru d-​dawl?

¹⁷ Fil-​Priedka taʼ fuq il-​Muntanja, Ġesù qal lid-​dixxipli tiegħu: “Intom id-​dawl tad-​dinja.” (Mattew 5:14) Aħna mhux ukoll inġorru d-​dawl? Bil-​mod taʼ kif ngħixu u bix-​xogħol taʼ l-​ippridkar li nagħmlu, aħna għandna l-​privileġġ li niggwidaw lil oħrajn lejn Jehovah, is-​Sors li verament idawwalna. Biex nimitaw lil Ġesù, aħna ngħarrfu isem Jehovah, nappoġġaw is-​sovranità Tiegħu, u nxandru s-​Saltna Tiegħu bħala l-​unika tama għall-​bnedmin. Iżjed minn hekk, bħala wħud li nġorru d-​dawl aħna nikxfu l-​qerq reliġjuż, inwissu kontra xogħlijiet mhux safjin li jappartjenu lid-​dlam, u nesponu lil Satana, il-​wieħed mill-​agħar.—Atti 1:8; 1 Ġwann 5:19.

“Għannu lill-​Mulej Għanja Ġdida”

18. Jehovah x’iġagħalhom ikunu jafu lin-​nies tiegħu?

¹⁸ Issa Jehovah jdawwar l-​attenzjoni lejn il-​poplu tiegħu, billi jgħid: “Jiena l-​Mulej, dan hu ismi; ma nċedi lil ħadd il-​glorja tiegħi; lanqas lill-​idoli t-​tifħir tiegħi. Il-​ġrajjiet li tħabbru qabel, ara, veru seħħu. U jiena nħabbar ħwejjeġ ġodda, u nsemmagħhomlkom qabel ma jinbtu.” (Isaija 42:8, 9) Il-​profezija dwar “il-​qaddej tiegħi” ma tlissnitx minn wieħed mill-​allat li ma jiswew xejn, imma mill-​uniku Alla veru u ħaj. Kienet ħaġa ċerta li se sseħħ, u hekk ġara. Alla Jehovah hu tabilħaqq l-​Awtur t’affarijiet ġodda, u hu jġiegħel li n-​nies tiegħu jkunu jafuhom qabel ma jseħħu. Aħna kif għandna nirreaġixxu?

19, 20. (a) Liema għanja trid titkanta? (b) Min huma dawk li llum qegħdin ikantaw l-​għanja taʼ tifħir lil Jehovah?

¹⁹ Jikteb Isaija: “Għannu lill-​Mulej għanja ġdida; ħa  jitlaʼ minn truf l-​art it-​tifħir tiegħu! Ħa jsebbħuh il-​baħar u kull ma fih, il-​gżejjer u min jgħammar fihom. Jerfaʼ leħnu d-​deżert u l-​ibliet tiegħu, l-​irħula fejn jgħammru wlied Kedar; jgħannulu ferħana dawk li jgħammru f’Sela, jgħajjtu bil-​ferħ fuq qċaċet il-​muntanji. Ħa jagħtu glorja lill-​Mulej u jxandru t-​tifħir tiegħu fil-​gżejjer.”—Isaija 42:10-12.

²⁰ L-​abitanti tal-​bliet, taʼ l-​irħula fid-​deżert, tal-​gżejjer, saħansitra taʼ “Kedar,” jew it-​tined fid-​deżert, f’kelma waħda, in-​nies kullimkien, huma mħeġġin jgħannu għanja taʼ tifħir lil Jehovah. Kemm huwa eċċitanti li fi żmienna miljuni sħaħ wieġbu għal dan l-​appell profetiku! Huma ħaddnu l-​verità tal-​Kelma t’Alla u lil Jehovah għamluh Alla tagħhom. In-​nies taʼ Jehovah qegħdin jgħannu din l-​għanja l-​ġdida, li tagħti glorja lil Jehovah, f’iktar minn 230 pajjiż. Kemm huwa kommoventi li ngħannu f’dan il-​kor taʼ ħafna kulturi, lingwi, u razez!

21. L-​għedewwa tal-​poplu t’Alla għala ma jistax jirnexxilhom isikktu l-​għanja taʼ tifħir lil Jehovah?

²¹ Jistgħu l-​opponenti jiqfulu lil Alla u jsikktu din l-​għanja taʼ tifħir? Impossibbli! “Joħroġ il-​Mulej bħal wieħed qawwi, u jqanqal bħal gwerrier il-​ħeġġa tiegħu; jgħajjat l-​għajta tal-​gwerra, ħa juri kontra l-​għedewwa l-​qawwa tiegħu.” (Isaija 42:13) Liema qawwa tistaʼ tiqaflu lil Jehovah? Xi 3,500 sena ilu, il-​profeta Mosè u wlied Iżrael għannew: “Il-​Mulej gwerrier, Jaħweh ismu! L-​imriekeb tal-​Fargħun u qawwietu tefagħhom fil-​baħar; l-​aħjar fost il-​gwerriera tiegħu f’Baħar il-​Qasab għarraqhom!” (Eżodu 15:3, 4) Jehovah ħareġ rebbieħ fuq il-​qawwa militari l-​iktar setgħana taʼ dak iż-​żmien. Ebda għadu tal-​poplu t’Alla ma jistaʼ jkollu suċċess meta Jehovah joħroġ bħala gwerrier setgħan.

 “Ili Ħafna Żmien Inżomm is-​Skiet”

22, 23. Jehovah għala ‘jżomm is-​skiet għal ħafna żmien’?

²² Jehovah hu rett u ġust, anki meta jesegwixxi l-​ħaqq kontra l-​għedewwa tiegħu. Hu jgħid: “Ili ħafna żmien inżomm is-​skiet, qgħadt bi kwieti u trażżant. Bħal mara fl-​uġigħ tal-​ħlas se ngħajjat, nonfoħ u nilheġ f’nifs wieħed. Il-​muntanji u l-​għoljiet nagħmilhom ħerba, innixxfilhom ħdurithom kollha. Nbiddel ix-​xmajjar f’xagħri, u nnixxef l-​ilma qiegħed.”—Isaija 42:14, 15.

²³ Qabel ma jagħmel ġudizzju, Jehovah jħalli ż-​żmien jgħaddi sabiex lil dawk li jiżbaljaw jagħtihom l-​opportunità li jduru lura mit-​triqat ħżiena tagħhom. (Ġeremija 18:7-10; 2 Pietru 3:9) Ikkunsidra l-​każ tal-​Babiloniżi li, bħala l-​qawwa dinjija dominanti, jagħmlu ħerba lil Ġerusalemm fis-​sena 607 Q.E.K. Jehovah jippermetti dan sabiex jiddixxiplina lill-​Iżraelin minħabba l-​infedeltà tagħhom. Madankollu, il-​Babiloniżi ma jirrikonoxxuhx l-​irwol li jingħataw. Huma jittrattaw lill-​poplu t’Alla ferm iktar bl-​aħrax milli jitlob il-​ħaqq t’Alla. (Isaija 47:6, 7; Żakkarija 1:15) Min jaf kif iħossu l-​veru Alla meta jara lill-​poplu tiegħu jsofri! Imma, bħalma ġie mbassar, hu ma jiħux azzjoni waqt li jissaporti l-​uġigħ bħal mara tgħajjat, tonfoħ, u tilheġ hi u twelled. Fl-​aħħar, jasal iż-​żmien stabbilit minnu biex ‘jagħmel ħerbaʼ u ‘jnixxef’ lil Babilonja. Hu jagħmel dan, billi jibda mis-​sena 539 Q.E.K.

24. Jehovah liema prospett jiftaħ għall-​poplu tiegħu Iżrael?

²⁴ Min jaf kemm iħossuhom se jtiru bil-​ferħ in-​nies t’Alla meta, wara tant u tant snin fl-​eżilju, fl-​aħħar it-​triq lura lejn darhom tinfetħilhom mill-​ġdid! (2 Kronaki 36:22, 23) Żgur se jitgħaxxqu meta jesperjenzaw it-​twettiq tal-​wegħda taʼ Jehovah: “Nmexxi  lill-​għomja fi triq li ma jafuhiex; mogħdijiet li ma jafuhomx inqabbadhom. Id-​dlam inbiddlu f’dawl quddiemhom, it-​triqat mgħawwġa niddrittahom. Dan kollu nagħmlu għalihom, u qatt iżjed ma nabbandunahom.”—Isaija 42:16.

25. (a) Il-​poplu taʼ Jehovah llum dwar liema ħaġa jistaʼ jkun ċert? (b) X’għandha tkun id-​determinazzjoni tagħna?

²⁵ Illum, dan il-​kliem kif japplika? Sewwa, Jehovah issa ilu żmien twil, sekli sħaħ, iħalli lill-​ġnus jagħmlu dak li jogħġobhom. Madankollu, iż-​żmien stabbilit minnu biex jissetilja l-​affarijiet huwa qrib. Fi żmienna hu qajjem poplu biex jagħti xiehda għal ismu. Billi xejjen kull oppożizzjoni li qamet kontrihom, hu wittielhom it-​triq biex iqimuh “fl-​ispirtu u l-​verità.” (Ġwann 4:24) Hu wiegħed: “Qatt iżjed ma nabbandunahom,” u żamm kelmtu. Xi ngħidu għal dawk illi jippersistu li jqimu lill-​allat foloz? Jgħid Jehovah: “Iduru lura kollhom mistħija, dawk kollha li jittamaw fl-​idoli, dawk li jgħidu lix-​xbihat: ‘Intom allatna.’” (Isaija 42:17) Kemm huwa vitali li nibqgħu leali lejn Jehovah, bħalma għamel il-​Maħtur tiegħu!

‘Qaddej li Hu Trux u Agħma’

26, 27. Iżrael kif juri li hu ‘qaddej trux u agħma,’ u b’liema konsegwenzi?

²⁶ Ġesù Kristu, il-​Qaddej Maħtur t’Alla, baqaʼ leali sal-​mewt. Iżda Iżrael, il-​poplu taʼ Jehovah, juri li hu qaddej mhux leali, trux u agħma f’sens spiritwali. Waqt li jindirizzahom, Jehovah jgħid: “Intom torox, isimgħu! Intom għomja, ħarsu u araw! Min hu agħma ħlief il-​qaddej tiegħi? Min hu trux bħall-​messaġġier li bgħatt? Min hu agħma bħall-​maħbub tiegħi? U trux bħall-​qaddej tal-​Mulej? Jara ħafna ħwejjeġ, u ma jagħtix kas; widnejh miftuħa, iżda ma jismax. Għad li għoġob lill-​Mulej bil-​ġustizzja  tiegħu li jkabbar u jsebbaħ il-​liġi tiegħu.”—Isaija 42:18-21.

²⁷ X’falliment tal-​biki hu Iżrael! In-​nies tiegħu jaqgħu ripetutament biex iqimu lill-​allat demoniċi tal-​ġnus. Għal darba wara l-​oħra, Jehovah jibqaʼ jibgħat lill-​messaġġiera tiegħu, imma l-​poplu tiegħu ma jagħtix kas. (2 Kronaki 36:14-16) Isaija jbassar il-​konsegwenzi: “Hu poplu misruq u mneżżaʼ; maqbudin ilkoll fil-​ħofor, magħluqin fil-​ħabsijiet. Ħatfuhom u ħadd ma ħelishom; neżżgħuhom u ħadd ma jgħajjat: Rodd! Min minnkom jagħti widen għal dan, u jaħseb fih u jismaʼ għal li ġej? Min kien li telaq lil Ġakobb biex jisirquh? Min telaq lil Iżrael għall-​priża? M’hux il-​Mulej, għax kontrieh dinbu? Ma ridux jimxu fi triqatu, u l-​liġi tiegħu ma obdewhiex. Għalhekk sawwab fuqu n-​nar tal-​korla tiegħu, u l-​qilla tal-​gwerra, qabdet ħuġġieġa madwaru u ma ndunax; ikkunsmatu, u ma daħħalx f’rasu.”—Isaija 42:22-25.

28. (a) X’nistgħu nitgħallmu mill-​eżempju taʼ l-​abitanti taʼ Ġuda? (b) Kif nistgħu nfittxu l-​approvazzjoni taʼ Jehovah?

²⁸ Minħabba l-​infedeltà taʼ l-​abitanti tiegħu, Jehovah jippermetti li l-​pajjiż taʼ Ġuda jiġi misruq u mneżżaʼ fis-​sena 607 Q.E.K. Il-​Babiloniżi jaħarqu t-​tempju taʼ Jehovah, jagħmlu ħerba lil Ġerusalemm, u jieħdu lil-​Lhud fil-​jasar. (2 Kronaki 36:17-21) Jalla ndaħħlu f’qalbna dan l-​eżempju taʼ twissija u qatt ma nsoddu widnejna għall-​istruzzjonijiet taʼ Jehovah jew nagħlqu għajnejna għall-​Kelma miktuba tiegħu. Minflok, jalla nfittxu l-​approvazzjoni taʼ Jehovah billi nimitaw lil Kristu Ġesù, il-​Qaddej approvat minn Jehovah nnifsu. Bħal Ġesù, jalla nagħmluha magħrufa l-​ġustizzja vera b’dak li ngħidu u nagħmlu. B’dan il-​mod, se nibqgħu fost il-​poplu taʼ Jehovah, billi naqdu bħala wħud li nġorru d-​dawl u li nfaħħru lill-​veru Alla u nagħtuh glorja.

[Mistoqsijiet taʼ Studju]

 [Stampi f’paġna 33]

Il-​ġustizzja vera taf tagħder u tħenn

 [Stampa f’paġna 34]

Fil-​parabbola tas-​Samaritan li ġieb ruħu taʼ proxxmu, Ġesù wera li l-​ġustizzja vera tħaddan lin-​nies kollha

[Stampi f’paġna 36]

Billi ninkuraġġixxu lill-​oħrajn u nuruhom qalb tajba, aħna nuru ġustizzja divina

 [Stampi f’paġna 39]

Permezz taʼ l-​ippridkar tagħna, aħna nuru ġustizzja divina

[Stampa f’paġna 40]

Il-​Qaddej approvat ngħata bħala “dawl għall-​ġnus”