Kapitlu Erbgħa

“Intom ix-​Xhieda Tiegħi”!

Isaija 43:1-28

1. Jehovah kif jużaha l-​profezija, u n-​nies tiegħu kif għandhom iwieġbu għall-​profezija mwettqa?

 L-​ABBILTÀ li jbassar il-​futur hija waħda mill-​affarijiet li jiddistingwu lill-​veru Alla mill-​allat foloz kollha. Imma meta Jehovah jipprofetizza, f’moħħu ma jkollux biss li jagħti prova tad-​Divinità tiegħu. Bħalma jintwera f’Isaija kapitlu 43, permezz tal-​profezija Jehovah jagħti prova kemm tad-​Divinità tiegħu kif ukoll taʼ l-​imħabba tiegħu għall-​poplu f’patt miegħu. Mill-​banda l-​oħra, dawn in-​nies m’għandhomx jaraw it-​twettiq tal-​profezija u jibqgħu ħalqhom magħluq; huma għandhom jagħtu xiehda dwar dak li jkunu raw. Iva, għandhom ikunu xhieda taʼ Jehovah!

2. (a) X’inhi l-​kundizzjoni spiritwali taʼ Iżrael fi żmien Isaija? (b) Jehovah kif jiftaħ għajnejn in-​nies tiegħu?

² Jiddispjaċina ngħidu li, fi żmien Isaija, Iżrael jinsab fi stat tant tal-​biki li Jehovah jikkunsidra lin-​nies bħala li huma inkapaċitati spiritwalment. “Oħroġ il-​poplu agħma, għalkemm għandu għajnejh, u trux, għalkemm għandu widnejh.” (Isaija 43:8) Nies li huma għomja u torox spiritwalment kif jistgħu jaqdu lil Jehovah bħala x-​xhieda ħajjin tiegħu? Hemm biss mod wieħed. Iridu jinfetħulhom għajnejhom u widnejhom b’mod mirakoluż. U Jehovah hekk jagħmel, jiftaħhomlhom! Kif? L-​ewwel, Jehovah jiddixxiplinahom b’mod aħrax—l-​abitanti tas-​saltna taʼ Iżrael fit-​tramuntana jmorru fl-​eżilju fis-​sena 740 Q.E.K., u dawk taʼ Ġuda, fis-​sena 607 Q.E.K. Imbagħad,  Jehovah juża l-​qawwa tiegħu għan-​nom tal-​poplu tiegħu billi jeħilsu mill-​jasar. Fis-​sena 537 Q.E.K. hu jġib lura lejn art twelidu fdal niedem u mogħti l-​ħajja mill-​ġdid spiritwalment. Fil-​fatt, Jehovah hu tant fiduċjuż li l-​iskop tiegħu f’dan ir-​rigward ma jistax jiġi mfixkel li, xi 200 sena bil-​quddiem, hu jitkellem dwar il-​ħelsien taʼ Iżrael bħallikieku diġà seħħ.

3. Jehovah kif jinkuraġġihom lil dawk li se jiġu eżiljati?

³ “Dan jgħid il-​Mulej, dak li ħalqek, Ġakobb, dak li sawwrek, Iżrael: ‘La tibżax, għax jien fdejtek: jien sejjaħtlek b’ismek; inti tiegħi. Anki jekk tgħaddi mill-​ilma, jiena miegħek; jekk taqsam ix-​xmajjar, ma jgħerrqukx. Anki jekk tgħaddi min-​nar, ma tinħaraqx, u l-​fjamma ma tibelgħekx. Għax jiena l-​Mulej, Alla tiegħek, il-​Qaddis taʼ Iżrael, is-​Salvatur tiegħek.’”—Isaija 43:1-3a.

4. Kif inhu li Jehovah hu l-​Ħallieq taʼ Iżrael, u lin-​nies tiegħu x’assigurazzjoni jagħtihom rigward ir-​ritorn tagħhom lejn art twelidhom?

⁴ Jehovah għandu interess speċjali f’Iżrael għaliex il-​ġens huwa tiegħu. Huwa l-​ħolqien persunali tiegħu bi twettiq tal-​patt li għamel m’Abraham. (Ġenesi 12:1-4a) B’hekk, Salm 100:3 jgħid: “Kunu afu li Jaħweh hu Alla, hu ħalaqna, u aħna tiegħu, aħna l-​poplu tiegħu u n-​nagħaġ tal-​mergħa tiegħu.” Bħala l-​Ħallieq taʼ Iżrael u Dak li xtrah lura, Jehovah se jġib lin-​nies tiegħu qawwijin u sħaħ lura lejn art twelidhom. Diffikultajiet li jistgħu jiltaqgħu magħhom, bħalma huma l-​ilmijiet, xmajjar li jfuru, u deżerti li jaqbdu, m’humiex se jfixkluhom jew jagħmlulhom ħsara, sewwa sew bħalma affarijiet simili ma waqqfux lil missirijiethom tal-​qedem meta kienu fi triqithom lejn l-​Art Imwiegħda elf sena qabel.

5. (a) Kliem Jehovah kif ifarraġ lil Iżrael spiritwali? (b) Min huma sħab Iżrael spiritwali, u dawn minn min kienu ffigurati bil-​quddiem?

⁵ Illum, kliem Jehovah jfarraġ ukoll lill-​fdal taʼ Iżrael  spiritwali, li l-​membri tiegħu huma “ħolqien ġdid” imnissel mill-​ispirtu. (2 Korintin 5:17) Billi ppreżentaw ruħhom bi qlubija quddiem l-​“ilma” taʼ l-​umanità, huma gawdew il-​protezzjoni kollha mħabba t’Alla meta għaddew minn għargħar figurattiv. In-​nar li ħareġ mingħand l-​għedewwa tagħhom m’għamlilhomx ħsara imma, pjuttost, serva biex jirfinahom. (Żakkarija 13:9; Apokalissi 12:15-17) Jehovah tefaʼ wkoll il-​ħarsien tiegħu fuq il-​“kotra kbira” taʼ “nagħaġ oħra,” li ssieħbu mal-​ġens spiritwali t’Alla. (Apokalissi 7:9; Ġwann 10:16) Dawn kienu ffigurati bil-​quddiem mill-​“kotra kbira taʼ nies” li ħarġu mill-​Eġittu flimkien maʼ l-​Iżraelin, kif ukoll minn dawk li ma kinux Lhud u li rritornaw maʼ l-​eżiljati meħlusin mill-​jasar f’Babilonja.—Eżodu 12:38; Esdra 2:1, 43, 55, 58.

6. Jehovah kif juri li hu Alla taʼ ġustizzja rigward il-​prezz tal-​fidwa għal (a) Iżrael tal-​laħam? (b) Iżrael spiritwali?

 ⁶ Jehovah jwiegħed li jeħles lill-​poplu tiegħu minn Babilonja permezz taʼ l-​eżerċti tal-​Medja u l-​Persja. (Isaija 13:17-19; 21:2, 9; 44:28; Danjel 5:28) Bħala Alla taʼ ġustizzja, lill-​“qaddejja” Medo-Persjani tiegħu, Jehovah se jagħtihom fidwa xierqa bi tpartit maʼ Iżrael. “Rħejt l-​Eġittu b’rikatt [“fidwa,” “Saydon”] għalik, ’il Kus [“Etjopja,” “KŻ”] u ’l Saba minn flokok. Għax int kont għażiż f’għajnejja, kollok ġieħ u jien ħabbejtek. Jien irħejt bnedmin minn flokok, u popli sħaħ partatt maʼ ħajtek.” (Isaija 43:3b, 4) L-​istorja tikkonferma li l-​Imperu Persjan fil-​fatt ikkonkwista l-​Eġittu, l-​Etjopja, u lil Saba fil-​viċin, sewwa sew bħalma bassar Alla. (Proverbji 21:18) Bl-​istess mod, fl-​1919  Jehovah ħeles mill-​jasar lill-​fdal taʼ Iżrael spiritwali permezz taʼ Ġesù Kristu. Madankollu, għas-​servizzi tiegħu, Ġesù ma ried ebda premju. Ma kienx xi ħakkiem pagan. U kien qed jeħles lil ħutu spiritwali. Minbarra dan, fl-​1914, Jehovah kien diġà tah ‘ġnus b’wirtu, u truf l-​art bi priża tiegħu.’—Salm 2:8.

7. Jehovah kif iħossu lejn il-​poplu tiegħu, kemm fl-​antik kif ukoll fi żmienna?

⁷ Innota kif Jehovah jesprimi bla tlaqliq is-​sentimenti teneri tiegħu lejn l-​eżiljati li xtara lura, billi jgħidilhom li huma ‘għeżież’ u ‘kollhom ġieħ’ għalih u li hu ‘jħobbhom.’ (Ġeremija 31:3) Hu għandu l-​istess sentimenti—u saħansitra iktar—għall-​qaddejja leali tiegħu llum. Il-​Kristjani midlukin iddaħħlu f’relazzjoni m’Alla, mhux mit-​twelid, imma permezz tal-​ħidma taʼ l-​ispirtu qaddis t’Alla wara li ddedikaw ruħhom lill-​Ħallieq tagħhom. Lil dawn, Jehovah ġibidhom lejh u lejn Ibnu filwaqt li kiteb il-​liġijiet u l-​prinċipji tiegħu fi qlubhom, li kienu lesti li jaċċettawhom.—Ġeremija 31:31-34; Ġwann 6:44.

8. Jehovah b’liema mod iqawwi qalb l-​eżiljati, u kif se jħossuhom huma dwar il-​ħelsien tagħhom?

⁸ Waqt li jerġaʼ jkompli jqawwi qalb l-​eżiljati, Jehovah jżid: “La tibżax għax jien miegħek; mil-​lvant inġib lil uliedek, mill-​punent jien niġemgħek. Ngħid lit-​tramuntana: Agħtihomli, u lin-​nofsinhar: La żżommhomlix! Ġibli s-​subjien mill-​bogħod, ’il bnieti minn tarf l-​art, lil kull min jissejjaħ b’ismi, lil min ħlaqt għall-​glorja tiegħi, lil min sawwart u għamilt.” (Isaija 43:5-7) Jehovah se jilħaq anki l-​iktar partijiet imbiegħda taʼ l-​art meta jasal iż-​żmien biex jeħles lil uliedu subien u bniet u jġibhom lura lejn il-​maħbuba art twelidhom. (Ġeremija 30:10, 11) Bla dubju, f’għajnejhom dan il-​ħelsien se jkun ferm akbar minn dak taʼ qabel meta l-​ġens ġie meħlus mill-​Eġittu.—Ġeremija 16:14, 15.

9. Jehovah b’liema żewġ modi jorbot l-​atti tiegħu taʼ ħelsien maʼ ismu?

 ⁹ Jehovah jikkonferma l-​wegħda tiegħu li jeħles lil Iżrael billi jfakkar lin-​nies tiegħu li huma qegħdin jissejħu b’ismu. (Isaija 54:5, 6) Iżjed minn hekk, Jehovah jorbot ismu mal-​wegħdi tiegħu taʼ ħelsien. Billi jagħmel hekk, jassigura ruħu li jkun hu li jirċievi l-​glorja meta titwettaq il-​kelma profetika tiegħu. Lanqas saħansitra l-​konkwistatur taʼ Babilonja ma se jkun intitolat għall-​unur li jistħoqq lill-​uniku Alla ħaj.

L-​Allat Mgħoddijin Ġuri

10. Jehovah liema sfida jpoġġi quddiem il-​ġnus u l-​allat tagħhom?

¹⁰ Jehovah issa jagħmel il-​wegħda tiegħu li jeħles lil Iżrael bħala l-​bażi għal każ fil-​qorti universali li fih jgħaddi ġuri lill-​allat tal-​ġnus. Naqraw: “Ħa jinġemgħu l-​ġnus ilkoll flimkien, ħa jiltaqgħu l-​popli. Min [mill-allat tagħhom] jistaʼ jħabbar dan, u jsemmgħalna l-​ġrajja taʼ l-​imgħoddi? [L-allat tagħhom] ħa jġibu x-​xhieda u jippruvaw u n-​nies jisimgħuhom u jgħidu: Hekk hu!” (Isaija 43:9) Jehovah jpoġġi sfida iebsa quddiem il-​ġnus tad-​dinja. Fi kliem ieħor, hu qisu qed jgħid: ‘Ħa jagħtu prova l-​allat tagħkom li huma allat billi jbassru l-​futur bl-​eżatt.’ Billi huwa biss il-​veru Alla li jistaʼ jipprofetizza mingħajr ma jiżbalja, din il-​prova se tikxef lill-​imposturi kollha. (Isaija 48:5) Imma Dak li jistaʼ kollox iżid jerġaʼ ħtieġa legali oħra: Dawk kollha li jsostnu li huma allat veri jridu jġibu x-​xhieda, kemm għat-​tbassir tagħhom u kemm għat-​twettiq tiegħu. Naturalment, Jehovah ma jeskludix lilu nnifsu minn din il-​ħtieġa legali.

11. Jehovah liema inkarigu jagħtih lill-​qaddej tiegħu, u Jehovah x’jirrivela dwar id-​Divinità tiegħu?

¹¹ Billi huma bla saħħa, l-​allat foloz ma jistgħux iġibu xhieda. Għaldaqstant, b’mistħija għalihom, il-​pedana  tax-​xhieda tibqaʼ vojta. Imma issa jasal il-​waqt biex Jehovah jikkonferma d-​Divinità tiegħu. Waqt li jħares lejn in-​nies tiegħu, hu jgħid: “Intom ix-​xhieda tiegħi . . . u l-​qaddej tiegħi li jiena ħtart, biex tagħrfuni u temmnuni u tifhmu li jiena hu. Qabli qatt ma ssawwar xi alla, u lanqas warajja qatt ma jkun hemm. Jiena, jiena l-​Mulej, u ħliefi m’hemmx salvatur. Jiena ħabbart u jien salvajt. Jien semmajt, u fostkom alla barrani ma kienx hemm. Intom ix-​xhieda tiegħi. . . . Jiena Alla, sa minn dejjem jien hu. M’hemm ħadd li jeħles minn taħt idejja; min jistaʼ jraġġaʼ lura li nagħmel jien?”—Isaija 43:10-13.

12, 13. (a) In-​nies taʼ Jehovah liema xiehda abbundanti għandhom x’jippreżentaw? (b) Isem Jehovah kif sar magħruf maʼ kullimkien fi żmienna?

¹² B’rispons għall-​kliem taʼ Jehovah, il-​pedana tax-​xhieda malajr issir miżgħuda b’kotra ferriħija taʼ xhieda. L-​istqarrija tagħhom hija ċara u soda. Bħal Ġożwè, huma jixhdu li ‘kulma qal Jehovah seħħ. Anqas kelma waħda ma marret fix-​xejn.’ (Ġożwè 23:14) In-​nies taʼ Jehovah għad għandhom jidwi f’widnejhom il-​kliem taʼ Isaija, Ġeremija, Eżekjel, u profeti oħrajn li, qisu b’vuċi waħda, bassru l-​eżilju taʼ Ġuda u l-​ħelsien mirakoluż tagħha mill-​eżilju. (Ġeremija 25:11, 12) Ċiru, il-​ħellies taʼ Ġuda, issemma b’ismu ferm qabel ma kien saħansitra twieled!—Isaija 44:26–45:1.

¹³ Meta tqis din ir-​ruxxmata taʼ evidenza, min jistaʼ jiċħad li Jehovah hu l-​uniku Alla veru? Kuntrarju għall-​allat pagani, Jehovah biss ma ġiex maħluq; hu biss il-​veru Alla. a B’riżultat taʼ dan, in-​nies li jġorru isem Jehovah għandhom il-​privileġġ uniku u eċċitanti li jirrakkontaw l-​għemejjel taʼ l-​għaġeb tiegħu lil ġenerazzjonijiet taʼ warajhom u lil oħrajn li jistaqsu dwaru. (Salm 78:5-7) B’mod  simili, ix-​Xhieda taʼ Jehovah fi żmienna għandhom il-​privileġġ li jxandru isem Jehovah fl-​art kollha. Għall-​ħabta taʼ l-​1920 l-​Istudenti tal-​Bibbja saru iżjed konxji taʼ kemm għandu tifsir profond l-​isem t’Alla, Jehovah. Imbagħad, fis-​26 taʼ Lulju, 1931, f’konvenzjoni li saret f’Columbus, Ohio, il-​president tas-​Soċjetà, Joseph F. Rutherford, ippreżenta riżoluzzjoni intitolata “Isem Ġdid.” Il-​kliem, “Aħna nixtiequ li nkunu magħrufin u msejħin bl-​isem, jiġifieri, xhieda taʼ Jehovah,” qanqal lil dawk li attendew il-​konvenzjoni, u dawn approvaw ir-​riżoluzzjoni b’għajta tidwi taʼ “Iva!” Minn dak in-​nhar ’l hawn, isem Jehovah kiseb prominenza mad-​dinja kollha.—Salm 83:19 [83:18, NW].

14. Jehovah dwar xiex ifakkarhom lill-​Iżraelin, u din it-​tfakkira għala hi f’waqtha?

¹⁴ Jehovah jgħożżhom lil dawk li jġorru ismu b’mod onorabbli, billi jħares lejhom “bħall-​mimmi taʼ għajnejh.” Hu jfakkar lill-​Iżraelin dwar dan, billi jgħidilhom kif ħelishom mill-​Eġittu u għaddiehom qawwijin u sħaħ minn ġod-​deżert. (Dewteronomju 32:10, 12) F’dak iż-​żmien ma kien hemm ebda alla barrani fosthom, għax huma raw b’għajnejhom stess kif ġew umiljati għalkollox l-​allat kollha taʼ l-​Eġittu. Iva, l-​allat kollha kemm huma taʼ l-​Eġittu la setgħu jipproteġu lill-​Eġittu lanqas iżommu lil Iżrael milli jitlaq. (Eżodu 12:12) Bl-​istess mod, is-​setgħana Babilonja, li fiha hemm minn taʼ l-​inqas 50 tempju dedikat lil allat foloz, mhux se jkollha l-​ħila żżommlu idu lil Dak li jistaʼ kollox meta jeħles lin-​nies tiegħu. Jidher ċar li “m’hemmx salvatur” ħlief Jehovah.

Żwiemel tal-​Gwerra Jaqgħu, Ħabsijiet Jinfetħu

15. Jehovah x’jipprofetizza dwar Babilonja?

¹⁵ “Dan jgħid il-​Mulej, il-​feddej tiegħek, il-​Qaddis taʼ Iżrael: ‘Minħabba fikom nibgħat f’Babilonja u nniżżel l-​iżbarri kollha, u l-​Kaldin jixhru fuq l-​iġfien. Jiena, il-​Mulej,  il-​Qaddis tagħkom, il-​ħallieq taʼ Iżrael, is-​sultan tagħkom.’ Dan jgħid il-​Mulej, li fetaħ triq fil-​baħar, mogħdija fl-​ilmijiet qawwija; dak li ħareġ karrijiet u żwiemel, eżerċti u rġiel qalbiena f’daqqa; nxteħtu fl-​art, biex aktar ma qamux; nħlew bħal ftila, u ntfew.”—Isaija 43:14-17.

16. X’se jiġrilhom Babilonja, il-​merkanti Kaldin, u dawk kollha li jipprovaw jiddefendu lil Babilonja?

¹⁶ Għall-​eżiljati, Babilonja hija bħal ħabs għaliex ma tħallihomx jirritornaw lejn Ġerusalemm. Imma d-​difiżi taʼ Babilonja m’humiex se jwaqqfu lil Dak li jistaʼ kollox, Dak li snin qabel “fetaħ triq fil-​baħar [l-Aħmar], mogħdija fl-​ilmijiet qawwija,” milli jidher tal-​Ġordan. (Eżodu 14:16; Ġożwè 3:13) B’mod simili, Ċiru, ir-​rappreżentant taʼ Jehovah, se jbaxxi l-​ilmijiet tax-​xmara setgħana Ewfrat, u b’hekk il-​gwerriera tiegħu jkunu jistgħu jidħlu fil-​belt. Il-​merkanti Kaldin li jivvjaġġaw ’il fuq u ’l isfel fil-​kanali—toroq fil-​baħar għal eluf taʼ xwieni kummerċjali u għal braken li jġorru l-​allat taʼ Babilonja—se jnewħu bin-​niket meta taqaʼ l-​belt kapitali u setgħana tagħhom. Il-​karrijiet veloċi taʼ Babilonja ma se jiswew għalxejn, bħalma ma swew għalxejn il-​karrijiet tal-​Fargħun fil-​Baħar l-​Aħmar. M’humiex se jsalvawha. Daqskemm huwa faċli li wieħed jitfi l-​ftila taʼ musbieħ taż-​żejt, daqshekk ieħor se jkun faċli li jintemmu l-​ħajjiet taʼ dawk li jipprovaw jiddefenduha.

Jehovah Jwassal lin-​Nies Tiegħu f’Arthom Qawwijin u Sħaħ

17, 18. (a) Jehovah liema ħaġa “ġdida” jipprofetizza? (b) In-​nies b’liema mod m’għandhomx jiftakru dak li ġara qabel, u għala?

¹⁷ Waqt li jqabbel l-​atti taʼ ħelsien tiegħu li wettaq snin qabel maʼ dak li wasal biex jagħmel issa, Jehovah jgħid: “La tiftakrux iżjed fi ġrajjiet l-​imgħoddi; la taħsbux fuq dak li ġara qabel. Arawni, sejjer nagħmel ħaġa ġdida: feġġet issa; għadkom ma ttendejtux? Se niftaħ triq fix-​xagħri,  xmajjar fid-​deżert. Ifaħħruni l-​bhejjem selvaġġi, ix-​xakalli u wlied in-​ngħam, għax noħroġ l-​ilma fix-​xagħri, xmajjar fid-​deżert, biex nisqi l-​poplu tiegħi, il-​maħtur tiegħi, il-​poplu li sawwart għalija, biex ixandar it-​tifħir tiegħi.”—Isaija 43:18-21.

¹⁸ Meta jgħid, “taħsbux fuq dak li ġara qabel,” Jehovah mhux qed jissuġġerixxi li l-​qaddejja tiegħu jinsew l-​atti tiegħu taʼ salvazzjoni li għaddew. Fil-​fatt, ħafna minn dawn l-​atti huma parti mill-​istorja taʼ Iżrael ispirata b’mod divin, u Jehovah kkmanda li l-​ħruġ mill-​Eġittu jitfakkar kull sena fiċ-​ċelebrazzjoni tal-​Qbiż. (Levitiku 23:5; Dewteronomju 16:1-4) Madankollu, Jehovah issa jrid li n-​nies tiegħu jigglorifikawh fuq il-​bażi taʼ xi “ħaġa ġdida”—xi ħaġa li se jesperjenzawha direttament. Dan ma jinkludix biss il-​ħelsien tagħhom mill-​jasar taʼ Babilonja imma wkoll il-​vjaġġ mirakoluż tagħhom lejn arthom, forsi mit-​triq iktar diretta tad-​deżert. F’din l-​art moxa, Jehovah se jiftħilhom “triq” u se jwettaq affarijiet setgħana li jfakkruhom f’dak li għamel għall-​Iżraelin fi żmien Mosè—tabilħaqq, hu se jitmaʼ fid-​deżert lil dawk li sejrin lura u jaqtgħalhom l-​għatx bi xmajjar reali. Tant se jkunu kotrana l-​provvisti taʼ Jehovah li saħansitra l-​bhejjem salvaġġi se jigglorifikaw lil Alla u m’humiex se jattakkaw lin-​nies.

19. Il-​fdal taʼ Iżrael spiritwali u sħabhom kif jimxu fit-​“Triq il-​Qaddisa”?

¹⁹ B’mod simili, fl-​1919 il-​membri tal-​fdal taʼ Iżrael spiritwali ġew meħlusin mill-​jasar taʼ Babilonja, u rħewlha għal għonq it-​triq li kienet tħejjiet għalihom minn Jehovah, “it-​Triq il-​Qaddisa.” (Isaija 35:8) Kuntrarju għall-​Iżraelin, huma ma kellhomx għalfejn jgħaddu minn ġo deżert jikwi biex imorru minn post għall-​ieħor, u l-​vjaġġ tagħhom ma spiċċax wara ftit xhur b’wasla f’Ġerusalemm. Madankollu, “it-​Triq il-​Qaddisa”  fil-​fatt daħħlet lill-​membri tal-​fdal taʼ Kristjani midlukin f’ġenna spiritwali. Fil-​każ tagħhom, huma jibqgħu f’din “it-​Triq il-​Qaddisa,” ladarba għad iridu jivvjaġġaw biex jgħaddu minn din is-​sistema dinjija. Sakemm jibqgħu fil-​mogħdija—sakemm josservaw il-​livelli t’Alla f’dik li hi ndafa u qdusija—huma jibqgħu fil-​ġenna spiritwali. U x’ferħ għalihom li tissieħeb magħhom kotra kbira taʼ ħbieb “mhux Iżraelin”! B’kuntrast qawwi maʼ dawk li jittamaw fis-​sistema taʼ Satana, kemm il-​fdal kif ukoll sħabhom ikomplu jgawdu mejda taʼ ikel spiritwali bnin minn id Jehovah. (Isaija 25:6; 65:13, 14) Billi indunaw li l-​barka taʼ Jehovah qiegħda fuq il-​poplu tiegħu, ħafna li kienu jixbhu lill-​bhejjem bidlu ħajjithom u gglorifikaw lill-​veru Alla.—Isaija 11:6-9.

Jehovah Juri li Hu Mweġġaʼ

20. Iżrael taʼ żmien Isaija kif naqas lil Jehovah?

²⁰ Fil-​qedem, il-​fdal taʼ Iżrael mifdi mill-​jasar hu poplu mibdul meta jitqabbel mal-​ġenerazzjoni mill-​agħar taʼ Isaija. Dwar dawn taʼ l-​aħħar, Jehovah jgħid: “B’danakollu, int, Ġakobb, ma sejjaħtlix, għax int xbajt minni, O Iżrael! Ma ġibtlix in-​nagħaġ tiegħek għas-​sagrifiċċju tal-​ħruq, u ma weġġaħtnix bis-​sagrifiċċji tiegħek. Jien ma għabbejtekx bl-​offerti, lanqas fnejtek bl-​inċens. Ma xtrajtlix bi flusek qasab bil-​fwieħa, lanqas xebbajtni bix-​xaħam tal-​vittmi. Imma għabbejtni bi dnubietek, fnejtni bi ħżunitek.”—Isaija 43:22-24.

21, 22. (a) Għala jistaʼ jingħad li l-​ħtiġijiet taʼ Jehovah m’humiex taʼ piż? (b) In-​nies, fil-​fatt, kif iġagħlu lil Jehovah jaqdihom?

²¹ Meta jgħid, “Jien ma għabbejtekx bl-​offerti, lanqas fnejtek bl-​inċens,” Jehovah mhux qed jissuġġerixxi li s-​sagrifiċċji u l-​inċens m’humiex meħtiġin. Tabilħaqq, dawn huma parti integrali mill-​qima vera taħt il-​patt tal-​Liġi. L-​istess jistaʼ jingħad dwar il-​“qasab,” li jirreferi għal  ħaxixa aromatika tfuħ, wieħed mill-​ingredjenti li kien fih iż-​żejt qaddis tad-​dlik. L-​Iżraelin kienu qed jonqsu li jużawhom dawn l-​affarijiet fis-​servizz tat-​tempju. Imma huma taʼ piż dawn il-​ħtiġijiet? Dażgur li m’humiex! Il-​ħtiġijiet taʼ Jehovah huma ħfief meta tqabbilhom maʼ dawk taʼ l-​allat foloz. Per eżempju, l-​alla falz Molek esiġa l-​issagrifikar tat-​tfal—xi ħaġa li Jehovah qatt ma riedha!—Dewteronomju 30:11; Mikea 6:3, 4, 8.

²² O li kieku l-​Iżraelin kellhom dehen spiritwali, kieku qatt ma kienu se ‘jixbgħu minn Jehovah’! Billi jħarsu fil-​Liġi tiegħu, kienu se jaraw l-​imħabba profonda tiegħu għalihom u bil-​ferħ joffrulu x-​“xaħam,” l-​aqwa parti mis-​sagrifiċċji tagħhom. Minflok, bir-​regħba huma jżommu x-​xaħam għalihom infushom. (Levitiku 3:9-11, 16) Kemm inikktuh lil Jehovah n-​nies taʼ dan il-​ġens mill-​agħar bil-​piż taʼ dnubiethom—fil-​fatt, iġagħluh jaqdihom!—Neħemija 9:28-30.

Id-​Dixxiplina Taħsad il-​Frott

23. (a) Għala hija mistħoqqa sew id-​dixxiplina taʼ Jehovah? (b) X’hemm involut fid-​dixxiplina li Alla jagħti lil Iżrael?

²³ Għalkemm id-​dixxiplina taʼ Jehovah hija ħarxa, u bix-​xieraq, din tikseb ir-​riżultati mixtiqin, u b’hekk il-​ħniena ssir possibbli. “Jien, jien hu, li nħassar dnubietek minħabba fija, u li ħtijietek iżjed ma niftakarhomx. Fakkarni, ħa nitħaddtuha; tkellem int u uri s-​sewwa tiegħek. L-​ewwel ma dineb missierek; u l-​medjaturi tiegħek ixxewwxu għalija. Għalhekk jien kasbart il-​prinċpijiet tas-​santwarju, u rħejt għall-​qerda lil Ġakobb, lil Iżrael għat-​tagħjir.” (Isaija 43:25-28) Iżrael, bħall-​ġnus kollha tad-​dinja, huwa dixxendent taʼ Adam, “l-​ewwel” bniedem. Għaldaqstant, ebda Iżraeli ma jistaʼ jagħti prova li hu fis-​“sewwa.”  Saħansitra l-​“medjaturi”—l-​għalliema, jew dawk li jinterpretaw il-​Liġi f’Iżrael—dinbu kontra Jehovah u għallmu l-​gideb. Mill-​banda l-​oħra, Jehovah se jerħi l-​ġens tiegħu kollu kemm hu “għall-​qerda” u “għat-​tagħjir.” Hu se jkasbar ukoll lil dawk kollha li qegħdin imexxu l-​funzjonijiet fis-​“santwarju,” jew il-​post qaddis, tiegħu.

24. Jehovah għal liema raġuni ewlenija jaħfrilhom lin-​nies tiegħu, kemm fil-​qedem u kemm fi żmienna, u madankollu kif iħossu lejhom?

²⁴ Iżda, innota li l-​ħniena divina li tintwera ma tiġix sempliċement minħabba li Iżrael jisgħobbih; din tintwera minħabba Jehovah nnifsu. Iva, ismu hu involut. Kieku kellu jħalli lil Iżrael f’eżilju għal dejjem, ismu stess kien se jitkasbar minn dawk li jaraw x’qed jiġri. (Salm 79:9; Eżekjel 20:8-10) Bl-​istess mod illum, is-​salvazzjoni tal-​bnedmin hija marbuta mat-​taqdis taʼ isem Jehovah u l-​ivvindikar tas-​sovranità tiegħu. Minkejja dan, Jehovah jħobbhom lil dawk li jaċċettaw id-​dixxiplina tiegħu mingħajr tlaqliq u li jqimuh bl-​ispirtu u l-​verità. Hu juri mħabbtu lejn dawn—kemm jekk huma midlukin kif ukoll min-​nagħaġ oħra—billi jħassrilhom dnubiethom fuq il-​bażi tas-​sagrifiċċju taʼ Ġesù Kristu.—Ġwann 3:16; 4:23, 24.

25. Jehovah liema affarijiet li jqanqlu l-​biżaʼ se jwettaq fil-​futur qarib, u aħna kif nistgħu nuru l-​apprezzament tagħna issa?

²⁵ Barra minn hekk, Jehovah dalwaqt se juri mħabbtu lejn kotra kbira t’adoraturi leali tiegħu meta jagħmel xi ħaġa ġdida għan-​nom tagħhom billi jgħaddihom qawwijin u sħaħ “mit-​taħbit il-​kbir” għal ġo “art ġdida” mnaddfa. (Apokalissi 7:14; 2 Pietru 3:13) Dawn se jaraw b’għajnejhom l-​akbar turija tal-​qawwa taʼ Jehovah li qatt raw il-​bnedmin. Billi jafu li din il-​ġrajja se titwettaq żgur, il-​fdal midluk u dawk kollha li se jifformaw il-​kotra kbira jħossuhom henjin u jgħixu kull ġurnata fi qbil maʼ dan l-​inkarigu sublimi: “Intom ix-​xhieda tiegħi”!—Isaija 43:10.

[Nota taʼ taħt]

[Mistoqsijiet taʼ Studju]

[Stampa f’paġna 48, 49]

Jehovah se jgħin lil-​Lhud huma u sejrin lejn darhom f’Ġerusalemm

 [Stampi f’paġna 52]

Jehovah jisfida lill-​ġnus biex jipproduċu xhieda għall-​allat tagħhom

1. Statwa tal-​bronż taʼ Bagħal  2. Figurini tat-​tafal taʼ Għastoret  3. Trinità Eġizzjana taʼ Ħorus, Osiris, u Isis  4. L-​allat Griegi Atena (xellug) u Afrodite

 [Stampa f’paġna 58]

“Intom ix-​xhieda tiegħi.”—Isaija 43:10