Kapitlu Tlieta u Għoxrin

“Isem Ġdid”

Isaija 62:1-12

1. Liema assiguranza nsibu f’Isaija kapitlu 62?

 SERĦAN il-​moħħ, faraġ, tama taʼ tiġdid—hekk għandhom bżonn il-​Lhud f’Babilonja li jħossuhom qalbhom maqtugħa. Għaddew diversi għaxriet taʼ snin mindu Ġerusalemm u t-​tempju tagħha ġew meqrudin. Ġuda, li qiegħda xi 800 kilometru ’l bogħod minn Babilonja, tinsab ħerba, u donnu li l-​Lhud intesew minn Jehovah. X’inhu li jistaʼ jtejbilhom is-​sitwazzjoni? Il-​wegħdi mingħand Jehovah li se jġibhom lura lejn pajjiżhom u jħallihom jistabbilixxu mill-​ġdid il-​qima safja. Imbagħad deskrizzjonijiet bħalma huma ‘l-​abbandunata’ u ‘l-​imħarbta’ se jinbidlu b’ismijiet li jindikaw li hemm l-​approvazzjoni t’Alla. (Isaija 62:4; Żakkarija 2:16 [2:12, NW]) Kapitlu 62 taʼ Isaija huwa mimli b’dawn il-​wegħdi. Madankollu, bħal profeziji oħrajn taʼ tiġdid, dan il-​kapitlu jittratta wkoll dwar affarijiet li jseħħu ħafna wara l-​ħelsien tal-​Lhud mill-​jasar f’Babilonja. Fit-​twettiq il-​kbir tiegħu, Isaija kapitlu 62 jassigurana li s-​salvazzjoni tal-​ġens spiritwali taʼ Jehovah, l-​“Iżrael taʼ Alla,” hija ċerta.—Galatin 6:16.

Jehovah Ma Jibqax Sieket

2. Jehovah b’liema mod jerġaʼ jiffavorixxi lil Sijon?

² Babilonja tisfa megħluba fis-​sena 539 Q.E.K. Wara dan, is-​Sultan Ċiru tal-​Persja joħroġ digriet li bih il-​Lhud li kellhom il-​biżaʼ t’Alla setgħu jirritornaw lejn  Ġerusalemm u jistabbilixxu mill-​ġdid il-​qima taʼ Jehovah. (Esdra 1:2-4) Fis-​sena 537 Q.E.K., l-​ewwel Lhud li rritornaw jinsabu lura f’arthom. Jehovah għal darb’oħra jiffavorixxi lil Ġerusalemm, bħalma huwa rifless fid-​dikjarazzjoni profetika li tirrifletti s-​sentimenti tiegħu: “Minħabba f’Sijon ma nehdiex, minħabba f’Ġerusalemm ma niskotx, sa ma tfeġġ bħal dija l-​ġustizzja tagħha, tħeġġeġ bħal torċa s-​salvazzjoni tagħha.”—Isaija 62:1.

3. (a) Finalment, Sijon taʼ l-​art għala tiġi miċħuda minn Jehovah, u min jiħdilha postha? (b) Liema abbandunar iseħħ, u meta, u f’liema perijodu qegħdin ngħixu llum?

³ Fis-​sena 537 Q.E.K., Jehovah wettaq il-​wegħda tiegħu li jerġaʼ jagħti l-​ħajja lil Sijon, jew Ġerusalemm. L-​abitanti tagħha esperjenzaw is-​salvazzjoni mingħandu, u t-​tjieba tagħhom iddiet b’qawwa kbira. Iżda iktar tard huma reġgħu abbandunaw il-​qima safja. Maż-​żmien, irrifjutaw lil Ġesù bħala l-​Messija, u Jehovah finalment ma baqax jaċċettahom bħala l-​ġens magħżul tiegħu. (Mattew 21:43; 23:38; Ġwann 1:9-13) Jehovah wiled ġens ġdid, l-​“Iżrael taʼ Alla.” Dan il-​ġens ġdid sar il-​poplu speċjali tiegħu, u fl-​ewwel seklu, il-​membri tiegħu ppridkaw biż-​żelu l-​aħbar tajba fid-​dinja li kienet magħrufa dak iż-​żmien. (Galatin 6:16; Kolossin 1:23) B’sogħba, wara li mietu l-​appostli, ir-​reliġjon vera ġiet abbandunata. B’riżultat taʼ dan, żviluppat għamla taʼ Kristjanità apostata, bħalma nsibu llum fil-​Kristjaneżmu. (Mattew 13:24-30, 36-43; Atti 20:29, 30) Għal sekli sħaħ, il-​Kristjaneżmu tħalla jġib tmaqdir kbir fuq l-​isem taʼ Jehovah. Madankollu, fl-​aħħarnett, fl-​1914 bdiet is-​“sena tal-​grazzja” taʼ Jehovah, flimkien mat-​twettiq ewlieni taʼ din il-​parti mill-​profezija taʼ Isaija.—Isaija 61:2.

4, 5. (a) Sijon u wliedha lil min jissimbolizzaw illum? (b) Jehovah b’liema mod uża lil Sijon biex jagħmel is-​‘salvazzjoni tagħha tħeġġeġ bħal torċa’?

 ⁴ Illum il-​wegħda taʼ Jehovah li jerġaʼ jagħti l-​ħajja lil Sijon twettqet fuq l-​organizzazzjoni tiegħu fis-​sema, “Ġerusalemm taʼ fuq,” kif rappreżentata fuq l-​art minn uliedha, il-​Kristjani midlukin bl-​ispirtu. (Galatin 4:26) L-​organizzazzjoni taʼ Jehovah fis-​sema taqdi bħala ajjutanta dedikata—attenta, tħobb, u tħabrek. X’okkażjoni kommoventi kienet dik, meta fl-​1914 wildet lis-​Saltna Messjanika! (Apokalissi 12:1-5) B’mod partikulari mill-​1919, uliedha fuq l-​art ippridkaw lill-​ġnus dwar it-​tjieba u s-​salvazzjoni tagħha. Bħalma bassar Isaija, dawn l-​ulied dawlu d-​dlam bħal torċa tħeġġeġ, billi ħallew id-​dawl tagħhom jiddi.—Mattew 5:15, 16; Filippin 2:15.

⁵ Jehovah hu interessat ferm fl-​adoraturi tiegħu u mhux se jistrieħ, jew jibqaʼ sieket, qabel ma jkun wettaq il-​wegħdi kollha li għamel lil Sijon u lil uliedha. Dawk li baqaʼ mill-​midlukin flimkien maʼ sħabhom in-​“nagħaġ oħra” wkoll jirrifjutaw li jibqgħu siktin. (Ġwann 10:16) Huma storbjużi tabilħaqq hekk kif jiggwidaw lin-​nies lejn l-​unika triq taʼ salvazzjoni.—Rumani 10:10.

“Isem Ġdid” Mogħti minn Jehovah

6. Jehovah x’għandu f’moħħu għal Sijon?

⁶ X’għandu f’moħħu Jehovah għal Sijon, il-​“mara” tiegħu fis-​sema, rappreżentata minn Ġerusalemm tal-​qedem? Hu jgħid: “Il-​ġustizzja tiegħek għad jarawha l-​ġnus, u s-​sebħ tiegħek jarawh is-​slaten kollha. B’isem ġdid għad isejjħulek, isem li għad jagħżlu fomm il-​Mulej.” (Isaija 62:2) Hekk kif l-​Iżraelin jaġixxu bit-​tjieba, il-​ġnus jiġu mġagħlin iħarsu lejhom b’attenzjoni. Anki s-​slaten jiġu mġagħlin jirrikonoxxu li Jehovah qed juża lil Ġerusalemm u li kwalunkwe ħakma li jeżerċitaw hija  insinifikanti meta mqabbla mas-​Saltna taʼ Jehovah.—Isaija 49:23.

7. L-​isem ġdid taʼ Sijon x’jissinjifika?

⁷ Jehovah issa jikkonferma li l-​kundizzjoni taʼ Sijon inbidlet billi jagħtiha isem ġdid. Dan l-​isem ġdid jissinjifika l-​kundizzjoni mbierka u l-​istat onorat gawdut minn ulied Sijon fuq l-​art mis-​sena 537 Q.E.K. ’l quddiem. a Juri li Jehovah jirrikonoxxi lil Sijon bħala li tappartjeni lilu. Illum, il-​membri taʼ l-​Iżrael t’Alla tgħidx kemm huma henjin li huma l-​għaxqa taʼ Jehovah b’dan il-​mod, u n-​nagħaġ oħra jithennew magħhom.

8. Jehovah b’liema modi onora lil Sijon?

⁸ Wara li lil Sijon taha isem ġdid, Jehovah issa jwiegħed: “Għad tkun kuruna taʼ ġmiel f’id il-​Mulej, u dijadema taʼ sultan f’id Alla tiegħek.” (Isaija 62:3) Jehovah jżommha fl-​għoli lill-​mara simbolika tiegħu, Sijon tas-​sema, biex kulħadd iħares lejha b’ammirazzjoni. (Salm 48:3 [48:2, NW]; 50:2) Il-​kuruna taʼ ġmiel u d-​“dijadema taʼ sultan” jindikaw li hi mlibbsa b’ġieħ u awtorità. (Żakkarija 9:16) Peress li jirrappreżenta lil Sijon tas-​sema, jew “Ġerusalemm taʼ fuq,” l-​Iżrael t’Alla huwa riżultat meraviljuż taʼ id Alla—il-​qawwa applikata tiegħu—fl-​azzjoni. (Galatin 4:26) Bl-​għajnuna taʼ Jehovah, dan il-​ġens spiritwali stabbilixxa eżempju li jispikka taʼ integrità u devozzjoni. Miljuni sħaħ, inkluż kemm il-​midlukin kif ukoll in-​nagħaġ oħra, jiġu msaħħin biex juru fidi u mħabba li jispikkaw. Matul ir-​Renju Millennjali taʼ Kristu, il-​midlukin, billi jkunu kisbu l-​premju glorjuż tagħhom fis-​sema, se jkunu strumenti f’id Jehovah biex jagħti ħajja taʼ  dejjem lill-​ħolqien li qed jitniehed.—Rumani 8:21, 22; Apokalissi 22:2.

‘Jehovah Tgħaxxaq Bik’

9. Iddeskrivi l-​bidla li seħħet fuq Sijon.

⁹ L-​għoti taʼ isem ġdid huwa parti mill-​bidla meraviljuża taʼ Sijon tas-​sema kif rappreżentata fuq l-​art minn uliedha. Naqraw: “Ma jgħidulekx aktar: ‘L-​Abbandunata,’ lanqas lil artek: ‘L-​Imħarbta.’ Lilek għad isejjħulek: ‘Għaxqti fiha,’ u lil artek għad jgħidulha: ‘Għarusa’; għax l-​għaxqa tal-​Mulej fik, u artek għad titgħarras.” (Isaija 62:4) Sijon fuq l-​art ilha ħerba mindu nqerdet fis-​sena 607 Q.E.K. Madankollu, kliem Jehovah jassiguraha li l-​pajjiż se jerġaʼ jieħu l-​ħajja u jimtela bin-​nies. Sijon, li darba kienet ħerba, mhix se tkun iktar abbandunata, u pajjiżha mhux se jkun iktar imħarbat. It-​tiġdid taʼ Ġerusalemm fis-​sena 537 Q.E.K. jfisser kundizzjoni ġdida għaliha, b’kuntrast sħiħ maʼ l-​istat taʼ rovina li kienet fih qabel. Jehovah jiddikjara li Sijon se tissejjaħ “Għaxqti,” u artha, “Għarusa.”—Isaija 54:1, 5, 6; 66:8; Ġeremija 23:5-8; 30:17; Galatin 4:27-31.

10. (a) L-​Iżrael t’Alla kif inbidel? (b) L-​“art” taʼ l-​Iżrael t’Alla x’inhi?

¹⁰ Mill-​1919 ’l hawn, l-​Iżrael t’Alla esperjenza bidla simili. Matul l-​ewwel gwerra dinjija, il-​Kristjani midlukin kienu qishom ġew miċħudin minn Alla. Imma fl-​1919 reġgħu ngħataw l-​istat taʼ favur li kellhom qabel, u l-​mod taʼ qima tagħhom issaffa. Dan effettwa t-​tagħlim, l-​organizzazzjoni, u l-​attività tagħhom. L-​Iżrael t’Alla daħal f’‘artu,’ il-​qasam spiritwali, jew sfera t’attività, tiegħu.—Isaija 66:7, 8, 20-22.

11. Il-​Lhud kif jiżżewġu lil ommhom?

¹¹ Waqt li jkompli jisħaq fuq il-​pożizzjoni ġdida taʼ favur tal-​poplu tiegħu, Jehovah jiddikjara: “Bħal ma  jiżżewweġ żagħżugħ [lil] xebba, hekk uliedek jiżżewġuk: u bħal ma jifraħ il-​għarus bil-​għarusa, hekk Alla tiegħek jifraħ bik.” (Isaija 62:5, “KŻ”) Kif jistgħu l-​Lhud, ‘ulied’ Sijon, jiżżewġu lil ommhom? Billi dawk li qed jirritornaw wara li nħelsu mill-​eżilju f’Babilonja jokkupaw il-​belt kapitali antika tagħhom u jerġgħu jistabbilixxu ruħhom fiha. Meta jiġri dan, Sijon ma tibqax iktar ħerba imma timtela bl-​ulied.—Ġeremija 3:14.

12. (a) Jehovah b’liema mod għamilha ċara li l-​Kristjani midlukin huma parti mill-​organizzazzjoni li hi msieħba fiż-​żwieġ miegħu? (b) Il-​mod kif Jehovah jaġixxi mal-​poplu tiegħu kif jipprovdi mudell nobbli għaż-​żwieġ illum? (Ara l-​kaxxa f’paġna 342.)

¹² B’mod simili, mill-​1919 ’l hawn ulied Sijon tas-​sema ħadu pussess t’arthom, il-​qasam spiritwali tagħhom, li għandha l-​isem profetiku “Għarusa.” L-​attività Kristjana tagħhom f’dik l-​art għamlitha evidenti li dawn il-​Kristjani midlukin huma ‘l-​poplu għal isem Jehovah.’ (Atti 15:14, KŻ) Il-​fatt li jipproduċu l-​frott tas-​Saltna u jxandru isem Jehovah għamilha ovvja li Jehovah jitgħaxxaq b’dawn il-​Kristjani. Hu għamilha ċara li dawn huma parti mill-​organizzazzjoni li hi msieħba miegħu b’unità li ma titkissirx. Billi dilek lil dawn il-​Kristjani bl-​ispirtu qaddis, ħelishom mill-​jasar spiritwali, u użahom biex jippridkaw it-​tama tas-​Saltna lill-​bnedmin kollha, Jehovah wera li jithenna bihom bil-​ferħ taʼ għarus minħabba l-​għarusa.—Ġeremija 32:41.

“Ma Hemmx Mistrieħ Għalikom”

13, 14. (a) Fil-​qedem, Ġerusalemm kif saret belt li tipprovdi s-​sigurtà? (b) Fi żmienna, Sijon kif saret “foħrija taʼ l-​art”?

¹³ In-​nies taʼ Jehovah jħossuhom fis-​sigurtà minħabba l-​isem ġdid u figurattiv li ngħatalhom minn Alla. Huma jafu li hu jirrikonoxxihom u li hu sidhom. Waqt li issa juża tixbiha differenti, Jehovah jkellem lin-​nies tiegħu  bħallikieku qed ikellem lil belt imdawra bis-​swar: “Fuq swarek, Ġerusalemm, qegħedt l-​għassiesa: lejl u nhar qatt ma jisktu. Intom li tfakkru l-​Mulej, ma hemmx mistrieħ għalikom; u lilu sserrħuhx sa ma jerġaʼ jwaqqaf lil  Ġerusalemm, u jagħmilha l-​foħrija taʼ l-​art.” (Isaija 62:6, 7) Fiż-​żmien stabbilit minn Jehovah, wara li l-​fdal leali jirritorna minn Babilonja, Ġerusalemm tassew li ssir “il-​foħrija taʼ l-​art”—belt imdawra bis-​swar li tipprovdi sigurtà lill-​abitanti tagħha. Lejl u nhar, l-​għassiesa fuq dawn is-​swar qegħdin attenti biex ikunu ċerti mis-​sigurtà tal-​belt u biex iwasslu messaġġi taʼ twissija liċ-​ċittadini tagħha.—Neħemija 6:15; 7:3; Isaija 52:8.

¹⁴ Fi żmienna Jehovah uża lill-​għassiesa midlukin tiegħu biex lill-​ġwejdin juruhom it-​triq lejn il-​ħelsien mill-​jasar taħt ir-​reliġjon falza. Dawn l-​uħud ġew mistidnin biex jidħlu fl-​organizzazzjoni tiegħu, fejn isibu l-​protezzjoni minn tinġis spiritwali, minn nies li jinfluwenzawhom għall-​ħażen, u mit-​telfien taʼ l-​approvazzjoni taʼ Jehovah. (Ġeremija 33:9; Sofonija 3:19) Xi ħaġa li hi vitali għal din il-​protezzjoni hija l-​irwol tal-​klassi taʼ l-​għassies, “l-​ilsir leali u diskret,” li tipprovdi ‘l-​ikel spiritwali fiż-​żmien xieraq.’ (Mattew 24:45-47, NW) Billi taħdem mal-​klassi taʼ l-​għassies, il-​“kotra kbira” wkoll għandha rwol sinifikanti f’li tagħmel lil Sijon “foħrija taʼ l-​art.”—Apokalissi 7:9.

15. Il-​klassi taʼ l-​għassies u sħabhom kif jaqdu lil Jehovah kontinwament?

¹⁵ Is-​servizz tal-​klassi taʼ l-​għassies u taʼ sħabhom ikompli! L-​attitudni tagħhom li jaqdu b’ruħhom kollha tidher fl-​attività żeluża taʼ miljuni taʼ individwi leali appoġġati minn indokraturi li jivvjaġġaw u n-​nisa tagħhom; volontieri fid-​diversi djar Betel u uffiċċji u stamperiji tax-​Xhieda taʼ Jehovah; missjunarji; u pijunieri speċjali, regulari, u awżiljarji. Iżjed minn hekk, huma jaħdmu iebes biex jibnu Swali tas-​Saltna ġodda, iżuru l-​morda, jassistu lil individwi li jiffaċċjaw sitwazzjonijiet mediċi diffiċli, u jipprovdu għajnuna f’waqtha lill-​vittmi  taʼ diżastri u aċċidenti. Ħafna minn dawn l-​individwi li jissagrifikaw ruħhom spiss jaqdu letteralment “lejl u nhar”!—Apokalissi 7:14, 15.

16. Il-​qaddejja taʼ Jehovah b’liema mod ‘ma jagħtuhx mistrieħ’?

¹⁶ Il-​qaddejja taʼ Jehovah huma inkuraġġiti biex jitolbu bla heda, biex jitolbu ’l Alla ħalli ‘jkun li jrid hu, kif fis-​sema, hekkda fl-​art.’ (Mattew 6:9, 10; 1 Tessalonikin 5:17) Huma jiġu mħeġġin: “Ma hemmx mistrieħ għalikom” qabel ma jaqtgħalkom ix-​xewqat u t-​tamiet tagħkom rigward it-​tiġdid tal-​qima vera. Ġesù saħaq fuq il-​ħtieġa li nitolbu bla ma naqtgħu, billi ħeġġeġ lis-​segwaċi tiegħu biex ‘jgħajtu lil Alla lejl u nhar.’—Luqa 18:1-8.

Is-​Servizz lil Alla Se Jiġi Premjat

17, 18. (a) L-​abitanti taʼ Sijon b’liema mod jistgħu jistennew li jgawdu l-​frott tal-​ħidma tagħhom? (b) In-​nies taʼ Jehovah llum kif igawdu l-​frott tal-​ħidma tagħhom?

¹⁷ L-​isem ġdid li Jehovah jagħti lin-​nies tiegħu jassigurahom li l-​isforzi tagħhom m’humiex għalxejn. “Ħalef il-​Mulej b’lemintu u bid-​driegħ qawwi tiegħu: ‘Il-​qamħ tiegħek ma nagħtihx aktar b’ikel lill-​għedewwa tiegħek, u l-​barranin ma jixorbux l-​inbid tiegħek, li int tħabatt għalih; imma l-​qamħ jikluh dawk li jaħsduh u jfaħħru l-​Mulej, u dawk li jiġbru l-​għeneb jixorbu l-​inbid fil-​btieħi tat-​tempju tiegħi.’” (Isaija 62:8, 9) L-​id il-​leminija u d-​driegħ qawwi taʼ Jehovah huma simboli tal-​qawwa u s-​saħħa tiegħu. (Dewteronomju 32:40; Eżekjel 20:5) Il-​fatt li jaħlef bihom juri li hu determinat li jbiddel is-​sitwazzjoni taʼ Sijon. Fis-​sena 607 Q.E.K., Jehovah jippermetti li l-​għedewwa taʼ Sijon jisirquha u jiħdulha ġidha. (Dewteronomju 28:33, 51) Imma issa, il-​ġid li għandha Sijon se jitgawda biss minn dawk li għandhom id-​dritt għalih.—Dewteronomju 14:22-27.

 ¹⁸ Fit-​twettiq modern taʼ din il-​wegħda, in-​nies taʼ Jehovah li reġgħu ngħataw il-​ħajja jesperjenzaw prosperità spiritwali kbira. Huma jgawdu bis-​sħiħ il-​frott tal-​ħidma tagħhom—għadd miżjud taʼ dixxipli Kristjani u abbundanza taʼ ikel spiritwali. (Isaija 55:1, 2; 65:14) Peress li n-​nies tiegħu huma leali, Jehovah ma jħallix lill-​għedewwa tagħhom ifixklulhom il-​prosperità spiritwali li għandhom jew iċaħħduhom mir-​riżultati tas-​servizz li jagħmlu b’ruħhom kollha. L-​ebda xogħol li jsir fis-​servizz taʼ Jehovah m’hu għalxejn.—Malakija 3:10-12; Lhud 6:10.

19, 20. (a) It-​triq kif tnaddfet biex il-​Lhud ikunu jistgħu jirritornaw lejn Ġerusalemm? (b) Fi żmienna, it-​triq kif tnaddfet biex il-​ġwejdin ikunu jistgħu jidħlu fl-​organizzazzjoni taʼ Jehovah?

¹⁹ L-​isem ġdid jgħin ukoll biex l-​organizzazzjoni taʼ Jehovah tidher attraenti għal nies taʼ qalb onesta. Kotriet sħaħ jiġru bi ħġarhom lejha, u t-​triq tinżamm miftuħa għalihom. Il-​profezija taʼ Isaija tgħid: “Għaddu, għaddu mill-​bibien, wittu t-​triq għall-​poplu! Rawwmu, rawwmu t-​triq, naddfuha miż-​żrar! Għollu sinjal għall-​popli!” (Isaija 62:10) Fl-​ewwel twettiq, din is-​sejħa x’aktarx li tirreferi għall-​ħruġ mill-​bibien tal-​bliet taʼ Babilonja sabiex in-​nies t’Alla jirritornaw lejn Ġerusalemm. Dawk li jirritornaw iridu jneħħu l-​ġebel u ż-​żrar min-​nofs biex il-​vjaġġ isir iktar faċli u biex jagħmlu sinjal li juri t-​triq.—Isaija 11:12.

²⁰ Mill-​1919 ’l hawn, il-​Kristjani midlukin ġew maqtugħin apparti għal servizz divin u qegħdin jivvjaġġaw fit-​“Triq il-​Qaddisa.” (Isaija 35:8) Huma kienu l-​ewwel li mxew fil-​mogħdija spiritwali biex ħarġu minn Babilonja l-​Kbira. (Isaija 40:3; 48:20) Alla tahom il-​privileġġ li jieħdu t-​tmexxija f’li jiddikjaraw ix-​xogħlijiet setgħanin tiegħu u biex juru lil oħrajn it-​triq lejn il-​mogħdija. Il-​fatt  li naddfuha mill-​ġebel u ż-​żrar, billi neħħew min-​nofs kull tfixkil, kien prinċipalment għall-​benefiċċju tagħhom stess. (Isaija 57:14) Kellhom bżonn jaraw b’mod ċar l-​iskopijiet u t-​tagħlim t’Alla. It-​twemmin falz huwa tfixkil fit-​triq li tagħti għall-​ħajja, imma l-​Kelma taʼ Jehovah hi “bħal imterqa tfarrak il-​blat.” Biha, il-​Kristjani midlukin farrku l-​ostakli li setgħu jfixklu lil dawk li riedu jaqdu lil Jehovah.—Ġeremija 23:29.

21, 22. Jehovah liema sinjal stabbilixxa għal dawk li qegħdin jitilqu mir-​reliġjon falza, u kif nafu?

²¹ Fis-​sena 537 Q.E.K., Ġerusalemm saret is-​sinjal li sejjaħ lill-​fdal Lhudi biex jirritorna u jibni t-​tempju mill-​ġdid. (Isaija 49:22) Fl-​1919, meta l-​membri tal-​fdal midluk inħelsu mill-​jasar tar-​reliġjon falza, ma qagħdux jiġru ’l hawn u ’l hinn bla skop. Kienu jafu fejn kellhom imorru, għax Jehovah kien stabbilixxa sinjal għalihom. Liema sinjal? L-​istess sinjal imbassar f’Isaija 11:10, li jgħid: “Jiġri f’dak il-​jum li l-​għerq taʼ Ġesse jieqaf bħala sinjal għall-​popli.” L-​appostlu Pawlu japplika dan il-​kliem għal Ġesù. (Rumani 15:8, 12) Iva, is-​sinjal hu Kristu Ġesù, li qed isaltan bħala Sultan fuq il-​Muntanja Sijon tas-​sema!—Lhud 12:22; Apokalissi 14:1.

²² Kemm il-​Kristjani midlukin kif ukoll in-​nagħaġ oħra huma miġburin madwar Ġesù Kristu biex jieħdu sehem fil-​qima li tgħaqqad taʼ dak Alla l-​Iktar Għoli. Il-​ħakma tiegħu sservi biex tivvindika s-​sovranità universali taʼ Jehovah u biex tbierek lil dawk taʼ qalb onesta mill-​ġnus kollha taʼ l-​art. M’hijiex din raġuni biex kull wieħed u waħda minna ningħaqdu biex ngħolluh bit-​tifħir?

“Ġej is-​Salvatur Tiegħek”!

23, 24. Is-​salvazzjoni kif qed tinġieb lil dawk li għandhom fidi f’Alla?

²³ L-​isem ġdid li Jehovah jagħti lill-​organizzazzjoni  tiegħu, li hi bħal martu, għandu x’jaqsam mas-​salvazzjoni eterna taʼ wliedha. Jikteb Isaija: “Araw, il-​Mulej isammaʼ leħnu sa truf l-​art: ‘Għidu lil bint Sijon: “Arah, ġej is-​salvatur [“salvazzjoni,” “KŻ”] tiegħek! Arah bil-​prezz f’idu u l-​ħlas quddiemu.”’” (Isaija 62:11) Is-​salvazzjoni ġiet għand il-​Lhud meta waqgħet Babilonja u huma rritornaw lejn arthom. Imma dan il-​kliem jipponta lejn xi ħaġa akbar. Id-​dikjarazzjoni taʼ Jehovah tfakkarna fil-​profezija taʼ Żakkarija rigward Ġerusalemm: “Ifraħ kemm tiflaħ, bint Sijon; għajjat bil-​ferħ, bint Ġerusalemm! Ara, is-​sultan tiegħek ġej għandek; ġust u rebbieħ, umli u riekeb fuq ħmar, fuq felu taʼ ħmara.”—Żakkarija 9:9.

 ²⁴ Tliet snin u nofs wara li Ġesù ġie mgħammed fl-​ilma u midluk bl-​ispirtu t’Alla, hu daħal riekeb f’Ġerusalemm u naddaf it-​tempju tagħha. (Mattew 21:1-5; Ġwann 12:14-16) Illum, Ġesù Kristu hu dak li qed iġib is-​salvazzjoni mingħand Jehovah lil dawk kollha li għandhom fidi f’Alla. Mindu ngħata t-​tron fl-​1914, Ġesù huwa wkoll l-​Imħallef u l-​Esekutur maħtur minn Jehovah. Fl-​1918, tliet snin u nofs wara li ngħata t-​tron, hu naddaf it-​tempju spiritwali taʼ Jehovah, kif rappreżentat fuq l-​art mill-​kongregazzjoni taʼ Kristjani midlukin. (Malakija 3:1-5) Il-​fatt li ġie mgħolli bħala sinjal immarka l-​bidu taʼ ġbir kbir taʼ nies minn fuq l-​art kollha biex jappoġġaw lis-​Saltna Messjanika. Fi qbil mal-​mudell tal-​qedem, is-​“salvazzjoni” ġiet għand l-​Iżrael t’Alla meta fl-​1919 inħeles minn taħt Babilonja l-​Kbira. Il-​“prezz” jew “il-​ħlas” li hemm maħżun għall-​ħaddiema tal-​ħsad li jissagrifikaw ruħhom hu jew ħajja immortali fis-​sema jew ħajja eterna fuq l-​art. Dawk kollha li jibqgħu leali jistgħu jkunu fiduċjużi li ‘l-​ħidma tagħhom fil-​Mulej m’hijiex għalxejn.’—1 Korintin 15:58.

25. Il-​poplu taʼ Jehovah liema assiguranza jingħata?

²⁵ Kemm hu promettenti l-​futur għall-​organizzazzjoni taʼ Jehovah fis-​sema, għar-​rappreżentanti midlukin tagħha hawnhekk fuq l-​art, u għal kulmin hu msieħeb magħhom b’mod attiv! (Dewteronomju 26:19) Isaija pprofetizza: “Jibdew isejjħulhom: ‘Poplu qaddis, il-​Mifdijin tal-​Mulej,’ u lilek isejjħulek: ‘L-​Imfittxija,’ ‘Il-​Belt qatt abbandunata.’” (Isaija 62:12) Kien hemm żmien meta “Ġerusalemm taʼ fuq,” rappreżentata mill-​Iżrael t’Alla, ħassitha abbandunata. Qatt ma se terġaʼ tħossha hekk. Il-​poplu taʼ Jehovah se jkun għal dejjem taħt il-​protezzjoni Tiegħu, waqt li jgawdi t-​tbissima kontinwa t’approvazzjoni Tiegħu.

[Nota taʼ taħt]

[Mistoqsijiet taʼ Studju]

[Kaxxa f’paġna 342]

Mudell Nobbli għaż-​Żwieġ

Meta n-​nies jiżżewġu, huma jkollhom ħafna tamiet u stennijiet għaż-​żwieġ tagħhom. Imma x’inhuma l-​istennijiet t’Alla? L-​istituzzjoni taż-​żwieġ oriġinat minnu. X’kien l-​iskop tiegħu f’dan ir-​rigward?

Indikazzjoni waħda tal-​mod kif Alla jħares lejn il-​kwistjoni tiġi mir-​relazzjoni tiegħu mal-​ġens taʼ Iżrael. Isaija jiffigura din ir-​relazzjoni bħala żwieġ. (Isaija 62:1-5) Innota x’jagħmel Alla Jehovah bħala “raġel miżżewweġ” għal “għarustu.” Jipproteġiha u jqaddisha. (Isaija 62:6, 7, 12) Jonoraha u jistmaha. (Isaija 62:3, 8, 9) U jitgħaxxaq biha, bħalma huwa indikat mill-​ismijiet ġodda li jagħtiha.—Isaija 62:4, 5, 12.

Fl-​Iskrittura Griega Kristjana, Pawlu jirrepeti d-​deskrizzjoni li jagħti Isaija dwar ir-​relazzjoni bejn Jehovah u Iżrael meta jqabbel ir-​relazzjoni taʼ bejn raġel u martu maʼ dik taʼ bejn Kristu u l-​kongregazzjoni taʼ Kristjani midlukin.—Efesin 5:21-27.

Pawlu inkuraġġixxa lill-​Kristjani biex fiż-​żwieġ tagħhom jimitaw ir-​relazzjoni taʼ bejn Ġesù u l-​kongregazzjoni. Ma jistax ikun hemm imħabba akbar minn dik murija minn Jehovah lejn Iżrael u dik murija minn Kristu lejn il-​kongregazzjoni. Dawn ir-​relazzjonijiet simboliċi jipprovdu mudell nobbli għal żwieġ hieni li jirnexxi bejn il-​Kristjani.—Efesin 5:28-33.

 [Stampa f’paġna 339]

Jehovah se jsejjaħ lil Sijon tas-​sema b’isem ġdid

[Stampi f’paġna 347]

Fi żmienna l-​klassi taʼ l-​għassies taʼ Jehovah ma baqgħetx siekta