Kapitlu Erbgħa u Għoxrin

Jehovah Jagħmel Isem Glorjuż Għalih Innifsu

Isaija 63:1-14

1, 2. (a) Il-​Kristjani liema interess persunali għandhom fil-​‘jum taʼ Alla’ li ġej? (b) Liema kwistjoni superjuri hija involuta fil-​miġja taʼ jum Jehovah?

 GĦAL kważi elfejn sena, il-​Kristjani ilhom ‘jistennew b’ħerqa kbira l-​miġja tal-​jum taʼ Alla.’ (2 Pietru 3:12; Titu 2:13) Wieħed jistaʼ jifhem għala huma ansjużi biex jiġi dan il-​jum. Wara kollox, dan se jkun il-​bidu tas-​serħan tagħhom mill-​effetti distruttivi taʼ l-​imperfezzjoni. (Rumani 8:22) Se jkun ifisser ukoll it-​tmiem tal-​pressjonijiet li jsofru matul dan iż-​“żmien iebes.”—2 Timotju 3:1.

² Madankollu, waqt li l-​jum taʼ Jehovah se jġib serħan lit-​twajbin, se jkun ifisser ukoll qerda għal “dawk li ma jagħrfux lil Alla, u ’l dawk li ma jobdux l-​Evanġelju taʼ Sidna Ġesù.” (2 Tessalonikin 1:7, 8) Għandna bżonn nirriflettu serjament fuq dan. Huwa minnu li Alla se jġib il-​qerda tal-​ħżiena sempliċement biex jeħles lill-​poplu tiegħu minn kundizzjonijiet taʼ niket? Kapitlu 63 taʼ Isaija juri li hemm involuta kwistjoni li hi ferm iktar superjuri, jiġifieri, it-​taqdis taʼ l-​isem t’Alla.

Jimmarċja l-​Gwerrier Vittorjuż

3, 4. (a) X’inhu l-​isfond għall-​profezija li hemm f’Isaija kapitlu 63? (b) Isaija lil min jara qed jimmarċja lejn Ġerusalemm, u xi studjużi min jgħidu li hu?

³ F’Isaija kapitlu 62 qrajna kif il-​Lhud ġew meħlusin  mill-​jasar f’Babilonja u kif reġgħu ġew stabbiliti f’arthom. Naturalment, tqum il-​mistoqsija: Il-​membri tal-​fdal tal-​Lhud li marru lura lejn arthom għandhom għalfejn jibżgħu li jerġgħu jitkissru minn ġnus għedewwa oħrajn? Il-​viżjoni taʼ Isaija tgħin ħafna biex ittaffilhom il-​biżaʼ li għandhom. Il-​profezija tibda hekk: “Min hu dan li ġej minn Edom, bi ħwejġu ħomor minn Bosra? Hu mżejjen bi lbiesu, miexi fil-​milja tal-​qawwa tiegħu.”—Isaija 63:1a.

⁴ Isaija jara gwerrier, enerġetiku u trijonfanti, jimmarċja lejn Ġerusalemm. L-​ilbies meraviljuż tiegħu jindika li hu għandu l-​ogħla grad. Hu ġej min-​naħa taʼ Bosra, l-​iktar belt prominenti t’Edom, u dan jissuġġerixxi li hu kellu rebħa kbira fuq dan il-​pajjiż taʼ l-​għadu. Min jistaʼ jkun dan il-​gwerrier? Xi studjużi jgħidu li hu Ġesù Kristu. Oħrajn jemmnu li hu l-​mexxej militari Lhudi Ġuda l-​Makkabi. Madankollu, il-​gwerrier innifsu jindika min hu meta jwieġeb il-​mistoqsija t’hawn fuq billi jgħid: “Jiena hu li nxandar il-​ħelsien, jiena l-​qawwi biex ngħin.”—Isaija 63:1b.

5. Min hu l-​gwerrier li jara Isaija, u għala twieġeb hekk?

⁵ M’hemm ebda dubju li dan il-​gwerrier hu Alla Jehovah nnifsu. F’postijiet oħrajn jiġi deskritt bħala li għandu ‘abbundanza taʼ enerġija dinamika’ u bħala li ‘jgħid is-​sewwa.’ (Isaija 40:26, NW; 45:19, 23) L-​ilbies meraviljuż tal-​gwerrier ifakkarna fi kliem is-​salmista: “Mulej, Alla tiegħi, inti kbir bil-​bosta! Bis-​sebħ u l-​ġmiel inti mlibbes.” (Salm 104:1) Waqt li Jehovah hu dak Alla taʼ mħabba, il-​Bibbja turi li meta jkun hemm bżonn hu jagħmilha taʼ gwerrier.—Isaija 34:2; 1 Ġwann 4:16.

6. Jehovah għala ġej lura minn battalja f’Edom?

⁶ Iżda, Jehovah għala ġej lura minn battalja f’Edom?  L-​Edumin, li għadhom iżommu f’qalbhom mibegħda mibdija minn Għesaw, missierhom tal-​qedem, ilhom minn żmien żemżem għedewwa tal-​poplu f’patt m’Alla. (Ġenesi 25:24-34; Numri 20:14-21) Kemm kienet profonda l-​mibegħda li Edom kellu għal Ġuda sar evidenti b’mod partikulari fi żmien il-​ħerba taʼ Ġerusalemm meta l-​Edumin bdew jifirħulhom lis-​suldati Babiloniżi. (Salm 137:7) Din il-​mibegħda Jehovah jiħodha bħala offiża kontrih personalment. Mhux taʼ b’xejn li qatagħha li jxejjer is-​sejf taʼ vendetta tiegħu kontra Edom!—Isaija 34:5-15; Ġeremija 49:7-22.

7. (a) Il-​profezija kontra Edom kif twettqet fil-​bidu? (b) Edom lil min jissimbolizza?

⁷ Għalhekk, il-​viżjoni taʼ Isaija hija taʼ inkuraġġiment kbir għal-​Lhud li qed jirritornaw lejn Ġerusalemm. Tassigurahom li se joqogħdu bi kwiethom u b’rashom mistrieħa fid-​dar il-​ġdida tagħhom. Tabilħaqq, sa żmien il-​profeta Malakija, ‘il-​muntanji taʼ Edom kienu saru xagħra, u l-​art li wiret tħallietlu għax-​xakalli tad-​deżert.’ Dan kollu sar minn Alla. (Malakija 1:3) Ifisser dan, allura, li l-​profezija taʼ Isaija twettqet għalkollox sa żmien Malakija? Le, għax minkejja li kien ħerba, Edom kien determinat li jibni mill-​ġdid il-​postijiet imġarrfin tiegħu, u lil Edom, Malakija baqaʼ jsejjaħlu “Art il-​ħażen” u l-​“poplu li l-​Mulej hu dejjem inkurlat għalih.” a (Malakija 1:4, 5) Madankollu, b’mod profetiku, Edom jiġbor fih iktar mid-​dixxendenti t’Għesaw. Jissimbolizza lill-​ġnus kollha li juru li huma għedewwa taʼ l-​adoraturi taʼ Jehovah. Il-​ġnus tal-​Kristjaneżmu kienu prominenti b’mod partikulari f’dan ir-​rigward. X’se jiġrilu dan l-​Edom taʼ żmienna?

 Il-​Magħsar taʼ l-​Inbid

8, 9. (a) Il-​gwerrier li ra Isaija b’liema attività kien qed jokkupa ruħu? (b) Meta u kif jitgħaffeġ il-​magħsar simboliku taʼ l-​inbid?

⁸ Isaija jistaqsi lill-​gwerrier li ġie lura: “Għaliex hemm l-​aħmar fi lbiesek, u ħwejġek bħal min jgħaffeġ fil-​magħsar?” Jehovah jwieġeb: “Fil-​magħsar għaffiġt jien waħdi, mill-​poplu ma kien hemm ħadd miegħi: għaffiġthom fl-​għadab tiegħi, sħaqthom fil-​qilla tiegħi. U traxxax demmhom fuq ħwejġi, u ħammiġt ilbiesi kollu.”—Isaija 63:2, 3.

⁹ Dan il-​kliem simboliku jiddeskrivi massakru. Saħansitra l-​ilbies eleganti t’Alla hu mċappas, bħall-​ilbies taʼ wieħed li qed jgħaffeġ fil-​magħsar taʼ l-​inbid! Il-​magħsar taʼ l-​inbid huwa simbolu xieraq tan-​nassa li jsibu ruħhom fiha l-​għedewwa t’Alla Jehovah meta jaġixxi biex jeqridhom. Meta se jitgħaffeġ dan il-​magħsar simboliku taʼ l-​inbid? Il-​profeziji taʼ Ġoel u taʼ l-​appostlu Ġwanni wkoll jitkellmu dwar magħsar simboliku taʼ l-​inbid. Il-​magħsar taʼ l-​inbid taʼ dawn il-​profeziji se jitgħaffeġ meta Jehovah jgħaffeġ lill-​għedewwa tiegħu biex jeqridhom f’Armageddon. (Ġoel 4:13 [3:13, NW]; Apokalissi 14:18-20; 16:16) Il-​magħsar profetiku taʼ l-​inbid f’Isaija jipponta ’l quddiem lejn l-​istess żmien.

10. Jehovah għala jgħid li kien waħdu meta għaffeġ fil-​magħsar taʼ l-​inbid?

¹⁰ Iżda, Jehovah għala jgħid li kien waħdu meta għaffeġ f’dan il-​magħsar taʼ l-​inbid, waqt li ma kien hemm ħadd miegħu minn fost il-​popli? Bħala r-​rappreżentant t’Alla, ma kienx Ġesù Kristu se jieħu t-​tmexxija f’idejh biex jgħaffeġ fil-​magħsar taʼ l-​inbid? (Apokalissi 19:11-16) Iva, imma Jehovah qed jirreferi għall-​bnedmin, mhux għall-​ħlejjaq spirti. Hu qed jgħid li ebda bniedem m’għandu l-​ħila jeħles lill-​art mis-​segwaċi  taʼ Satana. (Isaija 59:15, 16) Qed jitħalla f’idejn Alla li Jistaʼ Kollox biex ikompli jgħaffiġhom fir-​rabja tiegħu, sakemm ikunu tfarrku kompletament.

11. (a) Jehovah għala jġib “jum taʼ vendetta”? (b) Min kienu l-​“mifdijin” fil-​qedem, u min huma llum?

¹¹ Jehovah jkompli jispjega għala jwettaqha hu stess din il-​biċċa xogħol, billi jgħid: “Kien jum taʼ vendetta f’qalbi, u s-​sena tal-​[“mifdijin,” “KŻ”] tiegħi waslet.” (Isaija 63:4) b Huwa Jehovah biss li għandu d-​dritt jesegwixxi vendetta fuq dawk li jweġġgħu lill-​poplu tiegħu. (Dewteronomju 32:35) Fil-​qedem, il-​“mifdijin” kienu l-​Lhud li sofrew taħt idejn il-​Babiloniżi. (Isaija 35:10; 43:1; 48:20) Fi żmienna huma l-​membri tal-​fdal midluk. (Apokalissi 12:17) Dawn ġew mifdijin mill-​jasar reliġjuż, bħal dawk li kienu pariġġhom fil-​qedem. U bħal dawk il-​Lhud, il-​midlukin, flimkien maʼ sħabhom in-​“nagħaġ oħra,” kienu u għadhom il-​vittmi taʼ persekuzzjoni u oppożizzjoni. (Ġwann 10:16) B’hekk, il-​profezija taʼ Isaija tassigura lill-​Kristjani llum li fiż-​żmien stabbilit minn Alla, Hu se jaġixxi għan-​nom tagħhom.

12, 13. (a) B’liema mod m’hemm ħadd min jgħinu lil Jehovah? (b) Id-​driegħ taʼ Jehovah kif iġib is-​salvazzjoni, u għadbu kif jappoġġah?

¹² Ikompli Jehovah: “Ħarist, u ma kien hemm ħadd min jgħinni: skantajt li ma kien hemm ħadd li jieqaf miegħi; imma għenni driegħi biex irbaħt, u waqaf miegħi l-​għadab tiegħi. Għaffiġt il-​popli f’għadbi, tħanthom fis-​saħna tiegħi, u demmhom xerridt maʼ l-​art.”—Isaija 63:5, 6.

 ¹³ Ebda bniedem ma jistaʼ jagħtih l-​għajnuna u jieħu l-​kredtu għall-​jum grandjuż taʼ vendetta taʼ Jehovah. Lanqas m’għandu bżonn l-​appoġġ taʼ xi bniedem biex iwettaq ir-​rieda tiegħu. c Driegħu taʼ saħħa u setgħa bla qjies huwa biżżejjed biex iwettaq din il-​biċċa xogħol. (Salm 44:4 [44:3, NW]; 98:1; Ġeremija 27:5) Iktar minn hekk, għadbu jappoġġah. Kif? Għax l-​għadab t’Alla m’huwiex xi emozzjoni mhix kontrollata imma rabja ġusta. Peress li Jehovah jaġixxi dejjem fuq prinċipji taʼ tjieba, għadbu jappoġġah u jqanqlu biex ‘ixerred maʼ l-​art’ id-​‘demm’ iċarċar taʼ l-​għedewwa tiegħu, u b’hekk jumiljahom u jegħlibhom.—Salm 75:9 [75:8, NW]; Isaija 25:10; 26:5.

Atti taʼ Qalb Tajba bl-​Imħabba minn Alla

14. Isaija liema tfakkiriet xierqa jagħti issa?

¹⁴ Fl-​imgħoddi, il-​Lhud spiss tilfu l-​apprezzament lejn l-​affarijiet li Jehovah għamel għalihom. Għalhekk, b’mod xieraq Isaija jfakkarhom għala Jehovah għamel dawn l-​affarijiet. Jiddikjara Isaija: “Irrid infakkar il-​grazzji tal-​Mulej, nsammaʼ għanja taʼ tifħir lill-​Mulej, għal dak kollu li għamel magħna, għax kbira kienet il-​ħniena tiegħu maʼ dar Iżrael; mexa magħna skond l-​imħabba tiegħu, skond it-​tjieba kbira tiegħu. Hu qal: ‘Iva, huma l-​poplu tiegħi, wliedi li ma jimxux wiċċ b’ieħor.’ U hu sar għalihom is-​Salvatur fid-​dwejjaq kollha tagħhom. Ma kienx xi messaġġier jew xi anġlu, imma hu stess salvahom għall-​imħabba u l-​ħniena tiegħu. Hu ħelishom, refagħhom, u ġarrhom dejjem fl-​imgħoddi.”—Isaija 63:7-9.

15. Jehovah kif u għala wera qalb tajba bl-​imħabba lin-​nisel t’Abraham fl-​Eġittu?

 ¹⁵ X’eżempju li jispikka jagħtina Jehovah meta juri l-​qalb tajba bl-​imħabba, imħabba leali! (Salm 36:8; 62:13 [36:7; 62:12, NW]) Jehovah fforma rabta taʼ mħabba m’Abraham. (Mikea 7:20) Lill-​patrijarka wiegħdu li permezz taż-​żerriegħa, jew nisel tiegħu, il-​ġnus kollha taʼ l-​art kienu se jitbierku. (Ġenesi 22:17, 18) Jehovah żamm maʼ din il-​wegħda, billi wera tjubija abbundanti lid-​dar taʼ Iżrael. Fost l-​atti leali tiegħu spikkat l-​okkażjoni meta ħeles lin-​nisel t’Abraham mill-​jasar fl-​Eġittu.—Eżodu 14:30.

16. (a) Jehovah x’opinjoni kellu meta għamel il-​patt tiegħu maʼ l-​Iżraelin? (b) Alla kif jaġixxi man-​nies tiegħu?

¹⁶ Wara li ħariġhom mill-​Eġittu, Jehovah ġab lill-​Iżraelin lejn il-​Muntanja Sinaj u għamlilhom din il-​wegħda: “Issa, jekk tisimgħu leħni u żżommu l-​patt tiegħi, intom tkunu l-​wirt tiegħi . . . Intom tkunu għalija saltna taʼ qassisin u ġens qaddis.” (Eżodu 19:5, 6) Kien Jehovah qed iqarraq bihom meta għamel din il-​proposta? Le, għax Isaija jirrivela li Jehovah qal bejnu u bejn ruħu: “Iva, huma l-​poplu tiegħi, wliedi li ma jimxux wiċċ b’ieħor.” Wieħed studjuż josserva: “L-​‘iva’ m’hijiex digriet ibbażat fuq is-​sovranità jew l-​għarfien minn qabel: hija t-​tama u l-​fiduċja bbażati fuq l-​imħabba.” Iva, Jehovah kien onest meta għamel il-​patt tiegħu, billi ried sinċerament li n-​nies tiegħu jirnexxu. Minkejja n-​nuqqasijiet tagħhom li kienu ovvji, hu wera fiduċja fihom. Kemm hi ħaġa taʼ l-​għaġeb li nqimu lil Alla bħal dan li għandu din il-​fiduċja fl-​adoraturi tiegħu! L-​anzjani llum jgħinu ħafna biex isaħħu lil dawk li huma fdati f’idejhom meta juru fiduċja bħal din fin-​nies t’Alla, li dawn bażikament huma tajbin.—2 Tessalonikin 3:4; Lhud 6:9, 10.

17. (a) Jehovah liema evidenza taʼ mħabbtu wera għall-​Iżraelin? (b) Illum liema fiduċja jistaʼ jkollna?

 ¹⁷ Minkejja dan, is-​salmista jgħid dwar l-​Iżraelin: “Nsew ’l Alla, li salvahom, li għamel ħwejjeġ kbar fl-​Eġittu.” (Salm 106:21) Minħabba l-​attitudni tagħhom taʼ diżubbidjenza u kburija huma spiss daħlu f’ċirkustanzi mwiegħra. (Dewteronomju 9:6) Ma baqax Jehovah jurihom qalb tajba bl-​imħabba? Għal kuntrarju, Isaija jirrakkonta li “fid-​dwejjaq kollha tagħhom” kien jitnikket. Kemm iħoss Jehovah għall-​qaddejja tiegħu! Bħalma jiġri fil-​każ taʼ missier li jħobb, Alla tgħidx kemm ħass meta ra lil uliedu jsofru, saħansitra meta s-​sofferenza kienet ir-​riżultat tal-​bluha tagħhom stess. Bħalma tbassar u biex juri mħabbtu, hu bagħat lill-​“messaġġier” persunali tiegħu, li x’aktarx hu Ġesù fl-​eżistenza tiegħu qabel ma sar bniedem, biex idaħħalhom fl-​Art Imwiegħda. (Eżodu 23:20) Hekk Jehovah refaʼ u ġarr lill-​ġens, “bħalma bniedem jerfaʼ lil ibnu.” (Dewteronomju 1:31; Salm 106:10) Illum nistgħu nkunu fiduċjużi li Jehovah hu konxju bl-​istess mod tas-​sofferenzi tagħna u li jħoss għalina meta nkunu f’xi sitwazzjoni diffiċli. Nistgħu bil-​fiduċja kollha ‘nixħtu fuqu l-​ħsibijiet kollha tagħna għax hu jaħseb fina.’—1 Pietru 5:7.

Alla Jsir Għadu

18. Jehovah għala sar l-​għadu tal-​poplu tiegħu?

¹⁸ Iżda, qatt m’għandna nonqsu li napprezzaw il-​qalb tajba bl-​imħabba t’Alla. Ikompli Isaija: “Huma ħaduha kontrieh, u nikktu l-​ispirtu qaddis tiegħu, u sar għadu għalihom u tqabad kontriehom.” (Isaija 63:10) Jehovah wissa li għalkemm hu Alla li jagħder u jħenn, “ma jħalli xejn għaddej” mingħajr ma jikkastigah. (Eżodu 34:6, 7) L-​Iżraelin poġġew lilhom infushom  f’pożizzjoni biex jiġu kastigati billi ħaduha drawwa li jirribellaw. “Ftakar u tinsiex kemm inkurlajt lill-​Mulej, Alla tiegħek, fid-​deżert,” fakkarhom Mosè. “Minn dakinhar li ħriġt mill-​art taʼ l-​Eġittu sakemm wasaltu hawn, dejjem ħadtuha kontra l-​Mulej.” (Dewteronomju 9:7) Billi rreżistew l-​effetti bnien taʼ l-​ispirtu t’Alla, huma weġġgħuh, jew nikktuh. (Efesin 4:30) Lil Jehovah ġagħluh isir l-​għadu tagħhom.—Levitiku 26:17; Dewteronomju 28:63.

19, 20. Il-​Lhud f’liema affarijiet jiftakru, u għala?

¹⁹ Fin-​niket tagħhom, xi Lhud jitqanqlu biex jirriflettu fuq l-​imgħoddi. Jgħid Isaija: “Ftakru f’jiem l-​imgħoddi: Mosè, il-​qaddej tiegħu. ‘Fejn hu dak li ħeles mill-​baħar, ir-​ragħaj tal-​poplu tiegħu? Fejn hu dak li qiegħed f’nofshom, l-​ispirtu qaddis tiegħu? Hu li kien jimxi fuq il-​leminija taʼ Mosè bid-​driegħ imsebbaħ tiegħu? Li feraq il-​baħar quddiemhom biex jagħmel għalih isem li jibqaʼ għal dejjem? Li mexxiehom qalb il-​mewġ u ma għotrux bħal żiemel fid-​deżert? Bħal annimal li nieżel fil-​wied, mmexxi mill-​ispirtu tal-​Mulej.’”—Isaija 63:11-14a. d

²⁰ Iva, waqt li jsofru r-​riżultati tad-​diżubbidjenza tagħhom, il-​Lhud jixxennqu għal dawk il-​jiem meta Jehovah kien il-​Ħellies tagħhom u mhux l-​għadu tagħhom. Huma jiftakru kif ir-​‘rgħajja’ tagħhom, Mosè u Aron, għaddewhom qawwijin u sħaħ minn ġol-​Baħar l-​Aħmar. (Salm 77:21 [77:20, NW]; Isaija 51:10) Jiftakru fi żmien meta minflok ma nikktu l-​ispirtu t’Alla,  tmexxew minnu permezz tal-​gwida mogħtija minn Mosè u minn irġiel ixjeħ oħrajn maħturin bl-​ispirtu. (Numri 11:16, 17) Jiftakru wkoll li raw id-​“driegħ imsebbaħ” tas-​saħħa taʼ Jehovah meta ntuża għan-​nom tagħhom permezz taʼ Mosè! Maż-​żmien, Alla ħariġhom mid-​deżert kbir u tal-​biżaʼ u daħħalhom f’art li tnixxi ħalib u għasel—post taʼ mistrieħ. (Dewteronomju 1:19; Ġożwè 5:6; 22:4) Iżda issa l-​Iżraelin isofru għaliex tilfu r-​relazzjoni favorevoli li kellhom m’Alla!

‘Isem Glorjuż Għalih Innifsu’

21. (a) L-​Iżraelin xi privileġġ kbir setaʼ jkollhom f’konnessjoni maʼ l-​isem t’Alla? (b) X’kienet ir-​raġuni ewlenija t’Alla meta ħeles lid-​dixxendenti t’Abraham mill-​Eġittu?

²¹ Xorta waħda, it-​telf materjali taʼ l-​Iżraelin m’hu xejn meta jitqabbel mat-​telf tal-​privileġġ li kellhom u li tawh bis-​sieq, jiġifieri, il-​privileġġ li jkollhom sehem f’li jigglorifikaw l-​isem t’Alla. Mosè wiegħed lill-​Iżraelin: “Il-​Mulej jagħmel minnek poplu kkonsagrat għalih, skond ma ħaliflek, jekk int tħares l-​ordnijiet tal-​Mulej, Alla tiegħek, u timxi fi triqatu. U jaraw il-​ġnus kollha taʼ l-​art li int iġġib isem il-​Mulej, u jibżgħu minnek.” (Dewteronomju 28:9, 10) Meta Jehovah aġixxa biex jiddefendi lid-​dixxendenti t’Abraham, billi ħelishom mill-​jasar fl-​Eġittu, dan ma kienx qed jagħmlu sempliċement biex il-​ħajja ssir iktar konvenjenti jew pjaċevoli għalihom. Hu kien qed jaġixxi għan-​nom taʼ xi ħaġa ferm iktar importanti—ismu. Iva, hu kien qed jaċċerta ruħu li ismu “jixxandar maʼ l-​art kollha.” (Eżodu 9:15, 16) U meta Alla wera l-​ħniena wara l-​irvell taʼ l-​Iżraelin fid-​deżert, ir-​raġuni għala għamel hekk ma kinitx biss għax ħass għalihom. Jehovah nnifsu qal: “Kelli nagħmel mod ieħor  minħabba ismi; li ma jkunx imżeblaħ f’għajnejn il-​ġnus.”—Eżekjel 20:8-10.

22. (a) Fil-​futur, Alla għala se jiġġieled mill-​ġdid għan-​nom tal-​poplu tiegħu? (b) L-​imħabba li għandna għall-​isem t’Alla b’liema modi teffettwa dak li nagħmlu?

²² X’konklużjoni qawwija jagħtiha Isaija mbagħad lil din il-​profezija! Hu jgħid: “Hekk int mexxejt il-​poplu tiegħek biex tagħmel għalik isem glorjuż.” (Isaija 63:14b) Issa jistaʼ jidher ċar għala Jehovah jiġġieled b’setgħa kbira għall-​interess tal-​poplu tiegħu. Huwa biex jagħmel isem glorjuż għalih innifsu. B’hekk, il-​profezija taʼ Isaija sservi bħala tfakkira qawwija illi li wieħed iġorr l-​isem taʼ Jehovah m’huwiex biss privileġġ taʼ l-​għaġeb imma wkoll responsabbiltà kbira. Il-​Kristjani veri llum iħobbu l-​isem taʼ Jehovah iktar milli jħobbu lil ħajjithom stess. (Isaija 56:6; Lhud 6:10) Ma jridux li jagħmlu xi ħaġa li għandha mnejn iġġib tmaqdir fuq dan l-​isem sagru. Huma jwieġbu għall-​imħabba leali t’Alla billi jibqgħu leali lejh. U peress li jħobbu l-​isem glorjuż taʼ Jehovah, jixxennqu għal dak il-​jum meta hu se jgħaffeġ lill-​għedewwa tiegħu fil-​magħsar taʼ l-​inbid tar-​rabja tiegħu—mhux sempliċement għaliex dan se jgawdu minnu imma għaliex se jwassal għall-​glorifikazzjoni taʼ l-​isem taʼ dak Alla li huma tant iħobbu.—Mattew 6:9.

[Noti taʼ taħt]

[Mistoqsijiet taʼ Studju]

[Stampa f’paġna 359]

Jehovah kellu stennijiet kbar għall-​poplu tiegħu