Jerġgħu Lura Lejn il-Qima taʼ Jehovah
Kapitlu Sebgħa
Jerġgħu Lura Lejn il-Qima taʼ Jehovah
1. X’inhuma l-ismijiet taʼ tnejn mill-allat prinċipali taʼ Babilonja, u x’inhu mbassar dwarhom?
META Iżrael jiġi eżiljat f’Babilonja, se jkun imdawwar bil-qima falza. Fi żmien Isaija, in-nies taʼ Jehovah għadhom f’pajjiżhom, u għandhom it-tempju u s-saċerdozju. Madankollu, ħafna mill-ġens dedikat t’Alla ċedew għall-idolatrija. Għalhekk, huwa vitali li jitħejjew minn qabel sabiex ma jiġux imsaħħrin mill-allat foloz taʼ Babilonja jew jiġu ttantati biex jaqduhom. Għaldaqstant, meta jitkellem profetikament dwar tnejn mill-allat prinċipali taʼ Babilonja, Isaija jgħid: “Iltewa Bel, tgħawweġ Nebu! Saru xbihathom tagħbija għall-bhejjem, tagħbija għad-dbejjeb; tagħbijietkom tagħbija għall-bhejjem mifnija.” (Isaija 46:1) Bel huwa l-alla ewlieni, f’għamla taʼ statwa, adorat mill-Kaldin. Nebu huwa meqjum bħala alla taʼ għerf u tagħlim. Ir-rispett gawdut minn dawn iż-żewġ allat jidher mill-fatt li ismijiethom huma inklużi f’għadd taʼ ismijiet persunali tal-Babiloniżi—Beltassar, Nabopolassar, Nabukodonosor, u Nebużaradan, biex insemmu ftit minnhom.
2. Kif inhu enfasizzat kemm ma jiswew xejn l-allat taʼ Babilonja?
2 Isaija jgħid li Bel “iltewa” u Nebu “tgħawweġ.” Dawn l-allat foloz se jiġu mitfugħin maʼ l-art. Meta Jehovah jwettaq l-atti taʼ ġudizzju tiegħu kontra Babilonja, dawn l-allat mhux se jkunu jistgħu jgħinu lil dawk li jqimuhom. Lanqas ma se jkunu jistgħu saħansitra jsalvaw lilhom infushom! Bel u Nebu mhux se jkunu jistgħu jinġarru iktar fil-post onorat fil-purċissjonijiet, bħal per eżempju f’nhar il-festa Babiloniża taʼ Jum l-Ewwel tas-Sena. Minflok, se jkollhom jiġu mkaxkrin bħal xkora minn dawk li jqimuhom. Minflok tifħir u qima se jirċievu tmaqdir u twaqqigħ għaċ-ċajt.
3. (a) X’se jaħsadhom lill-Babiloniżi? (b) Illum x’nistgħu nitgħallmu minn dak li ġralhom l-allat taʼ Babilonja?
3 Kif se jinħasdu l-Babiloniżi meta jsiru jafu li l-idoli għeżież tagħhom m’humiex ħlief tagħbija li trid tinġarr minn bhejjem għajjenin! Bl-istess mod illum, l-allat tad-dinja—l-affarijiet li jafdaw fihom in-nies u li għalihom jaħlu l-enerġija tagħhom u saħansitra jagħtu ħajjithom—huma biss frugħa. L-għana, l-armamenti, il-pjaċiri, il-ħakkiema, il-pajjiż jew is-simboli li jirrappreżentawh, u bosta affarijiet oħrajn saru oġġetti taʼ devozzjoni. Il-frugħa taʼ dawn l-allat se tintwera fiż-żmien stabbilit minn Jehovah.—Danjel 11:38; Mattew 6:24; Atti 12:22; Filippin 3:19; Kolossin 3:5; Apokalissi 13:14, 15.
4. L-allat taʼ Babilonja f’liema sens ‘jitgħawġu’ u ‘jiltwew’?
4 Biex tkompli tenfasizza kif l-allat taʼ Babilonja fallew għalkollox, il-profezija tkompli: “Tgħawwġu u ltwew flimkien, ma jifilħux isalvaw lil min iġorrhom; u huma nfushom imorru fil-jasar.” (Isaija 46:2) L-allat taʼ Babilonja donnhom qegħdin ‘jitgħawġu’ u ‘jiltwew’ bħallikieku ġew feruti fil-battalja jew tgħakksu bix-xjuħija. Lanqas biss jistgħu jħaffu t-tagħbija jew isalvaw lill-povri bhejjem li jġorruhom. Għalhekk, għandu l-poplu f’patt maʼ Jehovah, avolja jinsab fil-jasar f’Babilonja, jagħtihom xi unur? Le! B’mod simili, il-qaddejja midlukin taʼ Jehovah, anki meta kienu fil-jasar spiritwali, m’onorawhomx lill-allat foloz taʼ “Babilonja l-Kbira.” Dawn l-allat ma kellhomx il-ħila jżommu lura l-waqgħa tagħha fl-1919 u mhux se jkollhom il-ħila jsalvawha mill-gwaj li ġej fuqha matul it-tribulazzjoni l-kbira.—Apokalissi 18:2, 21; Mattew 24:21.
5. Illum il-Kristjani kif jevitaw li jirrepetu l-iżbalji tal-Babiloniżi li kienu jqimu l-idoli?
5 Illum il-Kristjani veri ma jmilu quddiem ebda tip taʼ idolu. (1 Ġwann 5:21) Il-kurċifissi, il-kuruni tar-rużarju, u x-xbihat tal-qaddisin mhux se jagħmluha iktar faċli biex iressquna għand il-Ħallieq. Ma jistgħux jidħlu għalina quddiem Alla. Fl-ewwel seklu, Ġesù għallem lid-dixxipli tiegħu kif għandhom iqimu lil Alla b’mod xieraq meta qal: “Jiena hu t-Triq, il-Verità u l-Ħajja. Ħadd ma jmur għand il-Missier jekk mhux permezz tiegħi. Iva, jekk titolbu xi ħaġa f’ismi, jiena nagħmilha.”—Ġwann 14:6, 14.
“Rfajtkom sa mill-Ġuf”
6. Jehovah kif inhu differenti mill-allat tal-ġnus?
6 Wara li kixef il-frugħa tal-qima lill-allat f’għamla taʼ statwi f’Babilonja, Jehovah jgħid lill-poplu tiegħu: “Isimgħuni, dar Ġakobb, u l-fdal kollu taʼ dar Iżrael; ġarrejtkom sa mit-twelid, rfajtkom sa mill-ġuf.” (Isaija 46:3) Kemm hu differenti Jehovah mix-xbihat minquxin taʼ Babilonja! L-allat taʼ Babilonja ma jistgħu jagħmlu xejn affattu għal dawk li jqimuhom. Jekk se jiċċaqalqu, iridu jinġarru minn xi bhima tat-tagħbija. B’kuntrast, Jehovah ilu jerfaʼ lin-nies tiegħu. Hu sostniehom “sa mill-ġuf,” minn dak in-nhar li ssawwar il-ġens. Memorji għeżież taʼ meta Jehovah refagħhom għandhom jinkuraġġixxu lil-Lhud biex jaħarbu l-qima taʼ l-idoli u jpoġġu l-fiduċja tagħhom fih bħala l-Missier u l-Ħabib tagħhom.
7. Il-mod kif Jehovah jieħu ħsieb b’mod teneru lil dawk li jqimuh kif inhu saħansitra akbar minn kif il-ġenituri umani jieħdu ħsieb uliedhom?
7 Jehovah għandu iktar kliem ħelu għall-poplu tiegħu: “Sa xjuħitkom jien dejjem hu, sa meta jibjad xagħarkom nibqaʼ nġorrkom. Jiena għamiltkom u jien nitgħabba bikom; u jien inġorrkom u nsalvakom.” (Isaija 46:4) Il-mod kif Jehovah jieħu ħsieb in-nies tiegħu jisboq lil dak taʼ xi ġenitur uman l-iktar attent. Hekk kif it-tfal jibdew jikbru, il-ġenituri għandhom mnejn iħossu inqas u inqas responsabbiltà lejhom. Meta l-ġenituri jixjieħu, ikunu t-tfal li spiss jieħdu ħsiebhom. Fil-każ taʼ Jehovah, dan qatt ma jistaʼ jseħħ. Hu qatt ma jieqaf jieħu ħsieb it-tfal umani tiegħu—saħansitra fi xjuħithom. Illum dawk li jqimu lil Alla jafdaw u jħobbu lill-Ħallieq tagħhom u jsibu faraġ kbir f’dan il-kliem tal-profezija taʼ Isaija. M’għandhomx għalfejn ikunu ansjużi dwar il-jiem jew is-snin li baqgħalhom iqattgħu f’din is-sistema t’affarijiet. Jehovah jwiegħed li ‘jibqaʼ jġorr’ lil dawk li huma mdaħħlin fiż-żmien, billi jagħtihom is-saħħa li għandhom bżonn biex jissaportu u jibqgħu leali. Hu se jerfagħhom, isaħħaħhom, u jsalvahom.—Lhud 6:10.
Oqgħod Attent mill-Idoli taʼ Żmienna
8. Xi nies minn pajjiż Isaija għamlu liema dnub li ma jistax jiġi skużat?
8 Immaġina d-diżappunt li hemm maħżun għall-Babiloniżi li jpoġġu l-fiduċja tagħhom fl-idoli, meta dawn se juru li huma inutli għall-aħħar! Għandu Iżrael jemmen li dawn l-allat jistgħu jitqabblu maʼ Jehovah? Dażgur li le. Jehovah jagħmel sew li jistaqsi: “Maʼ min se xxebbhuni u ddaqqsuni, tqabbluni bħallikieku ndaqs?” (Isaija 46:5) Kemm ma jistax jiġi skużat il-fatt li xi nies minn pajjiż Isaija daru biex iqimu l-istatwi li la jitkellmu, la għandhom ħajja, u lanqas jiċċaqalqu! Għal ġens li jaf lil Jehovah, huwa tabilħaqq bluha li jistrieħ fuq xbihat bla ħajja u bla difiża magħmulin mill-bniedem.
9. Iddeskrivi r-raġunar vojt taʼ xi wħud li jqimu l-idoli.
9 Ikkunsidra r-raġunar vojt taʼ dawk li jqimu l-idoli. Il-profezija tkompli: “Dawk li joħorġu d-deheb mill-ħorġa u jiżnu l-fidda bil-miżien, jikru l-arġentier biex jagħmilhielhom alla, li mbagħad quddiemu jmilu u jqimuh wiċċhom maʼ l-art!” (Isaija 46:6) L-adoraturi lesti li jonfqu flejjes kbar biex jagħmlu alla ħa jadurawh, bħallikieku idolu li jiswa ħafna flus għandu iktar qawwa li jsalvahom minn idolu taʼ l-injam. Xorta waħda, ikun kemm ikun kbir l-isforz li jsir jew iqum kemm iqum il-materjal li jintuża, idolu bla ħajja jibqaʼ idolu bla ħajja, xejn iktar u xejn inqas.
10. Kif inhi deskritta l-frugħa assoluta tal-qima lill-idoli?
10 Biex tkompli tenfasizza l-bluha tal-qima lill-idoli, il-profezija tkompli: “Jerfgħuh fuq l-ispallejn u jġorruh, u jqegħduh f’postu u jibqaʼ hemm, u minn postu ma jiċċaqlaqx. Jekk xi ħadd isejjaħlu, ma jweġibx, u minn hemmu ma jeħilsux.” (Isaija 46:7) Kemm hu taċ-ċajt li titlob lil xi xbieha li la għandha l-ħila tismaʼ u lanqas taġixxi! Is-salmista jiddeskrivi tajjeb kemm huma inutli dawn l-oġġetti taʼ qima: “Fidda u deheb huma l-allat tagħhom, xogħol taʼ jdejn il-bniedem. Għandhom il-fomm, u ma jitkellmux; għandhom l-għajnejn, u ma jarawx; għandhom il-widnejn, u ma jisimgħux; għandhom l-imnieħer, u ma jxommux; għandhom l-idejn, u ma jmissux; għandhom ir-riġlejn, u ma jimxux; ebda leħen ma joħroġ minn fommhom. Bħalhom ikunu dawk li jagħmluhom, u dawk kollha li jittamaw fihom.”—Salm 115:4-8.
“Kunu Rġiel”
11. Lil dawk li jkunu bejn ħalltejn x’se jgħinhom biex juru l-kuraġġ?
11 Wara li wriehom il-frugħa tal-qima lill-idoli, Jehovah issa jagħti lin-nies tiegħu raġunijiet għala għandhom jaqduh: “Ftakru f’dan u kunu rġiel; aħsbu fih, ja midinbin. Ftakru fl-ibgħad żminijiet, għax jien hu Alla, u ħadd ħliefi m’hemm. Jien Alla u m’hemm ħadd bħali.” (Isaija 46:8, 9) Dawk li jkunu bejn ħalltejn jekk għandhomx iħaddnu l-qima vera jew l-idolatrija għandhom jiftakru fil-ġrajjiet taʼ l-imgħoddi. Għandhom iżommu f’moħħhom l-affarijiet li għamel Jehovah. Dan se jgħinhom biex juru l-kuraġġ u jagħmlu dak li hu xieraq. Se jgħinhom biex jerġgħu lura lejn il-qima taʼ Jehovah.
12, 13. Il-Kristjani f’liema taqbid qegħdin jissaraw, u kif jistgħu joħorġu rebbiħin?
12 Illum dan l-inkuraġġiment għadu meħtieġ. Bħall-Iżraelin, Kristjani sinċieri jridu jiġġieldu kontra t-tentazzjonijiet li jkollhom u l-imperfezzjonijiet tagħhom stess. (Rumani 7:21-24) Iżjed minn hekk, huma qegħdin jitqabdu f’battalja spiritwali maʼ għadu li, għalkemm ma jidhirx, huwa b’saħħtu immensament. L-appostlu Pawlu jgħid: “Il-ġlieda tagħna m’hijiex kontra d-demm u l-laħam, imma kontra s-Setgħat, kontra l-Qawwiet, kontra l-Prinċpijiet taʼ din id-dinja taʼ dlamijiet, kontra l-ispirti ħżiena li jgħammru fil-wisaʼ tas-smewwiet.”—Efesin 6:12.
13 Satana u d-demonji tiegħu se jagħmlu kulma hu possibbli biex jiżvijaw lill-Kristjani mill-qima vera. Biex ikollhom suċċess fil-ġlieda tagħhom, il-Kristjani jeħtieġ li jsegwu l-pariri taʼ Jehovah u juru l-kuraġġ. Kif? Jispjega l-appostlu Pawlu: “Ilbsu l-armatura taʼ Alla biex tkunu tifilħu tieqfu għat-tnassis tax-Xitan.” Lill-qaddejja tiegħu Jehovah ma jibgħathomx biex jiġġieldu b’nofs armar. L-armatura spiritwali tagħhom tinkludi ‘t-tarka tal-fidi; li biha jistgħu jitfu l-vleġeġ kollha tan-nar tal-ħażin.’ (Efesin 6:11, 16) L-Iżraelin dinbu għaliex injoraw il-provvedimenti spiritwali li Jehovah kien għamel għalihom. Kieku mmeditaw fuq l-atti setgħana li Jehovah wettaq ripetutament għan-nom tagħhom, qatt u qatt ma kienu se jduru lejn il-qima moqżieża lill-idoli. Jalla nitgħallmu mill-eżempju tagħhom u nkunu determinati li qatt ma nċedu fil-ġlieda biex nagħmlu dak li hu sewwa.—1 Korintin 10:11.
14. Jehovah liema abbiltà jsemmi sabiex juri li hu l-uniku Alla veru?
14 Jehovah jiddikjara: “Sa mill-bidu ngħarraf it-tmiem, u sa minn qabel dak li ma seħħx, u ngħid: ‘Il-ħsieb tiegħi għad iseħħ, u nagħmel kull ma rrid.’” (Isaija 46:10) Liema alla ieħor jistaʼ jitqabbel maʼ Jehovah f’dan ir-rigward? L-abbiltà li jbassar il-futur hija prova li tispikka tad-Divinità tal-Ħallieq. Madankollu, biex it-twettiq taʼ l-affarijiet li jitbassru jkun żgurat, li jkun jafhom qabel ma jseħħu mhux biżżejjed. Id-dikjarazzjoni “l-ħsieb tiegħi għad iseħħ” tenfasizza kemm l-iskop stabbilit minn Alla ma jinbidilx. Ladarba Jehovah għandu qawwa bla limitu, m’hemm xejn fl-univers li jistaʼ jżommu milli jwettaq ir-rieda tiegħu. (Danjel 4:32 [4:35, NW]) Għalhekk, nistgħu nibqgħu ċerti li l-profeziji kollha li għadhom ma twettqux tabilħaqq li se jseħħu fiż-żmien stabbilit minn Alla.—Isaija 55:11.
15. L-attenzjoni tagħna tinġibed lejn liema eżempju mill-aqwa taʼ l-abbiltà taʼ Jehovah li jbassar il-futur?
15 Il-profezija taʼ Isaija issa tiġbdilna l-attenzjoni lejn eżempju eċċellenti taʼ l-abbiltà taʼ Jehovah li jbassar ġrajjiet fil-futur u mbagħad iġiegħel li kliemu jseħħ: “Insejjaħ tajra tal-priża mil-lvant, mill-art imbiegħda l-bniedem li jtemm ħsiebi. Hekk tkellimt u hekk nagħmel; hekk iddeċidejt, u nagħmel hekk.” (Isaija 46:11) Bħala Dak li ‘sa mill-bidu jgħarraf it-tmiem,’ Alla Jehovah se jsawwar iċ-ċirkustanzi fil-ġrajjiet tad-dinja sabiex iwettaq il-ħsieb tiegħu. Hu se jsejjaħ lil Ċiru biex jiġi minfejn titlaʼ x-xemx, jew il-Persja fil-“lvant,” fejn se jkun hemm Pasargade, il-belt kapitali favorita taʼ Ċiru. Dan se jkun bħal “tajra tal-priża,” billi jaqbeż ħabta u sabta u bla mistenni għal fuq Babilonja.
16. Jehovah kif jikkonferma li t-tbassir tiegħu dwar Babilonja hu ċert?
16 Li t-tbassir taʼ Jehovah dwar Babilonja huwa ċert jiġi konfermat bil-kliem, “Hekk tkellimt u hekk nagħmel.” Waqt li l-bniedem imperfett għandu t-tendenza li jagħmel wegħdi bl-addoċċ, il-Ħallieq qatt ma jonqos li jwettaq kelmtu. Peress li Jehovah hu dak Alla “li ma jigdibx,” nistgħu nibqgħu ċerti li jekk ‘iddeċieda hekk,’ ‘hekk se jagħmel.’—Titu 1:2.
Qlub bla Fidi
17, 18. Min jistaʼ jiġi deskritt bħala “taʼ qalb iebsa” (a) fil-qedem? (b) illum?
17 Għal darb’oħra, Jehovah jdawwar l-attenzjoni tiegħu b’mod profetiku lejn il-Babiloniżi, billi jgħid: “Isimgħuni intom taʼ qalb iebsa, intom l-imbegħdin mis-sewwa.” (Isaija 46:12) L-espressjoni “intom taʼ qalb iebsa” tiddeskrivi lil dawk li huma stinati u determinati f’li jopponu r-rieda t’Alla. Bla dubju, il-Babiloniżi huma mbegħdin sew minn Alla. Il-mibegħda tagħhom għal Jehovah u l-poplu tiegħu tqanqalhom biex jeqirdu lil Ġerusalemm u t-tempju tagħha u biex iġorru lill-abitanti tagħha fl-eżilju.
18 Illum dawk li għandhom qalb iebsa li ma temminx jirrifjutaw b’mod stinat li jagħtu widen għall-messaġġ tas-Saltna, li qed jiġi pridkat fl-art abitata kollha. (Mattew 24:14) Ma jridux jirrikonoxxu lil Jehovah bħala Dak li għandu d-dritt li jkun Sovran. (Salm 83:19 [83:18, NW]; Apokalissi 4:11) Peress li qlubhom huma “mbegħdin mis-sewwa,” huma jirreżistu u jopponu r-rieda tiegħu. (2 Timotju 3:1-5) Bħall-Babiloniżi, huma jirrifjutaw li jagħtu widen lil Jehovah.
Is-Salvazzjoni minn Alla Mhix Se Tiddawwar
19. Jehovah b’liema mod se jwettaq att taʼ tjieba għal Iżrael?
19 L-aħħar kliem taʼ Isaija kapitlu 46 jenfasizza xi aspetti mill-personalità taʼ Jehovah: “Nqarreb il-ġustizzja tiegħi: m’hijiex fil-bogħod, u s-salvazzjoni tiegħi ma tiddawwarx. U nqiegħed is-salvazzjoni f’Sijon għal Iżrael, il-foħrija tiegħi.” (Isaija 46:13) Meta Alla jeħles lil Iżrael, dan se jkun att taʼ ġustizzja u tjieba. Hu mhux se jippermetti li l-eżilju tal-poplu tiegħu jiġbed fit-tul. Is-salvazzjoni taʼ Sijon se tiġi fiż-żmien xieraq, mhix se ‘tiddawwar.’ Wara li jinħelsu mill-jasar, l-Iżraelin se jsiru spettaklu għall-ġnus taʼ madwarhom. Meta Jehovah jeħles lill-ġens tiegħu, din se tkun xiehda tal-qawwa li għandu biex isalva. Kulħadd se jkun jistaʼ jara kemm Bel u Nebu, l-allat taʼ Babilonja, ma jiswew għalxejn. Se jiġi rivelat kemm huma bla saħħa.—1 Slaten 18:39, 40.
20. Il-Kristjani kif jistgħu jkunu ċerti li ‘s-salvazzjoni taʼ Jehovah mhix se tiddawwar’?
20 Fis-sena 1919, Jehovah ħeles lill-poplu tiegħu mill-jasar spiritwali. Ma ddawwarx. Din il-ġrajja, kif ukoll il-ġrajjiet li seħħew fil-qedem meta Babilonja waqgħet taħt idejn Ċiru, jinkuraġġuna llum. Jehovah wiegħed li se jtemm din is-sistema t’affarijiet mill-agħar, inkluż il-qima falza tagħha. (Apokalissi 19:1, 2, 17-21) Mill-mod kif jaraha l-bniedem, xi Kristjani għandhom mnejn iħossu li s-salvazzjoni tagħhom iddawret. Madankollu, il-fatt li Jehovah juri l-paċenzja sakemm jasal iż-żmien stabbilit minnu biex iwettaq din il-wegħda huwa tassew att taʼ tjieba. Wara kollox, “[Jehovah] ma jridx li xi ħadd jintilef, imma li kulħadd jersaq għall-indiema.” (2 Pietru 3:9) Għalhekk, kun ċert li sewwa sew bħalma ġara fi żmien Iżrael tal-qedem, ‘is-salvazzjoni ma tiddawwarx.’ Tabilħaqq, hekk kif jum is-salvazzjoni jersaq eqreb, Jehovah b’imħabba jkompli jistieden lin-nies: “Fittxu l-Mulej sakemm tistgħu ssibuh, sejjħulu sakemm hu fil-qrib! Ħa jħalli triqtu l-midneb, u l-bniedem il-ħażin fehmietu; ħa jerġaʼ lura għand il-Mulej u jħenn għalih, għand Alla tagħna għax hu jaħfer ħafna.”—Isaija 55:6, 7.
[Mistoqsijiet taʼ Studju]
[Stampi f’paġna 94]
L-allat taʼ Babilonja ma jipproteġuhiex mill-qerda
[Stampi f’paġna 98]
Illum il-Kristjani jridu joqogħdu attenti mill-idoli taʼ żmienna
[Stampi f’paġna 101]
Uri l-kuraġġ biex tagħmel dak li hu sewwa