Kapitlu Tnejn

Kliem Profetiku taʼ Faraġ li Jinvolvi Lilek

Isaija 41:1-29

1. Għala għandna nkunu interessati fil-​profezija taʼ Isaija?

 GĦALKEMM Isaija kiteb il-​ktieb li jġorr ismu kważi 3,000 sena ilu, dan xorta waħda għandu valur siewi għalina llum. Nistgħu nitgħallmu prinċipji vitali mill-​ġrajjiet storiċi li kiteb dwarhom. U nistgħu nibnu l-​fidi tagħna jekk nistudjaw il-​profeziji li hu kiteb f’isem Jehovah. Iva, Isaija kien profeta t’Alla l-​ħaj. Jehovah ispirah biex jikteb l-​istorja bil-​quddiem—biex jiddeskrivi ġrajjiet qabel ma seħħew. Jehovah b’hekk wera li hu jistaʼ kemm ibassar il-​futur kif ukoll isawru. Wara li jistudjaw il-​ktieb taʼ Isaija, il-​Kristjani veri jsiru konvinti li Jehovah se jwettaq dak kollu li wiegħed.

2. X’kienet is-​sitwazzjoni f’Ġerusalemm meta Isaija kiteb il-​ktieb profetiku tiegħu, u x’bidla kellha sseħħ?

² Sa dakinhar li Isaija kien spiċċa jikteb il-​profezija tiegħu, Ġerusalemm kienet irreżistiet it-​theddida mill-​Assirja. It-​tempju kien għadu wieqaf, u n-​nies kienu għaddejjin bil-​ħajja tagħhom taʼ kuljum bħalma kienu għamlu għal mijiet taʼ snin. Madankollu, din is-​sitwazzjoni kellha tinbidel. Kellu jiġi żmien meta l-​għana tas-​slaten Lhud kellu jinġarr lejn Babilonja u ż-​żgħażagħ Lhud kellhom isiru uffiċjali tal-​palazz irjali f’din il-​belt. a (Isaija 39:6, 7) Dan kellu jseħħ iktar minn 100 sena wara.—2 Slaten 24:12-17; Danjel 1:19.

3. X’messaġġ insibu f’Isaija kapitlu 41?

 ³ Madankollu, il-​messaġġ t’Alla permezz taʼ Isaija m’huwiex biss messaġġ taʼ kundanna. Kapitlu 40 tal-​ktieb tiegħu jibda bil-​kelma “Farrġu.” b Il-​Lhud kellhom jitfarrġu biċ-​ċertezza li huma jew uliedhom kienu se jkunu jistgħu jirritornaw lejn art twelidhom. Kapitlu 41 jissokta b’dan il-​messaġġ taʼ faraġ u jbassar li Jehovah kellu jqajjem sultan taʼ qawwa kbira biex iwettaq ir-​rieda divina. Fih insibu affarijiet li jqawwu l-​qalb u jinkuraġġixxi l-​fiduċja f’Alla. Jikxef ukoll li l-​allat foloz li n-​nies tal-​ġnus jafdaw fihom huma bla saħħa. F’dan kollu, hemm ħafna biex tissaħħaħ il-​fidi, kemm fi żmien Isaija kif ukoll fi żmienna.

Jehovah Jisfida lill-​Ġnus

4. Jehovah b’liema kliem jisfidahom lill-​ġnus?

⁴ Permezz tal-​profeta tiegħu, Jehovah jgħid: “Isktu quddiemi, intom xtut; u ħalli l-​popli jitqawwew mill-​ġdid! Ħa jersqu l-​ewwel, mbagħad jitkellmu: u nersqu għall-​ħaqq flimkien!” (Isaija 41:1) B’dan il-​kliem Jehovah jisfida lill-​ġnus li jiħduha kontra l-​poplu tiegħu. Ħa jieqfu quddiemu u jitħażżmu biex jitkellmu! Bħalma se naraw iktar tard, Jehovah jesiġi, bħallikieku kien xi mħallef f’qorti, li dawn il-​ġnus jagħtu prova li l-​idoli tagħhom huma verament allat. Jistgħu dawn l-​allat ibassru atti taʼ salvazzjoni għal dawk li jqimuhom jew ġudizzji kontra l-​għedewwa tagħhom? Jekk iva, jistgħu huma jwettqu dawn il-​profeziji? Ir-​risposta hi le. Jehovah biss jistaʼ jagħmilhom dawn l-​affarijiet.

5. Spjega kif il-​profeziji taʼ Isaija għandhom iktar minn twettiq wieħed.

⁵ Aħna u nikkunsidraw il-​profezija taʼ Isaija, ejja  nżommu f’moħħna li, bħal fil-​każ taʼ ħafna profeziji Bibliċi, kliemu għandu iktar minn twettiq wieħed. Fis-​sena 607 Q.E.K., il-​poplu taʼ Ġuda se jittieħed fl-​eżilju ġo Babilonja. Madankollu, il-​profezija taʼ Isaija turi li Jehovah se jeħles lill-​Iżraelin li huma mjassrin hemmhekk. Dan iseħħ fis-​sena 537 Q.E.K. Dan il-​ħelsien kellu xebh fil-​bidu tas-​seklu 20. Matul l-​ewwel gwerra dinjija, il-​qaddejja midlukin taʼ Jehovah fuq l-​art għaddew minn perijodu taʼ tribulazzjoni. Fl-​1918, l-​ippridkar organizzat taʼ l-​aħbar tajba kważi waqaf għalkollox minħabba pressjoni mid-​dinja taʼ Satana, li ġiet imxewxa mill-​Kristjaneżmu bħala l-​parti ewlenija taʼ Babilonja l-​Kbira. (Apokalissi 11:5-10) Xi uffiċjali responsabbli mill-​Watch Tower Society ġew mitfugħin il-​ħabs fuq akkużi foloz. Donnu kien jidher li d-​dinja kienet ittrijonfat fil-​battalja tagħha kontra l-​qaddejja t’Alla. Imbagħad, bħalma ġara lura fis-​sena 537 Q.E.K., Jehovah bla mistenni ħelishom. Fl-​1919, l-​uffiċjali ġew meħlusin mill-​ħabs, u iktar tard l-​akkużi kontrihom ġew irtirati. Konvenzjoni li saret f’Cedar Point, Ohio, f’Settembru taʼ l-​1919 tat il-​ħajja mill-​ġdid lill-​qaddejja taʼ Jehovah biex jerġgħu jibdew jippridkaw l-​aħbar tajba tas-​Saltna. (Apokalissi 11:11, 12) Minn dakinhar sa llum, dan ix-​xogħol taʼ l-​ippridkar infirex b’mod taʼ l-​għaġeb. Iktar minn hekk, ħafna mill-​kliem taʼ Isaija se jitwettaq b’mod meraviljuż fil-​futur fuq l-​art magħmula Ġenna. Għaldaqstant, kliem Isaija taʼ żmien twil ilu jinvolvi lill-​ġnus u l-​popli kollha llum.

Jissejjaħ Ħellies

6. Il-​profeta kif jiddeskrivi lil konkwistatur li għad irid jiġi?

⁶ Permezz taʼ Isaija, Jehovah jbassar konkwistatur li mhux biss se jsalva lin-​nies t’Alla minn Babilonja imma  wkoll se jġib ġudizzju fuq l-​għedewwa tagħhom. Jistaqsi Jehovah:“Min qajjem mil-​lvant lil dak, li r-​rebħ jiġri wara riġlejh? Rħielu l-​ġnus f’idejh, biex irażżan is-​slaten? Li b’sejf jagħmilhom trab, u b’qawsu karfa ttir mar-​riħ? Jiġri warajhom, u jibqaʼ għaddej fis-​sliem, lanqas biss b’riġlejh ma jmiss it-​triq. Min għamlu u temmu dan? Min sejjaħ il-​ġenerazzjonijiet mill-​bidu? Jiena, il-​Mulej, Jiena l-​ewwel, u maʼ taʼ l-​aħħar, jiena hu!”—Isaija 41:2-4.

7. Min hu l-​konkwistatur li ġej, u x’iwettaq?

⁷ Min hu dak li se jitqajjem mil-​lvant, minn tlugħ ix-​xemx? Il-​pajjiżi tal-​Medo-Persja u Għelam jinsabu lejn il-​lvant taʼ Babilonja. Minn hemmhekk jimmarċja Ċiru l-​Persjan, flimkien maʼ l-​eżerċti setgħanin tiegħu. (Isaija 41:25; 44:28; 45:1-4, 13; 46:11) Għalkemm Ċiru ma jqimx lil Jehovah, hu jaġixxi bit-​tjieba, jiġifieri, fi qbil mar-​rieda taʼ Jehovah, Alla taʼ tjieba. Ċiru jrażżan ħafna slaten, u dawn jiġu mxerrdin bħal trab quddiemu. Biex iwettaq il-​konkwisti tiegħu, hu jgħaddi “fis-​sliem,” jew  qawwi u sħiħ, minn toroq li s-​soltu ħadd ma jgħaddi minnhom, u jegħleb kull ostaklu li jiġi quddiemu. Sas-​sena 539 Q.E.K., Ċiru jasal ħdejn il-​belt setgħana taʼ Babilonja u jegħlibha. B’riżultat taʼ dan, in-​nies t’Alla jiġu meħlusin sabiex ikunu jistgħu jirritornaw lejn Ġerusalemm biex jistabbilixxu mill-​ġdid il-​qima safja.—Esdra 1:1-7. c

8. Liema ħaġa jistaʼ jagħmilha Jehovah biss?

⁸ B’hekk, permezz taʼ Isaija, Jehovah jbassar il-​kobor taʼ Ċiru ferm qabel ma twieled dan is-​sultan. Il-​veru Alla biss jistaʼ jipprofetizza bl-​eżatt ħaġa bħal din. M’hemm ħadd li hu daqs Jehovah fost l-​allat foloz tal-​ġnus. B’raġuni tajba, hu jistqarr: “Ma nċedi lil ħadd il-​glorja tiegħi.” Jehovah biss għandu dritt jgħid: “Jien l-​ewwel u Jiena l-​aħħar, u ħliefi m’hemmx alla ieħor.”—Isaija 42:8; 44:6, 7.

Popli Mwerwrin Jafdaw fl-​Idoli

9-11. Il-​ġnus kif jirreaġixxu meta jaraw lil Ċiru ġej għalihom?

⁹ Isaija issa jiddeskrivi r-​reazzjoni tal-​ġnus għal dan il-​konkwistatur li għad irid jiġi: “Jaraw ix-​xtut u jibżgħu, truf l-​art jitriegħdu. Huma resqu u ġew. Jgħinu ’l xulxin sieħeb lil ieħor, u l-​aħwa jgħidu lil xulxin: ‘Agħmel il-​ħila!’ Il-​ħaddied jagħmel il-​ħila lil tad-​deheb; min jaħfi bil-​martell lil min iħabbat fuq l-​inkwina, u jgħidu: ‘Tajba s-​saldatura.’ U mbagħad jissudah bl-​imsiemer, biex ma jitħarrikx.”—Isaija 41:5-7.

¹⁰ Jehovah jeżamina x-​xena dinjija, billi jħares xi 200 sena fil-​futur. Eżerċti setgħanin taħt Ċiru javanzaw  b’ħeffa kbira u jikkonkwistaw lil kulmin jopponihom. Il-​popli jitriegħdu malli jaraw lil Ċiru ġej, saħansitra dawk in-​nies li joqogħdu fix-​xtut tal-​gżejjer, fl-​iktar postijiet imbegħdin. Bil-​biżaʼ li jaqbadhom huma jingħaqdu flimkien biex jopponu lil dak li lilu Jehovah  sejjaħ mil-​lvant biex jagħmel il-​ħaqq. Huma jipprovaw jinkuraġġixxu lil xulxin, billi jgħidu: “Agħmel il-​ħila!”

¹¹ Nies tas-​sengħa jaħdmu flimkien biex isawru allat f’għamla taʼ idoli ħalli jeħilsu lin-​nies. Il-​mastrudaxxa jagħmel qafas taʼ l-​injam u mbagħad jinkuraġġixxi lill-​arġentier biex jiksih bil-​metall, forsi bid-​deheb. Skultur jillixxa l-​metall bil-​martell u jgħid li s-​saldatura hi tajba. Jistaʼ jkun li huwa bi ftit sarkażmu li jissemma l-​fatt li l-​qafas jiġi ssodat bl-​imsiemer sabiex ma jitħarrikx jew juri dgħjufija, bħalma għamel l-​idolu taʼ Dagon li waqaʼ wiċċu fl-​art quddiem l-​arka taʼ Jehovah.—1 Samwel 5:4.

La Tibżax!

12. Jehovah kif iqawwi qalb Iżrael?

¹² Jehovah issa jdawwar l-​attenzjoni tiegħu lejn il-​poplu tiegħu. Kuntrarju għall-​ġnus li jafdaw f’idoli bla ħajja, dawk li jafdaw fil-​veru Alla qatt m’għandhom għalfejn jibżgħu. Jehovah jibda jqawwilhom qalbhom billi jfakkarhom li Iżrael huwa n-​nisel tal-​ħabib tiegħu Abraham. F’silta li tesprimi tenerezza kbira, Isaija jirrapporta l-​kliem taʼ Jehovah: “Imma int Iżrael, il-​qaddej tiegħi, Ġakobb, jien ħtartek, nisel Abraham, ħabibi. Lilek jien qbadtek minn truf l-​art, u sejjaħtlek minn l-​ibgħad inħawi tagħha, u għedtlek: ‘Int il-​qaddej tiegħi, jiena ħtartek, u ma rmejtikx.’ La tibżax, għax miegħek jien! La titħassibx, għax Alla tiegħek jien! Jiena nwettqek, jien ngħinek; nwieżnek bil-​leminija rebbieħa tiegħi!”—Isaija 41:8-10.

13. Il-​kliem taʼ Jehovah għala se jkun taʼ faraġ għal-​Lhud li huma fil-​jasar?

¹³ Kemm se jkun taʼ faraġ dan il-​kliem għal-​Lhud leali li huma miżmumin fil-​jasar f’pajjiż barrani! Kemm  se jkun inkuraġġanti li jisimgħu lil Jehovah jsejħilhom “il-​qaddej tiegħi” fiż-​żmien meta jinsabu eżiljati, qaddejja tas-​sultan taʼ Babilonja! (2 Kronaki 36:20) Għalkemm Jehovah se jiddixxiplinahom minħabba n-​nuqqas taʼ fedeltà tagħhom, hu mhux se jiċħadhom. Iżrael hu taʼ Jehovah, mhux taʼ Babilonja. Il-​qaddejja t’Alla mhux se jkollhom għalfejn jitriegħdu malli jarawh ġej lil Ċiru l-​konkwistatur. Jehovah se jkun mal-​poplu tiegħu biex jgħinu.

14. Il-​kliem li Jehovah qal lil Iżrael kif ifarraġ lill-​qaddejja t’Alla llum?

¹⁴ Dan il-​kliem qawwa qalb il-​qaddejja t’Alla u saħħaħhom saħansitra sa żmienna. Lura fl-​1918 huma kienu ħerqanin biex ikunu jafu x’ried Jehovah minnhom. Kienu jixtiequ ħafna li jinħelsu mill-​jasar spiritwali li kienu fih. Illum aħna ħerqanin biex ninħelsu mill-​pressjonijiet li jġibu fuqna Satana, id-​dinja, u l-​imperfezzjoni tagħna stess. Imma napprezzaw il-​fatt li Jehovah jaf preċiżament meta u kif għandu jaġixxi għan-​nom tal-​poplu tiegħu. Bħal tfal żgħar, aħna naqbdulu idu u ma nitilquhiex għax nafu li idu setgħana. Aħna fiduċjużi li hu se jgħinna nkampaw. (Salm 63:8, 9 [63:7, 8, New World Translation]) Jehovah jgħożżhom lil dawk li jaqduh. Hu jwiżinna llum sewwa sew bħalma wieżen lill-​poplu tiegħu meta għadda mill-​perijodu diffiċli taʼ l-​1918-19 u sewwa sew bħalma wieżen lill-​Iżraelin leali tal-​qedem.

15, 16. (a) X’se jiġrilhom l-​għedewwa taʼ Iżrael, u Iżrael b’liema mod jixbah lil dudu? (b) Minħabba liema attakk li riesaq bil-​ħeffa huwa l-​kliem taʼ Jehovah inkuraġġanti b’mod partikulari llum?

¹⁵ Ikkunsidra x’jgħid Jehovah issa permezz taʼ Isaija: “Ara, għad jistħu u jitriegħxu, dawk kollha li nkurlaw għalik; jiġu fix-​xejn u jintemmu n-​nies li jħaqquha miegħek. Tfittixhom u ma ssibhomx, in-​nies li jeħduha miegħek,  jiġu fix-​xejn u jintemmu n-​nies li jitqabdu miegħek. Jiena l-​Mulej, Alla tiegħek, nwieżnek minn idek il-​leminija, u ngħidlek: ‘La tibżax, jiena l-​għajnuna tiegħek.’ Tibżax, Ġakobb, daqsxejn taʼ dudu fl-​art, intom, bnedmin taʼ Iżrael! Jiena l-​għajnuna tiegħek, oraklu tal-​Mulej, il-​feddej tiegħek, il-​Qaddis taʼ Iżrael!”—Isaija 41:11-14.

¹⁶ L-​għedewwa taʼ Iżrael m’humiex se jirbħu. Dawk li jinkorlaw għal Iżrael se jistħu. Dawk li jitqabdu miegħu se jintemmu. Għalkemm l-​Iżraelin li qegħdin fil-​jasar jidhru li huma dgħajfin u bla difiża bħal daqsxejn taʼ dudu jitmiegħek fit-​trab, Jehovah se jgħinhom. Kemm qed iservi taʼ inkuraġġiment dan matul “l-​aħħar tad-​dinja” hekk kif il-​Kristjani veri jiffaċċjaw l-​ostilità deċiża taʼ tant u tant individwi fid-​dinja! (2 Timotju 3:1) U kemm issaħħaħna l-​wegħda taʼ Jehovah meta tqis l-​attakk li riesaq bil-​ħeffa minn Satana, li fil-​profezija jissejjaħ ‘Gog taʼ l-​art taʼ Magog’! Taħt l-​attakk feroċi taʼ Gog, in-​nies taʼ Jehovah se jkunu jidhru qishom bla difiża bħal dudu—“nies bla swar” u li “bibien u żbarri ma għandhomx.” Madankollu, dawk li qegħdin jittamaw f’Jehovah mhux se jkollhom għalfejn jitriegħdu bil-​biżaʼ. Dak stess li jistaʼ kollox se jiġġieled biex jeħlishom.—Eżekjel 38:2, 11, 14-16, 21-23; 2 Korintin 1:3.

Faraġ għal Iżrael

17, 18. Isaija kif jiddeskrivih l-​għoti taʼ setgħa lil Iżrael, u dwar liema twettiq nistgħu nkunu żguri?

¹⁷ Jehovah jkompli jfarraġ lill-​poplu tiegħu: “Arani! Jien nagħmel minnek romblu tad-​dris ġdid, jaqtaʼ u kollu snien. Int tidres il-​muntanji u tfarrakhom, u l-​għoljiet tagħmilhom tlief; int idderrihom u r-​riħ iġorrhom, u  r-​riefnu jxerridhom. Mbagħad int tifraħ fil-​Mulej, u tiftaħar bil-​Qaddis taʼ Iżrael.”—Isaija 41:15, 16.

¹⁸ Iżrael se jingħata s-​saħħa biex joħroġ fuq l-​attakk u, f’sens spiritwali, irażżan lill-​għedewwa tiegħu li qishom muntanji. Meta Iżrael jirritorna mill-​eżilju, se jittrijonfa fuq għedewwa li jipprovaw iżommu lura l-​bini mill-​ġdid tat-​tempju u tas-​swar taʼ Ġerusalemm. (Esdra 6:12; Neħemija 6:16) Madankollu, il-​kliem taʼ Jehovah se jitwettaq fuq skala kbira maʼ l-​“Iżrael taʼ Alla.” (Galatin 6:16) Lill-​Kristjani midlukin, Ġesù jwegħedhom: “Lir-​rebbieħ, lil dak li jħares sa l-​aħħar l-​opri tiegħi, nagħtih setgħa fuq il-​ġnus, biex imexxihom b’xettru tal-​ħadid bħal min ifarrak il-​bwieqi tal-​fuħħar, l-​istess kif jien ukoll ħadt is-​setgħa mingħand Missieri.” (Apokalissi 2:26, 27) Żgur li se jiġi ż-​żmien meta ħut Kristu rxoxtati għall-​glorja tas-​sema se jieħdu sehem fil-​qerda taʼ l-​għedewwa t’Alla Jehovah.—2 Tessalonikin 1:7, 8; Apokalissi 20:4, 6.

19, 20. Isaija x’jikteb dwar li Iżrael jiġi restawrat għal post taʼ sbuħija, u dan kif jitwettaq?

¹⁹ B’lingwaġġ figurattiv, Jehovah issa jsaħħaħ il-​wegħda li għamel li jagħti l-​għajnuna lill-​poplu tiegħu. Isaija jikteb: “Il-​foqra u l-​imsejknin ifittxu l-​ilma u ma jsibux! Lsienhom niexef bil-​għatx. Jiena, il-​Mulej, nismagħhom, Jiena, Alla taʼ Iżrael, ma ninsihomx. Xmajjar taʼ ilma nfawwar fuq l-​għoljiet għerja, u għejun f’nofs il-​widien. Nibdel id-​deżert f’għadira ilma, u l-​art niexfa f’għejun taʼ ilma. Nxettel iċ-​ċedri fid-​deżert, il-​gazzi, u r-​riħan, u s-​siġar taż-​żebbuġ; ntellaʼ ċ-​ċipress fix-​xagħri, u magħhom id-​dolf u l-​bux; biex hekk jaraw u jagħrfu, jaħsbu u jifhmu ukoll, li id il-​Mulej għamlet dan, u l-​Qaddis taʼ Iżrael ħalqu.”—Isaija 41:17-20.

 ²⁰ Għalkemm l-​Iżraelin li qegħdin fl-​eżilju jgħammru fil-​belt kapitali taʼ qawwa dinjija għanja, għalihom hi bħal deżert bla ilma. Iħossuhom bħal David meta kien qed jistaħba mis-​Sultan Sawl. Fis-​sena 537 Q.E.K., Jehovah jiftħilhom it-​triq biex jirritornaw lejn Ġuda u jibnu mill-​ġdid it-​tempju tiegħu f’Ġerusalemm, u b’hekk jerġgħu jistabbilixxu l-​qima safja. Jehovah, mill-​banda l-​oħra, iberikhom. Fi profezija li tlissnet iktar tard, Isaija jbassar: “Il-​Mulej iħenn għal Sijon; iħenn għall-​ħrieb kollha tagħha. Jagħmel Għeden mid-​deżert u ġnien tal-​Mulej mix-​xagħri tagħha.” (Isaija 51:3) Dan fil-​fatt tassew iseħħ wara li l-​Lhud jirritornaw lejn art twelidhom.

21. Liema tiġdid seħħ fi żmienna, u x’se jiġri fil-​futur?

²¹ Xi ħaġa simili ġrat fi żmienna meta Ċiru Akbar, Kristu Ġesù, ħeles lis-​segwaċi midlukin tiegħu mill-​jasar spiritwali biex ikunu jistgħu jaħdmu ħalli jistabbilixxu mill-​ġdid il-​qima safja. Dawn l-​uħud leali tbierku b’ġenna spiritwali għanja, ġnien taʼ Għeden figurattiv. (Isaija 11:6-9; 35:1-7) F’qasir żmien, meta Alla jeqred lill-​għedewwa tiegħu, l-​art kollha kemm hi se tiġi mibdula f’ġenna taʼ l-​art letterali, sewwa sew bħalma Ġesù wiegħed lill-​kriminal li kien maġenbu fuq iz-​zokk.—Luqa 23:43.

Sfida għall-​Għedewwa taʼ Iżrael

22. Jehovah b’liema kliem jerġaʼ jisfidahom lill-​ġnus?

²² Jehovah issa jmur lura għall-​kontroversja li għandu mal-​ġnus u maʼ l-​allat tagħhom f’għamla taʼ idoli: “‘Ressqu l-​kawża tagħkom,’ jgħid il-​Mulej, ‘Ġibu l-​provi tagħkom,’ jgħid is-​sultan taʼ Ġakobb. Ħa jersqu u jgħarrfuna x’se jiġri; jgħidulna l-​imgħoddi x’kien, biex aħna naħsbu fuqu. Jew semmgħuna l-​ġejjieni sabiex nagħrfu t-​tmiem. Għidulna x’se jiġri fl-​aħħar, u  nkunu nafu jekk intomx allat. Agħmlu xi ħaġa, tajba jew ħażina, u aħna nistagħġbu u nibżgħu fl-​istess waqt. M’intom xejn u xogħolkom ħrafa; mistmerr hu min jaħtarkom.” (Isaija 41:21-24) Kapaċi l-​allat tal-​ġnus jipprofetizzaw bl-​eżatt, u b’hekk juru li għandhom għarfien soprannaturali? Jekk huma kapaċi, żgur li għandu jkun hemm xi riżultati, tajbin jew ħżiena, biex jappoġġaw dak li jsostnu huma. Iżda, fil-​fatt, l-​allat f’għamla taʼ idoli m’huma kapaċi jagħmlu xejn u huma bħal xi ħaġa li ma teżistix.

23. Jehovah, permezz tal-​profeti tiegħu, għala kien daqshekk persistenti f’li jikkundanna l-​idoli?

²³ Fi żmienna xi wħud jistgħu jiskantaw għala Jehovah, permezz taʼ Isaija u sħabu l-​profeti, qattaʼ daqshekk żmien jikkundanna l-​bluha taʼ l-​idolatrija. Li  l-​idoli magħmulin mill-​bniedem ma jiswew għalxejn jistaʼ jidher li huwa ovvju għal ħafna nies illum. Madankollu, ladarba sistema falza taʼ twemmin tkun ġiet stabbilita u aċċettata minn ħafna nies, ikun diffiċli ferm li tneħħiha minn moħħ dawk li jemmnuha. Illum, ħafna mit-​twemmin huwa bla sens daqs it-​twemmin li xbihat bla ħajja huma tassew allat. Madankollu, in-​nies jiggranfaw maʼ dan it-​twemmin minkejja l-​argumenti persważivi li jinġiebu kontrih. Huwa biss billi jisimgħu l-​verità darba wara l-​oħra li xi wħud jitqanqlu biex jaraw l-​għerf taʼ li wieħed jafda f’Jehovah.

24, 25. Jehovah kif jerġaʼ jirreferi għal Ċiru, u dan ifakkarna f’liema profezija oħra?

²⁴ Jehovah jerġaʼ jirreferi għal Ċiru: “Jien qajjimt bniedem mit-​tramuntana u hu ġej; sejjaħtlu b’ismu minn tlugħ ix-​xemx: u jgħaffeġ il-​ħakkiema bħalma jgħaffġu t-​tajn, bħalma l-​fuħħari jgħaffeġ it-​tafal taħt saqajh.” (Isaija 41:25) d B’kuntrast maʼ l-​allat tal-​ġnus, Jehovah kapaċi jwettaq li jrid. Meta joħroġ lil Ċiru mil-​lvant, minn “tlugħ ix-​xemx,” Alla se juri l-​abbiltà tiegħu li jbassar u mbagħad isawwar il-​futur biex iwettaq it-​tbassir tiegħu.

²⁵ Dan il-​kliem ifakkarna fid-​deskrizzjoni profetika taʼ l-​appostlu Ġwanni dwar is-​slaten li kellhom iqumu għall-​azzjoni fi żmienna. F’Apokalissi 16:12 naqraw li t-​triq se tinfetaħ “għas-​slaten tal-​lvant.” Dawn is-​slaten m’huma ħadd ħlief Alla Jehovah u Ġesù Kristu. Sewwa sew bħalma Ċiru ħeles lin-​nies t’Alla żmien twil ilu, dawn is-​slaten, li huma ferm iktar setgħanin, se jġibu  fix-​xejn lill-​għedewwa taʼ Jehovah u jirgħu lin-​nies tiegħu biex jgħaddu mit-​tribulazzjoni l-​kbira għal ġo dinja ġdida taʼ tjieba.—Salm 2:8, 9; 2 Pietru 3:13; Apokalissi 7:14-17.

Jehovah Hu Suprem!

26. Jehovah liema mistoqsija jistaqsi issa, u titwieġeb din?

²⁶ Mill-​ġdid, Jehovah jiddikjara l-​verità li hu biss hu l-​veru Alla. Fil-​fatt, hu jistaqsi: “Min qatt ħabbar sa mill-​bidu, biex aħna nkunu nafu? Sa minn qabel, biex ngħidu: ‘Veru’? Qatt ħadd ma qalu; qatt ħadd ma semmgħu; qatt ħadd ma samaʼ kliemkom.” (Isaija 41:26) Ebda alla f’għamla taʼ idolu ma ħabbar il-​miġja taʼ konkwistatur biex jeħles lil dawk li qegħdin jafdaw fih. Dawn l-​allat kollha huma bla ħajja, siekta. M’huma allat xejn assolutament.

27, 28. Liema verità vitali tiġi enfasizzata fl-​aħħar versi taʼ Isaija kapitlu 41, u min biss jipproklamaha din?

²⁷ Wara li jirrapporta dan il-​kliem profetiku u kommoventi taʼ Jehovah, Isaija jenfasizza verità vitali: “Dan l-​ewwel għarraftu lil Sijon; u ’l Ġerusalemm tajtha ħabbâr. Jien ħarist, ma kien hemm ħadd; ħadd minnhom biex jagħti parir, biex nistaqsihom u jwieġbu kelma. Lkoll kemm huma m’huma xejn, xogħolhom frugħa, riħ u baħħ xbihat allathom.”—Isaija 41:27-29.

²⁸ Jehovah hu l-​ewwel. Hu s-​suprem! Hu l-​veru Alla li jħabbar il-​ħelsien għan-​nies tiegħu, billi jġibilhom aħbar tajba. U huma x-​Xhieda tiegħu biss li jipproklamaw il-​kobor tiegħu lill-​ġnus. Bi stmerrija, Jehovah jikkundanna lil dawk li jafdaw fil-​qima taʼ l-​idoli, billi jittimbra lill-​idoli tagħhom bħala “riħ u baħħ.” X’raġuni qawwija din biex niggranfaw mal-​veru Alla! Jehovah biss jistħoqqlu li nafdawh bil-​fiduċja kollha tagħna.

[Noti taʼ taħt]

[Mistoqsijiet taʼ Studju]

[Stampa f’paġna 19]

Ċiru, għalkemm pagan, jintgħażel biex jagħmel ix-​xogħol t’Alla

[Stampa f’paġna 21]

Il-​ġnus jafdaw f’idoli bla ħajja

[Stampi f’paġna 27]

Iżrael, bħal “romblu tad-​dris ġdid,” se ‘jfarrak il-​muntanji’