Kapitlu Dsatax

Tinkixef l-​Ipokrisija!

Isaija 58:1-14

1. Ġesù u Jehovah kif iħarsu lejn l-​ipokrisija, u din kif tidher fi żmien Isaija?

 “MINN barra tidhru tassew ġusti quddiem il-​bnedmin,” qal Ġesù lill-​mexxejja reliġjużi taʼ żmienu, “waqt li minn ġewwa kollkom ipokrisija u ħażen!” (Mattew 23:28) Il-​fatt li Ġesù qed jikkundanna l-​ipokrisija jirrifletti l-​opinjoni taʼ Missieru tas-​sema. Kapitlu 58 tal-​profezija taʼ Isaija jitfaʼ l-​attenzjoni speċifikament fuq l-​ipokrisija li hi abbundanti f’Ġuda. It-​taqbid, il-​moħqrija, u l-​vjolenza huma komuni ferm, u l-​ħarsien tas-​Sabat spiċċa biss f’ritwal li ma jfisser xejn. In-​nies qed jagħtu servizz b’nofs qalb lil Jehovah u jagħtu l-​impressjoni li huma devoti billi jsumu, imma f’qalbhom m’hemmx sinċerità. Mhux taʼ b’xejn li Jehovah jikxef l-​ipokrisija tagħhom!

‘Urih Dnubu lill-​Poplu’

2. Isaija xi spirtu juri hekk kif jiddikjara l-​messaġġ taʼ Jehovah, u min illum hu bħalu?

² Għalkemm Jehovah hu mdejjaq bil-​kondotta taʼ Ġuda, Kliemu jinkludi appell mill-​qalb lill-​ġens biex jindem. Xorta waħda, Jehovah ma jridx li t-​twiddib tiegħu ma jkunx ċar. Għaldaqstant, hu jikkmanda lil Isaija: “Iftaħ garġik, għajjat u la tiskotx! Għolli leħnek bħal tromba! Dnubhom uri lill-​poplu tiegħi, u ħtijiethom lil dar Ġakobb!” (Isaija 58:1) Peress li jxandar bil-​qlubija l-​kliem taʼ  Jehovah, Isaija għandu mnejn jiġi mibgħud mill-​poplu, imma hu ma jżommx lura. Hu għad għandu l-​istess spirtu taʼ dedikazzjoni li wera meta qal: “Hawn jien: ibgħat lili!” (Isaija 6:8) X’eżempju mill-​aħjar taʼ sabar hu Isaija għax-​Xhieda taʼ Jehovah taʼ żmienna, li wkoll huma inkarigati li jippridkaw il-​Kelma t’Alla u jikxfu l-​ipokrisija reliġjuża!—Salm 118:6; 2 Timotju 4:1-5.

3, 4. (a) In-​nies fi żmien Isaija liema dehra falza jagħtu? (b) X’inhi s-​sitwazzjoni vera f’Ġuda?

³ Il-​Lhud fi żmien Isaija jfittxu lil Jehovah u jesprimu l-​għaxqa tagħhom fil-​ġudizzji taʼ tjieba tiegħu għal għajn in-​nies biss. Naqraw il-​kliem taʼ Jehovah: “Lili kuljum ifittxu, jixtiequ jagħrfu triqati, bħallikieku ġens li jagħmel is-​sewwa, u li ma ħalliex l-​ordnijiet ġusti taʼ Alla tiegħu. Jitolbuni ġudizzji fis-​sewwa, jixtiequ jersqu lejn Alla.” (Isaija 58:2) Hija ġenwina din l-​għaxqa li qed jgħidu li għandhom bit-​triqat taʼ Jehovah? Le. Huma “bħallikieku ġens li jagħmel is-​sewwa,” imma x-​xebh huwa biss superfiċjali. Fil-​verità, dan il-​ġens telaq “l-​ordnijiet ġusti taʼ Alla tiegħu.”

⁴ Is-​sitwazzjoni tixbah ferm lil dik li iktar tard ġiet rivelata lill-​profeta Eżekjel. Jehovah qal lil Eżekjel li l-​Lhud kienu qegħdin jgħidu lil xulxin: “Ejjew ħa nisimgħu x’inhi l-​kelma ħierġa mingħand il-​Mulej.” Imma Alla wissa lil Eżekjel li huma ma kinux sinċieri: “Jiġu għandek . . . u jisimgħu kliemek u ma jagħmluhx; għax jitgħaxxqu bihom b’fommhom, imma qalbhom tiġri wara l-​qligħ. Int bħal għannej l-​imħabba għalihom, b’vuċi ħelwa u daqq jagħtik pjaċir; jisimgħu kliemek, u ma jagħmluhx.” (Eżekjel 33:30-32) In-​nies taʼ żmien Isaija wkoll isostnu li qegħdin kontinwament ifittxu lil Jehovah, imma kliemu ma jobduhx.

 Sawm Mhux Sinċier

5. Il-​Lhud kif jipprovaw jiksbu l-​favur divin, u Jehovah kif jirreaġixxi?

⁵ Biex jipprovaw jiksbu l-​favur divin, il-​Lhud fil-​fatt isumu, imma t-​taparsi devozzjoni tagħhom isservi biss biex tbegħedhom minn Jehovah. Mistagħġbin, huma jistaqsu: “Għaliex somna u int ma ħaristx, għakkisna ruħna u int ma ntbaħtx?” Jehovah jwieġeb bla tlaqliq, billi jgħidilhom: “Araw, f’jum is-​sawm tagħkom tagħmlu li tridu, u tgħakksu lill-​ħaddiem tagħkom. Araw, issumu bil-​kustjonijiet u l-​ġlied u tidorbu bil-​ponn bla ħaqq. Jekk issumu kif qegħdin issumu issa, leħinkom ma jinstamax fl-​għoli. Jaqaw jien jogħġobni sawm bħal dan, jum biex bniedem jgħakkes lilu nnifsu? Biex ibaxxi rasu bħas-​simar, u jimtedd fuq ix-​xkora u r-​rmied? Tgħidlu int dan sawm, jum jogħġob lill-​Mulej?”—Isaija 58:3-5.

6. Liema azzjonijiet mil-​Lhud juru li s-​sawm tagħhom m’huwiex sinċier?

⁶ Waqt li jsumu, billi jagħmlu taʼ bir-​ruħhom li huma twajbin, u saħansitra waqt li jitolbu għall-​ġudizzji taʼ tjieba taʼ Jehovah, in-​nies jiġru wara l-​pjaċiri egoistiċi u l-​interessi tan-​negozju. Huma jinvolvu ruħhom fit-​taqbid, fil-​moħqrija, u fil-​vjolenza. Biex jipprovaw jaħbu l-​imġiba tagħhom, jieħdu sehem f’wirjiet impressjonanti taʼ niket—billi jbaxxu rashom bħas-​simar u jimteddu fuq ix-​xkora u l-​irmied—ħalli taparsi qed jindmu minn dnubiethom. X’jiswa dan kollu jekk ikomplu jirribellaw? Huma ma juru ebda niket u ndiema ġenwini li suppost jintwerew mas-​sawm sinċier. It-​tinwiħ tagħhom—għalkemm storbjuż—ma jinstemax fis-​sema.

7. Il-​Lhud taʼ żmien Ġesù kif aġixxew b’ipokrisija, u ħafna llum kif jagħmlu l-​istess ħaġa?

 ⁷ Il-​Lhud taʼ żmien Ġesù jagħmlu turija simili taʼ sawm ċerimonjali, u xi wħud isumu anki darbtejn fil-​ġimgħa! (Mattew 6:16-18; Luqa 18:11, 12) Ħafna mill-​mexxejja reliġjużi imitaw ukoll lill-​ġenerazzjoni taʼ Isaija billi kienu ħorox u dominanti. Għaldaqstant, Ġesù bil-​kuraġġ kollu kixef lil dawn l-​ipokriti reliġjużi, billi qalilhom li l-​għamla taʼ qima tagħhom kienet fiergħa. (Mattew 15:7-9) Illum, ukoll, miljuni sħaħ “jistqarru li jagħrfu lil Alla, biex imbagħad bl-​għemil tagħhom jiċħduh; huma nies taʼ min jistmerrhom, rashom iebsa, u ma jinqalgħu għal xejn tajjeb.” (Titu 1:16) Uħud bħal dawn jistgħu jittamaw għall-​ħniena mingħand Alla, imma l-​kondotta tagħhom tikxef kemm m’humiex sinċieri. B’kuntrast, ix-​Xhieda taʼ Jehovah juru devozzjoni vera lejn Alla u mħabba taʼ l-​aħwa ġenwina.—Ġwann 13:35.

X’Tinvolvi l-​Indiema Vera

8, 9. Liema azzjonijiet pożittivi għandu jkun hemm maʼ l-​indiema sinċiera?

⁸ Lin-​nies tiegħu Jehovah ma jridhomx biss isumu minħabba dnubiethom; iridhom jindmu minnhom. Imbagħad huma jiksbu l-​favur tiegħu. (Eżekjel 18:23, 32) Hu jispjega li sabiex is-​sawm ikun sinifikanti, irid ikun hemm korrezzjoni tad-​dnubiet li jkunu saru. Ikkunsidra dawn il-​mistoqsijiet taʼ Jehovah li jolqtu fil-​laħam il-​ħaj: “Jaqaw m’hux dan is-​sawm li jiena rrid, jiġifieri, li tħoll l-​irbit tal-​ħażen, u tqaċċat ix-​xkiel tal-​madmad, li tibgħat ħielsa l-​maħqurin, u tkisser kull madmad?”—Isaija 58:6.

⁹ L-​irbit u l-​madmad huma simboli xierqa taʼ jasar aħrax. Għalhekk, minflok ma jsumu u fl-​istess ħin jaħqru lil sħabhom taʼ l-​istess twemmin, in-​nies imisshom jobdu l-​kmand: “Ħobb lil għajrek bħalek innifsek.”  (Levitiku 19:18) Għandhom jeħilsu lil kulmin ħaqru u tefgħu fil-​jasar b’mod inġust. a Atti reliġjużi li jimpressjonaw, bħalma hu s-​sawm, ma jistgħux jieħdu post id-​devozzjoni ġenwina lejn Alla u l-​atti li juru l-​imħabba taʼ l-​aħwa. Il-​profeta Mikea, li għex fi żmien Isaija, jikteb: “X’jistenna minnek il-​Mulej: li tagħmel dak li hu ġust, li tħobb u tkun ħanin, u li tkun umli fl-​imġiba tiegħek maʼ Alla tiegħek.”—Mikea 6:8.

10, 11. (a) Għal-​Lhud, x’kien hemm aħjar mis-​sawm? (b) Illum, il-​Kristjani kif jistgħu japplikaw il-​parir li Jehovah ta lil-​Lhud?

¹⁰ Il-​ġustizzja, il-​qalb tajba, u l-​modestja jirrikjedu li tagħmel il-​ġid lil ħaddieħor, u dan huwa l-​qofol tal-​Liġi taʼ Jehovah. (Mattew 7:12) Li jaqsmu mill-​ġid li għandhom maʼ dawk li huma fil-​bżonn ikun ferm aħjar mis-​sawm. Jistaqsi Jehovah: “[Is-sawm li nagħżel jien] m’hux li taqsam ħobżok maʼ min hu bil-​ġuħ, u ddaħħal f’darek lill-​imsejken bla saqaf? M’hux li tlibbes lil min tara għarwien, u n-​nies taʼ darek ma tinsihomx?” (Isaija 58:7) Iva, minflok ma jimpressjonaw bis-​sawm, dawk li għandhom il-​mezzi biex jagħmlu dan għandhom jagħtu ikel, ilbies, jew kenn lill-​abitanti sħabhom taʼ Ġuda li huma fil-​bżonn—in-​nies taʼ darhom stess.

¹¹ Dawn il-​prinċipji mill-​isbaħ taʼ l-​imħabba u l-​mogħdrija bejn l-​aħwa espressi minn Jehovah ma japplikawx biss għal-​Lhud taʼ żmien Isaija. Jiggwidaw lill-​Kristjani wkoll. Għaldaqstant, l-​appostlu Pawlu kiteb: “Mela, dment li għandna ż-​żmien ħa nagħmlu l-​ġid maʼ kulħadd, l-​iktar maʼ qrabatna fil-​fidi.” (Galatin 6:10)  Il-​kongregazzjoni Kristjana għandha tkun menqa taʼ mħabba u affezzjoni bejn l-​aħwa, speċjalment meta nqisu ż-​żmien taʼ llum li qed isir dejjem iktar iebes.—2 Timotju 3:1; Ġakbu 1:27.

L-​Ubbidjenza Ġġib Barkiet Għonja

12. X’se jagħmel Jehovah jekk in-​nies tiegħu jobduh?

¹² O li kieku n-​nies taʼ Jehovah jkollhom id-​dehen biex jagħtu kas it-​twiddiba tiegħu taʼ mħabba! Jgħid Jehovah: “Mbagħad ifiġġ bħaż-​żerniq id-​dawl tiegħek, u malajr tagħlaqlek il-​ġerħa tiegħek. Quddiemek timxi l-​ġustizzja tiegħek, u l-​glorja tal-​Mulej timxi warajk. Jekk biss issejjaħlu, iwieġeb il-​Mulej; jekk tgħajjatlu, jgħidlek ‘Hawn jien.’” (Isaija 58:8, 9a) Xi kliem inkuraġġanti, li jiġbdek! Jehovah jbierek u jipproteġi lil dawk li jitgħaxxqu bil-​qalb tajba bl-​imħabba u bit-​tjieba. Jekk in-​nies taʼ Jehovah jindmu mill-​ħruxija u l-​ipokrisija tagħhom u jobduh, l-​affarijiet se jitjiebu ferm iktar għalihom. Jehovah se ‘jagħlqilhom il-​ġerħa’; il-​ġens se jirkupra spiritwalment u fiżikament. Hu se jgħassishom ukoll, bħalma għasses lil missirijiethom tal-​qedem meta kienu qegħdin jitilqu mill-​Eġittu. U se jwieġeb minnufih għall-​għajat tagħhom għall-​għajnuna.—Eżodu 14:19, 20, 31.

13. Liema barkiet hemm jistennew lil-​Lhud jekk iwieġbu għall-​inkuraġġiment taʼ Jehovah?

¹³ Jehovah issa jżid maʼ l-​inkuraġġiment li tahom qabel, billi jgħid: “Jekk tneħħi minn nofsok il-​moħqrija [taʼ jasar aħrax u inġust], ma tmiddx sebgħek [x’aktarx b’żebliħ jew b’akkużi foloz] u ma tagħmilx deni b’ilsienek, jekk int qalbek toħroġ għall-​imġewwaħ, u xxabbaʼ qalb l-​imnikket, mbagħad id-​dawl tiegħek ifiġġ fid-​dlam,  u s-​swied tiegħek ikun bħan-​nofsinhar.” (Isaija 58:9b, 10) L-​egoiżmu u l-​ħruxija jaħdmu kontra min jużahom u jġibu fuqu l-​għadab taʼ Jehovah. Madankollu, il-​qalb tajba u l-​ġenerożità, speċjalment meta jintwerew lil min hu bil-​ġuħ u lil min hu maħqur, iġibu l-​barka għanja t’Alla. Li kieku l-​Lhud idaħħlu dawn il-​veritajiet f’qalbhom! Imbagħad id-​dija u r-​riżq spiritwali tagħhom se jagħmluhom jiddu bħax-​xemx taʼ nofsinhar, li tneħħi s-​swied kollu. Fuq kollox, se jonoraw u jfaħħru lil Jehovah, is-​Sors tal-​glorja u l-​barkiet tagħhom.—1 Slaten 8:41-43.

Ġens Stabbilit mill-​Ġdid

14. (a) In-​nies taʼ żmien Isaija kif jirreaġixxu għal kliemu? (b) Jehovah x’ikompli joffri?

¹⁴ B’sogħba, il-​ġens jinjorah l-​appell taʼ Jehovah u jogħdos saħansitra iktar fil-​ħama tal-​ħażen. Eventwalment, lil Jehovah ma jħallulux għażla ħlief li jibgħathom fl-​eżilju, sewwa sew bħalma wissiehom. (Dewteronomju 28:15, 36, 37, 64, 65) Xorta waħda, il-​kliem li jgħid Jehovah issa permezz taʼ Isaija jkompli joffri tama. Alla jbassar li fdal dixxiplinat u sogħbien se jirritorna bil-​ferħ lejn il-​pajjiż taʼ Ġuda, avolja l-​pajjiż jinsab ħerba.

15. Jehovah jbassar liema tiġdid mimli ferħ?

¹⁵ Waqt li jħares ’il quddiem lejn meta l-​poplu tiegħu jiġi stabbilit mill-​ġdid fis-​sena 537 Q.E.K., Jehovah jgħid permezz taʼ Isaija: “Il-​Mulej jibqaʼ jmexxik għal dejjem, u jxebbagħlek qalbek fl-​imkejjen niexfa, u jsaħħaħlek għadmek. Int tkun bħal ġnien bis-​saqwi, bħal għajn taʼ ilma [“nixxiegħa,” “Saydon”] ma jonqos qatt.” (Isaija 58:11) Jehovah se jġedded il-​pajjiż niexef taʼ Iżrael billi jagħmlu jipproduċi ħafna. Xi ħaġa iktar taʼ l-​għaġeb hi li se jbierek lin-​nies tiegħu li nidmu, billi jsaħħilhom ‘għadamhom’ minn stat bla ħajja spiritwalment għal wieħed mimli ħajja u  enerġija. (Eżekjel 37:1-14) In-​nies infushom se jsiru bħal “ġnien bis-​saqwi” mimli frott spiritwali.

16. Il-​pajjiż kif se jiġġedded?

¹⁶ It-​tiġdid se jinkludi l-​bini mill-​ġdid tal-​bliet li nqerdu fl-​invażjoni Babiloniża fis-​sena 607 Q.E.K. “Jerġgħu jibnuk mill-​ħerbiet tal-​qedem, mill-​ġdid int tibni s-​sisien taʼ ġenerazzjonijiet sħaħ. U jsejjħulek: ‘Bennej tas-​swar imġarrfa, li jġedded it-​toroq fejn wieħed joqgħod.’” (Isaija 58:12) L-​espressjonijiet simili “ħerbiet tal-​qedem” u “s-​sisien taʼ ġenerazzjonijiet sħaħ” (jew, is-​sisien li ilhom ħerba għal ġenerazzjonijiet sħaħ) juru li l-​membri tal-​fdal li jerġgħu lura lejn pajjiżhom se jibnu mill-​ġdid il-​bliet taʼ Ġuda li saru ħerba, speċjalment Ġerusalemm. (Neħemija 2:5; 12:27; Isaija 44:28) Se jsewwu s-​“swar imġarrfa”—terminu li jirreferi għal ħsarat fis-​swar taʼ Ġerusalemm u bla dubju fi swar taʼ bliet oħrajn ukoll.—Ġeremija 31:38-40; Għamos 9:14.

Barkiet li Jiġu minn Ħarsien tas-​Sabat bil-​Lealtà

17. Jehovah kif jappella lin-​nies tiegħu biex jobdu l-​liġijiet tas-​Sabat?

¹⁷ Is-​Sabat kien espressjoni taʼ l-​interess profond li kellu Alla għall-​benesseri fiżiku u spiritwali tal-​poplu tiegħu. Qal Ġesù: “Is-​sibt [“Sabat,” NW] kien magħmul għall-​bniedem.” (Mark 2:27) Dan il-​jum imqaddes minn Jehovah ta lill-​Iżraelin opportunità speċjali biex juru mħabbithom lejh. B’sogħba, sa żmien Isaija dan spiċċa bħala jum li fih in-​nies iħarsu ritwali fiergħa u jieħdu sehem f’xewqat egoistiċi. Għalhekk, għal darb’oħra, Jehovah għandu raġun iċanfar lin-​nies tiegħu. U mill-​ġdid jipprova jilħqilhom qalbhom, billi jgħid: “Jekk int ma tixħetx is-​Sibt taħt riġlejk, billi tagħmel li jogħġbok fil-​jum imqaddes tiegħi; jekk issejjaħ is-​Sibt l-​għaxqa tiegħek, u l-​jum qaddis u mweġġaħ mill-​Mulej; jekk tagħtih ġieħ billi fih ma  tagħmilx ix-​xogħol taʼ kuljum, u ma tfittixx in-​negozju u t-​tlablib fieragħ, mbagħad issib l-​għaxqa tiegħek fil-​Mulej, u jiena ntellgħek fuq għoljiet l-​art. U nxebbgħek b’wirt Ġakobb, missierek. Għax fomm il-​Mulej tkellem.”—Isaija 58:13, 14.

18. X’se jirriżulta mill-​fatt li Ġuda ma tonorax is-​Sabat?

¹⁸ Is-​Sabat huwa jum għal meditazzjoni spiritwali, talb, u qima fil-​familja. Għandu jgħin lil-​Lhud jirriflettu fuq l-​għemejjel meraviljużi taʼ Jehovah għan-​nom tagħhom u fuq il-​ġustizzja u l-​imħabba murijin fil-​Liġi tiegħu. B’hekk, il-​fatt li jħarsu lealment dan il-​jum qaddis għandu jgħin lin-​nies jersqu eqreb lejn Alla tagħhom. Minflok, qegħdin iħassruh is-​Sabat, u għalhekk qegħdin fil-​periklu li jinqatgħu mill-​barka taʼ Jehovah.—Levitiku 26:34; 2 Kronaki 36:21.

19. Liema barkiet għonja hemm maħżunin għan-​nies t’Alla jekk jerġgħu jibdew iħarsu s-​Sabat?

 ¹⁹ Xorta waħda, jekk il-​Lhud jitgħallmu mid-​dixxiplina u jibdew jonoraw l-​arranġament tas-​Sabat, hemm barkiet għonja maħżunin għalihom. L-​effetti tajbin tal-​qima vera u r-​rispett lejn is-​Sabat se jkunu jidhru fl-​aspetti kollha taʼ ħajjithom. (Dewteronomju 28:1-13; Salm 19:8-12 [19:7-11, NW]) Per eżempju, lin-​nies tiegħu Jehovah se ‘jtellagħhom fuq għoljiet l-​art.’ Din l-​espressjoni tissinjifika sigurtà u rebħa fuq l-​għedewwa tagħhom. Kulmin jikkontrolla l-​postijiet għoljin—l-​għoljiet u l-​muntanji—jikkontrolla l-​art. (Dewteronomju 32:13; 33:29) Kien hemm żmien meta Iżrael obda lil Jehovah, u l-​ġens gawda l-​protezzjoni Tiegħu u kien rispettat minn ġnus oħrajn li saħansitra kienu jibżgħu minnu. (Ġożwè 2:9-11; 1 Slaten 4:20; 5:1 [1 Slaten 4:20, 21, NW]) Jekk jerġgħu jibdew jobdu lil Jehovah, se terġaʼ tiddi fuqhom ftit minn dik il-​glorja li kellhom qabel. Lin-​nies tiegħu Jehovah se jagħtihom sehem sħiħ f’“wirt Ġakobb”—il-​barkiet imwegħdin permezz tal-​patt Tiegħu maʼ missirijiethom tal-​qedem, speċjalment il-​barka li jippossiedu l-​Art Imwiegħda fis-​sigurtà.—Salm 105:8-11.

20. Liema “mistrieħ tas-​Sibt” hemm għall-​Kristjani?

²⁰ Hemm xi lezzjoni għall-​Kristjani f’dan? Mal-​mewt taʼ Ġesù Kristu, il-​Liġi Mosajka twarrbet min-​nofs, inkluż ir-​regolamenti tagħha dwar is-​Sabat. (Kolossin 2:16, 17) Madankollu, l-​ispirtu li l-​ħarsien tas-​Sabat suppost li inkuraġġixxa f’Ġuda—li wieħed ifittex l-​ewwel l-​interessi spiritwali u jersaq qrib taʼ Jehovah—għadu vitali għall-​adoraturi taʼ Jehovah. (Mattew 6:33; Ġakbu 4:8) Iktar minn hekk, fl-​ittra tiegħu lil-​Lhud, Pawlu jgħid: “Għad baqaʼ mistrieħ tas-​Sibt għall-​poplu taʼ Alla.” Il-​Kristjani jidħlu f’dan il-​“mistrieħ tas-​Sibt” billi jkunu ubbidjenti lejn Jehovah u jimxu bit-​tjieba bbażata fuq il-​fidi  fid-​demm imxerred taʼ Ġesù Kristu. (Lhud 3:12,18,19; 4:6,9-11,14-16) Għall-​Kristjani, dan it-​tip taʼ ħarsien tas-​Sabat ma jinżammx biss ġurnata waħda fil-​ġimgħa, imma kuljum.—Kolossin 3:23, 24.

Iżrael Spiritwali ‘Jitlaʼ fuq Għoljiet l-​Art’

21, 22. Jehovah b’liema mod ‘tellaʼ fuq għoljiet l-​art’ lill-​Iżrael t’Alla?

²¹ Mindu nħelsu mill-​jasar taħt Babilonja fl-​1919, il-​Kristjani midlukin ħarsu lealment dak li kien iffigurat bil-​quddiem mis-​Sabat. B’riżultat taʼ dan, Jehovah ‘tellagħhom fuq għoljiet l-​art.’ F’liema sens? Lura fis-​sena 1513 Q.E.K., Jehovah għamel patt mad-​dixxendenti t’Abraham li jekk ikunu ubbidjenti, kienu se jsiru saltna taʼ qassisin u ġens qaddis. (Eżodu 19:5, 6) Matul l-​40 sena li damu fid-​deżert, Jehovah ħa ħsieb iwassalhom qawwijin u sħaħ, bħalma ajkla ġġorr iż-​żgħar tagħha, u berikhom b’ħafna ġid. (Dewteronomju 32:10-12) Madankollu, il-​ġens ma kellux fidi, u finalment tilef il-​privileġġi kollha li setaʼ jkollu. Minkejja dan, Jehovah fil-​fatt għandu saltna taʼ qassisin illum—l-​Iżrael spiritwali t’Alla.—Galatin 6:16; 1 Pietru 2:9.

²² Matul “żmien it-​tmiem,” dan il-​ġens spiritwali għamel dak li naqas li jagħmel Iżrael tal-​qedem. Żamm il-​fidi tiegħu f’Jehovah. (Danjel 8:17) Hekk kif il-​membri taʼ dan il-​ġens iħarsu bir-​reqqa l-​livelli għoljin u t-​triqat sublimi taʼ Jehovah, f’sens spiritwali Hu jerfagħhom fl-​għoli. (Proverbji 4:4, 5, 8; Apokalissi 11:12) Peress li huma protetti mit-​tinġis taʼ madwarhom, igawdu stil taʼ ħajja merfugħ ’il fuq, u minflok ma jinsistu li jagħmlu li jfettlilhom, huma ‘jsibu l-​għaxqa tagħhom fil-​Mulej’ u fil-​Kelma tiegħu. (Salm 37:4) Jehovah żammhom fis-​sigurtà spiritwalment għalkemm mad-​dinja kollha hemm nies li huma determinati li jopponuhom. Mill-​1919 ’l hawn, il-​“pajjiż”  spiritwali tagħhom ma ġiex megħlub. (Isaija 66:8) Huma jkomplu jkunu poplu għall-​isem sublimi tiegħu, li dwaru jxandru bil-​ferħ mad-​dinja kollha. (Dewteronomju 32:3; Atti 15:14, Saydon) Iktar minn hekk, għadd li dejjem jiżdied taʼ nies ġwejdin mill-​ġnus kollha issa jieħu sehem magħhom fil-​privileġġ grandjuż li jiġu mgħallmin it-​triqat taʼ Jehovah u megħjunin jimxu fil-​mogħdijiet tiegħu.

23. Jehovah kif ġiegħel lill-​qaddejja midlukin tiegħu ‘jixbgħu b’wirt Ġakobb’?

²³ Jehovah ġiegħel lill-​qaddejja midlukin tiegħu biex ‘jixbgħu b’wirt Ġakobb.’ Meta Iżakk bierek lil Ġakobb minflok lil Għesaw, bi kliemu l-​patrijarka bassar barkiet għal dawk kollha li kienu se juru fidi fin-​Nisel imwiegħed t’Abraham. (Ġenesi 27:27-29; Galatin 3:16, 17) Bħal Ġakobb—u kuntrarju għal Għesaw—il-​Kristjani midlukin u sħabhom japprezzawhom l-​affarijiet sagri, speċjalment l-​ikel spiritwali li Alla jipprovdi b’abbundanza. (Lhud 12:16, 17; Mattew 4:4) Dan l-​ikel spiritwali—li jinkludi għarfien dwar dak li Jehovah qed iwettaq permezz tan-​Nisel imwiegħed u permezz taʼ l-​imseħbin taʼ dan in-​Nisel—isaħħaħ, iqawwi, u huwa vitali għall-​ħajja spiritwali tagħhom. Għaldaqstant, huwa kruċjali li huma kontinwament jieħdu nutriment spiritwali billi jaqraw il-​Kelma t’Alla u jimmeditaw fuqha. (Salm 1:1-3) Huwa imperattiv li jassoċjaw maʼ sħabhom fit-​twemmin fil-​laqgħat Kristjani. U huwa essenzjali li jappoġġaw il-​livelli għoljin tal-​qima safja hekk kif jaqsmu bil-​ferħ dan in-​nutriment maʼ ħaddieħor.

24. Il-​Kristjani veri kif iġibu ruħhom illum?

²⁴ Waqt li jistennew bil-​ħerqa t-​twettiq tal-​wegħdi taʼ Jehovah, jalla l-​Kristjani veri jkomplu jistmerru kull tip taʼ ipokrisija. Peress li huma mantnuti b’“wirt Ġakobb,” jalla jkomplu jgawdu s-​sigurtà spiritwali “fuq għoljiet l-​art.”

[Nota taʼ taħt]

[Mistoqsijiet taʼ Studju]

 [Stampa f’paġna 278]

Il-​Lhud samu u baxxew rashom b’indiema falza —imma ma bidlux triqathom

 [Stampa f’paġna 283]

Dawk li għandhom il-​mezzi biex jagħmlu dan jagħtu kenn, ilbies, jew provvisti lil dawk li huma fil-​bżonn

[Stampa f’paġna 286]

Jekk tindem, Ġuda se tibni mill-​ġdid il-​bliet tagħha li saru ħerba