Id-Dinja Ġdida Meraviljuża li Se Jagħmel Alla
Il-10 Parti
Id-Dinja Ġdida Meraviljuża li Se Jagħmel Alla
1, 2. X’se jiġri wara l-gwerra li tnaddaf taʼ Armageddon?
WARA l-gwerra t’Armageddon li biha Alla se jnaddaf kollox, imbagħad x’jiġri? Imbagħad se tibda era glorjuża ġdida. Dawk li se jibqgħu ħajjin wara Armageddon, billi jkunu diġà taw prova tal-lealtà tagħhom lejn il-ħakma minn Alla, se jiddaħħlu f’dinja ġdida. X’perijodu eċċitanti ġdid tal-istorja se jkun dak hekk kif jitferrgħu benefiċċji meraviljużi mingħand Alla fuq il-familja umana!
2 Taħt id-direzzjoni tas-Saltna t’Alla, dawk li jibqgħu ħajjin se jibdew jiżżviluppaw ġenna tal-art. L-enerġiji tagħhom se jkunu mmirati lejn għanijiet mhux egoisti li se jkunu taʼ ġid għal kulmin ikun qed igħix hemmhekk. L-art se tibda tinbidel f’dar sabiħa, taʼ paċi u sodisfaċenti għall-bnedmin.
It-Tjieba Tieħu Post il-Ħażen
3. Liema serħan immedjat se jinħass preċiz wara Armageddon?
3 Dan kollu se jintgħamel possibbli bil-qerda tad-dinja taʼ Satana. Qatt iktar ma se jkun hemm reliġjonijiet foloz, sistemi soċjali, jew gvernijiet, li joħolqu firda. Qatt iktar ma se jkun hemm propaganda satanika li tqarraq bin-nies; l-aġenziji kollha li jipproduċuha se jgħibu mas-sistema taʼ Satana. Aħseb ftit: l-atmosfera vvelenata kollha kemm hi tad-dinja taʼ Satana se titwarrab! X’serħan se jkun dak!
4. Iddeskrivi l-bidla li se sseħħ fit-tagħlim.
4 Imbagħad l-ideat qerrieda tal-ħakma umana se jeħdilhom posthom it-tagħlim edifikanti li jiġi minn Alla. “U wliedek subien kollha se jkunu persuni mgħallmin minn Jehovah.” (Isaija 54:13) B’din l-istruzzjoni bnina sena wara l-oħra, “l-art ċertament li se tkun mimlija bil-għarfien taʼ Jehovah bħalma l-ilmijiet qed jiksu lill-istess baħar.” (Isaija 11:9) In-nies m’humiex se jitgħallmu iktar dak li hu ħażin, imma “t-tjieba hija dak li l-abitanti tal-art produttiva ċertament li se jitgħallmu.” (Isaija 26:9) Ħsibijiet u azzjonijiet li jibnu se jkunu l-ordni tal-ġurnata.—Atti 17:31; Filippin 4:8.
5. X’se jiġri mill-ħażen kollu u min-nies mill-agħar?
5 B’hekk, mhux se jkun hemm iktar qtil, vjolenza, stupru, serq, jew xi delitt ieħor. Ħadd ma se jkollu jbati minħabba l-għemejjel mill-agħar taʼ oħrajn. Proverbji 10:30 igħid: “Inkwantu għall-wieħed twajjeb, għal żmien indefinit hu mhux se jiġi mġiegħel jimxi qisu se jaqaʼ; imma inkwantu għal dawk li huma mill-agħar, huma m’humiex se jibqgħu jgħammru fuq l-art.”
Saħħa Perfetta Restawrata
6, 7. (a) Liema realtà ħarxa se tinġieb fit-tmiem mill-ħakma tas-Saltna? (b) Ġesù kif werieh dan waqt li kien fuq l-art?
6 Fid-dinja l-ġdida, se jkun hemm irranġar tal-effetti ħżiena kollha tal-irvell oriġinali. Per eżempju, il-ħakma tas-Saltna se telimina l-mard u x-xjuħija. Illum, saħansitra jekk int tgawdi ammont taʼ saħħa tajba, ir-realtà ħarxa hi li hekk kif int tixjieħ, għajnejk jiċċajpru, snienek jitmermru, is-smiegħ tiegħek jiddgħajjef, il-ġilda tiegħek titkemmex, l-organi interni tiegħek ma jibqgħux jaħdmu, sakemm fl-aħħar tmut.
7 Madankollu, dawn l-effetti taʼ niket li writna mingħand l-ewwel ġenituri tagħna dalwaqt se jkunu xi ħaġa tal-passat. Tiftakar int x’wera Ġesù rigward is-saħħa waqt li kien fuq l-art? Il-Bibbja tirrakkonta: “Folol kbar resqu lejh, li kellhom magħhom nies li kienu zopop, immankati, għomja, muti, u oħrajn mod ieħor, u tefgħuhom b’mod ġust f’riġlejh, u hu fejjaqhom; biex b’hekk il-folla baqgħet imgħaġġba hekk kif raw il-muti jitkellmu u z-zopop jimxu u l-għomja jaraw.”—Mattew 15:30, 31.
8, 9. Iddeskrivi l-ferħ li se jiġi fid-dinja l-ġdida meta tiġi rrestawrata s-saħħa perfetta.
8 X’ferħ kbir se jiġi fid-dinja l-ġdida hekk kif il-mard kollu tagħna jiġi eliminat! It-tbatija li tirriżulta minn nuqqas taʼ saħħa qatt iktar ma se titturmentana. “Ebda resident ma se jgħid: ‘Jien marid.’” “F’dak iż-żmien għajnejn il-għomja se jinfetħu, u l-istess widnejn tat-torox se jkunu mhux misdudin. F’dak iż-żmien iz-zopp se jixxabbat sewwa sew bħalma jagħmel iċ-ċerv, u lsien il-mutu se jgħajjat bil-ferħ.”—Isaija 33:24; 35:5, 6.
9 Ma jkunx eċċitanti li tqum kull fil-għodu u tirrealizza li int issa tgawdi saħħa mill-aqwa? Ma jkunx taʼ sodisfazzjon għal nies xjuħ li jkunu jafu li ngħataw lura l-qawwa taż-żgħożija u li se jiksbu l-perfezzjoni illi Adam u Eva kienu jgawdu oriġinalment? Il-wegħda tal-Bibbja hi: “Ħalli l-laħam tiegħu jsir iktar frisk milli fiż-żgħożija; ħallih imur lura lejn il-jiem tal-ħeġġa taʼ żgħożitu.” (Ġob 33:25) Xi pjaċir ikun li teħles min-nuċċalijiet tal-vista, mill-għajnuniet għas-smiegħ, mill-krozzi, mis-siġġijiet bir-roti, u mill-mediċini! L-isptarijiet, it-tobba, u d-dentisti qatt iktar ma se jkollna bżonnhom.
10. X’se jiġri mill-mewt?
10 Nies li jgawdu saħħa mill-aqwa bħal din mhux se jkunu jridu jmutu. U mhux se jkollhom għalfejn imutu, għaliex il-bniedem qatt iktar ma se jkun maħkum mill-imperfezzjoni li writna u mill-mewt. Kristu “jrid jaħkem bħala sultan sakemm Alla jkun qiegħed il-għedewwa kollha taħt saqajh. Bħala l-aħħar għadu, il-mewt trid tinġieb fix-xejn.” “[I]l-għotja li jagħti Alla hi l-ħajja taʼ dejjem.”—1 Korintin 15:25, 26; Rumani 6:23; ara wkoll Isaija 25:8.
11. Rivelazzjoni kif jiġbor fil-qosor il-benefiċċji tad-dinja l-ġdida?
11 Billi jiġbor fil-qosor il-benefiċċji li se jitferrgħu mingħand dak Alla li jimpurtah għall-familja umana fil-Ġenna tal-art, l-aħħar ktieb tal-Bibbja jgħid: “U [Alla] se jimsaħ kull demgħa minn għajnejhom, u l-mewt ma tkunx iżjed, u la l-għali u la l-biki u lanqas l-uġigħ ma jkunu iżjed. L-affarijiet taʼ qabel għaddew.”—Rivelazzjoni 21:3, 4.
Jirritornaw il-Mejtin
12. Ġesù kif wera l-qawwa li tah Alla biex iqajjem mill-mewt?
12 Ġesù mhux biss fejjaq lill-morda u liz-zopop. Hu ġab ukoll lil xi persuna lura mill-qabar. B’hekk wera l-qawwa tal-għaġeb tal-irxoxt li Alla kien tah. Tiftakarha l-okkażjoni meta Ġesù ġie fid-dar taʼ wieħed raġel li bintu kienet mietet? Ġesù qal lit-tifla mejta: “Tfajla, jien ingħidlek, Qum!” B’liema riżultat? “Minnufih it-tfajla qamet u bdiet timxi.” Malli raw dan, in-nies “intilfu f’estasi kbir.” Bil-kemm setgħu jifilħu jżommu l-ferħ tagħhom!—Mark 5:41, 42; ara wkoll Luqa 7:11-16; Ġwann 11:1-45.
13. Liema xorta taʼ nies se jiġu rxoxtati?
13 Fid-dinja l-ġdida, “se jkun hemm irxoxt kemm tat-twajbin u kemm taʼ dawk li m’humiex twajbin.” (Atti 24:15) F’dak iż-żmien Ġesù se juża l-qawwa li tah Alla biex iqajjem lill-mejtin għaliex, kif qal hu, “Jien hu l-irxoxt u l-ħajja. Min jeżerċita fidi fija, saħansitra għalkemm imut, se jieħu l-ħajja.” (Ġwann 11:25) Hu qal ukoll: “Dawk kollha fl-oqbra tal-mafkar [fil-memorja t’Alla] se jisimgħu leħnu [leħen Ġesù] u joħorġu.”—Ġwann 5:28, 29.
14. Peress li l-mewt mhix se tkun iktar, liema affarijiet se neħilsu minnhom?
14 Kbir se jkun il-ferħ mal-art kollha meta grupp wara grupp taʼ nies mejtin jerġgħu lura għall-ħajja biex jingħaqdu mal-maħbubin tagħhom! Mhux se jkun hemm iktar obitwarji stampati fil-gazzetti biex inikktu lil dawk li jibqgħu ħajjin. Minflok, forsi jistaʼ jkun hemm sewwa sew l-oppost: avviżi dwar irxoxtijiet ġodda biex iferrħu lil dawk li ħabbewhom. Mela xejn iktar funerali, twiebet, krematorji, jew ċimiterji!
Dinja Verament fil-Paċi
15. Il-profezija taʼ Mikea kif se titwettaq fis-sens l-iktar sħiħ tagħha?
15 Se tinkiseb il-vera paċi f’kull qasam tal-ħajja. Il-gwerer, dawk li jġibu l-gwerer, u dawk li jimmanifatturaw l-armamenti se jkunu xi ħaġa tal-passat. Għala? Għaliex interessi nazzjonali u razzjali li jifirdu jkunu għebu. Imbagħad, fil-veru sens tal-kelma, “m’humiex se jerfgħu sejf, ġens kontra ġens, lanqas ma se jitgħallmu l-gwerra iżjed.”—Mikea 4:3.
16. Alla kif se jara li l-gwerer isiru impossibbli?
16 Wieħed forsi jiskanta b’dan meta wieħed iqis l-istorja mdemmija tal-bniedem bil-gwerer il-ħin kollu. Imma dan ġara minħabba li l-bniedem kien taħt ħakma umana u demonika. Fid-dinja l-ġdida, taħt il-ħakma tas-Saltna, dan hu li se jiġri: “Ejjew, ilmħu l-attivitajiet taʼ Jehovah . . . Qiegħed iġiegħel il-gwerer jieqfu sa tarf l-art. Il-qaws hu jaqsam fi tnejn u tassew ikisser il-lanza f’biċċiet; il-vaguni [tal-gwerra] jaħraqhom fin-nar.”—Salm 46:8, 9.
17, 18. Fid-dinja l-ġdida, liema paċi se tiġġedded mal-annimali?
17 Il-bnedmin u l-annimali wkoll se jkunu fil-paċi bejniethom, bħalma kienu f’Għeden. (Genesi 1:28; 2:19) Alla jgħid: “Għalihom jien ċertament li se nikkonkludi patt f’dak il-jum f’konnessjoni mal-bhima selvaġġa tal-għalqa u mal-ħlejqa li ttir tas-smewwiet u l-ħaġa li titkaxkar tal-art, u . . . se nġigħelhom jimteddu fis-sigurtà.”—Ħosea 2:18.
18 Kemm se tkun estensiva dik il-paċi? “[I]l-lupu se jgħammar attwalment għal ftit żmien mal-ħaruf, u mal-gidi se jimtedd il-lijupard innifsu, u l-għoġol u l-iljun żagħżugħ muxgħar u l-annimal mitmugħ sewwa lkoll flimkien; u naqra taʼ tifel ċkejken se jkun mexxej fuqhom.” Qatt iktar ma sejrin l-annimali jkunu taʼ theddida għall-bniedem jew għalihom infushom. Saħanistra “l-iljun se jiekol it-tiben sewwa sew bħall-gendus”!—Isaija 11:6-9; 65:25.
L-Art Mibdula f’Ġenna tal-Art
19. L-art se tinbidel f’liema ħaġa?
19 L-art kollha kemm hi se tinbidel f’dar bħal ġenna għall-bnedmin. Kien għalhekk li Ġesù setaʼ jwiegħed lir-raġel li emmen fih: “Int se tkun miegħi fil-Ġenna.” Il-Bibbja tgħid: “Ix-xagħri u r-reġjun bla ilma se jeżaltaw, u l-pjanura tad-deżert se tkun ferħana u tiżgħar bħaż-żafran. . . . Għax fix-xagħri l-ilmijiet se jkunu nfaqgħu, u gelgil fil-pjanura tad-deżert.”—Luqa 23:43; Isaija 35:1, 6.
20. Il-ġuħ għala qatt iktar ma se jifni lill-bniedem?
20 Taħt is-Saltna t’Alla, il-ġuħ qatt iktar ma se jifleġ lil miljuni. “Se jiġi li jkun hemm kotra taʼ qamħ fuq l-art; fuq il-quċċata tal-muntanji se jkun hemm iżżejjed.” “Is-siġra tal-għalqa trid tagħti l-frott tagħha, u l-art infisha se tagħti l-prodott tagħha, u huma attwalment se jagħtu prova li jkunu fuq il-ħamrija tagħhom fis-sigurtà.”—Salm 72:16; Eżekjel 34:27.
21. X’se jiġri min-nuqqas taʼ djar, kerrejjiet, u nħawi koroh?
21 Qatt iktar ma se jkun hemm faqar, nies bla dar, kerrejjiet, jew inħawi mifnijin mill-kriminalità. “Ċertament li se jibnu djar u jokkupawhom; u ċertament li se jħawlu għelieqi tad-dwieli u jieklu l-frott tagħhom. Mhux se jibnu huma u xi ħadd ieħor jokkupah; mhux se jħawlu huma u xi ħadd ieħor jiekol.” “Huma attwalment se jpoġġu bil-qiegħda, kull wieħed taħt id-dielja tiegħu u taħt is-siġra tat-tin tiegħu, u ma se jkun hemm ħadd li jġigħelhom jitriegħdu.”—Isaija 65:21, 22; Mikea 4:4.
22. Il-Bibbja kif tiddeskrivi l-barkiet taʼ ħakma minn Alla?
22 Il-bnedmin se jkunu mberkin b’dawn l-affarijiet kollha, u b’iktar, fil-Ġenna tal-art. Salm 145:16 igħid: “Int [Alla] qed tiftaħ idek u tissodisfa x-xewqa taʼ kull ħaġa ħajja.” Mhux taʼ b’xejn li l-profezija tal-Bibbja tiddikjara: “[I]l-ġwejdin infushom se jkollhom pussess tal-art, u huma tabilħaqq se jsibu l-għaxqa bnina tagħhom fl-abbundanza taʼ paċi. . . . It-twajbin infushom se jkollhom pussess tal-art, u se jgħammru għal dejjem fuqha.”—Salm 37:11, 29.
Irranġata l-Ħsara tal-Passat
23. Is-Saltna t’Alla kif se tħott is-sofferenza kollha li ġarrabna?
23 Il-ħakma tas-Saltna t’Alla se tirranġa l-ħsara kollha magħmula lill-familja umana għal dawn l-aħħar sitt elef sena. Il-ferħ taʼ dak iż-żmien se jisboq bil-kbir lil kull sofferenza li n-nies ikunu ġarrbu. Il-ħajja mhix se tkun iddisturbata b’memorji koroh taʼ sofferenzi tal-passat. Il-ħsibijiet u l-attivitajiet edifikanti li se jkunu l-ħajja taʼ kuljum għan-nies se jħassru bil-mod il-mod il-memorji taʼ niket.
24, 25. (a) Isaija x’bassar li għandu jiġri? (b) Għala nistgħu nkunu żguri li l-memorji taʼ sofferenzi tal-passat se jiċċajpru?
24 Dak Alla li jimpurtah jiddikjara: “Qiegħed noħloq smewwiet ġodda [gvern ġdid fis-sema fuq il-bniedem] u art ġdida [soċjetà umana taʼ tjieba]; u l-affarijiet taʼ qabel m’humiex se jitfakkru, lanqas ma jidħlu fil-qalb. Imma eżaltaw, intom, u kunu ferħanin għal dejjem b’dak li qiegħed noħloq.” “L-art kollha kemm hi strieħet, saret ħielsa minn tfixkil. In-nies saru ferħanin b’għajjat taʼ ferħ.”—Isaija 14:7; 65:17, 18.
25 Mela permezz tas-Saltna tiegħu, Alla se jirriversja għalkollox is-sitwazzjoni ħażina li ilha għal daqstant żmien. Tul l-eternità se juri kemm jimpurtah bil-kbir minna b’nixxigħat taʼ barkiet li se jpattu bil-kbir ferm għall-uġigħ li rċevejna fil-passat tagħna. L-inkwiet li nkunu ġarrabna qabel se jiċċajpru mbagħad f’memorja ’l bogħod, jekk wara kollox inkunu rridu niftakruhom.
26. Alla għala se jikkompensana għal xi tbatija tal-passat?
26 B’dak il-mod se jikkompensana Alla għas-sofferenza li forsi ssaportejna f’din id-dinja. Hu jaf li ma kienx tort tagħna li twelidna imperfetti, għax aħna writna l-imperfezzjoni mingħand l-ewwel ġenituri tagħna. Ma kienx tort tagħna li twelidna f’dinja satanika, għax kieku Adam u Eva kienu leali, konna nkunu minflok twelidna f’ġenna tal-art. Mela b’mogħdrija kbira Alla se jpatti bil-kbir għall-passat ħażin li ntlaqatna bih.
27. Liema profeziji se jaraw it-twettieq meraviljuż tagħhom fid-dinja l-ġdida?
27 Fid-dinja l-ġdida, il-bniedem se jġarrab il-libertà mbassra f’Rumani 8:21, 22: “Il-ħolqien innifsu wkoll se jinħeles mill-jasar għall-korruzzjoni u jkollu l-libertà glorjuża tat-tfal t’Alla. Għax aħna nafu li l-ħolqien kollu jibqaʼ jitniegħed flimkien u jkun fl-uġigħ flimkien s’issa.” In-nies imbagħad se jaraw it-twettieq sħiħ tat-talba: “Ħa tiġi saltnatek. Ħa tintgħamel ir-rieda tiegħek, kif fis-sema, ukoll fuq l-art.” (Mattew 6:10) Il-kundizzjonijiet meraviljużi fil-Ġenna tal-art se jirriflettu l-kundizzjonijiet fis-sema.
[Mistoqsijiet taʼ l-Istudju]
[Stampi f’paġni 23]
Fid-dinja l-ġdida, ix-xjuħ se jerġgħu lura lejn is-saħħa taż-żgħożija
[Stampa f’paġna 24]
Il-mard u l-mankamenti kollha se jiġu eliminati fid-dinja l-ġdida
[Stampa f’paġna 25]
Fid-dinja l-ġdida, il-mejtin se jiġu rxoxtati għall-ħajja
[Stampa f’paġna 26]
‘Mhux se jitgħallmu l-gwerra iktar’
[Stampi f’paġni 27]
Il-bnedmin u l-annimali se jkunu f’paċi totali fil-Ġenna tal-Art
[Stampa f’paġni 27]
‘Alla se jiftaħ idu u jissodisfa x-xewqa taʼ kull ħaġa ħajja’
[Stampa f’paġni 28]
Is-Saltna t’Alla se tagħmel iktar minn li sempliċement tpatti għas-sofferenza kollha li ssaportejna
