Il-Għotja tal-Għaġeb tar-Rieda Ħielsa
Il-5 Parti
Il-Għotja tal-Għaġeb tar-Rieda Ħielsa
1, 2. Liema għotja tal-għaġeb hija parti minn kif aħna magħmulin?
BIEX nifhmu għala Alla ħalliena nsofru u x’se jagħmel hu dwar is-sofferenza, għandna bżonn napprezzaw kif għamilna. Hu għamel iktar milli ħalaqna b’sempliċi ġisem u moħħ li jaħseb. Ħalaqna wkoll bi kwalitajiet speċjali, mentali u emozzjonali.
2 Parti bażika tal-forma mentali u emozzjonali tagħna hija r-rieda ħielsa. Iva, Alla poġġa ġewwa fina l-fakultà tal-libertà tal-għażla. Kienet tabilħaqq għotja tal-għaġeb mingħandu.
Kif Aħna Magħmulin
3-5. Għala napprezzaw aħna r-rieda ħielsa?
3 Ejjew nikkunsidraw kif ir-rieda ħielsa hija involuta f’li Alla ħalliena nsofru. Biex nibdew, aħseb dwar dan: Tapprezzah int il-fatt li għandek il-libertà li tagħżel x’se tagħmel u tgħid, x’se tiekol u tilbes, liema xorta taʼ xogħol se tagħmel, u fejn u kif se tgħix? Jew trid li xi ħadd jiddettalek kull kelma u azzjoni tiegħek kull mument taʼ ħajtek?
4 Ebda persuna normali ma trid li l-ħajja tagħha tittieħed minn taħt il-kontroll tagħha daqshekk bis-sħiħ. Għala le? Minħabba l-mod kif Alla għamilna. Il-Bibbja tgħidilna li Alla ħalaq lill-bniedem fix-‘xbiha u x-xebh’ tiegħu, u waħda mill-fakultajiet li Alla nnifsu għandu hi l-libertà tal-għażla. (Ġenesi 1:26; Dewteronomju 7:6) Meta ħalaq lill-bnedmin, hu tahom dik l-istess fakultà tal-għaġeb—il-għotja tar-rieda ħielsa. Dik hi raġuni waħda għala aħna ma niħdux pjaċir li nkunu mjassrin minn ħakkiema oppressivi.
5 Mela x-xewqa għal-libertà mhix b’kumbinazzjoni, għax Alla huwa Alla taʼ libertà. Il-Bibbja tgħid: “Fejn qiegħed l-ispirtu taʼ Jehovah, hemm il-libertà.” (2 Korintin 3:17) Għalhekk, Alla tana r-rieda ħielsa bħala parti minn kif aħna fformati. Ladarba hu kien jaf kif l-imħuħ u l-emozzjonijiet tagħna kienu se jaħdmu, kien jaf li aħna konna se nkunu l-iktar ferħanin bir-rieda ħielsa.
6. Alla kif ħalaq il-moħħ tagħna biex jaħdem fi qbil mar-rieda ħielsa?
6 Flimkien mal-għotja tar-rieda ħielsa, Alla tana l-abbiltà biex naħsbu, niżnu l-kwistjonijiet, nieħdu deċiżjonijiet, u nkunu nafu t-tajjeb mill-ħażin. (Ebrej 5:14) B’hekk, ir-rieda ħielsa kellha tkun ibbażata fuq għażla intelliġenti. Ma konniex magħmulin bħal robots bla moħħ li m’għandhom l-ebda rieda tagħhom stess. Lanqas ma konna maħluqin biex naġixxu bl-istint kif kienu maħluqin l-annimali. Minflok, il-moħħ meraviljuż tagħna kien iddisinnjat biex jaħdem fi qbil mal-libertà tal-għażla tagħna.
L-Aqwa Bidu
7, 8. Alla ta liema bidu mill-aħjar lill-ewwel ġenituri tagħna?
7 Biex juri kemm Alla kien jimpurtah, flimkien mal-għotja tar-rieda ħielsa, l-ewwel ġenituri tagħna, Adam u Eva, ġew mogħtijin kollox li xi ħadd setaʼ b’mod raġonevoli jkun irid. Tpoġġew f’ġenna tal-art kbira ħafna bħal ġnien. Kellhom l-abbundanza materjali. Kellhom imħuħ u iġsma perfetti, u b’hekk ma kellhomx għalfejn jixjieħu jew jimirdu jew imutu—setgħu għexu għal dejjem. Kien ikollhom tfal perfetti li wkoll setgħu jkollhom futur hieni, għal dejjem. U l-popolazzjoni li dejjem tikber kien ikollha x-xogħol sodisfaċenti taʼ li eventwalment idawru l-art kollha kemm hi f’ġenna.—Ġenesi 1:26-30; 2:15.
8 Rigward dak li kien ipprovdut, il-Bibbja tirrakkonta: “Alla ra kull ħaġa li kien għamel u, ħares! kienet tajba ħafna.” (Ġenesi 1:31) Il-Bibbja tgħid ukoll dwar Alla: “Perfetta hi l-attività tiegħu.” (Dewteronomju 32:4) Iva, il-Ħallieq ta lill-familja umana bidu perfett. Ma setax ikun aħjar. Kemm ta prova li hu Alla li jimpurtah!
Libertà Limitata
9, 10. Ir-rieda ħielsa għala trid tiġi rregolata b’mod xieraq?
9 Madankollu, kellu Alla l-iskop li r-rieda ħielsa tkun mingħajr limiti? Immaġina belt traffikuża mingħajr liġijiet tat-traffiku, fejn kulħadd jistaʼ jsuq f’liema direzzjoni jrid u b’liema veloċità jrid. Trid int issuq taħt dawk il-kundizzjonijiet? Le, dik kieku tkun anarkija tat-traffiku u żgur li tirriżulta f’ħafna inċidenti.
10 Hekk ukoll mal-għotja t’Alla taʼ rieda ħielsa. Libertà mingħajr limiti tkun tfisser anarkija fis-soċjetà. Irid ikun hemm il-liġijiet biex jiggwidaw l-attivitajiet tal-bniedem. Il-Kelma t’Alla tgħid: “Ġibu ruħkom bħal irġiel ħielsa, u qatt tużaw il-libertà tagħkom bħala skuża għall-ħażen.” (1 Pietru 2:16, JB) Alla jrid li r-rieda ħielsa tkun irregolata għall-ġid taʼ kulħadd. Hu kellu l-iskop għalina li jkollna, mhux libertà totali, imma libertà relattiva, suġġetta lejn ir-regola tal-liġi.
Liġijiet taʼ Min?
11. Il-liġijiet taʼ min konna ddisinnjati biex nobdu?
11 Il-liġijiet taʼ min aħna ddisinnjati biex nobdu? Parti oħra tat-test fl-1 Pietru 2:16 ( JB) tistqarr: “Ma intom irsiera taʼ ħadd ħlief t’Alla.” Dan ma jfissirx skjavitù oppressiv, imma, minflok, ifisser li aħna konna ddisinnjati biex inkunu l-iktar ferħanin meta nkunu sottomessi lejn il-liġijiet t’Alla. (Mattew 22:35-40) Il-liġijiet tiegħu, iktar minn kwalunkwe liġijiet imsawrin mill-bnedmin, jipprovdu l-aqwa gwida. “Jien, Jehovah, jien Alla tiegħek, Dak li qiegħed igħallmek biex tibbenefika lilek innifsek, Dak li qiegħed iġiegħlek tirfes fil-mogħdija li fiha għandek timxi.”—Isaija 48:17.
12. Liema libertà tal-għażla għandna ġewwa l-liġijiet t’Alla?
12 Fl-istess ħin, il-liġijiet t’Alla jippermettu libertà kbira tal-għażla fil-limiti tagħhom. Dan jirriżulta f’varjetà u lill-familja umana jagħmilha affaxxinanti. Aħseb dwar it-tipi differenti taʼ ikel, ilbies, mużika, arti, u djar madwar id-dinja. Aħna żgur li nippreferu li jkollna l-għażla tagħna f’affarijiet bħal dawn minflok ma jkollna xi persuna oħra tiddeċiedi għalina.
13. Liema liġijiet fiżiċi rridu nobdu għall-ġid tagħna stess?
13 B’hekk aħna konna maħluqin biex inkunu l-iktar ferħanin meta nkunu suġġetti lejn il-liġijiet t’Alla għal imġieba umana. Dan huwa l-istess bħal li tkun suġġett lejn il-liġijiet fiżiċi t’Alla. Per eżempju, jekk ma nagħtux kas il-liġi tal-gravità u naqbżu minn fuq xi post fil-għoli, se nweġġgħu jew immutu. Jekk ma nagħtux kas il-liġijiet interni tal-ġisem tagħna u ma niklux iktar ikel, ma nixorbux iktar ilma, jew ma niħdux iktar nifs, se mmutu.
14. Kif nafu li l-bnedmin ma kinux maħluqin biex ikunu indipendenti minn Alla?
14 Daqskemm hi ħaġa żgura li konna maħluqin bil-bżonn li nissottomettu ruħna lejn il-liġijiet fiżiċi t’Alla, aħna konna maħluqin bil-bżonn li nissottomettu ruħna lejn il-liġijiet morali u soċjali t’Alla. (Mattew 4:4) Il-bnedmin ma kinux maħluqin biex ikunu indipendenti minn Dak li għamilhom u jkollhom suċċess. Il-profeta Ġeremija jgħid: “Ma jappartjenix lill-bniedem li miexi saħansitra li jidderieġi l-pass tiegħu. Ikkorreġini, O Jehovah.” (Ġeremija 10:23, 24) Mela b’kull mod il-bnedmin kienu maħluqin biex igħixu taħt it-tmexxija t’Alla, mhux tagħhom stess.
15. Kienu l-liġijiet t’Alla jkunu piż għal Adam u Eva?
15 L-ubbidjenza lejn il-liġijiet t’Alla ma kinetx tkun taʼ piż għall-ewwel ġenituri tagħna. Minflok, kienet iġġib ’il quddiem l-istat tajjeb tagħhom u dak tal-familja umana kollha kemm hi. Kieku l-ewwel par qagħdu fil-limiti tal-liġijiet t’Alla, kollox kien ikun sewwa. Fil-fatt, aħna kieku issa qegħdin ingħixu f’ġenna tal-art tal-għaġeb u taʼ pjaċir bħala familja umana magħquda li tħobb! Ma kienx ikun hemm ħażen, sofferenza, u mewt.
[Mistoqsijiet taʼ l-Istudju]
[Stampa f’paġna 11]
Il-Ħallieq ta lill-bnedmin bidu perfett
[Stampa f’paġna 12]
Trid kieku int issuq fi traffiku qawwi kieku ma kien hemm ebda liġijiet tat-traffiku?
