X’KIENET il-​missjoni taʼ Ġesù fuq l-​art? Hu nnifsu qal: “Irrid inxandar l-​aħbar tajba tas-​saltna t’Alla lil bliet oħrajn ukoll, għax għal dan intbgħatt.” (Luqa 4:43) Ikkunsidra erbaʼ affarijiet li Ġesù għallem dwar din is-​Saltna, it-​tema prinċipali tal-​ippritkar tiegħu.

1. Ġesù kien is-​Sultan maħtur. Ġesù qal ċar u tond li kien il-​Messija mbassar. (Ġwanni 4:25, 26) Hu wera wkoll li kien is-​Sultan li l-​profeta Danjel kien ra f’viżjoni. Ġesù qal lill-​appostli tiegħu li hu kien il-​wieħed li xi darba kien se joqgħod bilqiegħda fuq “tron glorjuż” u li huma wkoll kienu se joqogħdu fuq tronijiet. (Mattew 19:28) Hu rrefera għal dawn l-​uħud li kienu se jkunu ħakkiema bħala l-​“merħla żgħira” tiegħu, u wkoll wera li kellu “nagħaġ oħrajn,” li ma kinux parti minn dan il-​grupp.—Luqa 12:32; Ġwanni 10:16.

2. Is-​Saltna t’Alla kellha tippromwovi l-​ġustizzja vera. Ġesù indika li s-​Saltna kellha tneħħi l-​akbar inġustizzja billi tqaddes, jew tagħmel qaddis, l-​isem t’Alla Ġeħova u tnaddfu mit-​tmaqdir kollu li Satana ilu jitfaʼ fuqu sa mill-​irvell fl-​Għeden. (Mattew 6:9, 10) Ġesù wera wkoll li ma kien iħares lejn wiċċ ħadd billi kuljum kien jgħallem lil irġiel u nisa, għonja u fqar, mingħajr distinzjoni. Għalkemm il-​missjoni tiegħu kienet li jgħallem primarjament lill-​Israelin, hu wkoll stinka biex jgħin lis-​Samaritani u lill-​Ġentili, dawk li ma kinux Lhud. Kuntrarju għall-​mexxejja reliġjużi taʼ żmienu, hu ma wera ebda ħjiel taʼ preġudizzju jew preferenzi.

3. Is-​Saltna t’Alla ma kellhiex tkun parti minn din id-​dinja. Ġesù għex fi żmien taʼ taqlib politiku kbir. Artu kienet dominata minn qawwa barranija. Madankollu, meta n-​nies ipprovaw jinvolvuh fil-​kwistjonijiet politiċi taʼ dak iż-​żmien, hu telaq. (Ġwanni 6:14, 15) Lil politikant minnhom qallu: “Is-​saltna tiegħi mhix parti minn din id-​dinja.” (Ġwanni 18:36) U lis-​segwaċi tiegħu qalilhom: “M’intomx parti mid-​dinja.” (Ġwanni 15:19) Ma ħallihomx jużaw armi tal-​gwerra, lanqas biex jiddefendu lilu stess.—Mattew 26:51, 52.

4. Il-​ħakma taʼ Kristu kellha tkun ibbażata fuq l-​imħabba. Ġesù wiegħed li jserraħ lin-​nies, u li jħaffilhom it-​toqol tagħhom. (Mattew 11:28-​30) Hu żamm kelmtu u bi mħabba ta pariri prattiċi dwar kif ikampaw mal-​ansjetà, kif ikollhom relazzjonijiet tajbin m’oħrajn, kif jikkumbattu l-​materjaliżmu, u kif isibu l-​hena. (Mattew, kapitli 5-​7) Peress li wera l-​imħabba, nies taʼ kull xorta ħassewhom komdi jersqu lejh. Anki l-​iktar nies trattati ħażin ħassewhom ċerti li hu kien se jittrattahom b’qalb tajba u dinjità. X’Ħakkiem tal-​għaġeb se jkun Ġesù!

Kien hemm mod qawwi ieħor kif Ġesù għallem dwar is-​Saltna t’Alla. Għamel ħafna mirakli. Għala għamilhom? Ejja naraw.

—Ibbażat fuq il-​kotba taʼ Mattew, Marku, Luqa, u Ġwanni.