KAPITLU 9
Aħrab mill-immoralità sesswali!
“Għalhekk, mewtu l-membri taʼ ġisimkom li qegħdin fuq l-art fejn tidħol iż-żína [jiġifieri “l-immoralità sesswali”], in-nuqqas taʼ ndafa, l-aptit sesswali, ix-xewqa li twassal għall-ħsara, u x-xenqa b’għira, li hi idolatrija.”—KOLOSSIN 3:5.
1, 2. Balgħam kif ipprova jagħmel ħsara lin-nies taʼ Ġeħova?
SAJJIED imur jistad f’post fejn jistaʼ jsib il-ħut li jixtieq jaqbad. Hu jagħżel il-lixka, jiġifieri l-ikel li se juża mas-sunnara, imbagħad jibda jistad u jistenna bil-paċenzja. Meta l-ħuta tmur għall-ikel taʼ mas-sunnara, is-sajjied jiġbed il-qasba lejh u jtellaʼ l-ħuta.
2 In-nies jistgħu jinqabdu f’nassa bħalma l-ħut jinqabad bil-lixka. Pereżempju, ftit qabel ma l-Iżraelin waslu fl-Art Imwiegħda, huma kkampjaw fid-deżert taʼ Mowab. Is-sultan taʼ Mowab wiegħed lil wieħed raġel jismu Balgħam, li jekk jirnexxilu jagħmel ħsara lin-nies t’Iżrael, itih somma flus. Eventwalment, Balgħam sab mod kif iġiegħel lill-Iżraelin jitfgħu l-ġebla fuq saqajhom. Hu ħaddem moħħu meta għażel il-lixka jew in-nassa li se juża. Hu bagħat nisa żgħażagħ Mowabin fil-kampijiet t’Iżrael biex iħajru lill-irġiel ikollhom relazzjonijiet sesswali magħhom.—Numri 22:1-7; 31:15, 16; Rivelazzjoni 2:14.
3. L-Iżraelin kif inqabdu fin-nassa taʼ Balgħam?
3 Kienet effettiva n-nassa taʼ Balgħam? Iva. Eluf taʼ rġiel Iżraelin kellhom “relazzjonijiet immorali mal-bniet taʼ Mowab.” Huma saħansitra bdew iqimu allat foloz, fosthom lil Bagħal taʼ Pegħor, alla moqżież tas-sess. B’hekk, 24,000 raġel Iżraeli miet eżatt ħdejn l-Art Imwiegħda.—Numri 25:1-9.
4. Eluf taʼ Iżraelin għala beda jkollhom relazzjonijiet immorali?
4 Għala kien hemm dawn l-irġiel kollha li waqgħu għall-pjan taʼ Balgħam? Huma kienu qed jaħsbu biss f’li jissodisfaw ix-xewqat tagħhom stess, u nsew dak kollu li Ġeħova kien għamel magħhom. L-Iżraelin kellhom ħafna raġunijiet għala jkunu leali lejn Alla. Hu kien ħelishom milli jibqgħu skjavi fl-Eġittu, temagħhom fid-deżert, u wassalhom qawwijin u sħaħ ħdejn l-Art Imwiegħda. (Ebrej 3:12) Imma huma xorta tħajru u waqgħu għall-immoralità sesswali. L-appostlu Pawlu kiteb: “Lanqas nipprattikaw iż-żína, kif żnew xi wħud minnhom, u spiċċaw biex waqgħu mejtin.”—1 Korintin 10:8.
5, 6. X’nistgħu nitgħallmu minn dak li ġara fid-deżert taʼ Mowab?
5 Id-dinja l-ġdida hi qrib ħafna. Allura, sa ċertu punt, aħna qisna l-Iżraelin meta kienu ħdejn l-Art Imwiegħda. (1 Korintin 10:11) Bħalissa, in-nies huma iktar moħħhom fis-sess milli kienu l-Mowabin. Din l-attitudni tistaʼ faċilment teffettwa n-nies taʼ Ġeħova. Fil-fatt, l-immoralità sesswali hi l-iktar nassa effettiva li juża x-Xitan.—Numri 25:6, 14; 2 Korintin 2:11; Ġuda 4.
6 Staqsi lilek innifsek, ‘Xi jkun l-aħjar, li nissodisfa x-xewqa egoista tiegħi għal ħin qasir, jew li ngħix ferħan għal dejjem f’ġenna tal-art?’ Ma taħsibx li jaqblilna nagħmlu kull sforz biex nobdu l-kmand taʼ Ġeħova u naħarbu mill-immoralità sesswali?—1 Korintin 6:18.
X’INHI L-IMMORALITÀ SESSWALI?
7, 8. X’inhi l-immoralità sesswali? Għala hi ħaġa serja?
7 Illum, ħafna nies għandhom kondotta laxka, jiġifieri attitudni bla mistħija. Huma ma jiddejqux juru diżrispett lejn il-liġijiet t’Alla dwar is-sess. Fil-Bibbja, l-immoralità sesswali tirreferi għal attività sesswali bejn żewġ persuni li mhumiex miżżewġin skont kif jixtieq Alla. L-immoralità sesswali tinkludi wkoll attività sesswali bejn nies tal-istess sess u bejn in-nies u l-annimali. Attività sesswali tistaʼ tkun relazzjoni sesswali, sess orali, sess anali, jew li wieħed imiss il-partijiet privati taʼ xi ħadd ieħor b’mod sesswali. Għalkemm dan is-suġġett jistaʼ jkun ftit imbarazzanti, hu importanti li niddiskutuh u nifhmuh ħalli nkunu nistgħu nevitaw dak li Ġeħova jobgħod.—Ara n-Nota numru 23 fl-aħħar.
8 Il-Bibbja tagħmilha ċara li jekk xi ħadd ikompli jagħmel l-immoralità sesswali, ma jistax jibqaʼ jagħmel parti mill-kongregazzjoni. (1 Korintin 6:9; Rivelazzjoni 22:15) Barra minn hekk, persuna immorali titlef ir-rispett lejha nfisha u l-fiduċja t’oħrajn. L-immoralità dejjem iġġib il-problemi. Ġeneralment, din iġġiegħel lil dak li jkun iħossu ħati u spiss iġġib tqala mhux mixtieqa, problemi fiż-żwieġ, mard, jew saħansitra mewt. (Aqra Galatin 6:7, 8.) Jekk persuna tieqaf ftit u taħseb dwar il-konsegwenzi tal-immoralità, probabbli ma tkunx tixtieq tagħmilha. Imma spiss, in-nies jaħsbu biss dwar li jissodisfaw ix-xewqat tagħhom stess, u b’hekk jieħdu l-ewwel pass lejn l-immoralità. Ħafna drabi, l-ewwel pass ikun il-pornografija.
PORNOGRAFIJA—PASS LEJN L-IMMORALITÀ
9. Il-pornografija għala hi perikoluża?
9 Il-pornografija hi ddisinjata biex tqanqal xewqat sesswali. Illum, il-pornografija tinsab kullimkien—fir-rivisti, kotba, mużika, programmi tat-televixin, kif ukoll fuq l-Internet. Ħafna jħossu li l-pornografija mhix taʼ ħsara, imma fir-realtà din hi perikoluża ħafna. Tistaʼ twassal persuna biex issir moħħha fis-sess u jkollha xewqat mhux ikkontrollati. Ladarba persuna tibda tara l-pornografija, hi taqbad triq li twassal għal affarijiet bħall-vizzju tal-masturbazzjoni, problemi fiż-żwieġ, u saħansitra divorzju.—Rumani 1:24-27; Efesin 4:19; ara n-Nota numru 24 fl-aħħar.
10. Il-prinċipju li nsibu f’Ġakbu 1:14, 15 kif jgħinna nevitaw l-immoralità?
10 Hu importanti li tkun taf x’għandek tevita biex ma taqax fl-immoralità. Innota t-twissija li nsibu f’Ġakbu 1:14, 15: “Kull bniedem jiġi provat billi jkun miġbud u mħajjar mix-xewqa tiegħu stess. Imbagħad, meta x-xewqa ssir fertili, tiled id-dnub; u meta d-dnub jitwettaq, iġib il-mewt.” Allura, meta jiġuk ħsibijiet ħżiena, neħħihom minn moħħok mill-ewwel. Jekk bi żball tara stampi erotiċi, jiġifieri li jqajmu xewqat sesswali, dawwar wiċċek! Itfi l-kompjuter, jew aqleb l-istazzjon. Tħallix xewqat ħżiena jinżlu f’qalbek. Inkella, dawn jistgħu tant isiru qawwijin li jkun diffiċli biex tikkontrollahom.—Aqra Mattew 5:29, 30.
11. Ġeħova kif jistaʼ jgħinna meta jkollna ħsibijiet ħżiena?
11 Ġeħova jafna aħjar milli nafu lilna nfusna. Allura jaf kemm aħna imperfetti. Imma jaf ukoll li nistgħu nikkontrollaw ix-xewqat ħżiena tagħna. Ġeħova jgħidilna: “Għalhekk, mewtu l-membri taʼ ġisimkom li qegħdin fuq l-art fejn tidħol iż-żína, in-nuqqas taʼ ndafa, l-aptit sesswali, ix-xewqa li twassal għall-ħsara, u x-xenqa b’għira, li hi idolatrija.” (Kolossin 3:5) Għalkemm dan mhux faċli, Ġeħova hu paċenzjuż magħna u se jgħinna. (Salm 68:19) Wieħed żagħżugħ kien qabad il-vizzju tal-pornografija u l-masturbazzjoni. Sħabu tal-iskola ħassew li din kienet ħaġa normali fiż-żgħożija. Imma hu qal: “Dan għamel ħsara l-kuxjenza tiegħi u kien qed iħajjarni għal ħajja immorali.” Hu rrealizza li kellu jikkontrolla x-xewqat tiegħu, u bl-għajnuna taʼ Ġeħova, irnexxielu jieqaf minn dan il-vizzju. Jekk għandek ħsibijiet immorali, itlob lil Ġeħova biex itik “il-qawwa iktar min-normal” ħalli tkun tistaʼ żżomm il-ħsibijiet tiegħek nodfa.—2 Korintin 4:7; 1 Korintin 9:27.
12. Għala rridu nipproteġu lil qalbna?
12 Salamun kiteb hekk: “Iktar minn kull ħaġa oħra li għandek tħares, ħares [jiġifieri pproteġi] lil qalbek, għax minn ġo fiha ġejjin is-sorsi tal-ħajja.” (Proverbji 4:23) F’dal-każ, “qalbna” tirreferi għat-tip taʼ persuna li aħna minn ġewwa, il-persuna li jara Ġeħova. Dak li naraw b’għajnejna jistaʼ jkollu effett kbir fuqna. Ir-raġel leali Ġob qal: “Patt m’għajnejja għamilt. Għalhekk, kif nistaʼ nkun moħħni f’xi verġni?” (Ġob 31:1) Bħal Ġob, aħna rridu nikkontrollaw lejn xiex inħarsu u dwar xiex naħsbu. U bħas-salmista, aħna nitolbu: “Tħallix lil għajnejja jaraw dak li hu bla siwi.”—Salm 119:37.
L-GĦAŻLA ĦAŻINA TAʼ DINA
13. X’tip taʼ ħbieb għażlet Dina?
13 Il-ħbieb tagħna jistaʼ jkollhom effett kbir fuqna. Dawn jistgħu jeffettwawna b’mod tajjeb jew ħażin. Jekk tagħżel ħbieb li jżommu mal-livelli t’Alla, huma jistgħu jgħinuk biex tagħmel l-istess. (Proverbji 13:20; aqra l-1 Korintin 15:33.) L-eżempju taʼ Dina jistaʼ jgħallimna kemm hu importanti li noqogħdu attenti meta nagħżlu l-ħbieb tagħna. Hi kienet waħda mit-tfal taʼ Ġakobb, allura trabbiet f’familja li kienu jqimu lil Ġeħova. Dina ma kinitx persuna immorali, imma hi bdiet tagħmilha maʼ tfajliet Kangħanin u saret ħabiba sew tagħhom. Il-Kangħanin ma kinux iqimu lil Ġeħova. Huma kienu jqisu s-sess b’mod differenti ħafna min-nies t’Alla u kienu magħrufin bħala nies immorali. (Levitiku 18:6-25) Waqt li Dina kienet magħhom, iltaqgħet maʼ ġuvni Kangħani jismu Sikem, li nġibed lejha. Sikem kien meqjus bħala “l-iktar wieħed stmat” fil-familja tiegħu. Imma hu ma kienx iħobb lil Ġeħova.—Ġenesi 34:18, 19.
14. X’ġaralha Dina?
14 Sikem għamel dak li deher normali u aċċettabbli għalih. Peress li Dina għoġbitu, hu “ħadha” u “stupraha.” (Aqra Ġenesi 34:1-4.) Minħabba f’hekk, ġraw ħafna affarijiet li wasslu biex Dina u l-familja kollha tagħha jgħaddu minn traġedja.—Ġenesi 34:7, 25-31; Galatin 6:7, 8.
15, 16. Kif nistgħu nsiru għaqlin?
15 M’hemmx għalfejn nagħmlu l-istess żball taʼ Dina biex nitgħallmu li l-livelli t’Alla huma taʼ ġid għalina. “Min qed jimxi maʼ l-għorrief se jsir għaref, imma min qed jagħmilha maʼ l-istupidi se jaħbatlu ħażin.” (Proverbji 13:20) Għamilha mira li tifhem “kulma għandek tagħmel biex timxi tajjeb,” u b’hekk tevita problemi u tbatija bla bżonn.—Proverbji 2:6-9; Salm 1:1-3.
16 Aħna nistgħu nsiru għaqlin billi nistudjaw il-Kelma t’Alla, nitolbuh qabel ma nieħdu deċiżjoni, u nimxu mal-pariri tajbin li nirċievu mingħand l-ilsir leali u għaqli. (Mattew 24:45; Ġakbu 1:5) Ovvjament, inti taf li lkoll kemm aħna imperfetti u jkollna mumenti fejn inkunu dgħajfin. (Ġeremija 17:9) Imma kif se tirreaġixxi jekk xi ħadd jiġi jwissik li qiegħed fil-periklu li tagħmel l-immoralità? Se tieħu għalik, jew se taċċetta l-għajnuna b’umiltà?—2 Slaten 22:18, 19.
17. Agħti eżempju taʼ kif it-twissija taʼ ħabib Kristjan tistaʼ tgħinna.
17 Pereżempju, immaġina din is-sitwazzjoni. Fuq il-post tax-xogħol taʼ waħda oħt, raġel jibda jtiha attenzjoni speċjali u jistidinha biex toħroġ miegħu. Hu ma jaqdix lil Ġeħova, imma jidher raġel sew u qalbu tajba. Oħt oħra tarahom flimkien u iktar tard tipprova twissiha dwar is-sitwazzjoni. Kif se tirreaġixxi l-ewwel oħt? Se tipprova ġġib l-iskużi, jew se tara li jkun tajjeb li tismaʼ mit-twissija? Hi x’aktarx tħobb lil Ġeħova u tixtieq tagħmel dak li hu tajjeb. Imma jekk tibqaʼ toħroġ maʼ dan ir-raġel, se tkun hi qed taħrab mill-immoralità sesswali jew se tkun qed ‘tafda lil qalbha stess’?—Proverbji 22:3; 28:26; Mattew 6:13; 26:41.
TGĦALLEM MILL-EŻEMPJU TAʼ ĠUŻEPPI
18, 19. Ġużeppi kif ħarab mill-immoralità, u x’għenu jagħmel dan?
18 Meta kien żagħżugħ, Ġużeppi kien skjav fl-Eġittu. Jum wara jum, il-mara taʼ sidu kienet titolbu biex ikollu x’jaqsam magħha, imma Ġużeppi kien jaf li kien ħażin li jagħmel hekk. Ġużeppi kien iħobbu lil Ġeħova u ried jogħġbu. Għalhekk, kull meta din il-mara kienet tipprova tħajru biex ikollu x’jaqsam magħha, hu ma kienx jaċċetta. Peress li kien skjav, hu ma setax jaqbad u jitlaq lil sidu. Darba, wara li l-mara taʼ sidu ppruvat tisforzah biex ikollu x’jaqsam magħha, hu “ħarab u telaq ’il barra.”—Aqra Ġenesi 39:7-12.
19 Kieku Ġużeppi qagħad jaħseb fuq affarijiet immorali jew qagħad jixxennaq għaliha, is-sitwazzjoni setgħet spiċċat b’mod differenti ħafna. Imma għal Ġużeppi, l-iktar ħaġa importanti kienet il-ħbiberija tiegħu maʼ Ġeħova. Hu qalilha hekk lill-mara taʼ sidu: “Sidi . . . ma ċaħħadni assolutament minn xejn ħlief minnek, għax int martu. Allura, kif nistaʼ jien nagħmel dan il-ħażen hekk kbir u nidneb kontra Alla?”—Ġenesi 39:8, 9.
20. Kif nafu li Ġeħova kien ferħan b’Ġużeppi?
20 Minkejja li Ġużeppi kien qed jgħix ’il bogħod mid-dar u l-familja tiegħu, hu baqaʼ leali lejn Alla, u Ġeħova bierku taʼ dan. (Ġenesi 41:39-49) Il-lealtà taʼ Ġużeppi kienet tferraħ lil Ġeħova. (Proverbji 27:11) Jistaʼ jkun diffiċli biex nirreżistu milli nagħmlu l-immoralità. Imma ftakar f’dan il-kliem: “O intom li tħobbu lil Ġeħova, obogħdu dak li hu ħażin. Hu qed iħares ruħ il-leali tiegħu; minn id dawk mill-agħar jeħlishom.”—Salm 97:10.
21. Ħu żagħżugħ kif imita lil Ġużeppi?
21 Jum wara jum, in-nies taʼ Ġeħova b’kuraġġ juru li ‘jobogħdu dak li hu ħażin, u jħobbu dak li hu tajjeb.’ (Għamos 5:15) Għandek kemm għandek żmien, int tistaʼ tkun leali lejn Ġeħova. Ħu żagħżugħ iffaċċja sfida l-iskola tiegħu. Tfajla offrietlu li jkollha x’taqsam miegħu jekk jgħinha f’test tal-iskola. X’għamel iż-żagħżugħ? Hu aġixxa bħal Ġużeppi. Hu qal: “Mill-ewwel għedtilha le. Peress li bqajt leali, ma tliftx id-dinjità u r-rispett lejja nnifsi.” Kull “tgawdija temporanja” li tiġi mill-immoralità ġeneralment twassal għal problemi u wġigħ taʼ qalb. (Ebrej 11:25) Imma l-fatt li nobdu lil Ġeħova se jġibilna ferħ li se jibqaʼ għal dejjem.—Proverbji 10:22.
ĦALLI LIL ĠEĦOVA JGĦINEK
22, 23. Ġeħova kif jistaʼ jgħinna anki jekk nagħmlu dnub serju?
22 Satana se jipprova jaqbadna fin-nassa tal-immoralità sesswali, u din tistaʼ tkun sfida diffiċli għalina. Ilkoll kemm aħna probabbli jiġuna ħsibijiet ħżiena minn żmien għall-ieħor. (Rumani 7:21-25) Ġeħova jafu dan u “jiftakar li aħna trab.” (Salm 103:14) Allura, x’jiġri jekk Kristjan jaqaʼ fid-dnub serju tal-immoralità? Hi din sitwazzjoni bla tama? Le. Jekk persuna tindem minn qalbha, Ġeħova se jgħinha. Alla hu ‘lest li jaħfer.’—Salm 86:5; Ġakbu 5:16; aqra Proverbji 28:13.
23 Ġeħova jagħtina wkoll “irġiel bħala għotjiet”—l-anzjani tal-kongregazzjoni li jieħdu ħsiebna bi mħabba. (Efesin 4:8, 12; Ġakbu 5:14, 15) Hu pprovdielna l-anzjani biex jgħinuna nirranġaw il-ħbiberija tagħna miegħu.—Proverbji 15:32.
UŻA L-ABBILTÀ LI TAĦSEB
24, 25. X’għandna bżonn biex nevitaw l-immoralità, u għala?
24 Biex inkunu nistgħu nieħdu deċiżjonijiet tajbin, irridu nifhmu li l-liġijiet taʼ Ġeħova huma taʼ ġid għalina. Aħna ma rridux inkunu bħaż-żagħżugħ imsemmi fi Proverbji 7:6-23. Hu ma kellux “qalb għarfa,” jiġifieri m’użax l-abbiltà li jaħseb, allura hu nqabad fin-nassa tal-immoralità sesswali. Aħna jistaʼ jkollna l-għerf kollu tad-dinja imma ma jkollniex qalb għarfa. Meta jkollna qalb għarfa, aħna se nipprovaw nifhmu u nimitaw il-mod kif jaħseb Ġeħova. Ftakar f’dan il-kliem għaqli: “Min jikseb qalb għarfa jħobb lilu nnifsu. Min qed jgħasses id-dixxerniment se jsib it-tajjeb.” Fi kliem ieħor, min japprezza l-abbiltà li jifhem se jirnexxi.—Proverbji 19:8.
25 Int konvint għalkollox li l-livelli t’Alla huma ġusti? Temmen verament li jekk tgħix fi qbil magħhom se tkun ferħan? (Salm 19:7-10; Isaija 48:17, 18) Jekk għadek m’intix ċert, ftakar f’kull ħaġa tajba li Ġeħova għamel għalik. “Duqu u araw li Ġeħova hu tajjeb.” (Salm 34:8) Int se tinduna li iktar ma timmedita fuq dak li Ġeħova għamel għalik, iktar se ssir tħobbu. Ħobb dak li hu jħobb, u obgħod dak li hu jobgħod. Imla moħħok bi ħsibijiet tajbin—affarijiet li huma veri, ġusti, nodfa, u jġibu l-imħabba. (Filippin 4:8, 9) Aħna nistgħu nkunu bħal Ġużeppi, li bbenefika mill-għerf t’Alla.—Isaija 64:8.
26. X’se niddiskutu fiż-żewġ kapitli li jmiss?
26 Kemm jekk int single u kemm jekk int miżżewweġ, Ġeħova jridek tgawdi ħajtek u tkun ferħan. Iż-żewġ kapitli li jmiss fihom informazzjoni li se tgħin lill-koppji miżżewġin iżommu r-relazzjoni taʼ bejniethom b’saħħitha.