KAPITLU 17
Ibqaʼ fl-imħabba t’Alla
“Billi tinbnew fuq il-fidi l-iktar qaddisa tagħkom, . . . żommu ruħkom fl-imħabba t’Alla.”—ĠUDA 20, 21.
1, 2. Kif nistgħu nibqgħu fl-imħabba t’Alla?
ILKOLL kemm aħna nixtiequ nkunu b’saħħitna. Allura nipprovaw nieklu ikel bnin, nagħmlu eżerċizzju regolari, u nieħdu ħsieb tagħna nfusna. Għalkemm dan jinvolvi sagrifiċċju, aħna nieħdu pjaċir meta naraw ir-riżultati, allura ma naqtgħux qalbna. Imma hemm bżonn li nkunu b’saħħitna f’xi ħaġa oħra.
2 Għalkemm diġà bdejt issir taf lil Ġeħova, hemm bżonn li tkompli ssaħħaħ il-ħbiberija tiegħek miegħu. Meta Ġuda inkuraġġixxa lill-Kristjani biex jibqgħu fl-imħabba t’Alla, hu spjega kif setgħu jagħmlu dan. Hu qalilhom: “Billi tinbnew fuq il-fidi l-iktar qaddisa tagħkom.” (Ġuda 20, 21) Allura kif nistgħu nsaħħu l-fidi tagħna?
KOMPLI SAĦĦAĦ IL-FIDI TIEGĦEK
3-5. (a) Satana xi jridek taħseb dwar il-livelli taʼ Ġeħova? (b) Int kif tħossok dwar il-liġijiet u l-prinċipji taʼ Ġeħova?
3 Hu importanti li tkun konvint li Ġeħova jaf x’inhu l-aħjar għalik. Satana jridek taħseb li hu diffiċli wisq li żżomm mal-livelli t’Alla. Hu jrid iġegħelna naħsbu li nkunu iktar ferħanin jekk niddeċiedu aħna x’inhu tajjeb u ħażin. Satana ilu minn żmien Adam u Eva jipprova jġiegħel lin-nies jemmnu dan. (Ġenesi 3:1-6) Hu għadu qed jipprova jagħmel dan b’ħiltu kollha.
4 Għandu raġun Satana? Huma l-livelli taʼ Ġeħova stretti wisq? Le. Biex nagħtu eżempju, immaġina li qed timxi fi ġnien kbir u sabiħ. Int u miexi tinnota li parti mill-ġnien hi mdawra b’fence għoli. Forsi tgħid, ‘Dan għala qiegħed fin-nofs?’ Imma wara ftit tismaʼ ljun jgħajjat min-naħa l-oħra. Issa kif tħossok dwar il-fence? Bla dubju, int tieħu r-ruħ li qiegħed hemm jipproteġik mill-iljun! Il-prinċipji taʼ Ġeħova huma bħal dan il-fence, u Satana hu bħall-iljun. Il-Kelma t’Alla twissina hekk: “Ibqgħu f’sensikom, oqogħdu għassa. L-avversarju tagħkom, ix-Xitan, iħuf bħal iljun jgħajjat, jipprova jiblaʼ lil xi ħadd.”—1 Pietru 5:8.
5 Ġeħova jixtieq li jkollna l-aqwa ħajja. Hu ma jridx li Satana jidħaq bina. Għalhekk, hu tana liġijiet u prinċipji biex jipproteġuna u jagħmluna ferħanin. (Efesin 6:11) Ġakbu kiteb: “Min iħares fiss lejn il-liġi perfetta tal-libertà u jibqaʼ jagħmel hekk, . . . ikun hieni li qed jagħmilha.”—Ġakbu 1:25.
6. Kif nistgħu nsiru konvinti li Ġeħova jixtiqilna l-aħjar?
6 Meta nobdu d-direzzjoni taʼ Ġeħova, se ngħixu ħajja aħjar u nsaħħu l-ħbiberija tagħna miegħu. Pereżempju, meta nitolbu spiss bħalma jixtieqna nagħmlu Alla, se jkun taʼ benefiċċju għalina. (Mattew 6:5-8; 1 Tessalonikin 5:17) Aħna nkunu ferħanin meta nobdu d-direzzjoni biex niltaqgħu flimkien ħalli nqimu lil Alla u fl-istess ħin ninkuraġġixxu lil xulxin. Anki li nippritkaw u ngħallmu lil oħrajn jagħmilna ferħanin. (Mattew 28:19, 20; Galatin 6:2; Ebrej 10:) It-talb, il-laqgħat, u l-ippritkar jgħinuna biex inżommu fidi b’saħħitha. Meta naħsbu dwar il-benefiċċji li jiġu minn dawn l-affarijiet, se nkunu iktar konvinti li Ġeħova jixtiqilna l-aħjar. 24, 25
7, 8. X’se jgħinna biex ma ninkwetawx dwar provi li nistgħu ngħaddu minnhom?
7 Għandna mnejn ninkwetaw li ’l quddiem se niltaqgħu maʼ provi li se jagħmluha diffiċli wisq għalina biex nibqgħu leali. Jekk ġieli tħossok hekk, ftakar fil-kliem li Ġeħova qal fil-ktieb t’Isaija: “Jien, Ġeħova, jien Alla tiegħek, li ngħallmek għall-ġid tiegħek, li mmexxik fit-triq li għandek timxi. O li kieku fil-fatt tagħti kas il-kmandamenti tiegħi! Imbagħad il-paċi tiegħek tkun bħal xmara, u s-sewwa tiegħek bħall-mewġ tal-baħar.”—Isaija 48:17, 18.
8 Din l-iskrittura tuża żewġ affarijiet biex turi kif se nibbenefikaw meta nobdu lil Ġeħova. Tgħid li l-paċi tagħna se tkun bħal xmara, jiġifieri abbundanti u ma tispiċċax. Ukoll, tqabbel “is-sewwa” tagħna mal-mewġ tal-baħar, li jistaʼ jibqaʼ għaddej għal żmien twil bla ma jieqaf. Meta nobdu ’l Ġeħova, hu se jgħinna nkomplu nagħmlu dak li hu sewwa. Jiġri x’jiġri f’ħajjitna, aħna nistgħu nibqgħu leali. Il-Bibbja twiegħed: “Ixħet toqlok fuq Ġeħova, u jsostnik. Hu qatt ma jħalli lill-ġust jogħtor,” jew jaqaʼ.—Salm 55:22.
“ĦA NIRSISTU LEJN IL-MATURITÀ”
9, 10. Xi jfisser li tkun matur?
9 Int u ssaħħaħ il-ħbiberija tiegħek maʼ Ġeħova, se tkun qed ‘tirsisti lejn il-maturità.’ (Ebrej 6:1) Xi jfisser li tkun matur?
10 Aħna ma nsirux Kristjani maturi sempliċiment għax nikbru. Biex insiru maturi, irridu nqisu lil Ġeħova bħala l-akbar Ħabib tagħna u nipprovaw naraw l-affarijiet bħalma jarahom hu. (Ġwanni 4:23) Pawlu kiteb: “Għax dawk li huma f’armonija mal-laħam jixħtu moħħhom fuq l-affarijiet tal-laħam, imma dawk li huma f’armonija maʼ l-ispirtu fuq l-affarijiet taʼ l-ispirtu.” (Rumani 8:5) Xi ħadd matur ma jiffokax fuq “l-affarijiet tal-laħam,” bħall-pjaċiri tal-ħajja jew l-affarijiet materjali. Anzi, jiffoka fuq li jaqdi lil Ġeħova u jagħmel għażliet tajbin. (Proverbji 27:11; aqra Ġakbu 1:2, 3.) Hu joqgħod attent li ma jitħajjarx biex jagħmel xi ħaġa ħażina. Persuna matura taf x’inhu tajjeb u tkun determinata li tagħmlu.
11, 12. (a) Kif għandhom ikunu “s-sensi” taʼ Kristjan? (b) X’hemm simili bejn atleta u Kristjan matur?
11 Hemm bżonn nagħmlu sforz biex insiru maturi. L-appostlu Pawlu kiteb: “Imma l-ikel solidu hu għan-nies maturi, għal dawk li bl-użu għandhom is-sensi tagħhom imħarrġin biex jagħrfu jagħżlu kemm it-tajjeb u kemm il-ħażin.” (Ebrej 5:14) Il-kelma “mħarrġin,” tistaʼ tfakkarna fit-trejning t’atleta.
12 Meta naraw dak li atleta professjonali kapaċi jagħmel, nistgħu nkunu ċerti li din il-kapaċità ma ġietx mix-xejn. Żgur li kien hemm bżonn li jittrennja għal tul taʼ żmien biex isir daqshekk tajjeb. Hu ma twilidx b’din il-kapaċità. Meta dan l-atleta kien għadu tarbija, ma kienx jaf eżatt kif juża jdejh u saqajh. Imma maż-żmien, hu tgħallem kif iżomm l-oġġetti u kif jimxi. Mela persuna għandha bżonn tittrennja biex tkun tistaʼ ssir atleta. B’mod simili, biex insiru Kristjani maturi hemm bżonn iż-żmien u t-trejning.
13. X’se jgħinna naħsbu bħalma jaħseb Ġeħova?
13 F’dan il-ktieb, rajna kif nistgħu naħsbu bħalma jaħseb Ġeħova u kif inqisu l-affarijiet bħalma jqishom hu. Tgħallimna wkoll napprezzaw u nħobbu l-livelli taʼ Ġeħova. Meta nkunu se nieħdu xi deċiżjoni, hemm bżonn li nsaqsu lilna nfusna: ‘Liema liġijiet jew prinċipji mill-Bibbja japplikaw f’din is-sitwazzjoni? Kif nistaʼ napplikahom? Ġeħova x’jixtieqni nagħmel?’—Aqra Proverbji 3:5, 6; Ġakbu 1:5.
14. Xi rridu nagħmlu biex inkabbru l-fidi tagħna?
14 Aħna għandna nkomplu nkabbru l-fidi tagħna f’Ġeħova. Bħalma l-ikel bnin jgħinna nkunu f’saħħitna, it-tagħlim dwar Ġeħova jgħinna jkollna fidi b’saħħitha. Meta bdejna nistudjaw il-Bibbja, tgħallimna veritajiet bażiċi dwar Ġeħova u dak li għamel. Imma maż-żmien, hemm bżonn nifhmu wkoll affarijiet iktar profondi. Fil-fatt, Pawlu hekk ried jgħid meta qal: “Imma l-ikel solidu hu għan-nies maturi.” Meta napplikaw dak li nitgħallmu, aħna jkollna l-għerf. Il-Bibbja tgħidilna: “L-għerf hu l-aqwa ħaġa.”—Proverbji 4:5-7; 1 Pietru 2:2.
15. Għala hu importanti ħafna li nħobbu lil Ġeħova u lil ħutna?
15 Sabiex persuna tibqaʼ f’saħħitha hemm bżonn li tkompli tieħu ħsieb tagħha nfisha. Bl-istess mod, persuna matura għandha tkompli taħdem iebes biex iżżomm il-ħbiberija tagħha maʼ Ġeħova b’saħħitha. Pawlu jfakkarna biex ‘nibqgħu ngħarblu jekk aħniex fil-fidi’ u ‘nibqgħu nagħtu prova taʼ x’aħna.’ Fi kliem ieħor, irridu naraw li ħajjitna hi fi qbil maʼ dak li nemmnu. (2 Korintin 13:5) Imma flimkien mal-fidi rridu nkomplu nkabbru wkoll imħabbitna għal Ġeħova u għal ħutna. Pawlu qal: “Kieku għandi . . . l-għarfien kollu, u għandi l-fidi kollha biex inċaqlaq il-muntanji minn posthom, iżda m’għandix imħabba, ma jien xejn.”—1 Korintin 13:1-3.
IFFOKA FUQ IT-TAMA LI GĦANDEK
16. Satana kif jixtieq li nħossuna?
16 Satana, il-mexxej taʼ din id-dinja, iridna naħsbu li qatt ma nistgħu nkunu tajbin biżżejjed biex naqdu lil Ġeħova. Hu jixtieq jiskuraġġina u jġegħelna naħsbu li l-problemi tagħna ma jistgħux jissolvew. Hu jrid li nkunu mdejqin u ma nafdawx f’ħutna l-Kristjani. (Efesin 2:2) Satana jaf li ħsibijiet negattivi jistgħu jkunu taʼ ħsara għalina u għall-ħbiberija tagħna m’Alla. Imma Ġeħova tana xi ħaġa li tistaʼ tgħinna nneħħu dawn il-ħsibijiet. Hu tana t-tama.
17. It-tama għala hi importanti ħafna?
17 Fl-1 Tessalonikin 5:8, il-Bibbja tqabbel “it-tama tas-salvazzjoni” maʼ elmu li suldat kien jilbes f’rasu bħala protezzjoni fil-battalja. It-tama fil-wegħdi taʼ Ġeħova tistaʼ tipproteġi ’l moħħna minn ħsibijiet negattivi.
18, 19. It-tama kif għenet lil Ġesù?
18 It-tama li kellu Ġesù tatu l-kuraġġ. Fl-aħħar lejl tiegħu fuq l-art, hu baqaʼ sod minkejja s-sitwazzjonijiet diffiċli li ffaċċja. Wieħed mill-ħbieb kbar tiegħu ttradieh u ieħor qal li lanqas biss kien jafu. Oħrajn abbandunawh u ħarbu. In-nies taʼ pajjiżu stess daru kontrih sal-punt li talbu li jiġi ttorturat sal-mewt. X’għenu jissaporti dawn l-affarijiet kollha? Hu ffoka fuq “il-ferħ li tqiegħed quddiemu.” Dan għenu biex ma jagħtix kas id-diżunur u biex iktar tard ikun jistaʼ jgawdi l-privileġġ li ‘joqgħod bil-qiegħda fuq il-lemin tat-tron t’Alla.’—Ebrej 12:2.
19 Ġesù kien jaf li jekk jibqaʼ leali kien se jġib tifħir lil Missieru u juri li Satana hu giddieb. Din it-tama tatu ferħ kbir. Ġesù kien jaf ukoll li ma kienx se jdum ma jerġaʼ jmur ħdejn Missieru fis-sema. Din it-tama għenitu jissaporti. Bħal Ġesù, aħna għandna niffokaw fuq it-tama li għandna. It-tama se tgħinna nissaportu jiġri x’jiġri f’ħajjitna.
20. X’jistaʼ jgħinek tkun pożittiv?
20 Ġeħova jinnota l-fidi u l-paċenzja tagħna. (Isaija 30:18; aqra Malakija 3:10.) Hu wiegħed li se ‘jagħtina dak li tixtieq qalbna.’ (Salm 37:4) Allura kompli ffoka fuq it-tama. Satana jixtieqek titlef it-tama u tħoss li l-wegħdi taʼ Ġeħova qatt mhu se jitwettqu. Imma ċċedix għal dawn il-ħsibijiet negattivi! Jekk tinnota li qed jidħlulek id-dubji dwar it-tama, itlob lil Ġeħova biex jgħinek. Ftakar fil-kliem li nsibu f’Filippin 4:6, 7: “Tkunu ansjużi fuq xejn, imma f’kollox b’talb u b’suppliki flimkien maʼ radd il-ħajr ħallu lil Alla jkun jaf x’teħtieġu; u l-paċi t’Alla li tisboq kull ħsieb tgħasses lil qalbkom u l-qawwa mentali tagħkom permezz taʼ Kristu Ġesù.”
21, 22. (a) Ġeħova xi skop għandu għad-dinja? (b) X’inti determinat li tagħmel?
21 Sib ħin regolarment biex taħseb u timmedita fuq il-futur mill-isbaħ li hemm jistenniena. Ftit żmien ieħor, fid-dinja se jkun hawn biss nies li jqimu lil Ġeħova. (Rivelazzjoni 7:9, 14) Aħseb ftit dwar il-ħajja fid-dinja l-ġdida. Se tkun ħafna aħjar milli nistgħu nimmaġinaw! Satana, id-dimonji, u l-ħażen mhux se jibqgħu jeżistu. Int la se timrad u lanqas tmut. Anzi, mhux se tgħaddi ġurnata li tkun imdejjaq jew bla saħħa, imma se tkun dejjem ferħan u mimli enerġija. Ilkoll se naħdmu flimkien biex id-dinja ssir ġenna. Kulħadd se jgawdi ikel tajjeb u jkollu post sabiħ fejn jgħix. In-nies se jkunu qalbhom tajba u mhux vjolenti jew kattivi. Maż-żmien, in-nies kollha se jgawdu “l-libertà glorjuża taʼ wlied Alla.”—Rumani 8:21.
22 Ġeħova jixtieqek li tqisu bħala l-akbar Ħabib tiegħek. Mela agħmel dak kollu li tistaʼ biex tobdih u ssir ħabib aħjar tiegħu. Jalla kollha kemm aħna nibqgħu fl-imħabba t’Alla għal dejjem!—Ġuda 21.