KAPITLU 16
Irreżisti lix-Xitan
“Opponu lix-Xitan, u hu jaħrab minnkom.”—ĠAKBU 4:7.
1, 2. X’hemm bżonn li nkunu nafu dwar Satana u d-dimonji?
IL-ĦAJJA fid-dinja l-ġdida taʼ Ġeħova se tkun xi ħaġa mill-isbaħ. Fl-aħħar, se ngħixu ħajjitna bil-mod kif xtaq Alla fil-bidu. Imma bħalissa qed ngħixu f’dinja kkontrollata minn Satana u d-dimonji tiegħu. (2 Korintin 4:4) Għalkemm ma nistgħux narawhom, dawn jeżistu u huma b’saħħithom ħafna.
2 F’dan il-kapitlu, se niddiskutu kif nistgħu nżommu ħbiberija tajba maʼ Ġeħova u nipproteġu ruħna minn Satana. Ġeħova jwiegħed li se jgħinna. Imma hemm bżonn li nitgħallmu dwar il-metodi li Satana u d-dimonji jużaw biex jidħqu bina u jattakkawna.
“BĦAL ILJUN JGĦAJJAT”
3. Ix-Xitan x’jixtieq jagħmlilna?
3 Satana jgħid li n-nies iqimu lil Ġeħova għax jaqblilhom. Hu jgħid li jekk niġu f’ċirkustanzi diffiċli ħafna ma nibqgħux naqdu lil Alla. (Aqra Ġob 2:4, 5.) Satana u d-dimonji jinnotaw meta xi ħadd juri li jrid jitgħallem dwar Ġeħova, u huma jipprovaw iwaqqfuh. Huma jirrabjaw meta persuna tiddedika ħajjitha lil Ġeħova u titgħammed. Il-Bibbja tqabbel lix-Xitan maʼ “ljun jgħajjat, jipprova jiblaʼ lil xi ħadd.” (1 Pietru 5:8) Satana jixtieq ikissrilna l-ħbiberija tagħna maʼ Ġeħova.—Salm 7:1, 2; 2 Timotju 3:12.
Satana jirrabja meta nużaw ħajjitna biex naqdu lil Ġeħova
4, 5. (a) Satana x’ma jistax jagħmel? (b) Kif nistgħu ‘nopponu lix-Xitan’?
4 Imma m’għandniex għalfejn nibżgħu minn Satana u d-dimonji tiegħu. Ġeħova għamel limitu għal dak li jistgħu jagħmlulna. Ġeħova jwiegħed li “folla kbira” taʼ Kristjani veri se jibqgħu ħajjin wara “t-tribulazzjoni l-kbira.” (Rivelazzjoni 7:9, 14) Ix-Xitan ma jistaʼ jagħmel xejn biex iwaqqaf dan, għax Alla qed jipproteġi lin-nies Tiegħu.
5 Jekk nibqgħu qrib taʼ Ġeħova, Satana mhux se jkun jistaʼ jbegħedna minn Ġeħova. Il-Kelma t’Alla sserrħilna moħħna b’dan il-kliem: “Ġeħova jkun magħkom sakemm intom tkunu miegħu.” (2 Kronaki 15:2; aqra l-1 Korintin 10:13.) Ħafna nies leali li jissemmew fil-Bibbja, bħal Abel, Enok, Noè, Sara, u Mosè, irreżistew lix-Xitan billi baqgħu jżommu qrib taʼ Ġeħova. (Ebrej 11:4-40) Aħna nistgħu nagħmlu l-istess. Il-Kelma t’Alla twiegħed: “Opponu lix-Xitan, u hu jaħrab minnkom.”—Ġakbu 4:7.
AĦNA GĦANDNA ĠLIEDA
6. Satana x’qed jipprova jagħmel?
6 Satana jaf li Ġeħova ma jħallihx jagħmlilna kulma jrid. Minkejja dan, Satana xorta jipprova jagħmel minn kollox biex ibegħedna minn Alla. Illum, ix-Xitan jattakka b’ħafna modi differenti. Hu għadu juża l-istess metodi li uża għal eluf taʼ snin. Liema huma xi ftit minnhom?
7. Satana għala qed jattakka lin-nies t’Alla? Kif qed jagħmel dan?
7 L-appostlu Ġwanni kiteb: “Id-dinja kollha qiegħda taħt il-qawwa tal-Ħażin.” (1 Ġwanni 5:19) Bħalissa, Satana għandu kontroll fuq id-dinja u jixtieq jikkontrolla lin-nies t’Alla wkoll. (Mikea 4:1; Ġwanni 15:19; Rivelazzjoni 12:12, 17) Ix-Xitan jaf li ma tantx fadallu żmien, allura qed jagħmel kulma jistaʼ biex iwaqqafna milli nkunu leali lejn Alla. Kultant ix-Xitan juża attakki diretti, imma drabi oħra hu jattakka fin fin.
8. X’għandu jirrealizza kull Kristjan?
8 Efesin 6:12 jgħid li aħna nissaraw jew niġġieldu “kontra l-forzi taʼ l-ispirti mill-agħar fil-postijiet tas-sema.” Kull Kristjan għandu ġlieda personali kontra x-Xitan u d-dimonji. Hemm bżonn nirrealizzaw li kull min jiddedika lilu nnifsu lil Ġeħova qiegħed f’din il-ġlieda. Fl-ittra li l-appostlu Pawlu bagħat lill-Efesin, hu inkuraġġixxa lill-Kristjani għal tliet darbiet biex ‘iżommu sod.’—Efesin 6:11, 13, 14.
9. Satana u d-dimonji x’jipprovaw jagħmlulna?
9 Satana u d-dimonji jipprovaw jidħqu bina b’modi differenti. Il-fatt li nkunu bqajna sodi f’xi prova partikolari kontra Satana ma jfissirx li se nibqgħu sodi fi prova oħra. Ix-Xitan jipprova jara fiex aħna dgħajfin biex ikun jistaʼ jagħżel l-aħjar nases biex iwaqqagħna. Imma m’għandniex għalfejn naqgħu, għax il-Bibbja tgħallimna dwar in-nases tax-Xitan. (2 Korintin 2:11; ara n-Nota numru 31 fl-aħħar.) Waħda minn dawn hi s-sataniżmu.
ŻOMM ’IL BOGĦOD MID-DIMONJI
10. (a) X’inhu s-sataniżmu? (b) Ġeħova kif iqis is-sataniżmu?
10 Is-sataniżmu, jew l-ispiritiżmu, jinvolvi li jkollok kuntatt mad-dimonji, pereżempju permezz tal-qari tax-xorti, il-maġija, il-magħmul, jew il-komunikazzjoni mal-mejtin. Il-Bibbja tgħidilna li Ġeħova jobgħod is-sataniżmu. Tgħidilna wkoll li ma nistgħux inkunu involuti fih u fl-istess ħin naqdu lil Alla. (Dewteronomju 18:10-12; Rivelazzjoni 21:8) Il-Kristjani għandhom jevitaw għalkollox kull tip taʼ sataniżmu.—Rumani 12:9.
11. X’jistaʼ jiġri jekk inkunu kurjużi dwar affarijiet li għandhom x’jaqsmu mad-dimonji?
11 Satana jaf li jekk jogħġbuna affarijiet li jġibuna f’kuntatt mad-dimonji, se jkun faċli għalih biex jiġbidna lejn l-ispiritiżmu. Kull tip taʼ spiritiżmu se jkissrilna l-ħbiberija tagħna maʼ Ġeħova.
SATANA JIPPROVA JIDĦAQ BINA
12. Satana x’qed jipprova jġegħelna naħsbu?
12 Satana jipprova jħawwad lin-nies. Bil-mod il-mod hu jdaħħlilhom id-dubji sakemm jibdew jaħsbu li “t-tajjeb hu ħażin u l-ħażin hu tajjeb.” (Isaija 5:20) Ix-Xitan jipprova jġegħelna nemmnu li l-pariri tal-Bibbja mhumiex tajbin u li nkunu iktar ferħanin jekk ninjoraw il-livelli t’Alla.
13. Satana kif ipprova jqajjem id-dubji?
13 Wieħed mill-iktar metodi effettivi taʼ Satana hu li jipprova jqajjem id-dubji. Hu ilu ħafna juża dan il-metodu. Fil-ġnien tal-Għeden, hu pprova jqajjem id-dubji billi staqsa lil Eva: “Veru li Alla qalilkom li ma tistgħux tieklu minn kull siġra tal-ġnien?” (Ġenesi 3:1) Fi żmien Ġob, Satana staqsa lil Ġeħova quddiem l-anġli: “Huwa għalxejn li Ġob jibżaʼ minn Alla?” (Ġob 1:9) Wara li Ġesù tgħammed, Satana sfidah billi qallu: “Jekk int bin Alla, għid lil dan il-ġebel isir ħobż.”—Mattew 4:3.
14. Satana kif jipprova jġiegħel lin-nies jiddubitaw jekk is-sataniżmu huwiex perikoluż?
14 Illum, ix-Xitan għadu qed iqajjem id-dubji. Hu jipprova jġiegħel lin-nies jiddubitaw jekk is-sataniżmu huwiex daqshekk ħażin. Hu jidħaq bihom billi jagħmel ċerti tipi taʼ sataniżmu jidhru li ma fihom xejn ħażin. Anki xi Kristjani ġieli jaqgħu f’din in-nassa. (2 Korintin 11:3) Allura, x’nistgħu nagħmlu biex nipproteġu lilna nfusna? Kif nistgħu nagħmlu ċert li Satana mhux qed jidħaq bina? Ejja naraw żewġ affarijiet li Satana jistaʼ juża biex jidħaq bina: id-divertiment u trattamenti mediċi.
SATANA JINQEDA BIX-XEWQAT NATURALI TAGĦNA
15. Kif nistgħu nkunu qed inħallu x-xjaten jinfluwenzawna permezz tad-divertiment tagħna?
15 Illum, ħafna films, vidjows, programmi tat-televixin, video games, u siti fuq l-Internet ikollhom xeni li jkun fihom id-dimonji, il-maġija, u qawwa sopranaturali. Ħafna jieħdu pjaċir b’dawn l-affarijiet u ma jaraw xejn ħażin fihom. Imma huma ma jirrealizzawx kemm hu perikoluż li jħallu x-xjaten jinfluwenzawhom. Dak li jkun jistaʼ jinvolvi ruħu fl-ispiritiżmu anki permezz tal-oroskopju, il-ballun tal-kristall, u l-qari tax-xorti mill-idejn jew bil-kards. Ix-Xitan jaħbi l-perikli li fihom u jipprova jagħmel dawn l-affarijiet jidhru misterjużi, affaxxinanti, u sbieħ. Dak li jkun jistaʼ anki jaħseb li m’hemm xejn ħażin billi jara xi ħaġa li għandha x’taqsam mad-dimonji ladarba hu mhux qed jipprattika s-sataniżmu. Għala hu perikoluż li naħsbu b’dan il-mod?—1 Korintin 10:12.
16. Għala għandna nwarrbu divertiment li għandu x’jaqsam mad-dimonji?
16 Satana u d-dimonji ma jistgħux ikunu jafu x’hemm f’moħħna. Imma huma jistgħu jsiru jafu dwar dak li nixtiequ u kif naħsbuha billi jinnotaw dak li nagħżlu għalina u għall-familja tagħna, inkluż id-divertiment li nagħżlu. Jekk nagħżlu films, mużika, jew kotba dwar il-mediums tal-ispirti, il-maġija, il-pussess mid-dimonji, is-sħaħar, il-vampiri, jew affarijiet simili, Satana u d-dimonji se jsiru jafu li aħna kurjużi dwarhom. Huma jistgħu jipprovaw jinvolvuna iktar fis-sataniżmu.—Aqra Galatin 6:7.
17. Satana kif jistaʼ jieħu vantaġġ mix-xewqa tagħna biex inkunu f’saħħitna?
17 Satana jistaʼ anki jieħu vantaġġ mix-xewqa tagħna biex inkunu f’saħħitna. Illum, ħafna għandhom saħħa batuta. Persuna forsi tkun pruvat ħafna trattamenti li ma ħadmux. (Marku 5:25, 26) Din forsi tispiċċa bla tama u tkun lesta li tipprova kwalunkwe ħaġa li tiġi. Imma bħala Kristjani, hemm bżonn noqogħdu attenti biex ma nagħżlux trattamenti mediċi li fihom “il-qawwa maġika.”—Isaija 1:13.
Strieħ fuq Ġeħova meta tkun marid
18. Il-Kristjani liema trattamenti mediċi għandhom jevitaw?
18 Ħafna żmien ilu, f’Iżrael, kien hemm xi wħud li kienu jużaw “il-qawwa maġika.” Ġeħova qalilhom: “Meta tiftħu idejkom, jien naħbi għajnejja minnkom. Avolja tgħidu ħafna talb, m’iniex nismaʼ.” (Isaija 1:15) Aħseb ftit: Ġeħova lanqas biss kien se jismaʼ talbhom! Aħna ma rridux nagħmlu xi ħaġa li tistaʼ tkun taʼ ħsara għall-ħbiberija tagħna maʼ Ġeħova u li biha nżommuh lura milli jgħinna, speċjalment meta nkunu morda. (Salm 41:3) Allura, irridu nsiru nafu jekk it-trattament għandux x’jaqsam mas-sataniżmu jew il-qawwa sopranaturali. (Mattew 6:13) Jekk hemm possibiltà li għandu x’jaqsam maʼ dawn l-affarijiet, irridu nevitawh!—Ara n-Nota numru 32 fl-aħħar.
STEJJER DWAR ID-DIMONJI
19. Xi jġiegħel lil ħafna nies jibżgħu mix-Xitan?
19 Xi wħud jaħsbu li x-xjaten ma jeżistux, imma oħrajn jafu li jeżistu minħabba l-esperjenzi personali li kellhom. Ħafna huma mwerwrin minn dawn l-ispirti u għalhekk iżommu maʼ drawwiet li għandhom x’jaqsmu mas-superstizzjoni. Oħrajn iġiegħlu lil ħaddieħor jibżaʼ mid-dimonji billi jgħidu stejjer dwar l-affarijiet ħżiena li d-dimonji għamlu lin-nies. Dawk li jisimgħu dawn l-istejjer spiss jimpressjonaw ruħhom u jkunu jridu jgħiduhom lil oħrajn. Stejjer bħal dawn spiss iġiegħlu lin-nies jibżgħu mix-Xitan.
20. Kif nistgħu nkunu qed inxerrdu l-gideb taʼ Satana?
20 Aħseb dwar dan: Satana jrid li n-nies jibżgħu minnu. (2 Tessalonikin 2:9, 10) Hu giddieb u jaf kif jinfluwenza lil dawk li jaffaxxinaw ruħhom bl-ispiritiżmu. Hu jġiegħel lin-nies jemmnu affarijiet li mhux bilfors huma veri. Dawn in-nies għandhom mnejn jgħidu stejjer dwar x’jaħsbu li raw u semgħu. Iktar kemm dawn l-istejjer jiġu ripetuti, iktar jiġu esaġerati. Jekk nirrepetu stejjer bħal dawn, inkunu qed ngħinu lil Satana jxerred il-biżaʼ—xi ħaġa li żgur ma rridux nagħmluha.—Ġwanni 8:44; 2 Timotju 2:16.
21. Minflok ma nirrakkontaw stejjer dwar id-dimonji, fuqiex nistgħu niffokaw?
21 Jekk xi ħadd min-nies taʼ Ġeħova kellu xi esperjenza li tinvolvi d-dimonji, dan mhux se joqgħod jirrakkontaha għall-gost. In-nies taʼ Ġeħova m’għandhomx għalfejn jibżgħu minn dak li x-Xitan u d-dimonji jistgħu jagħmlu. Minflok, aħna rridu niffokaw fuq Ġesù u l-qawwa li tah Ġeħova. (Ebrej 12:2) Ġesù ma qagħadx jirrakkonta stejjer dwar id-dimonji mad-dixxipli għall-gost. Hu ffoka fuq il-messaġġ tas-Saltna u “l-affarijiet grandjużi t’Alla.”—Atti 2:11; Luqa 8:1; Rumani 1:11, 12.
22. X’int determinat li tagħmel?
22 Ħa ma ninsewx li x-xewqa taʼ Satana hi li jkisser il-ħbiberija tagħna maʼ Ġeħova. Hu lest li jagħmel minn kollox biex jiġri hekk. Imma aħna nafu x’inhuma l-metodi li juża x-Xitan u aħna determinati biex nirreżistu kull tip taʼ sataniżmu. Aħna mhux se ‘nagħtu wisaʼ lix-Xitan,’ jiġifieri mhux se ntuh opportunità biex inaqqsilna d-determinazzjoni tagħna. (Aqra Efesin 4:27.) Iva, jekk nirreżistu lix-Xitan, se nevitaw in-nases tiegħu u se jkollna l-protezzjoni taʼ Ġeħova.—Efesin 6:11.