1, 2. Jekk żwieġ ikun fih xi problemi, ifisser li falla? Spjega.

 IŻ-​ŻWIEĠ hu rigal mingħand Ġeħova. Dan jistaʼ jagħmel persuna iktar ferħana. Madankollu, kull żwieġ se jkollu xi problemi. Barra minn hekk, il-​problemi jistgħu jidhru li mhu se jispiċċaw qatt, u r-​relazzjoni taʼ bejn il-​koppja tistaʼ tibred.

² M’għandniex niħduha bi kbira jekk ikollna xi problemi fiż-​żwieġ minn żmien għall-​ieħor. Imma dan ma jfissirx li ż-​żwieġ falla. Anki koppji li kellhom problemi serji ħafna sabu modi kif jirranġaw ir-​relazzjoni tagħhom u jsaħħu ż-​żwieġ. Kif?

3, 4. Xi kultant, x’jistaʼ jiġri fiż-​żwieġ?

³ Iż-​żwieġ jgħaqqad flimkien żewġ persuni b’ideat u gosti differenti u li huma mdorrijin jagħmlu l-​affarijiet b’modi differenti. Apparti minn hekk, ir-​raġel u l-​mara jistaʼ jkollhom trobbija jew kultura differenti minn xulxin. Hemm bżonn iż-​żmien u sforz biex koppja jsiru jafu u jifhmu lil xulxin sew.

⁴ Maż-​żmien, raġel u mara miżżewġin jistgħu tant jibdew jiffokaw fuq l-​affarijiet personali tagħhom stess  li jibdew jitbiegħdu minn xulxin u jkunu bħallikieku qed jgħixu għal rashom. X’jistaʼ jgħinhom biex isaħħu r-​relazzjoni taʼ bejniethom?

5. (a) X’jistaʼ jgħin lil Kristjan biex isaħħaħ ir-​relazzjoni tiegħu mal-​persuna l-​oħra fiż-​żwieġ? (b) Skont Ebrej 13:4, kif għandna nqisu ż-​żwieġ?

⁵ Ġeħova jipprovdi pariri eċċellenti li jistgħu jgħinu lil koppja biex isaħħu r-​relazzjoni tagħhom miegħu u maʼ xulxin. (Salm 25:4; Isaija 48:17, 18) Hu jgħidilna: “Ħa jkun iż-​żwieġ onorabbli għal kulħadd.” (Ebrej 13:4) Xi ħaġa li int tqis onorabbli, hi prezzjuża u taʼ min japprezzaha. Inti tipproteġiha u ma tittraskurahiex. Dan hu l-​mod kif Ġeħova jridna nqisu ż-​żwieġ.

6. Skont Mattew 19:4-6, Alla kif iqis iż-​żwieġ?

⁶ L-​ewwel żwieġ sar minn Ġeħova. Ibnu Ġesù qal: “Ma qrajtux li sa mill-​bidu dak li ħalaqhom għamilhom raġel u mara u qal, ‘Minħabba f’hekk raġel iħalli lil missieru u lil ommu u jingħaqad maʼ martu, u t-​tnejn ikunu ġisem wieħed’? Mela m’għadhomx iżjed tnejn, imma ġisem wieħed. Għalhekk, dak li Alla għaqqad flimkien ħa ma jifirdu ebda bniedem.” (Mattew 19:4-​6) L-​iskop taʼ Ġeħova kien li ż-​żwieġ ikun xi ħaġa permanenti. Hu ried li l-​familji jkunu ferħanin, ikollhom relazzjonijiet b’saħħithom, u jgawdu l-​ħajja flimkien.

7. Dawk miżżewġin kif jistgħu jsaħħu ż-​żwieġ tagħhom?

⁷ Minkejja dan, illum, koppji miżżewġin għandhom iktar stress minn qatt qabel. Xi drabi, tant ikollhom stress li jibdew jaħsbu li m’hemmx tama għaż-​żwieġ tagħhom, u jaqtgħu qalbhom. Imma l-​fatt li nifhmu kif Ġeħova jqis iż-​żwieġ jistaʼ jgħinna.—1 Ġwanni 5:3.

8, 9. (a) Meta għandna nimxu mal-​gwida t’Alla fiż-​żwieġ? (b) Kif nistgħu nuru li ż-​żwieġ tagħna hu prezzjuż għalina?

⁸ Il-​gwida taʼ Ġeħova hi dejjem għall-​ġid tagħna. Bħalma diġà rajna, hu jgħidilna: “Ħa jkun iż-​żwieġ onorabbli.” (Ebrej 13:4; Ekkleżjasti 5:4) Jekk nimxu mad-​direzzjoni taʼ Ġeħova, anki meta ma jkunx faċli, żgur li se nibbenefikaw.—1 Tessalonikin 1:3; Ebrej 6:10.

⁹ Peress li ż-​żwieġ hu prezzjuż għalina, aħna ma rridux ngħidu jew nagħmlu xi ħaġa li tistaʼ ddgħajfu.  Anzi, se nagħmlu l-​almu tagħna biex insaħħu r-​relazzjoni tagħna mar-​raġel jew il-​mara tagħna. Kif nistgħu nagħmlu dan?

10, 11. (a) Liema problema serja hemm f’xi żwiġijiet? (b) Il-​mod kif inkellmu lir-​raġel jew il-​mara tagħna għala hu importanti?

¹⁰ Hemm diversi modi kif xi ħadd miżżewweġ jistaʼ jġiegħel lir-​raġel jew il-​mara tħossha mweġġgħa. Aħna nafu li l-​Kristjani qatt m’għandhom isawtu l-​persuna l-​oħra fiż-​żwieġ jew jagħmlu xi ħaġa biex iweġġgħuha b’mod fiżiku. Però, tnejn jistgħu jweġġgħu lil xulxin bil-​kliem. Il-​kliem jistaʼ jkun bħall-​armi. Waħda mara qalet: “Żewġi jsawwatni bi kliemu. Vera li m’għandix tbenġil li jidher, imma hu kontinwament jgħaddi kummenti li jweġġgħu, bħal ‘Ma nifilħekx!’ u ‘Int ma tiswa għal xejn!’ Dawn il-​kummenti vera weġġgħuli qalbi.” Wieħed raġel qal li martu kienet dejjem tgħajru u ġġiegħlu jħossu ħażin bi kliemha. Hu qal: “L-​affarijiet li tgħidli mhumiex taʼ quddiem in-​nies. Huwa għalhekk li ma nistax inkellimha u għala ndum ix-​xogħol. Ikun iktar jaqbilli nibqaʼ x-​xogħol milli mmur id-​dar.” Illum, hu komuni li wieħed jgħajjar u jgħid kliem bl-​addoċċ li jġib uġigħ emozzjonali.

¹¹ Kliem li jweġġaʼ bejn koppja miżżewġa jwassal għal uġigħ emozzjonali li jieħu ż-​żmien biex jgħaddi. Biċ-​ċar, Ġeħova ma jridx li mara u raġel jittrattaw lil xulxin b’dan il-​mod. Imma jistaʼ jkun li tweġġaʼ lil żewġek jew martek mingħajr ma tkun taf. Int x’aktarx mingħalik li qed tittrattah jew tittrattaha sew. Imma kif tħossha l-​persuna l-​oħra? Jekk bi kliemek  ġieli tweġġagħha, lest li tagħmel bidliet?—Galatin 5:15; aqra Efesin 4:31.

12. X’jistaʼ jeffettwa l-​ħbiberija tagħna m’Alla?

¹² Ġeħova jagħti kas kif int tkellem lil żewġek jew martek, kemm jekk fil-​privat u kemm jekk fil-​pubbliku. (Aqra l-​1 Pietru 3:7.) Ġakbu 1:26 ifakkarna li “jekk xi bniedem jaħseb li jqim lil Alla tajjeb u madankollu ma jrażżanx ilsienu, imma jkompli jqarraq b’qalbu stess, il-​qima taʼ dan il-​bniedem hi fiergħa,” jiġifieri għalxejn.

13. X’inhi ħaġa oħra li tistaʼ ġġiegħel persuna miżżewġa tħossha mweġġgħa?

¹³ Hemm affarijiet oħra li l-​miżżewġin għandhom  jevitaw biex ma jweġġgħux lil xulxin. Pereżempju, kif tħossok kieku r-​raġel jew il-​mara tiegħek tibda tqattaʼ ħafna ħin maʼ xi ħadd ieħor? Forsi l-​intenzjoni tkun tajba, bħal li taħdem maʼ din il-​persuna fuq il-​ministeru jew tgħinha f’xi problema. Imma żewġek jew martek kif tħossha? Mara Kristjana tgħid: “Inħossni mweġġgħa meta nara li żewġi jqattaʼ ħafna ħin u jagħti ħafna attenzjoni lil oħt oħra fil-​kongregazzjoni. Dan iġegħelni nħossni inqas importanti għalih.”

14. (a) Liema verità bażika nitgħallmu minn Ġenesi 2:24? (b) X’għandna nistaqsu lilna nfusna?

¹⁴ Bħala Kristjani, aħna għandna responsabbiltajiet li jinvolvu l-​ġenituri tagħna u lil ħutna fil-​kongregazzjoni. Però, meta niżżewġu, ir-​raġel jew il-​mara tagħna tieħu prijorità. Ġeħova qal li raġel miżżewweġ “irid jingħaqad maʼ martu.” (Ġenesi 2:24) Is-​sentimenti tal-​persuna li żżewwiġna għandhom ikunu importanti ħafna għalina. Staqsi lilek innifsek: ‘Qiegħed nagħtiha l-​ħin, l-​attenzjoni, u l-​affezzjoni li għandha bżonn u li jixirqilha?’

15. Dawk miżżewġin għala għandhom jevitaw li jsiru wisq close taʼ xi ħadd li mhux żewġhom jew marthom?

¹⁵ Jekk insiru wisq close taʼ xi ħadd li mhux ir-​raġel jew il-​mara tagħna, se nkunu qed nipperikolaw iż-​żwieġ tagħna. Jistgħu jibdew deħlin is-​sentimenti u tibda tinġibed b’mod romantiku lejn din il-​persuna. (Mattew 5:28) Dawn is-​sentimenti jistgħu jiżdiedu u jġegħluk tagħmel xi ħaġa li biha turi diżrispett lejn l-​arranġament taż-​żwieġ.

16. Xi kmand tagħtina l-​Bibbja dwar iż-​żwieġ?

¹⁶ Wara li l-​Bibbja tgħid: “Ħa jkun iż-​żwieġ onorabbli,”  tgħid: “Ħa tkun is-​sodda taż-​żwieġ bla tinġis, għax Alla jiġġudika liż-​żienja u lill-​adulteri.” (Ebrej 13:4) Hawnhekk, “is-​sodda taż-​żwieġ” tirreferi għar-​relazzjoni sesswali taʼ bejn raġel u mara miżżewġin. (Proverbji 5:18) Kif nistgħu nuru rispett lejn din ir-​relazzjoni u ma nniġġsuhiex?

17. (a) Ħafna nies illum kif iqisu l-​adulterju? (b) Il-​Kristjani kif għandhom iqisu l-​adulterju?

¹⁷ Xi nies illum jaħsbu li m’hemm xejn ħażin billi ma jkunux leali lejn ir-​raġel jew il-​mara tagħhom. Irridu noqogħdu attenti li ma niġux influwenzati b’din il-​mentalità. Ġeħova jagħmilha ċara ħafna li jobgħod l-​immoralità sesswali u l-​adulterju. (Aqra Rumani 12:9; Ebrej 10:31; 12:29) Li kieku kellu jkollna x’naqsmu maʼ xi ħadd ieħor li mhux ir-​raġel jew il-​mara tagħna, inkunu qed inniġġsu ż-​żwieġ tagħna. Inkunu qed nuru li ma nirrispettawx il-​livelli taʼ Ġeħova u nagħmlu ħsara għar-​relazzjoni tagħna miegħu. Allura, għandna nevitaw li nagħmlu l-​ewwel pass lejn l-​adulterju. Dan jinkludi li nevitaw li jkollna ħsibijiet mhux xierqa dwar persuna oħra.—Ġob 31:1.

18. (a) L-​adulterju għala hu bħall-​qima lil alla falz? (b) Ġeħova kif iqis l-​adulterju?

¹⁸ Taħt il-​Liġi taʼ Mosè, f’Iżrael tal-​qedem, l-​adulterju kien meqjus bħala dnub serju ħafna. Dan kien serju daqs li wieħed iqim alla falz. Il-​kastig għal dawn iż-​żewġ dnubiet kien il-​mewt. (Levitiku 20:2, 10) L-​adulterju kif inhu simili għall-​qima lil alla falz? Dak iż-​żmien, jekk Iżraeli kien iqim alla falz, kien ikun qed jikser il-​wegħda li jibqaʼ leali lejn Ġeħova. U jekk jagħmel adulterju, kien ikun qed jikser il-​wegħda li  jibqaʼ leali lejn il-​persuna l-​oħra fiż-​żwieġ. (Eżodu 19:5, 6; Dewteronomju 5:9; aqra Malakija 2:14.) Biċ-​ċar, fil-​passat, Ġeħova kien iqis l-​adulterju bħala dnub serju ħafna.

19. X’jistaʼ jgħinna nkunu determinati biex ma nagħmlux adulterju?

¹⁹ Xi ngħidu għal-​lum? Għalkemm m’għadniex taħt il-​Liġi taʼ Mosè, il-​mod kif Ġeħova jqis l-​adulterju ma nbidilx. Bħalma aħna ma jgħaddilniex minn moħħna li nqimu alla falz, m’għandux jgħaddilna minn moħħna li nuru nuqqas taʼ lealtà lejn ir-​raġel jew mara tagħna. (Salm 51:1, 4; Kolossin 3:5) Li kieku nagħmlu hekk, inkunu qed nuru nuqqas taʼ rispett lejn l-​arranġament taż-​żwieġ u lejn Alla tagħna, Ġeħova.—Ara n-​Nota numru 26 fl-​aħħar.

20. L-​għerf kif jistaʼ jkun taʼ benefiċċju għaż-​żwieġ?

²⁰ Kif tistaʼ ssaħħaħ iż-​żwieġ tiegħek? Il-​Kelma t’Alla tgħid: “Dar tinbena bl-​għerf, u bid-​dixxerniment [jew, bl-​abbiltà li tifhem] tkun stabbilita fis-​sod.” (Proverbji 24:3) Dar tistaʼ tkun vojta u kiesħa jew tistaʼ tkun cosy, komda, u tagħti protezzjoni. Dan hu simili għal żwieġ. Persuna għarfa se tagħmel ċert li ż-​żwieġ tagħha jkun sod u jagħti l-​protezzjoni u l-​ferħ.

21. L-​għarfien kif jistaʼ jsaħħaħ iż-​żwieġ?

²¹ Il-​Bibbja tkompli tgħid hekk dwar din id-​dar: “Bl-​għarfien il-​kmamar taʼ ġewwa jimtlew b’kull ġid prezzjuż u sabiħ.” (Proverbji 24:4) Dak li titgħallem mill-​Kelma t’Alla jistaʼ jgħinek issaħħaħ iż-​żwieġ tiegħek. (Rumani 12:2; Filippin 1:9) Meta bħala koppja taqraw il-​pubblikazzjonijiet tagħna u l-​Bibbja, iddiskutu  kif tistgħu tapplikaw dak li tkunu tgħallimtu. Fittxu modi kif tistgħu turu mħabba u rispett lejn xulxin, kif ukoll kif tkunu qalbkom tajba u turu li jinteressakom minn xulxin. Itlob lil Ġeħova biex jgħinek taħdem fuq kwalitajiet li se jsaħħu ż-​żwieġ tiegħek u jgħinu biex ir-​raġel jew il-​mara tiegħek ikollha iktar għal xiex tħobbok.—Proverbji 15:16, 17; 1 Pietru 1:7.

22. Għala għandna nuru mħabba, rispett, u unur lejn ir-​raġel jew mara tagħna?

²² Irridu nagħmlu kulma nistgħu biex nittrattaw lir-​raġel jew mara tagħna bl-​imħabba, ir-​rispett, u l-​unur. Imbagħad, iż-​żwieġ tagħna se jkun iktar b’saħħtu u jkun mimli affezzjoni. U l-​iktar importanti hu li b’hekk se nkunu qed inferrħu lil Ġeħova.—Salm 147:11; Rumani 12:10.