KAPITLU 16
Ġesù juri żelu għall-qima vera
-
ĠESÙ JNADDAF IT-TEMPJU
Wara t-tieġ f’Kana, Ġesù jerħilha lejn Kafarnahum. Omm Ġesù u ħutu mill-omm—Ġakbu, Ġużeppi, Xmun, u Ġuda—qed jivvjaġġaw miegħu.
Imma Ġesù għala jmur Kafarnahum? Il-belt qiegħda f’post iktar prominenti minn Nazaret jew Kana u milli jidher hi akbar. Ukoll, ħafna mid-dixxipli ġodda taʼ Ġesù joqogħdu Kafarnahum jew viċin tagħha. Allura Ġesù jistaʼ jagħtihom xi taħriġ fl-inħawi fejn joqogħdu.
Matul iż-żmien li jqattaʼ Kafarnahum, Ġesù jwettaq ukoll ħafna għemejjel meraviljużi. B’hekk, ħafna nies mill-belt u mill-inħawi tal-madwar jisimgħu dwar l-affarijiet li qed jagħmel hemmhekk. Imma Ġesù u sħabu, li huma rġiel Lhud devoti, dalwaqt se jkollhom imorru Ġerusalemm biex jattendu l-Qbiż tas-sena 30 WK.
Waqt li qegħdin fit-tempju taʼ Ġerusalemm, id-dixxipli taʼ Ġesù jaraw xi ħaġa dwar Ġesù impressjonanti ħafna, xi ħaġa differenti minn dak li raw s’issa.
Il-Liġi t’Alla tirrikjedi li l-Iżraelin jagħmlu sagrifiċċji tal-annimali fit-tempju, u l-viżitaturi jkollhom bżonn provvisti tal-ikel matul iż-żjara tagħhom. Allura l-Liġi tippermetti lil dawk li jivvjaġġaw lejn Ġerusalemm minn post imbiegħed biex iġibu l-flus magħhom ħalli jkunu jistgħu jixtru ‘baqar, nagħaġ, mogħoż,’ u affarijiet utli oħrajn matul iż-żmien li jqattgħu l-belt. (Dewteronomju 14:24-26) Minħabba f’hekk, negozjanti f’Ġerusalemm qed ibigħu annimali jew għasafar f’bitħa kbira fit-tempju stess. U xi wħud minnhom qed jisirqu lin-nies billi jżommulhom iżżejjed.
Mgħaddab għall-aħħar, Ġesù jxerred il-muniti tas-sarrafa tal-flus, jaqilbilhom l-imwejjed tagħhom, u jkeċċi l-irġiel ’il barra. Ġesù mbagħad jgħid: “Neħħu dawn minn hawn! Tibqgħux tagħmlu dar Missieri dar tal-merkanzija!”—Ġwanni 2:16.
Meta d-dixxipli taʼ Ġesù jaraw dan, huma jiftakru fil-profezija dwar l-Iben t’Alla: “Iż-żelu għal darek jikolni.” Imma l-Lhud jistaqsu: “X’sinjal għandek x’turina, ladarba qed tagħmel dan?” Ġesù jwieġeb: “Ġarrfu dan it-tempju u fi tlett ijiem intellgħu.”—Ġwanni 2:17-19; Salm 69:9.
Il-Lhud jaħsbu li Ġesù qed jitkellem dwar it-tempju letterali li hemm Ġerusalemm, allura jistaqsuh: “Dan it-tempju nbena f’sitta u erbgħin sena, u int se ttellgħu fi tlett ijiem?” (Ġwanni 2:20) Madankollu, Ġesù qed jirreferi għal ġismu bħala tempju. Tliet snin wara, meta jiġi rxoxtat, id-dixxipli tiegħu jiftakru f’dan il-kliem.