KAPITLU 98
L-appostli jerġgħu jfittxu l-prominenza
MATTEW 20:17-28 MARKU 10:32-45 LUQA 18:31-34
-
ĠESÙ JERĠAʼ JBASSAR MEWTU
-
JITTRATTA MAX-XEWQA TAL-APPOSTLI GĦALL-PROMINENZA
Hekk kif Ġesù u d-dixxipli tiegħu jkomplu jivvjaġġaw lejn in-Nofsinhar tal-Perija fi triqithom lejn Ġerusalemm, huma jaqsmu x-Xmara Ġordan ħdejn Ġeriko. Oħrajn qed jivvjaġġaw magħhom għall-Qbiż tas-sena 33 WK.
Ġesù qed jimxi quddiem id-dixxipli għax hu determinat li jasal il-belt fil-ħin għall-Qbiż. Imma d-dixxipli qed jibżgħu. Iktar kmieni, meta Ġesù mill-Perija ried imur il-Lhudija minħabba li miet Lazzru, Tumas qal lill-oħrajn: “Ejjew immorru aħna wkoll, biex immutu miegħu.” (Ġwanni 11:16, 47-53) Allura hu perikoluż għalihom li jmorru Ġerusalemm, u nistgħu nifhmu għala d-dixxipli qed jibżgħu.
Biex iħejji lill-appostli għal dak li kien ġej, Ġesù jkellimhom waħedhom u jgħidilhom: “Aħna telgħin Ġerusalemm, u Bin il-bniedem se jingħata f’idejn il-qassisin ewlenin u l-iskribi, u dawn jikkundannawh għall-mewt, u jagħtuh f’idejn in-nies tal-ġnus biex jiżżuffjettaw bih u jsawtuh u jsammruh maʼ zokk, u fit-tielet jum jiġi mqajjem.”—Mattew 20:18, 19.
Din it-tielet darba li Ġesù qal lid-dixxipli tiegħu dwar il-mewt u l-irxoxt tiegħu. (Mattew 16:21; 17:22, 23) Madankollu, din id-darba jgħidilhom li se jmut fuq zokk. Huma għalkemm jisimgħu x’qed jgħid ma jifhmux xi jrid ifisser. Forsi huma qed jistennew li s-saltna t’Iżrael se tiġi restawrata fuq l-art, peress li huma jridu jgawdu l-glorja u l-unur f’saltna fuq l-art maʼ Kristu.
Omm l-appostli Ġakbu u Ġwanni, li milli jidher hi Salomè, hi fost dawk li qed jivvjaġġaw magħhom. Ġesù ta lil dawn iż-żewġ appostli isem li jfisser “Ulied ir-Ragħad,” bla dubju minħabba li huma żbukkati. (Marku 3:17; Luqa 9:54) Għal xi żmien, dawn it-tnejn kellhom ix-xewqa li jkunu prominenti fis-Saltna taʼ Kristu. Ommhom taf b’din ix-xewqa, u allura issa hi tersaq lejn Ġesù għan-nom tagħhom, tmil quddiemu, u titolbu pjaċir. Ġesù jwieġeb: “Xi trid?” Hi tgħidlu: “Ordna li dawn iż-żewġ uliedi joqogħdu bil-qiegħda, wieħed fuq il-lemin tiegħek u l-ieħor fuq ix-xellug, fis-saltna tiegħek.”—Mattew 20:20, 21.
Din it-talba fil-fatt ġejja mingħand Ġakbu u Ġwanni. Minħabba li għadu kemm qalilhom dwar l-għajb u l-umiljazzjoni li se jġarrab, Ġesù jgħidilhom: “Ma tafux x’qed titolbu. Tistgħu tixorbu l-kies li dalwaqt nixrob jien?” Huma jwiġbuh: “Nistgħu.” (Mattew 20:22) Xorta waħda, huma x’aktarx li ma jifhmux bis-sħiħ xi jfisser dan għalihom.
Minkejja dan, Ġesù jgħidilhom: “Tassew li se tixorbu l-kies tiegħi, imma li toqogħdu bil-qiegħda fuq il-lemin u fuq ix-xellug tiegħi ma nistax nagħtih jien, imma hu taʼ dawk li tħejja għalihom minn Missieri.”—Mattew 20:23.
L-għaxar appostli l-oħra tgħidx kemm jirrabjaw meta jisimgħu dwar it-talba taʼ Ġakbu u Ġwanni. Jistaʼ jagħti l-każ li Ġakbu u Ġwanni kienu minn taʼ quddiem fl-argument li kellhom l-appostli iktar qabel dwar min hu l-akbar fosthom? (Luqa 9:46-48) Kienu jew ma kinux, it-talba li qed jagħmlu issa tikxef li t-Tnax m’applikawx il-parir li tahom Ġesù biex iġibu ruħhom bħal wieħed mill-iżgħar. Ix-xewqa tagħhom għall-prominenza ma naqsitx.
Ġesù jiddeċiedi li jittratta maʼ din il-kwistjoni li nqalgħet u d-diżgwid li ġabet magħha. Hu jsejjaħ lit-Tnax flimkien u bi mħabba jwiddibhom billi jgħid: “Intom tafu li dawk li jidhru li qed jaħkmu lill-ġnus jiddominawhom u l-kbarat tagħhom għandhom awtorità fuqhom. Dan m’għandux ikun fostkom; imma kulmin irid isir kbir fostkom irid ikun il-qaddej tagħkom, u kulmin irid ikun l-ewwel fostkom irid ikun l-ilsir taʼ kulħadd.”—Marku 10:42-44.
Ġesù jsemmi l-eżempju li għandhom jimitaw—l-eżempju tiegħu. Hu jispjega: “Bin il-bniedem ma ġiex biex ikun moqdi, imma biex jaqdi u jagħti ruħu b’fidwa għal ħafna.” (Mattew 20:28) Ġesù issa ilu xi tliet snin jaqdi lil oħrajn. U dan se jkompli jagħmlu saħansitra sal-punt li jmut għall-umanità! Id-dixxipli għandhom bżonn din l-istess attitudni bħal taʼ Kristu, jiġifieri li jkunu jridu jaqdu minflok ma jiġu moqdijin, li jkunu bħal wieħed mill-iżgħar minflok ma jkollhom pożizzjoni taʼ prominenza.