KAPITLU 86
L-iben li kien mitluf jerġaʼ lura
-
IT-TIXBIHA TAL-IBEN LI KIEN MITLUF
Ġesù rrakkonta t-tixbihat tan-nagħġa l-mitlufa u tal-munita l-mitlufa waqt li x’aktarx kien għadu l-Perija, lejn in-naħa tal-Lvant tax-Xmara Ġordan. Iż-żewġ tixbihat jgħallmuna li għandna nifirħu meta midneb jindem u jerġaʼ lura għand Alla. Il-Fariżej u l-iskribi kkritikaw lil Ġesù għax jilqaʼ lill-midinbin. Imma jitgħallmu xi ħaġa dawn il-kritiċi miż-żewġ tixbihat taʼ Ġesù? Jifhmu huma kif Missierna tas-sema jħossu dwar midinbin li jindmu? Issa Ġesù jirrakkonta tixbiha li tmiss il-qalb u li tenfasizza l-istess lezzjoni importanti.
It-tixbiha tinvolvi missier li għandu żewġ subien, u t-tifel iż-żgħir hu l-karattru prinċipali f’din it-tixbiha. Kemm il-Fariżej u l-iskribi, kif ukoll oħrajn li jisimgħu dak li jgħid Ġesù, għandhom ikunu kapaċi jitgħallmu minn dak li jingħad dwar l-iben iż-żgħir. Madankollu, m’għandniex ninjoraw dak li Ġesù jgħid dwar il-missier u l-iben il-kbir, għax l-attitudnijiet tagħhom jistgħu jgħallmuna ħafna wkoll. Allura aħseb dwar dawn it-tlett irġiel hekk kif Ġesù jirrakkonta t-tixbiha:
“Wieħed raġel kellu żewġ ulied,” jibda Ġesù. “Iż-żgħir qal lil missieru, ‘Missier, agħtini l-parti mill-proprjetà li hi sehmi.’ Imbagħad dan qassmilhom ġidu.” (Luqa 15:11, 12) Innota li l-iben iż-żgħir qed ifittex li jieħu l-wirt tiegħu waqt li missieru għadu ħaj. L-iben irid sehmu issa ħalli jkun indipendenti u jkun jistaʼ jagħmel li jrid. U xi jrid jagħmel?
“Wara ftit jiem,” jispjega Ġesù, “iż-żgħir ġabar kollox u siefer lejn pajjiż imbiegħed, u hemmhekk berbaq ġidu billi għex ħajja sfrattata.” (Luqa 15:13) Minflok ma jibqaʼ fis-sigurtà taʼ daru, maʼ missier li jieħu ħsieb lil uliedu u jagħtihom dak li għandhom bżonn, l-iben jitlaq f’pajjiż ieħor. Hemmhekk iberbaq wirtu kollu biex ipaxxi x-xewqat sesswali tiegħu. Imbagħad jgħaddi minn żmien diffiċli, kif Ġesù jkompli jirrakkonta:
“Meta nefaq kollox, waqaʼ ġuħ kbir maʼ dak il-pajjiż kollu, u hu ġie fil-bżonn. Hu saħansitra mar u qabad maʼ wieħed miċ-ċittadini taʼ dak Luqa 15:14-16.
il-pajjiż, u dan bagħtu fl-għelieqi tiegħu biex jirgħa l-ħnieżer. U kien jixtieq jimla żaqqu bil-ħarrub li kienu jieklu l-ħnieżer, imma ħadd ma kien jagħtih xejn.”—Skont il-Liġi t’Alla, il-ħnieżer mhumiex meqjusin nodfa, imma dan l-iben ikollu jirgħahom. Hu mejjet bil-ġuħ, u għalhekk jixtieq jiekol ikel li normalment hu għall-annimali biss, għall-ħnieżer li qed jirgħa. Fl-istat iddisprat tiegħu l-iben ‘jiġi f’sensih.’ X’jagħmel? Jgħid bejnu u bejn ruħu: “Kemm lavranti maʼ missieri għandhom ħobż bix-xabaʼ, waqt li jien qed immut bil-ġuħ hawnhekk! Inqum u mmur għand missieri u ngħidlu: ‘Missier, jien dnibt kontra s-sema u kontrik. M’għadux jistħoqqli li nissejjaħ ibnek. Agħmilni bħal wieħed mil-lavranti tiegħek.’” Imbagħad iqum u jmur għand missieru.—Luqa 15:17-20.
Missieru kif se jirreaġixxi? Se jdur irrabjat lejn ibnu u jċanfru minħabba li kien iblah u telaq mid-dar? Se juri l-missier attitudni indifferenti u ma jilqgħux lura? Li kieku kont int minfloku, x’kont tagħmel? Xi ngħidu kieku kien ibnek jew bintek?
JINSTAB L-IBEN IL-MITLUF
Ġesù jiddeskrivi kif iħossu l-missier u kif jaġixxi: “Waqt li [ibnu] kien għadu ’l bogħod, missieru lemħu u ħassu mqanqal u tħassru, u telaq jiġri u għannqu u biesu b’tenerezza.” (Luqa 15:20) Anki jekk il-missier semaʼ bil-ħajja sfrattata t’ibnu, hu xorta jilqgħu lura. Mir-reazzjoni tal-missier, sejrin il-mexxejja Lhud, li jsostnu li jafu u jqimu lil Ġeħova, jifhmu kif Missierna tas-sema jħossu lejn midinbin niedma? Barra minn dan, se jagħrfu li Ġesù qed juri l-istess attitudni billi jilqaʼ lill-midinbin?
Il-missier għaqli x’aktarx li jistaʼ jara mill-espressjoni mnikkta taʼ wiċċ ibnu li hu jiddispjaċih minn dak li għamel. Xorta waħda, l-inizjattiva kollha mħabba tal-missier biex jilqgħu tagħmilhielu iktar faċli biex jistqarr dnubietu miegħu. Ġesù jirrakkonta: “Imbagħad l-iben qallu, ‘Missier, jien dnibt kontra s-sema u kontrik. M’għadux jistħoqqli li nissejjaħ ibnek.’”—Luqa 15:21.
Il-missier jordna lill-ilsiera tiegħu: “Ħaffu! Oħorġu libsa, l-aħjar waħda, u libbsuhielu, u poġġulu ċurkett f’idu u sandli f’saqajh. U ġibu l-għoġol l-imsemmen, oqtluh, u ejja nieklu u nieħdu pjaċir, għax dan ibni kien mejjet u reġaʼ ħa l-ħajja; kien mitluf u nstab.” U hekk jagħmlu, “jieħdu pjaċir” flimkien.—Luqa 15:22-24.
Sadanittant, l-iben il-kbir tal-missier qiegħed fl-għalqa. Dwaru Ġesù jgħid: “X’ħin kien ġej u wasal qrib id-dar semaʼ d-daqq u ż-żfin. Għalhekk, sejjaħ wieħed mill-qaddejja u staqsieh dan x’kien ifisser. Qallu, ‘Ġie ħuk, u missierek qatel l-għoġol l-imsemmen, għax laqgħu lura qawwi u sħiħ.’ Imma hu rrabja u ma riedx jidħol. Imbagħad missieru ħareġ barra u beda jitolbu bil-ħrara. Hu wieġeb u qal lil missieru, ‘Ili tant snin nitjassar għalik u qatt ma ksirt il-kmand tiegħek, u madankollu lili qatt ma tajtni gidi biex nieħu pjaċir maʼ ħbiebi. Imma malli wasal dan ibnek li ħela ġidek mal-prostituti, Luqa 15:25-30.
int qtiltlu l-għoġol l-imsemmen.’”—Min, bħall-iben il-kbir, ikkritika l-ħniena u l-attenzjoni li Ġesù wera man-nies komuni u l-midinbin? L-iskribi u l-Fariżej. Din it-tixbiha ġiet rakkontata minħabba l-kritika tagħhom li Ġesù jilqaʼ lill-midinbin. M’għandniex xi ngħidu, kull min jikkritika l-fatt li Alla juri l-ħniena għandu jaħseb bis-serjetà dwar din il-lezzjoni.
Ġesù jtemm it-tixbiha tiegħu billi jirrakkonta l-kliem mill-qalb li l-missier jgħid lil ibnu l-kbir: “Ibni, int dejjem kont miegħi, u kulma hu tiegħi hu tiegħek; imma aħna ma stajniex ma niħdux pjaċir u nifirħu, għax dan ħuk kien mejjet u ħa l-ħajja, u kien mitluf u nstab.”—Luqa 15:31, 32.
Ġesù ma jgħidx x’jagħmel eventwalment l-iben il-kbir. Madankollu, wara l-mewt u l-irxoxt taʼ Ġesù, “folla kbira taʼ qassisin bdew jobdu l-fidi.” (Atti 6:7) Din il-folla għandha mnejn inkludiet lil xi wħud minn dawk li qed jisimgħu lil Ġesù jirrakkonta din it-tixbiha qawwija dwar l-iben li kien mitluf. Iva, anki dawn l-uħud setgħu jiġu f’sensihom, jindmu, u jerġgħu lura għand Alla.
Minn dakinhar ’il quddiem, id-dixxipli taʼ Ġesù jistgħu u għandhom jieħdu bis-serjetà lezzjonijiet importanti minn din it-tixbiha mill-aħjar. L-ewwel lezzjoni hi kemm hu għaqli li nibqgħu fis-sigurtà tal-poplu t’Alla, taħt il-ħarsien taʼ Missierna li jħobbna u jieħu ħsiebna, minflok ma nimxu wara xewqat li jħajruna f’“pajjiż imbiegħed.”
Lezzjoni oħra hi li jekk nitbiegħdu minn Alla, bl-umiltà għandna nerġgħu lura għand Missierna ħalli nerġgħu ngawdu l-approvazzjoni tiegħu.
Nistgħu nitgħallmu lezzjoni oħra mill-kuntrast bejn l-attitudni tal-missier li jaħfer u jilqaʼ lil ibnu lura u l-attitudni tal-iben il-kbir li jżomm f’qalbu għal ħuh u ma jilqgħux. Jidher ċar li jekk xi ħadd ikun tbiegħed minn Alla imma mbagħad jindem verament u jerġaʼ lura ‘fid-dar tal-Missier,’ il-qaddejja t’Alla għandhom jaħfrulu u jilqgħuh. Ejja nifirħu li ħuna li ‘kien mejjet u mitluf’ issa ‘ħa l-ħajja u nstab.’