LEZZJONI 41
Il-Bibbja X’Tgħid Dwar is-Sess?
Ħafna jħossuhom skomdi jitkellmu dwar is-sess. Imma meta l-Bibbja titkellem dwar is-sess, dan tagħmlu b’mod ċar u b’rispett. Dak li tgħid hu għall-ġid tagħna. Dan jagħmel sens għax il-Bibbja ġejja minn Ġeħova u hu ħalaqna. Allura żgur jaf x’inhu l-aħjar għalina. Hu jgħidilna x’għandna nagħmlu biex nogħġbuh u x’jistaʼ jgħinna biex ikollna ħajja ferħana għal dejjem.
1. Ġeħova x’jaħseb fuq is-sess?
Is-sess hu xi ħaġa sabiħa li Ġeħova għamel għan-nies. Hu jixtieq li mara u raġel miżżewġin lil xulxin jieħdu pjaċir bis-sess. B’hekk, il-koppja jistaʼ jkollhom it-tfal u anki juru kemm iħobbu lil xulxin. Allura l-Kelma t’Alla tgħid: “Ifraħ b’mart żgħożitek.” (Proverbji 5:18, 19) Ġeħova jistenna li koppja Kristjana tkun leali lejn xulxin billi ma jagħmlux adulterju, jiġifieri ma jeqilbuhiex lil xulxin.—Aqra Ebrej 13:4.
2. X’inhi l-immoralità sesswali?
Il-Bibbja tgħidilna li ‘ż-żienja ma jirtux is-saltna t’Alla.’ Iż-żienja huma dawk li jagħmlu l-immoralità sesswali. (1 Korintin 6:9, 10) Dawk li kitbu fil-Bibbja bil-Grieg użaw il-kelma pornea biex jispjegaw l-immoralità sesswali. Din il-kelma tinkludi li xi ħadd jagħmel (1) is-sess maʼ xi ħadd li mhux miżżewweġ miegħu, a (2) is-sess maʼ xi ħadd tal-istess sess, u (3) is-sess mal-annimali. Meta ‘nitbiegħdu mill-immoralità sesswali,’ Ġeħova jieħu pjaċir bina u jkun għall-ġid tagħna.—1 Tessalonikin 4:3.
TGĦALLEM IŻJED
Ara x’tistaʼ tagħmel biex ma taqax għall-immoralità sesswali u kif dan hu għall-ġid tiegħek.
3. Ipproteġi lilek innifsek mill-immoralità sesswali
Raġel leali jismu Ġużeppi m’aċċettax li jagħmel is-sess maʼ mara li ma kinitx tiegħu. Aqra Ġenesi 39:1-12, u mbagħad iddiskuti:
-
X’ġiegħel lil Ġużeppi jaħrab? —Ara vers 9.
-
Taħseb li Ġużeppi ddeċieda tajjeb? Għala taħseb hekk?
Iż-żgħażagħ kif jistgħu jimitaw lil Ġużeppi u jipproteġu lilhom infushom mill-immoralità sesswali? Ara l-VIDJOW.
Ġeħova jrid li nipproteġu lilna nfusna mill-immoralità sesswali. Aqra l-1 Korintin 6:18, u mbagħad iddiskuti:
-
X’jistaʼ jħajrek tagħmel l-immoralità?
-
Kif tistaʼ tipproteġi lilek innifsek mill-immoralità?
4. Int tistaʼ tirreżisti t-tentazzjoni
X’jistaʼ jagħmilhielek diffiċli tirreżisti t-tentazzjoni tal-immoralità sesswali? Ara l-VIDJOW, u mbagħad iddiskuti l-mistoqsijiet.
-
Il-ħu fil-vidjow x’għamel meta nduna li xi affarijiet li kien qed jaħseb u jagħmel setgħu jwassluh biex jaqlibha lill-mara tiegħu?
Anki Kristjani leali kultant isibuha diffiċli biex iżommu l-ħsibijiet tagħhom nodfa. Kif tistaʼ tieqaf taħseb fuq affarijiet sesswali? Aqra Filippin 4:8, u mbagħad iddiskuti:
-
Fuq liema affarijiet għandna naħsbu?
-
Meta naqraw il-Bibbja u jkollna x’nagħmlu fix-xogħol taʼ Ġeħova, kif jgħinna nirreżistu t-tentazzjoni?
5. L-istandards taʼ Ġeħova huma għall-ġid tagħna
Ġeħova jaf x’inhu l-aħjar għalina. Hu jgħidilna kif inżommu l-ħsibijiet tagħna nodfa u kif dan hu għall-ġid tagħna. Aqra Proverbji 7:7-27 jew ara l-VIDJOW, u mbagħad iddiskuti l-mistoqsijiet.
-
Żagħżugħ kif waqaʼ fit-tentazzjoni? —Ara Proverbji 7:8, 9.
-
Proverbji 7:23, 26 jurina li l-immoralità sesswali tistaʼ ġġib konsegwenzi koroh. Jekk nibqgħu naħsbu fuq affarijiet nodfa, liema problemi se nevitaw?
-
Meta naħsbu fuq affarijiet nodfa, kif se jgħinna biex ikollna l-ħajja taʼ dejjem?
Xi nies jaħsbu li l-Bibbja hi kontra nies omosesswali u li Alla ma jħobbhomx. Imma Ġeħova, l-Alla li jħobb, jixtieq li kulħadd jgħix ħajja ferħana għal dejjem. Biex ingawdu din il-ħajja li qed iwegħedna, hemm bżonn li ngħixu skont kif jixtieq hu. Aqra l-1 Korintin 6:9-11, u mbagħad iddiskuti:
-
Skont Alla, ix-xewqat tal-omosesswali biss huma ħżiena?
Biex Alla jieħu pjaċir bina, kulħadd irid jagħmel xi bidliet. Jaqblilna nagħmluhom dawn il-bidliet? Aqra Salm 19:8, 11, u mbagħad iddiskuti:
-
L-istandards taʼ Ġeħova huma raġunevoli? Għala taħseb hekk?
Ġeħova għen lil ħafna biex jobdu l-liġijiet tiegħu. Anki lilek jistaʼ jgħin
ĦAFNA JGĦIDU: “M’hemm xejn ħażin jekk tnejn li jħobbu lil xulxin jagħmlu s-sess.”
-
Int x’taħseb?
XI DDISKUTEJNA?
Is-sess hi xi ħaġa sabiħa li Ġeħova ta lil raġel u mara miżżewġin.
X’Tgħallimt
-
X’tinkludi l-immoralità sesswali?
-
X’se jgħinna nipproteġu lilna nfusna mill-immoralità sesswali?
-
Għala hu għall-ġid tagħna li nobdu l-istandards taʼ Ġeħova?
ARA IŻJED
Tgħallem għala Alla jixtieq li raġel u mara li jridu jgħixu flimkien jiżżewġu.
Tgħallem għala l-Bibbja ma tgħidilniex biex nobogħdu lil nies omosesswali.
Sir af kif il-liġijiet t’Alla dwar is-sess jipproteġuna.
Fl-esperjenza bl-isem “Ittrattawni b’Dinjità,” ara x’inkuraġġixxa lil wieħed omosesswali biex ibiddel ħajtu ħalli jogħġob lil Alla.
“Il-Bibbja Tbiddel il-Ħajjiet” (It-Torri tal-Għassa, Lulju- Settembru 2011)
a Dan jinkludi wkoll affarijiet bħal sess orali, sess anali, jew meta xi ħadd imiss il-partijiet privati taʼ xi ħadd ieħor b’mod sesswali.