KAPITLU 2
Is-Saltna titwieled fis-sema
1, 2. X’kienet l-akbar ġrajja li qatt ġrat fl-istorja tad-dinja, u għala ma niskantawx li l-bnedmin ma rawhiex isseħħ?
QATT ħsibt dwar kif kont tħossok li kieku għext matul xi ġrajja storika kbira? Ħafna jaħsbu dwar dan. Imma kkunsidra ftit: Kieku veru għext fi żmien taʼ bidla bħal din, kont personalment tara b’għajnejk stess il-ġrajjiet ewlenin li wasslu għall-bidla? X’aktarx li le. Ġrajjiet li jwasslu għat-tmiem taʼ ħakmiet li ilhom jaħkmu u ġrajjiet li jinkitbu ħafna kotba tal-istorja dwarhom spiss ma jseħħux fil-pubbliku. Sa ċertu punt, ħafna mill-istorja sseħħ wara l-kwinti—f’palazzi tal-ħakkiema, fi kmamar privati fejn jiltaqaʼ l-kunsill, jew f’uffiċċji tal-gvern. Minkejja dan, bidliet bħal dawn jeffettwaw il-ħajjiet taʼ miljuni taʼ nies.
2 Xi ngħidu dwar l-akbar ġrajja li qatt ġrat fl-istorja tad-dinja? Dik il-ġrajja effettwat il-ħajjiet taʼ miljuni taʼ nies, imma l-bnedmin ma rawhiex isseħħ. Ovvjament, qed nirreferu għat-twelid tas-Saltna t’Alla fis-sema, il-gvern Messjaniku li kien ilu mwiegħed u li dalwaqt se jġib fi tmiemha lil din is-sistema dinjija kollha. (Aqra Danjel 2:34, 35, 44, 45.) Ladarba l-bnedmin ma rawx b’għajnejhom stess dan it-twelid sinifikanti, għandna nikkonkludu li Ġeħova ħeba din il-ġrajja mill-umanità? Jew, minflok, ħejja Hu minn qabel lill-poplu leali tiegħu għaliha? Ejja naraw.
“Il-messaġġier tiegħi . . . jħejji triq quddiemi”
3-5. (a) Min kien “il-messaġġier tal-patt” imsemmi f’Malakija 3:1? (b) X’kellu jiġri qabel ma “l-messaġġier tal-patt” jiġi fit-tempju?
3 Sa mill-imgħoddi, Ġeħova kellu l-iskop li jħejji lin-nies tiegħu għat-twelid tas-Saltna Messjanika. Pereżempju, ikkunsidra l-profezija taʼ Malakija 3:1: “Ara! Qed nibgħat lill-messaġġier tiegħi, u jrid iħejji triq quddiemi. U f’daqqa waħda jiġi fit-tempju Tiegħu l-Mulej il-veru, li lilu qegħdin tfittxu, u jiġi l-messaġġier tal-patt li bih titgħaxxqu.”
4 Fit-twettiq taʼ żmienna, Ġeħova, “il-Mulej il-veru,” meta ġie jispezzjona “t-tempju Tiegħu”? Il-profezija tispjega li Ġeħova kien se jiġi mal-“messaġġier tal-patt.” Dan min kien? Ħadd ħlief is-Sultan Messjaniku, Ġesù Kristu! (Lq. 1:68-73) Bħala l-Ħakkiem li kien għadu kif inħatar, kien se jispezzjona u jirfina lin-nies t’Alla fuq l-art, li qed jaqduh fil-bitħa fuq l-art tat-tempju spiritwali tiegħu.—1 Pt. 4:17.
5 Iżda, min kien “il-messaġġier” l-ieħor, l-ewwel wieħed li ssemma f’Malakija 3:1? Dan l-individwu profetiku kien se jkun preżenti ħafna qabel il-preżenza tas-Sultan Messjaniku. Fl-għaxriet taʼ snin qabel l-1914, kien hemm xi ħadd li ‘ħejja triq quddiem’ is-Sultan Messjaniku?
6. Min aġixxa bħala l-ewwel “messaġġier” imbassar li ġie biex iħejji lin-nies t’Alla għal dak li kien ġej?
6 Matul din il-pubblikazzjoni, se nsibu tweġibiet għal mistoqsijiet bħal dawn fl-istorja eċċitanti tal-poplu taʼ Ġeħova fi żmienna. Din l-istorja turi li lejn l-aħħar tas-seklu 19, grupp żgħir taʼ nies leali kien qed juri li hu l-uniku grupp taʼ Kristjani veri fost ħafna gruppi taʼ Kristjani foloz. Dan il-grupp żgħir sar magħruf bħala l-Istudenti tal-Bibbja. Dawk li ħadu t-tmexxija fosthom—Charles T. Russell u dawk li ħadmu mill-qrib miegħu—tassew aġixxew bħala “l-messaġġier” imbassar. Huma ggwidaw b’mod spiritwali lin-nies t’Alla u ħejjewhom għal dak li kien ġej. Ejja nikkunsidraw erbaʼ modi kif “il-messaġġier” għamel dan.
Iqimu bil-verità
7, 8. (a) Matul is-seklu 19, min beda jikxef id-duttrina falza tal-immortalità tar-ruħ? (b) C. T. Russell u l-imseħbin tiegħu kixfu liema tagħlim falz ieħor?
7 Meta studjaw, dawk l-Istudenti tal-Bibbja talbu għall-gwida taʼ Ġeħova; huma qablu fuq veritajiet duttrinali ċari, ġabruhom flimkien, u ppubblikawhom. Għal sekli sħaħ, id-dinja tal-Kristjaneżmu kienet imgeżwra fi dlam spiritwali; ħafna mit-tagħlim tagħha kellu oriġini pagana. Eżempju tajjeb taʼ dan hu d-duttrina tal-immortalità tar-ruħ. Però, matul is-seklu 19, xi studenti sinċieri tal-Bibbja għarblu dan it-tagħlim u raw li l-Kelma t’Alla ma tappoġġahx. Henry Grew, George Stetson, u George Storrs bi qlubija kitbu u taw taħditiet li fihom kixfu din il-gidba satanika. a U dak li għallmu kellu impatt qawwi fuq C. T. Russell u l-imseħbin tiegħu.
8 Il-grupp żgħir tal-Istudenti tal-Bibbja sabu li duttrini oħra li kellhom x’jaqsmu mal-immortalità tar-ruħ bl-istess mod kienu jħawdu lin-nies u kienu foloz—bħal pereżempju, it-tagħlim li n-nies tajbin kollha jmorru s-sema u li Alla jitturmenta għal dejjem l-erwieħ immortali tal-ħżiena fin-nar tal-infern. Russell u l-imseħbin tiegħu bi qlubija kixfu dan il-gideb f’diversi artikli, kotba, kotba żgħar, fuljetti, u prietki stampati fil-gazzetti.
9. It-Torri tal-Għassa kif kixef id-duttrina tat-Trinità bħala li hi falza?
9 Bl-istess mod, l-Istudenti tal-Bibbja kixfu li d-duttrina tat-Trinità, li tant nies kienu jgħożżu, ukoll kienet falza. Fl-1887, It-Torri tal-Għassa qal: “L-Iskrittura hi ċara ħafna dwar ir-relazzjoni li fil-fatt teżisti bejn Ġeħova u l-Mulej tagħna Ġesù u dwar il-fatt li huma żewġ individwi differenti.” L-artiklu mbagħad qal li kien taʼ stagħġib li “l-idea tat-Trinità—tliet allat f’Alla wieħed, u fl-istess ħin Alla wieħed fi tliet allat—saret tant magħrufa u ġiet aċċettata mill-maġġuranza tan-nies. Imma l-fatt li hi tant aċċettata, turi x’nagħsa ħadet il-knisja waqt li l-għadu mlieha sa ruħ ommha b’gideb u żbalji.” b
10. It-Torri tal-Għassa kif ikkonkluda li s-sena 1914 kienet waħda speċjali?
10 It-Torri tal-Għassa kien interessat ferm fi profeziji dwar il-preżenza taʼ Kristu, bħalma ta x’jifhem it-titlu sħiħ tiegħu f’dak iż-żmien (li kien It-Torri tal-Għassa taʼ Sijon li Jħabbar il-Preżenza taʼ Kristu). Il-kittieba midlukin leali tar-rivista għamlu rabta bejn il-profezija taʼ Danjel dwar is-“sebaʼ żminijiet” u bejn iż-żmien meta kellhom jitwettqu l-iskopijiet t’Alla dwar is-Saltna Messjanika. Sa mis-snin 70 tas-seklu 19, huma qalu li s-sena 1914 kienet is-sena meta dawk is-sebaʼ żminijiet kellhom jintemmu. (Dan. 4:25; Lq. 21:24) Għalkemm ħutna f’dak iż-żmien kienu għadhom ma fehmux is-sinifikat kollu taʼ dik is-sena speċjali, huma xandru mal-erbat irjieħ dak li kienu jafu. U anke fi żmienna għadna nħossu l-effetti taʼ dan ix-xandir.
11, 12. (a) Ħuna Russell lil min ta l-krettu għal dak li għallem? (b) Kemm kien importanti x-xogħol li Russell u l-imseħbin tiegħu għamlu fl-għaxriet taʼ snin qabel l-1914?
11 La Russell u lanqas l-imseħbin leali tiegħu ma riedu jieħdu l-krettu talli kixfu u fehmu dawn il-veritajiet spiritwali vitali. Russell ta ħafna krettu lil dawk li ġew qablu. Imma l-iktar, ta l-krettu lil Alla Ġeħova, il-wieħed responsabbli biex jgħallem lill-poplu Tiegħu dak li jeħtieġu jkunu jafu fiż-żmien meta jeħtieġu jkunu jafuh. Jidher ċar li Ġeħova tassew bierek l-isforzi taʼ Russell u l-imseħbin tiegħu biex isaffu l-verità mill-gideb. Hekk kif gerbu s-snin, baqgħu jispikkaw iktar u iktar bħala separati u differenti mill-Kristjaneżmu.
Ħuna Russell u dawk li ħadmu mill-qrib miegħu ressqu ’l quddiem il-veritajiet tal-Bibbja
12 Kemm kien rimarkevoli x-xogħol li għamlu dawn l-irġiel leali biex iressqu ’l quddiem il-veritajiet duttrinali fl-għaxriet taʼ snin qabel l-1914! Meta tkellem dwar dawk is-snin, It-Torri tal-Għassa tal-1 taʼ Novembru 1917, qal: “Miljuni taʼ nies illum qishom neħħew tagħbija tqila minn fuq spallejhom għax isibu ruħhom meħlusin mill-biżaʼ li ħassew minħabba t-tagħlim tan-nar tal-infern u duttrini foloz oħra . . . Il-Verità, li bdiet iktar minn 40 sena ilu, hi bħal mewġa li għadha qed togħla u li se tkompli togħla sakemm timla l-art kollha kemm hi; u l-opponenti tagħha għandhom iktar ċans iżommu lura l-mewġ t’oċean setgħan b’sempliċi xkupa milli jżommu lura l-Verità milli tinxtered madwar l-art kollha.”
13, 14. (a) “Il-messaġġier” kif għen biex iħejji t-triq għas-Sultan Messjaniku? (b) X’nistgħu nitgħallmu minn ħutna taʼ iktar minn 100 sena ilu?
13 Ikkunsidra dan: Kienu se jkunu mħejjijin in-nies għall-bidu tal-preżenza taʼ Kristu li kieku ma setgħux jagħrfu d-differenza bejn Ġesù u Missieru, Ġeħova? Dażgur li le! Lanqas ma kienu se jkunu mħejjijin kieku ħasbu li l-immortalità kienet tintiret awtomatikament minn kulħadd u mhux li kienet għotja prezzjuża li tingħata lil ftit mis-segwaċi taʼ Kristu; u lanqas kieku ħasbu li Alla jitturmenta lin-nies għal dejjem fin-nar tal-infern bl-ebda tama taʼ serħan! Bla ebda dubju, “il-messaġġier” ħejja t-triq għas-Sultan Messjaniku!
14 U xi ngħidu għalina llum? X’nistgħu nitgħallmu minn ħutna taʼ iktar minn 100 sena ilu? Aħna wkoll għandna nkunu qarrejja u studenti entużjasti tal-Kelma t’Alla. (Ġw. 17:3) Hekk kif din id-dinja materjalistika ssir iktar u iktar bil-ġuħ, f’sens spiritwali, jalla l-aptit tagħna għall-ikel spiritwali jkompli jiżdied!—Aqra l-1 Timotju 4:15.
“Oħorġu minnha, poplu tiegħi”
15. L-Istudenti tal-Bibbja bil-mod il-mod x’fehmu? (Ara wkoll in-nota addizzjonali.)
15 L-Istudenti tal-Bibbja għallmu li n-nies kellhom bżonn jabbandunaw il-knejjes tad-dinja. Fl-1879, It-Torri tal-Għassa rrefera għall-“knisja Babiloniża.” Kien qed jitkellem dwar il-papa? Jew il-Knisja Kattolika Rumana? Il-protestanti qalu li Babilonja, imsemmija fil-profezija tal-Bibbja, irrappreżentat lill-Knisja Kattolika. Madanakollu, l-Istudenti tal-Bibbja bil-mod il-mod fehmu li “Babilonja” taʼ żmienna rreferiet għall-knejjes kollha tal-Kristjaneżmu. Għala? Għax kollha għallmu duttrini foloz bħal dawk li semmejna qabel. c Maż-żmien, il-pubblikazzjonijiet tagħna saru iktar u iktar diretti dwar dak li kellhom jagħmlu l-membri tal-knejjes taʼ Babilonja li kellhom qalb onesta.
16, 17. (a) It-tielet volum tal-Millennial Dawn u t-Torri tal-Għassa, kif ħeġġew lin-nies jabbandunaw ir-reliġjon falza? (b) X’kienet ħaġa waħda li dgħajfet dawn it-twissijiet? (Ara n-nota addizzjonali.)
16 Pereżempju, fl-1891, it-tielet volum tal-Millennial Dawn iddiskuta l-fatt li Alla ċaħad lil Babilonja taʼ żmienna u qal li l-knejjes kollha tal-Kristjaneżmu “huma miċħudin.” Żied jgħid li dawk kollha “li mhumiex favur id-duttrini u l-prattiki foloz tagħha issa huma mitlubin jinfirdu minn magħha.”
17 F’Jannar tal-1900, It-Torri tal-Għassa ta parir lil dawk li kienu għadhom miktubin bħala membri taʼ xi denominazzjoni, jew grupp, tal-knejjes tal-Kristjaneżmu u li ġġustifikaw dak li għamlu billi qalu: “Jien għalkollox favur il-verità, u rari nattendi laqgħat oħra.” L-artiklu staqsa: “Imma taħsbu li dan hu xieraq—li tkun sieq waħda f’Babilonja u l-oħra barra? Hi din l-ubbidjenza mistennija . . . minn Alla, li togħġbu u li hi aċċettabbli għalih? Dażgur li le. Hu [il-membru tal-knisja] pubblikament daħal f’patt mad-denominazzjoni meta sar membru tagħha, u b’lealtà għandu jgħix fi qbil mal-kundizzjonijiet kollha tal-patt sakemm . . . pubblikament jikkanċella milli jibqaʼ jkun membru u jaqtaʼ kull rabta minn magħha.” Matul is-snin, dan il-messaġġ sar iktar sod. d Il-qaddejja taʼ Ġeħova jridu jaqtgħu kull rabta minn mar-reliġjon falza.
18. Għala kien meħtieġ li n-nies joħorġu minn Babilonja l-Kbira?
18 Kien Kristu, bħala s-Sultan li kien għadu kif inħatar, se jsib grupp taʼ qaddejja midlukin u mħejjijin fuq l-art li kieku ma kinux ingħataw regolarment twissijiet bħal dawn biex joħorġu minn Babilonja l-Kbira? Żgur li le, għax huma biss dawk il-Kristjani li nħelsu minn taħt difrejn Babilonja li jistgħu jqimu lil Ġeħova “bl-ispirtu u l-verità.” (Ġw. 4:24) Illum, ninsabu aħna bl-istess mod determinati biex nibqgħu ħielsa mir-reliġjon falza? Ejja nkomplu nobdu l-kmand: “Oħorġu minnha, poplu tiegħi”!—Aqra Rivelazzjoni 18:4.
Jiltaqgħu għall-qima
19, 20. It-Torri tal-Għassa kif ħeġġeġ lin-nies t’Alla biex jiltaqgħu flimkien għall-qima?
19 L-Istudenti tal-Bibbja għallmu li sħabhom fit-twemmin kellhom jiltaqgħu flimkien għall-qima, kull fejn dan kien possibbli. Għall-Kristjani ġenwini, mhuwiex biżżejjed li joħorġu mir-reliġjon falza. Hu wkoll vitali li jieħdu sehem fil-qima pura. Mill-ewwel ħarġiet tiegħu, It-Torri tal-Għassa ħeġġeġ lill-qarrejja biex jiltaqgħu flimkien għall-qima. Pereżempju, f’Lulju tal-1880, Ħuna Russell kiteb rapport dwar tur taʼ taħditiet li kien għamel u qal kemm kienu inkuraġġanti l-ħafna laqgħat li kien attenda. Imbagħad ħeġġeġ lill-qarrejja biex jibagħtu kards dwar il-progress tagħhom—u xi ftit minnhom kienu se jiġu stampati fil-paġni tar-rivista. Għal liema għan? “Għidulna . . . kif il-Mulej qed jgħinkom; jekk hux qed tattendu l-laqgħat maʼ dawk li jħaddnu l-istess fidi prezzjuża.”
Charles Russell maʼ grupp taʼ Studenti tal-Bibbja tal-bidu f’Kopenħagen, id-Danimarka, fl-1909
20 Fl-1882, artiklu bit-titlu “Ninġabru flimkien” deher fit-Torri tal-Għassa. L-artiklu ħeġġeġ lill-Kristjani biex jorganizzaw laqgħat “ħalli lkoll jibbenefikaw, jinkuraġġixxu ruħhom, u jissaħħu.” Qal: “Ma jimpurtax jekk m’hemm ħadd fostkom li hu taʼ skola jew li għandu xi abbiltà kbira. Kull wieħed minnkom ħa jġib miegħu l-Bibbja tiegħu stess, karta, u lapes u użaw kemm tistgħu għodod t’għajnuna bħalma hi Konkordanza [indiċi tal-Bibbja]. Agħżlu suġġett; itolbu għall-gwida tal-Ispirtu biex tifhmuh; imbagħad aqraw, aħsbu, qabblu skrittura m’oħra, u żgur li tiġu gwidati lejn il-verità.”
21. Il-kongregazzjoni f’Allegheny, Pennsylvania, liema eżempju tat rigward il-laqgħat u ż-żjajjar pastorali?
21 L-Istudenti tal-Bibbja kellhom il-kwartieri ġenerali tagħhom f’Allegheny, Pennsylvania, l-Istati Uniti tal-Amerika. Hemmhekk taw eżempju mill-aħjar billi ltaqgħu flimkien, u b’hekk obdew il-parir imnebbaħ li hu mniżżel f’Ebrej 10:24, 25. (Aqra.) Ħafna żmien wara, ħu mdaħħal fiż-żmien jismu Charles Capen ftakar f’meta attenda dawk il-laqgħat meta kien għadu tifel. Hu kiteb: “Għadni niftakar waħda mill-iskritturi li kienet miżbugħa fuq il-ħajt tas-sala tal-assemblea tas-Soċjetà. ‘Wieħed hu l-għalliem tagħkom, filwaqt li intom ilkoll aħwa.’ Dik l-iskrittura dejjem baqgħet stampata f’moħħi—m’hemmx distinzjoni taʼ kleru u lajċi fost in-nies taʼ Ġeħova.” (Mt. 23:8) Ħuna Capen ftakar ukoll fil-laqgħat li jimmotivaw, fl-inkuraġġiment mill-qalb li ngħata, u fl-isforzi diliġenti taʼ Ħuna Russell biex personalment jirgħa lil kull membru tal-kongregazzjoni.
22. In-nies leali kif irreaġixxew għall-inkuraġġiment biex jattendu l-laqgħat Kristjani, u x’lezzjoni nistgħu nitgħallmu minn dawn l-uħud?
22 Nies leali rreaġixxew tajjeb għal dan l-eżempju u għall-istruzzjoni li ngħataw. Ġew ifformati kongregazzjonijiet fi stati oħra, bħal f’Ohio u Michigan, u mbagħad madwar l-Amerika taʼ Fuq kollha u f’pajjiżi oħra. Ikkunsidra: Kienu n-nies leali tassew ikunu mħejjijin għall-preżenza taʼ Kristu li kieku ma ġewx imħarrġin biex jobdu l-parir imnebbaħ ħalli jiltaqgħu flimkien għall-qima? Żgur li le! Xi ngħidu għalina llum? Aħna wkoll irridu nkunu determinati biex nattendu l-laqgħat Kristjani regolarment, u nfittxu kull opportunità biex inqimu flimkien u nibnu lil xulxin spiritwalment.
Jippritkaw b’żelu
23. It-Torri tal-Għassa kif għamilha ċara li l-midlukin kollha għandhom ikunu predikaturi tal-verità?
23 L-Istudenti tal-Bibbja għallmu li l-midlukin kollha għandhom ikunu predikaturi tal-verità. Fl-1885, It-Torri tal-Għassa qal: “M’għandniex ninsew li kull membru tal-midlukin hu midluk biex jipprietka (Is. 61:1), imsejjaħ għall-ministeru.” Ħarġa fl-1888 kellha din it-twissija: “L-inkarigu tagħna hu ċar daqs il-kristall . . . Jekk ninjorawh u noqogħdu nġibu l-iskużi, ċertament li nkunu qaddejja għażżenin u nuru li ma jistħoqqilniex il-pożizzjoni għolja li ġejna msejħin għaliha [jiġifieri, li nkunu midlukin].”
24, 25. (a) Ħuna Russell u dawk li ħadmu mill-qrib miegħu, x’għamlu iktar minbarra li inkuraġġew lin-nies biex jippritkaw? (b) Wieħed pijunier kif iddeskriva xogħlu fiż-“żmien meta ftit li xejn kien hawn karozzi”?
24 Ħuna Russell u dawk li ħadmu mill-qrib miegħu għamlu iktar milli sempliċement inkuraġġew lin-nies biex jippritkaw. Ukoll, bdew jipproduċu fuljetti msejħin Bible Students’ Tracts, li iktar tard issejħu wkoll Old Theology Quarterly. Il-qarrejja tat-Torri tal-Għassa rċivew il-fuljetti ħalli jqassmuhom lill-pubbliku bla ħlas.
Nagħmlu tajjeb li nistaqsu lilna nfusna: ‘Ix-xogħol tal-ippritkar hu l-iktar ħaġa importanti f’ħajti?
25 Dawk li ddedikaw ruħhom għall-ministeru fultajm issejħu colporteurs (issa msejħin pijunieri). Charles Capen, li semmejna qabel, kien wieħed minnhom. Iktar tard ftakar: “Użajt mapep li għamel l-Istħarriġ Ġeoloġiku tal-Gvern tal-Istati Uniti biex jgħinuni nkopri t-territorju f’Pennsylvania. Dawn il-mapep urew it-toroq kollha, u b’hekk bil-mixi stajt inkopri t-territorju kollu. Kultant, wara vjaġġ taʼ tlett ijiem fil-kampanja li fih ħadt ordnijiet għall-kotba fis-serje Studies in the Scriptures, kont nikri żiemel u karettun ħalli nkun nistaʼ niħdilhom il-kotba. Spiss waqaft u għaddejt il-lejl għand xi bidwi. Dan kien żmien meta ftit li xejn kien hawn karozzi.”
Pijunier. Innota t-“Tabella taż-żminijiet” miżbugħa fuq ġenb il-karozzella
26. (a) In-nies t’Alla għala kellhom jieħdu sehem fix-xogħol tal-ippritkar sabiex ikunu mħejjijin għall-ħakma taʼ Kristu? (b) Liema mistoqsijiet nagħmlu tajjeb li nistaqsu lilna nfusna?
26 Żgur li l-Istudenti tal-Bibbja kellhom bżonn il-kuraġġ u ż-żelu biex jagħmlu dawn l-isforzi fl-ippritkar. Kienu l-Kristjani veri jkunu mħejjijin għall-ħakma taʼ Kristu li kieku ma ġewx mgħallmin l-importanza tax-xogħol tal-ippritkar? Ċertament li le! Wara kollox, dan ix-xogħol kellu jsir aspett li jispikka tal-preżenza taʼ Kristu. (Mt. 24:14) In-nies t’Alla riedu jkunu mħejjijin biex jagħmlu dan ix-xogħol li jsalva l-ħajjiet l-iktar ħaġa importanti f’ħajjithom. Illum, nagħmlu tajjeb li nistaqsu lilna nfusna: ‘Ix-xogħol tal-ippritkar hu l-iktar ħaġa importanti f’ħajti? Nagħmel sagrifiċċji ħalli jkolli sehem sħiħ f’din l-attività?’
Is-Saltna t’Alla titwieled!
27, 28. L-appostlu Ġwanni x’ra f’viżjoni, u Satana u d-demonji tiegħu kif irreaġixxew għat-twelid tas-Saltna?
27 Fl-aħħar, waslet is-sena tant mistennija tal-1914. Bħalma ddiskutejna fil-bidu tal-kapitlu, ma kien hemm l-ebda bniedem li ra b’għajnejh stess il-ġrajjiet glorjużi fis-sema. Però, l-appostlu Ġwanni ngħata viżjoni li ddeskriviet b’mod simboliku dak li ġara. Immaġina: Ġwanni jara “sinjal kbir fis-sema.” Il-“mara” t’Alla—l-organizzazzjoni tiegħu taʼ ħlejjaq spirti fis-sema—hi tqila u tiled iben. Jintqalilna li dan it-tifel simboliku daqt se “jirgħa lill-ġnus kollha b’xettru tal-ħadid.” Imma malli jitwieled, ‘jittieħed lejn Alla u lejn it-tron tiegħu.’ Leħen għoli fis-sema jgħid: “Issa bdew iseħħu s-salvazzjoni u l-qawwa u s-saltna t’Alla tagħna u l-awtorità tal-Kristu tiegħu.”—Riv. 12:1, 5, 10.
28 Mingħajr ebda dubju, Ġwanni ra viżjoni tat-twelid tas-Saltna Messjanika. Din tassew kienet ġrajja glorjuża, imma mhux kulħadd ħa pjaċir biha. Satana u d-demonji tiegħu ggwerraw kontra l-anġli leali, li kienu taħt it-tmexxija taʼ Mikiel, jew, Kristu. X’kien ir-riżultat? Naqraw: “Twaddab għal isfel id-dragun il-kbir, is-serp oriġinali, dak li hu msejjaħ Xitan u Satana, li qed iqarraq bl-art abitata kollha; twaddab ’l isfel lejn l-art, u l-anġli tiegħu twaddbu għal isfel miegħu.”—Riv. 12:7, 9.
Fl-1914, l-Istudenti tal-Bibbja bdew jagħrfu s-sinjal tal-preżenza inviżibbli taʼ Kristu
29, 30. Wara t-twelid tas-Saltna Messjanika, il-kundizzjonijiet kif inbidlu (a) fuq l-art? (b) fis-smewwiet?
29 Ħafna qabel l-1914, l-Istudenti tal-Bibbja qalu li kien se jibda żmien taʼ inkwiet f’dik is-sena speċjali. Imma lanqas huma ma setgħu jobsru kemm dan it-tbassir kien se jkun eżatt. Bħalma kixfet il-viżjoni taʼ Ġwanni, Satana mbagħad kien se jibda jkollu impatt saħansitra akbar fuq is-soċjetà umana: “Gwaj għall-art u għall-baħar, għax ix-Xitan niżel għandkom u għandu rabja kbira, għax jaf li żmien qasir baqagħlu.” (Riv. 12:12) Fl-1914, faqqgħet l-Ewwel Gwerra Dinjija u beda jitwettaq madwar id-dinja kollha s-sinjal tal-preżenza taʼ Kristu b’qawwa rjali. L-“aħħar jiem” taʼ din is-sistema kienu bdew.—2 Tim. 3:1.
30 Imma kien hemm il-ferħ fis-sema. Satana u d-demonji tiegħu tkeċċew għal dejjem. Ir-rakkont taʼ Ġwanni jgħid: “Għalhekk, ifirħu smewwiet u intom li tgħammru fihom!” (Riv. 12:12) Bis-smewwiet imnaddfin u b’Ġesù maħtur bħala Sultan, is-Saltna Messjanika issa kienet lesta biex taġixxi għan-nom tal-poplu t’Alla fuq l-art. X’azzjoni kienet se tieħu? Bħalma rajna fil-bidu taʼ dan il-kapitlu, Kristu bħala “l-messaġġier tal-patt” l-ewwel kien se jirfina l-qaddejja t’Alla fuq l-art. Dan x’kien se jfisser?
Żmien taʼ prova
31. Malakija x’bassar dwar il-proċess tal-irfinar, u din il-profezija kif bdiet titwettaq? (Ara wkoll in-nota addizzjonali.)
31 Malakija bassar li l-proċess tal-irfinar ma kienx se jkun faċli. Kiteb: “Min se jissaporti jum il-miġja tiegħu, u min se jiflaħ jieqaf meta jidher hu? Għax se jkun bħan-nar tar-raffinatur u bħas-sapun tal-ħasselin.” (Mal. 3:2) Kemm wera li kien minnu dan il-kliem! B’seħħ mill-1914, in-nies t’Alla fuq l-art ħabbtu wiċċhom maʼ provi u tbatijiet kbar waħda wara l-oħra. Hekk kif l-Ewwel Gwerra Dinjija kienet fl-aqwa tagħha, ħafna Studenti tal-Bibbja ġarrbu persekuzzjoni vjolenti u tfigħ il-ħabs. e
32. Liema taqlib minn ġewwa effettwa lin-nies t’Alla wara l-1916?
32 L-organizzazzjoni għaddiet minn taqlib minn ġewwa wkoll. Fl-1916, Ħuna Russell miet fl-età taʼ 64 sena biss, u dan ixxokkja lil ħafna min-nies t’Alla. Il-mewt tiegħu kixfet li ħafna wħud kienu poġġew wisq enfasi fuq raġel eżemplari wieħed. Għalkemm Ħuna Russell ma ried l-ebda tip taʼ qima, ħafna kienu għamluh kważi l-alla tagħhom. Kienu jaħsbu li r-rivelazzjoni bil-mod il-mod tal-verità kienet intemmet maʼ mewtu, u xi wħud opponew bil-kbir kwalunkwe sforz biex ikomplu mexjin ’il quddiem. Din l-attitudni wasslet biex tfaqqaʼ l-apostasija li firdet lill-organizzazzjoni.
33. Stennijiet mhux imwettqin kif għaddew lin-nies t’Alla minn prova?
33 Stennijiet mhux imwettqin kienu prova oħra. Għalkemm It-Torri tal-Għassa b’mod tajjeb kien ġibed l-attenzjoni lejn l-1914 bħala s-sena meta kellhom jintemmu Żminijiet il-Ġentili, l-aħwa kienu għadhom ma fehmux x’kien se jseħħ f’dik is-sena. (Lq. 21:24) Huma ħasbu li fl-1914, Kristu kien se jieħu l-midlukin fis-sema ħalli jaħkmu miegħu minn hemmhekk. Din kienet ferħa bla temma. Lejn l-aħħar tal-1917, It-Torri tal-Għassa ħabbar li żmien il-ħsad, li kellu jdum 40 sena, kien se jispiċċa fir-rebbiegħa tal-1918. Imma x-xogħol tal-ippritkar ma spiċċax. Kompla jiffjorixxi wara li għaddiet dik id-data. Ir-rivista tat x’tifhem li l-ħsad kien spiċċa imma li kien għad fadal żmien taʼ tilqit. Xorta waħda, ħafna ma baqgħux jaqdu lil Ġeħova għax kienu diżappuntati.
34. Liema prova diffiċli qamet fl-1918, u l-Kristjaneżmu għala ħaseb li n-nies t’Alla kienu “mejtin”?
34 Qamet prova diffiċli fl-1918. J. F. Rutherford, dak li beda jieħu t-tmexxija fost in-nies t’Alla minflok C. T. Russell, ġie arrestat flimkien maʼ sebaʼ aħwa responsabbli oħra. B’mod inġust għaddiet is-sentenza li jiġu mitfugħin għal żmien twil fil-ħabs t’Atlanta, Georgia, l-Istati Uniti tal-Amerika. Għal xi żmien, setaʼ deher li x-xogħol tan-nies t’Alla kien waqaf. Ħafna mill-kleru tal-Kristjaneżmu ferħu. Huma assumew li la l-“mexxejja” kienu l-ħabs, il-kwartieri ġenerali fi Brooklyn kienu ngħalqu, u l-ippritkar kien qed jiġi attakkat fl-Amerika u fl-Ewropa, dawk l-Istudenti tal-Bibbja fitti kienu “mejtin”—jiġifieri, ma kinux għadhom taʼ theddida. (Riv. 11:3, 7-10) Kemm kienu sejrin żmerċ!
Jerġgħu jieħdu l-ħajja
35. Ġesù għala ħalla t-tbatijiet jifnu lis-segwaċi tiegħu, u kif aġixxa biex jgħinhom?
35 L-għedewwa tal-verità ma basrux li l-unika raġuni għala Ġesù kien ħalla dawn it-tbatijiet jifnu lill-poplu tiegħu kienet għax Ġeħova f’dak iż-żmien kien bilqiegħda “bħala raffinatur u wieħed li jnaddaf il-fidda.” (Mal. 3:3) Ġeħova u Ibnu kienu ċerti li dawn il-provi bin-nar kienu se jirfinaw u jnaddfu lill-uħud leali, u b’hekk dawn kienu se jkunu f’qagħda aħjar minn qabel biex jaqdu lis-Sultan. Minn kmieni fl-1919, deher ċar li l-ispirtu t’Alla kien għamel dak li l-għedewwa tal-poplu tiegħu ħasbu li kien impossibbli. L-uħud leali reġgħu ħadu l-ħajja! (Riv. 11:11) F’dak iż-żmien, jidher ċar li Kristu wettaq aspett ewlieni tas-sinjal tal-aħħar jiem—ħatar “l-ilsir leali u għaqli,” grupp żgħir taʼ rġiel midlukin li kienu se jieħdu t-tmexxija fost il-poplu tiegħu billi jagħtu ikel spiritwali fiż-żmien xieraq.—Mt. 24:45-47.
36. X’wera li n-nies t’Alla kienu qed jerġgħu jieħdu l-ħajja f’sens spiritwali?
36 Ħuna Rutherford u l-imseħbin tiegħu nħelsu mill-ħabs fis-26 taʼ Marzu 1919. Malajr saru pjanijiet biex issir konvenzjoni f’Settembru taʼ dik is-sena. Ukoll, saru xi pjanijiet biex tinbeda rivista oħra bl-isem The Golden Age. Bħala sieħba għat-Torri tal-Għassa, din ġiet imħejjija biex tintuża fil-ministeru tal-għalqa. f Fl-istess sena, ġiet ippubblikata l-ewwel ħarġa tal-Bulletin, li issa msejjaħ il-fuljett għall-istudju tal-laqgħa għall-Ħajja u l-Ministeru Kristjan Tagħna. Sa mill-bidu, dan dejjem ħeġġiġna għall-ministeru tal-għalqa. Mingħajr dubju, mill-1919 ’il quddiem, il-ministeru persunali minn dar għal dar ingħata iktar prijorità.
37. Fis-snin taʼ wara l-1919, xi wħud kif urew li kienu żleali?
37 Ix-xogħol tal-ippritkar kompla jirfina lill-qaddejja taʼ Kristu, għax dawk fosthom li kienu kburin u arroganti ma kinux lesti jidħlu għal xogħol umli bħal dan. Dawk li ma ridux jieħdu sehem f’dan ix-xogħol ma baqgħux jassoċjaw mal-uħud leali. Fis-snin taʼ wara l-1919, xi wħud żleali rrabjaw u waslu biex qagħdu jaqilgħu l-qlajjiet u jimmalafamaw bil-kliem u l-kitba. Dawn saħansitra żammew maʼ dawk li kienu qed jippersegwitaw lill-qaddejja leali taʼ Ġeħova.
38. Xi prova jagħtuna s-suċċessi u r-rebħiet tas-segwaċi taʼ Kristu fuq l-art?
38 Iżda, minkejja attakki bħal dawn, is-segwaċi taʼ Kristu fuq l-art baqgħu jissaħħu u jimxu ’l quddiem spiritwalment. Kull suċċess u rebħa li kellhom minn dak iż-żmien ’l hawn, jagħtuna prova li ma tistax tiċħadha li s-Saltna t’Alla qed taħkem! Hu biss bis-saħħa tal-appoġġ u l-barka t’Alla—li jipprovdi permezz taʼ Ibnu u s-Saltna Messjanika—li sempliċi grupp taʼ bnedmin imperfetti setaʼ jirbaħ kontra Satana u din is-sistema mill-agħar darba wara l-oħra!—Aqra Isaija 54:17.
Ħuna Rutherford jagħti taħdita kommoventi f’konvenzjoni ftit xhur wara li jinħeles mill-ħabs
39, 40. (a) X’inhuma ftit mill-aspetti taʼ din il-pubblikazzjoni? (b) Kif tistaʼ tibbenefika meta tistudja din il-pubblikazzjoni?
39 Fil-kapitli li ġejjin, se neżaminaw dak li wettqet is-Saltna t’Alla fuq l-art fis-seklu mindu twieldet fis-sema. Kull sezzjoni taʼ dan il-ktieb se tkopri aspett partikulari tax-xogħol tas-Saltna hawn fuq l-art. F’kull kapitlu, kaxxa tar-reviżjoni se tgħinna biex persunalment naraw eżattament kemm hi reali għalina s-Saltna. Fl-aħħar kapitli, se niddiskutu x’għandna nistennew meta s-Saltna tiġi fil-futur qarib biex teqred lill-ħżiena u ġġib ġenna fuq l-art. Kif se tibbenefika meta tistudja din il-pubblikazzjoni?
40 Satana jrid idgħajjef il-fidi tiegħek fis-Saltna t’Alla. Imma Ġeħova jrid isaħħaħ il-fidi tiegħek ħalli din tipproteġik u tgħinek tibqaʼ b’saħħtek. (Efes. 6:16) Għalhekk, inħeġġuk tistudja din il-pubblikazzjoni bil-ħerqa. Ibqaʼ staqsi lilek innifsek, ‘Is-Saltna t’Alla hi reali għalija?’ Iktar ma tkun reali għalik issa, iktar se jkun hemm ċans li int tkun preżenti u tkun qed tappoġġa b’lealtà u b’mod attiv lil din is-Saltna f’dak il-jum meta kull min ikun ħaj jara li s-Saltna t’Alla hi reali u li qed taħkem!
a Biex titgħallem iktar dwar Grew, Stetson, u Storrs, ara l-ktieb Jehovah’s Witnesses—Proclaimers of God’s Kingdom, paġni 45-46, u t-Torri tal-Għassa tal-15 t’Awwissu 2006, paġna 12.
b It-Torri tal-Għassa beda jiġi tradott għall-Malti fl-1977. Bl-Ingliż, It-Torri tal-Għassa qabel kien magħruf bħala Zion’s Watch Tower, imbagħad bħala The Watch Tower, u issa bħala The Watchtower. F’dan il-ktieb, ġeneralment se nirreferu għalih bħala t-Torri tal-Għassa.
c L-Istudenti tal-Bibbja raw il-bżonn li ma jibqgħux jassoċjaw maʼ gruppi reliġjużi li kienu ħbieb mad-dinja. Imma, xorta waħda, għal ħafna snin baqgħu jqisu bħala ħuthom Kristjani lill-individwi li, għalkemm ma kinux Studenti tal-Bibbja, qalu li kienu jemmnu fil-fidwa u sostnew li kienu dedikati lil Alla.
d Ħaġa waħda li dgħajfet dawn it-twissijiet kienet il-ħsieb li dawn kienu japplikaw l-aktar għall-merħla żgħira taʼ Kristu, il-144,000. Se naraw f’kapitlu 5 li qabel l-1935, kien maħsub li l-‘folla l-kbira,’ kif inhi deskritta f’Rivelazzjoni 7:9, 10, kienet se tinkludi numru bla għadd taʼ membri tal-knejjes tal-Kristjaneżmu; u li dawn kienu se jsiru grupp sekondarju li kien se jitlaʼ fis-sema bħala premju talli fl-aħħar nett żamm maʼ Kristu.
e F’Settembru tal-1920, ir-rivista The Golden Age (issa msejħa Stenbaħ!) ippubblikat ħarġa speċjali li fiha tat dettalji taʼ diversi atti taʼ persekuzzjoni fi żmien il-gwerra—xi wħud minnhom tassew vjolenti—fil-Ġermanja, l-Ingilterra, l-Istati Uniti, u l-Kanada. B’kuntrast, fl-għaxriet taʼ snin qabel l-Ewwel Gwerra Dinjija, ftit li xejn kien hemm persekuzzjoni taʼ dan it-tip.
f Għal bosta snin, It-Torri tal-Għassa kien miktub prinċipalment għall-membri tal-merħla ż-żgħira għall-benefiċċju persunali tagħhom.