LEZZJONI 56
Ġosija kien iħobb il-Liġi t’Alla
Ġosija sar sultan taʼ Ġuda meta kellu tmien snin. F’dak iż-żmien, in-nies kienu qed jagħmlu l-maġija u jqimu l-idoli. Meta Ġosija kellu 16-il sena, hu pprova jitgħallem kif iqim lil Ġeħova bil-mod it-tajjeb. Meta kellu 20 sena, hu beda jeqred l-idoli u l-artali li kien hemm fil-pajjiż kollu. U meta Ġosija kellu 26 sena, hu beda jirranġa t-tempju taʼ Ġeħova.
Fit-tempju, il-qassis il-kbir, Ħilkija, sab l-iskroll tal-Liġi taʼ Ġeħova—jistaʼ jkun li kien l-istess skroll li kien ġie miktub minn Mosè. Safan, is-segretarju tas-sultan, mar bl-iskroll għand Ġosija u beda jaqra l-Liġi b’leħen għoli. Waqt li Ġosija kien attent jismaʼ, hu rrealizza li għal ħafna snin in-nies ma kinux qed jobdu lil Ġeħova. Is-Sultan Ġosija qal lil Ħilkija: ‘Ġeħova hu rrabjat ħafna magħna. Mur u kellmu ħalli jgħidilna x’għandna nagħmlu.’ Ġeħova wiġibhom permezz tal-profetessa Ħulda billi qalilhom: ‘In-nies taʼ Ġuda telquni. Huma se jiġu kkastigati, imma mhux sakemm għad hemm Ġosija bħala sultan, għax hu umilja ruħu,’ jiġifieri kien lest li jirranġa l-affarijiet skont dak li kien hemm miktub fil-Liġi.
Meta s-Sultan Ġosija semaʼ l-messaġġ, mar fit-tempju u sejjaħ lill-poplu kollu taʼ Ġuda. Imbagħad, hu qara quddiemhom il-Liġi taʼ Ġeħova b’leħen għoli. Ġosija u n-nies wiegħdu li se jobdu lil Ġeħova b’qalbhom kollha.
GħaI ħafna snin, il-poplu taʼ Ġuda ma kienx qed jiċċelebra
l-Qbiż. Imma meta Ġosija qara mil-Liġi li l-Qbiż għandu jiġi ċċelebrat kull sena, hu qal lill-poplu: ‘Se niċċelebraw il-Qbiż lil Ġeħova.’ Imbagħad, Ġosija pprepara ħafna sagrifiċċji u rranġa biex fit-tempju jkun hemm kor taʼ kantanti. Imbagħad, in-nies iċċelebraw il-Qbiż, u wara ċċelebraw il-Festa tal-Ħobż bla Ħmira, li damet għaddejja sebat ijiem. Kienet ilha ma ssir festa tal-Qbiż bħal din sa minn żmien Samwel. Ġosija kien iħobbha ħafna l-Liġi taʼ Ġeħova. Int tieħu pjaċir titgħallem dwar Ġeħova?“Kelmtek musbieħ għal sieqi, u dawl għal triqti.”—Salm 119:105