META taqra xi gazzetta, tara t-​televixin, jew tismaʼ r-​radju, int tara u tismaʼ ħafna aħbarijiet dwar il-​kriminalità, il-​gwerra, u t-​terroriżmu. Forsi int personalment qed tbati minħabba xi marda jew minħabba li mietlek xi ħadd li tħobb.

Staqsi lilek innifsek:

• Alla hekk irid għalija u għal familti?

• Fejn nistaʼ nsib l-​għajnuna biex inkampa mal-​problemi tiegħi?

• Qatt se jkun hawn paċi vera?

Il-​Bibbja tagħtina tweġibiet taʼ min joqgħod fuqhom għal dawn il-​mistoqsijiet.

• In-​nies mhux se jibqgħu jħossu l-​uġigħ, mhumiex se jixjieħu, u lanqas ma se jmutu.—Rivelazzjoni 21:4

• “Iz-​zopp se jixxabbat bħaċ-​ċerv.”—Isaija 35:6

• “Jinfetħu għajnejn l-​għomja.”—Isaija 35:5

•  Dawk li mietu se jerġgħu jingħataw il-​ħajja.—Ġwanni 5:28, 29

• Ħadd mhu se jimrad.—Isaija 33:24

• Kulħadd se jkollu x’jiekol bl-​abbundanza.—Salm 72:16

Ikun faċli li taħseb li dak li qrajt fl-​ewwel ftit paġni taʼ dan il-​ktieb hu biss ħolma. Imma Alla wiegħed li se jagħmel dawn il-​bidliet fuq l-​art dalwaqt, u l-​Bibbja tispjega kif se jagħmel dan.

Il-​Bibbja tagħmel iktar minn hekk. Tgħidilna dak li għandna bżonn inkunu nafu sabiex inkunu verament ferħanin u ngawdu l-​ħajja issa stess. Aħseb ftit dwar l-​affarijiet li jġegħluk tinkwieta. Dawn forsi jinkludu l-​flus jew kwistjonijiet tal-​familja, saħħa batuta, jew il-​mewt taʼ xi ħadd li tħobb. Il-​Bibbja tistaʼ tgħinek tkampa maʼ dawn il-​problemi u tistaʼ tfarrġek billi twieġeb mistoqsijiet bħal dawn:

• Għala nbatu?

• Kif nistgħu nkampaw mal-​problemi tagħna?

• Tistaʼ l-​familja tagħna tkun ferħana?

• X’jiġrilna meta mmutu?

• Qatt se nerġgħu naraw il-​maħbubin tagħna li mietu?

• Għala nistgħu nkunu fiduċjużi li Alla se jagħmel kulma wiegħed?

 Il-​fatt li qed taqra dan il-​ktieb juri li int trid tkun taf x’tgħallem il-​Bibbja. Dan il-​ktieb se jgħinek. Hemm mistoqsijiet mal-​paragrafi u dawn se jgħinuk tifhem il-​Bibbja aħjar. Miljuni taʼ nies jieħdu pjaċir jiddiskutu l-​Bibbja max-​Xhieda taʼ Ġeħova. Nittamaw li int tkun wieħed minnhom. Jalla Alla jbierkek hekk kif tiskopri dak li tistaʼ titgħallem mill-​Bibbja!