X’Jeħtieġu t-Tfal Mingħand il-Ġenituri
DAWK kollha li jsiru ġenituri jieħdu sehem fi ġrajja li l-ebda bniedem ma jistaʼ jifhimha għalkollox. Kull ġenitur jagħti xi ħaġa minn ġismu. Bħala riżultat, ġewwa l-omm tiżviluppa persuna ħajja u fformata kompletament. Mela mhux taʼ b’xejn li, meta titwieled tarbija, in-nies jitkellmu dwar din il-ġrajja bħala “l-miraklu tat-twelid.”
M’għandniex xi ngħidu, it-twelid tat-tfal huwa biss il-bidu tar-responsabbiltà li għandhom il-ġenituri. Għall-ewwel, it-trabi jiddependu kważi għalkollox minn ħaddieħor, imma huma u jikbru, ikollhom bżonn affarijiet oħra minbarra attenzjoni fiżika. Għandhom bżonn l-għajnuna biex jiżviluppaw b’mod mentali, emozzjonali, morali, u spiritwali.
Biex jiżviluppaw tajjeb, it-tfal għandhom bżonn b’mod speċjali l-imħabba tal-ġenituri. Għalkemm huwa importanti li l-ġenituri jgħidulhom bil-kliem illi jħobbuhom, huma jridu juru dan bil-fatti. Iva, it-tfal għandhom bżonn eżempju tajjeb mingħand il-ġenituri tagħhom. Jeħtieġu gwida morali, prinċipji fuqiex jgħixu. U dawn l-affarijiet jeħtiġuhom minn ċkunithom. Jistgħu jiġru, u fil-fatt jiġru, affarijiet taʼ qsim il-qalb meta t-tfal jingħataw l-għajnuna meta jkun tard wisq.
L-aqwa prinċipji li wieħed jistaʼ qatt isib huma dawk li jinsabu fil-Bibbja. It-tagħlim ibbażat mill-Bibbja fih vantaġġi uniċi. Bis-saħħa taʼ tagħlim bħal dan, it-tfal jibdew jirrealizzaw li dak li qed jintqalilhom m’huwiex x’qed jgħid sempliċi bniedem, imma huwa dak li qed jgħid il-Ħallieq tagħhom, Missierhom tas-sema. B’hekk il-pariri li jingħataw ikollhom dik l-awtorità unika.
Il-Bibbja tħeġġeġ lill-ġenituri biex jistinkaw ħalli jdaħħlu prinċipji tajbin f’moħħ uliedhom. Madankollu, iktar ma t-tfal jikbru, il-ġenituri spiss isibuha diffiċli biex jitkellmu magħhom dwar l-iktar affarijiet importanti. Dan il-ktieb,
Tgħallem mill-Għalliem il-Kbir, inkiteb bl-iskop li ma jħallix tiżviluppa sitwazzjoni bħal din. Dan se jipprovdi materjal spiritwali biex il-ġenituri u wliedhom jaqrawh flimkien. Imma iktar minn hekk, dan għandu jqanqal lit-tfal żgħar biex jitkellmu maʼ dawk li jaqrawlhom dan il-ktieb.F’dan il-ktieb se tinnota li t-tfal huma mħeġġin jipparteċipaw. Fil-kapitli nsibu ħafna mistoqsijiet addattati. X’ħin tasal għalihom se tara sinjal warajhom (—). Dan qiegħed biex ifakkrek tieqaf ftit u tħeġġeġ lit-tfal jesprimu ruħhom. It-tfal jieħdu pjaċir jipparteċipaw. Jekk ma jipparteċipawx, malajr jitilfu l-interess.
Madankollu, l-iktar ħaġa importanti hi li dawn il-mistoqsijiet se jgħinuk tiskopri x’għandhom f’moħħhom it-tfal. Veru, it-tfal jistgħu joħorġu bi tweġibiet żbaljati. Imma s-sentenzi taʼ wara kull mistoqsija huma mfasslin biex jgħinu lit-tfal jidraw jaħsbu u jirraġunaw b’mod tajjeb.
Aspett speċjali tal-ktieb huwa l-230 stampa u fuqhom li fih. Il-biċċa l-kbira minnhom fihom mistoqsija li tħeġġeġ lit-tfal jesprimu ruħhom, skond ma jaraw u jkunu qraw. Allura ifli dawn l-istampi mat-tfal. Dawn jistgħu jkunu t’għajnuna kbira biex tenfasizza l-affarijiet importanti li tkun trid tgħallimhom.
Meta t-tfal jitgħallmu jaqraw, ħeġġiġhom jaqrawlek il-ktieb kif ukoll jaqrawh waħedhom. Iktar ma jaqrawh, iktar se jdaħħlu f’moħħhom u f’qalbhom il-pariri tajbin li fih. Imma biex issaħħaħ ir-rabta t’affezzjoni u taʼ rispett bejnek u bejn uliedek, żgur li għandkom taqrawh flimkien, u tagħmlu hekk regolarment.
Illum it-tfal faċilment jistgħu jsibu ruħhom f’sitwazzjonijiet fejn jidħol sess illeċitu, spiritiżmu, u prattiċi baxxi oħra li sa ftit snin ilu kważi ħadd ma kien jgħaddilu minn moħħu li t-tfal se jiltaqgħu magħhom. Għalhekk jeħtieġu l-protezzjoni, u dan il-ktieb jgħinek tipprovdiha bil-ġieħ iżda mingħajr ma joqgħod idur mal-lewża. Madankollu, it-tfal jeħtieġu b’mod speċjali li jiġu murijin x’jgħid is-Sors taʼ kull għerf, Missierna tas-sema, Alla Ġeħova. Ġesù, l-Għalliem il-Kbir, dejjem wera lin-nies x’jgħid dan is-Sors. Aħna nittamaw bis-sinċerità kollha li dan il-ktieb jgħin lilek u lill-familja tiegħek tfasslu ħajjitkom b’mod li jogħġob lil Ġeħova, sabiex tirċievu barkiet għall-eternità.