Ħarsa Lejn id-Dinja
Ħarsa Lejn id-Dinja
Riċetta Antika tat-Toothpaste mill-Eġittu
“L-iktar riċetta antika li nafu biha tat-toothpaste, li kienet tintuża iktar minn 1,500 sena qabel ma Colgate beda jirreklama l-ewwel ditta [tat-toothpaste] fl-1873, instabet fuq biċċa papiru kollha trab fil-kantina taʼ mużew fi Vjenna,” jirrapporta l-Electronic Telegraph. “Miktuba b’linka sewda ċċarata magħmula mill-ġmied u l-gomma arabika mħallta bl-ilma, skrib mill-Eġittu tal-qedem iddeskriva bir-reqqa dak li hu sejjaħlu ‘trab għal snien bojod u perfetti.’ Meta titħallat mal-bżieq fil-ħalq, din issir ‘taħlita nadifa għas-snien.’” Id-dokument tar-rabaʼ seklu E.K. għandu lista taʼ ingredjenti bħall-melħ tal-blat, in-nagħniegħ, il-fjura mnixxfa taʼ l-iris, u l-bżar iswed—kollha mitħuna u mħalltin flimkien. L-iskoperta ġibdet ħafna interess f’kungress tad-dentisti li sar fi Vjenna. “Ħadd minn dawk kollha li huma fil-professjoni tad-dentisti ma kien jaf li kienet teżisti riċetta antika tat-toothpaste avanzata daqshekk,” qal id-dentist Heinz Neuman, li pprovaha u li “ħass ħalqu frisk u nadif.” L-artiklu jistqarr: “Id-dentisti dan l-aħħar skoprew il-benefiċċji taʼ l-iris, li nstabet effettiva kontra l-mard fil-ħanek u li issa reġgħet tinsab fis-suq.”
Il-Frott Idum Iktar Tajjeb għall-Ikel
“Il-ħażna tiegħek tal-frott dalwaqt tistaʼ tibda ddum iktar biex teħżien—dan minħabba sustanza li ġiet imħabbra bħala waħda mill-partijiet taʼ l-inbid aħmar li tagħti s-saħħa,” tirrapporta New Scientist. “Jekk tbill it-tuffieħ f’sustanza taʼ trans-resveratrol, anti-ossidant li jinsab fl-għeneb, se ttawwal iż-żmien li jdum tajjeb minn ħmistax għal tliet xhur. Meta l-għeneb ġie mbill fl-istess sustanza, ma kellux l-istess riżultati, imma xorta dam tajjeb ġimgħa iktar mis-soltu.” Ir-riċerkaturi sabu li kien hemm bżonn taʼ ammont żgħir biss taʼ l-anti-ossidant biex ma jitħassrux it-tessuti u jitneħħew il-ħmira u l-moffa kollha li jħassru lil ħafna frott. “Fir-riċerki li saru wara, it-tim ipproteġa prodotti oħra, inkluż it-tadam, l-avokado u l-bżar aħdar,” qalet ir-rivista. “Issa qed ifittxu modi kif jipproduċu t-trans-resveratrol iktar bl-irħis.”
Perikli għas-Saħħa bil-Logħob Elettroniku
Il-ġenituri għandhom mnejn ma jirrealizzawx kemm il-logħob elettroniku hu perikoluż għas-saħħa taʼ wliedhom, tirrapporta l-gazzetta El Universal tal-Belt tal-Messiku. Skond Antonio González Hermosillo, il-president tas-Soċjetà Messikana tal-Kardjoloġija, sa 40 fil-mija mit-tfal li jilagħbu ħafna logħob elettroniku se jiżviluppaw il-pressjoni għolja fid-demm. Għala? Għaliex minbarra li huma neqsin mill-eżerċizzju, it-tfal jispiċċaw stressati ħafna minħabba li jsibu ruħhom involuti ferm f’sitwazzjonijiet li jidhru perikolużi, bħall-attakki, il-ġlied virtwali, u konflitti oħrajn. “L-ispeċjalista wissa li dan se jżid il-mard tal-qalb fil-Messiku, il-kaġun primarju taʼ l-imwiet f’dan il-pajjiż,” qalet ir-rivista.
Imweldin Barra miż-Żwieġ
Fl-Unjoni Ewropea, “25 fil-mija tat-tfal kollha jitwieldu barra miż-żwieġ,” tirrapporta l-gazzetta Spanjola La Vanguardia. Hekk kif il-valuri tradizzjonali jinbidlu u l-istili taʼ ħajja differenti qed jiżdiedu, “it-tfal imweldin barra miż-żwieġ qed jiżdiedu madwar l-Ewropa kollha.” Skond l-Uffiċċju taʼ l-Istatistiċi tal-Komunitajiet Ewropej, fil-quċċata tal-lista hemm l-Isvezja b’54 fil-mija, id-Danimarka b’46 fil-mija, u Franza b’39 fil-mija. Il-Finlandja u l-Gran Britannja jiġu wara, fejn insibu li fiż-żewġ pajjiżi 37 fil-mija mit-tfal jitwieldu barra miż-żwieġ. Jidher li hemm l-istess tendenza fost il-pajjiżi Mediterranji, fejn xi darba t-tradizzjonijiet tal-familja kienu qawwijin. Per eżempju, kalkoli li saru dan l-aħħar juru li fi Spanja 19 fil-mija mit-tfal jitwieldu lil ommijiet li m’humiex miżżewġin, u f’xi reġjuni, bħal Catalonia, il-kalkolu hu taʼ 22 fil-mija—żjieda taʼ 100 fil-mija f’għaxar snin biss.
Nofs l-Art Hija Xagħri
“Minkejja li għal seklu sħiħ ġarrbet theddid ambjentali li dejjem jiżdied, 46 fil-mija minn wiċċ l-Art għadu xagħri li ħafna minnu mhux mimsus,” tirrapporta l-pubblikazzjoni World Watch. Fi studju li involva 200 xjenzat madwar id-dinja “instab li [68 miljun kilometru kwadru] minn wiċċ l-art jaqaʼ fil-kategorija taʼ ‘xagħri,’ jiġifieri għad fih minn taʼ l-inqas 70 fil-mija tal-veġitazzjoni oriġinali, fih inqas minn [5] minn nies għal kull [kilometru kwadru] ’l barra mill-inħawi tal-belt, u m’huwiex inqas minn [10,000 kilometru kwadru].” Is-37 post fejn hemm ix-xagħri fihom biss 2.4 fil-mija tal-popolazzjoni taʼ l-art—144 miljun ruħ, mingħajr ma ngħoddu linħawi tal-bliet—madankollu fihom art daqs l-akbar sitt pajjiżi tad-dinja kollha flimkien, jiġifieri, l-Awstralja, il-Brażil, iċ-Ċina, l-Istati Uniti, il-Kanada, u r-Russja. Però, “iktar minn terz tax-xagħri huwa silġ Antartiku jew it-tundra taʼ l-Artiku, u biss 5 mis-37 post huma postijiet imħarsin mill-ħsara—jiġifieri kull wieħed minnhom fih iktar minn 1,500 speċi lokali u ammont kbir taʼ bijodiversità,” jgħid l-artiklu.
Il-Periklu tal-Piż Żejjed
“In-nies li fl-età t’40 sena jkollhom piż żejjed għandhom iċ-ċans li jmutu tliet snin qabel dawk li ma jkollhomx, jiġifieri l-ħxuna taʼ mezz’età hija taʼ ħsara daqs it-tipjip fejn jidħol it-tul tal-ħajja mistenni,” tirrapporta The New York Times. “Dan l-istudju qed jgħid li jekk bejn il-35 u l-45 sena jkollok il-piż żejjed, anki jekk tonqos iktar tard, xorta jkollok riskju akbar li tmut,” jgħid it-Tabib Serge Jabbour, direttur taʼ klinika fl-isptar li tgħin lin-nies inaqqsu l-piż. “Dak li rridu ngħidu hu li trid toqgħod attent għall-piż tiegħek minn kmieni. Jekk iddum biex taġixxi, għandu mnejn il-ħsara tkun diġà saret.” It-tnaqqis fil-piż jistaʼ wkoll inaqqas l-imwiet minħabba l-kanċer. Wara studju li dam sejjer 16-il sena fuq 900,000 persuna, is-Soċjetà Amerikana tal-Kanċer ikkonkludiet li “l-piż żejjed jistaʼ jkun responsabbli għal 14 fil-mija taʼ l-imwiet taʼ l-irġiel u 20 fil-mija taʼ l-imwiet tan-nisa minħabba l-kanċer,” tgħid it-Times. L-istudji assoċjaw il-piż żejjed maʼ ħafna tipi taʼ kanċer.
Il-Qawwa taʼ Tbissima
“Sa 74 fil-mija minn dawk li ħadu sehem fi stħarriġ wieġbu li ma jiħdux pjaċir jinnegozjaw maʼ nies imdejqin, u 69 fil-mija ma jafux jagħmlu ħbieb maʼ wħud bħal dawn.” Hekk tirrapporta r-rivista Wprost dwar studju li sar mill-Istitut tas-Soċjoloġija fl-Università Jagiellonian fi Kraków, il-Polonja. Raġuni waħda li ngħatat hi li n-nies imdejqin spiss jagħtu l-impressjoni li donnhom qed jaħbu xi ħaġa. In-nies li jaħdmu mal-pubbliku ilhom jafu dwar dan, u dan jispjega għala “l-politikanti, in-negozjanti, l-istilel tal-mużika, il-preżentaturi tat-televixin, u n-nies li jaħdmu fir-relazzjonijiet pubbliċi, fir-reklamar, u fil-bejgħ jitbissmu” daqshekk spiss, tgħid Wprost. Ir-riċerkaturi sabu wkoll li meta nitbissmu, jitlaʼ iktar demm f’moħħna, u dan itejbilna l-burdata. Waħda negozjanta qalet: “Jien nipprova nitbissem anki meta ma jkollix aptit. Meta nitbissem, inħossni ninbidel minn ġewwa, u verament nibda nħossni aħjar.”
“Tellieqa” tas-Sawnd
Kemm jgħajjat l-isterjo tal-karozza taʼ wieħed iktar minn dak taʼ ieħor? Din il-mistoqsija wasslet għal kompetizzjoni internazzjonali ġdida magħrufa bħala tellieqa tad-dB, jirrapporta n-National Public Radio, fl-Istati Uniti. Jiġu organizzati okkażjonijiet biex il-livell tas-sawnd taʼ l-isterjo tal-karozzi—li jitkejjel bid-deċibel, jew dB—jiġi ttestjat bi strumenti li jitqiegħdu ġol-vetturi. Is-sawnd li jinstemaʼ barra mill-karozza jkun moħli, allura dawk li jieħdu sehem isaħħu l-istruttura tal-karozza tagħhom biex ma jħallux is-sawnd joħroġ. “Fl-iktar vetturi li jkunu msaħħin, . . . it-twieqi jkunu ħoxnin 7 [jew] 10 ċentimetri,” jgħid il-kompetitur Wayne Harris, “u l-bibien ikunu rinforzati bil-konkrit u l-azzar.” Dawk li jkunu qed jieħdu sehem ma joqogħdux fil-karozza meta s-sistema tas-sawnd tkun mixgħula—u mhux taʼ b’xejn.