Kif l-​Art Se Tiġi Salvata

MINKEJJA l-​futur ikrah li qed jiffaċċja l-​ambjent taʼ l-​art, aħna nixtiequ li jsalva. Wara kollox, din hi darna—u nittamaw li tkun ukoll dar uliedna u wlied uliedna. Hemm xi ħaġa li nistgħu nagħmlu biex insaħħu dan il-​prospett?

Il-verità hi li, għalkemm ħafna nies jinkwetaw dwar l-​ambjent, ħafna ma jimpurtahomx meta jarmu ż-​żibel maʼ l-​art, jarmu l-​ħmieġ f’xi xmara, jew iħallu d-​dawl mixgħul meta ma jkunux qed jużawh. Dawn l-​azzjonijiet jistgħu jidhru bħala insinifikanti, imma jekk kull wieħed mill-​biljuni taʼ nies li hawn fuq l-​art joqgħod attent kif jittratta l-​art, l-​affarijiet jistgħu jinbidlu. Meta dak li jkun jikkontrolla l-​użu taʼ l-​enerġija elettrika, jikkoopera mal-​programmi tar-​riċiklaġġ, u jarmi ż-​żibel kif suppost, ikun qed jgħin biex jippreserva l-​ambjent. Bid-​drawwiet tagħna nistgħu nuru kemm nieħdu ħsieb l-​art minn issa.

Xorta waħda, ma nistgħux nikkontrollaw l-​azzjonijiet taʼ ħafna min-​nies taʼ madwarna. Ifisser dan li s-​sitwazzjoni hija bażikament bla tama?

Soluzzjoni Aqwa Dalwaqt

Kumment minn Thilo Bode taʼ l-​organizzazzjoni Greenpeace, kif ġie kwotat fir-​rivista Time, jolqot il-​musmar fuq rasu dwar il-​problema taʼ l-​ambjent: “Il-​mira prinċipali tagħna minn dejjem kienet li nikkunsidraw kif il-​prodotti tal-​korporazzjonijiet għandhom jintremew. Dawn iridu jaħsbu fi tliet proċessi: il-​produzzjoni, l-​użu u kif jintrema.” B’sogħba, aħna kapaċi nipproduċu l-​affarijiet, nafu nużawhom, imma ma narmuhomx kif suppost. F’ċerti każi l-​bnedmin ma jafux kif jagħmlu dan mingħajr ma jikkaġunaw ħsara.

Il-​bnedmin huma limitati, imma l-​Ħallieq taʼ l-​art m’huwiex. Fil-​ħolqien li naraw fuq l-​art hu diġà wera l-​għerf tiegħu li jisboq kull għerf ieħor. Hu jaf kif jagħmel, juża, u jarmi l-​affarijiet kif suppost. Ħafna mis-​sistemi li għamel huma awtomatiċi. Iż-​żerriegħa tinbet,  u pjanta tikber u tipproduċi l-​frott. Imbagħad tmut—bl-​elementi kollha tagħha li jiddeterjoraw mingħajr ma jniġġsu, bil-​lest biex jerġgħu jintużaw. Din hi l-​aqwa sistema taʼ riċiklaġġ! Ma tagħmel ebda tinġis tossiku!

Il-Ħallieq ma jridx iħalli l-​art tmur lura sakemm tispiċċa miżbla li ħadd ma jistaʼ jgħix fiha. Fil-​Bibbja, f’​Isaija 45:​18, naqraw: “Dan jgħid il-​Mulej . . . ; Hu li hu tassew Alla, li sawwar l-​art, għamilha u wettaqha, ma ħalaqhiex għall-​baħħ, sawwarha biex jgħammru fiha.”

Jekk Alla sawwar l-​art biex tkun abitata, għala ħallieha tasal f’din il-​qagħda kritika? Il-​Bibbja tispjega li l-​bniedem fil-​bidu tqiegħed f’ġenna. Fil-​fatt, Alla kellu l-​iskop li din il-​Ġenna tinfirex sa truf l-​art u timtela bin-​nies. (Ġenesi 1:28) Madankollu, qamet ir-​ribelljoni. L-​ewwel raġel u mara ma ridux jibqgħu sottomessi għall-​ħakma t’Alla.

Alla ħalla lill-​bnedmin jipprovaw jaħkmu kif iridu huma. Ir-​riżultati huma dawk li naraw illum, falliment diżastruż. Il-​bnedmin urew biċ-​ċar li ma jistgħux isolvu l-​problemi. Ma nistgħux inwaħħlu f’Alla għal dak li ġara. Dak li tgħid il-​Bibbja huwa minnu dwar is-​soċjetà umana kollha: “Mxew ħażin miegħu; m’humiex uliedu, għajb għalihom; nisel taʼ inkwiet u għawġ.”—Dewteronomju 32:5.

Minkejja dan, Alla m’għalaqx għajnejh għall-​ħsara li qed issir lill-​art. Hu se jaġixxi qabel ma jkun tard wisq, qabel ma l-​art issir ħerba li ma tistax tkun abitata. Dan kif nafuh? Apokalissi 11:18 jispjega: “Il-​ġnus imtlew bil-​korla, imma l-​korla tiegħek ġiet u wasal iż-​żmien li . . . jinqerdu dawk li qegħdin jeqirdu d-​dinja.” Il-​ħsara li qed issir lill-​art se titwaqqaf.

L-iskop oriġinali t’Alla għall-​art, dak li ssir ġenna, xorta se jitwettaq. Alla wera dan b’dak li qal. Per eżempju, hu qal: “Kelmti . . . toħroġ minn fommi, u ma terġax lura vojta, imma tagħmel dak li jogħġob lili.” (Isaija 55:11) Għandek mnejn tieħu gost taqra Isaija kapitlu 35, fejn Alla jispjega kif il-​pajjiżi rvinati se jinbidlu f’parkijiet qishom ġonna u għelieqi kollhom frott.

Anki issa, meta jitwaqqaf it-​tinġis, l-​art turi li hija kapaċi ġġedded lilha nfisha b’mod taʼ l-​għaġeb. Alla ħalaqha b’dan il-​mod. Jekk l-​art ma tibqax tiġi invażata b’affarijiet li jniġġsuha, varjetà kbira taʼ ħlejjaq żgħar ħafna fl-​ilma u l-​ħamrija jistgħu jdewwu ħafna mill-​ħsara li diġà saret. Barra minn hekk, għandna għalxiex nemmnu li la jindaħal Alla u jmexxi hu, dan it-​tiġdid se jkun saħansitra iktar effettiv. Hu jistaʼ jipprovdi t-​taħriġ u d-​direzzjoni perfetta li m’għandhomx bħalissa l-​bnedmin.

Għalhekk, il-​futur taʼ l-​art m’huwiex bla tama. L-​annimali u l-​pjanti se jsalvaw. Mhux se jibqaʼ jkollna listi taʼ l-​ispeċi li huma fil-​periklu. L-​arja u l-​ilma tagħna se jerġgħu jsiru nodfa. Il-​bnedmin ubbidjenti se jkunu hemm biex igawdu dan kollu. Tixtieq tarah iseħħ dan? Tistaʼ. Kif? Il-​Bibbja tgħidlek x’għandek tagħmel. Għax ma teżaminax il-​Bibbja b’mod konsistenti biex tiskopri kif? Staqsi lill-​pubblikaturi taʼ din ir-​rivista biex jgħinuk tikkuntattja lil xi ħadd li jistaʼ jgħinek tibda. Għala għandek titlef l-​opportunità li titgħallem kif int u l-​familja tiegħek se tgawdu għal dejjem ambjent nadif għalkollox?