Mingħand il-Qarrejja
Mingħand il-Qarrejja
L-Abbuż tad-Drogi Il-qoxra taʼ quddiem tal-ħarġa tat-8 t’April, 2003 (“L-Abbuż tad-Drogi fil-Familja—Int X’Tistaʼ Tagħmel?”) verament laqtitni. Qed nistudja l-Bibbja maʼ mara li jisimha Linda. Tnejn minn uliedha għandhom il-vizzju tad-droga. L-għada studjajt din il-ħarġa magħha—kull paragrafu bid-dettall. Tgħidx kemm inkuraġġietha u saħħitha! Il-materjal ġie eżatt f’waqtu.
C. M., Stati Uniti
Jien immexxi servizz taʼ konsultazzjoni li jgħin lill-familji jiġġieldu kontra l-vizzju tad-droga u l-alkoħoliżmu. Għalkemm jien Kattoliku, inħobb ħafna naqra r-rivista Stenbaħ! Nixtieq nirringrazzjakom għas-serje dwar l-abbuż tad-drogi fil-familja. Qrajtha bl-akbar interess, għaliex se tgħinni f’xogħli maż-żgħażagħ.
H. C., Ekwador
Kwizzijiet tal-Bibbja Nixtieq ngħidilkom li nitgħaxxaq bil-kwizzijiet tal-Bibbja li tagħmlu. Tgħidx kemm qed nitgħallem minnhom!
R. N., Stati Uniti
Ili ngħallem il-Bibbja lil uliedi minn meta kienu ċkejknin. Imma issa li kibru, insibha iktar diffiċli biex inqajmilhom l-interess fl-affarijiet spiritwali. Allura kont ili nfittex modi kif se ngħinhom. Meta waslitli l-ħarġa tat-8 t’April u qgħadt neżamina l-parti “Tafha t-Tweġibha?” ġietni idea. Mill-ewwel addattajt il-mistoqsijiet għal uliedi, billi tajthom diversi tweġibiet u riedu jagħżlu l-waħda t-tajba, u waħħalt il-mistoqsijiet mal-ħajt. Għall-ewwel, ma dehrux interessati, imma wara ftit bdew iwieġbu l-mistoqsijiet. Issa sirna nitkellmu dwar il-mistoqsijiet bħala familja.
R. M., Ġappun
“Stenbaħ!” iwieġeb: Il-kwizz Bibliku “Tafha t-Tweġiba?” jidher b’ċerti lingwi f’xi ħarġiet taʼ “Stenbaħ!” li ma jkollhomx it-tisliba.
Is-Sensi Meraviljużi Għandi 15-il sena u ili naqra r-rivisti tagħkom minn meta tgħallimt naqra. Grazzi tas-serje t’artikli “Is-Sensi Meraviljużi tal-Ħajja—Int Tapprezzahom?” (8 taʼ Marzu, 2003) L-artikli affaxxinawni. Grazzi taʼ kemm taħdmu iebes u tagħmlu riċerka għal kull ħarġa taʼ Stenbaħ! Iġri tiġi l-ħarġa li jmiss!
H. S., Stati Uniti
Dawn l-artikli verament ġagħluni napprezza kemm aħna komplikati. Bqajt skantata meta sirt naf li t-tarf tas-sabaʼ taʼ bniedem jistaʼ jħoss tikka li hi għolja biss tliet mikroni! Jehovah żgur li jimpurtah ħafna mill-ħolqien tiegħu biex ħa ħsieb daqshekk taʼ xi ħaġa tant żgħira.
E. R., Awstralja
Iż-Żarbun Grazzi taʼ l-artiklu “Huwa ż-Żarbun Tiegħek Verament Komdu?” (8 taʼ Marzu, 2003) Ili s-snin inbati bi problemi f’saqajja u għamilt diversi operazzjonijiet żgħar fis-swabaʼ taʼ saqajja. Fl-aħħar skoprejt li għandi sieq kemm kemm akbar mill-oħra. Peress li ili snin sħaħ nilbes id-daqs taʼ żarbun żbaljat, issa qed ikolli nilbes żarbun ortopediku.
R. G., Stati Uniti
Il-Qerq Nixtieq nesprimi l-apprezzament tiegħi għall-artiklu “Iż-Żgħażagħ Jistaqsu . . . X’Hemm Ħażin fil-Qerq?” (8 taʼ Frar, 2003) Jien nistudja fl-università u ili bid-drawwa li nqarraq mill-ħames sena skolastika. Minn dejjem kont nitħasseb dwar jekk il-qerq kienx tajjeb, imma ma stajtx insib tweġiba. Għalhekk dan l-artiklu huwa verament prezzjuż għalija. Issa se nbiddel l-imġiba tiegħi mit-test li jmiss u li bħalissa qed nistudja għalih.
S. Y., Ukraina