Tilqima li Tagħti Lilek Innifsek ”bis-Sapun
Tilqima li Tagħti Lilek Innifsek ”bis-Sapun
IT-TIENI l-iktar ħaġa li toqtol lit-tfal fid-dinja la hija l-malarja, la t-tuberkulosi, u lanqas l-AIDS. Hija . . d-dijarea,” tirrapporta r-rivista The Economist. Madankollu, ħafna minn dawn il-vittmi żgħar kienu jkunu għadhom ħajjin li kieku huma u l-familji tagħhom ħaslu idejhom regolarment bis-sapun.
Ir-riċerkaturi fl-Iskola taʼ l-Iġjene u l-Mediċina Tropikali f’Londra sabu li “jekk l-idejn jinħaslu kif suppost jistaʼ jitnaqqas il-mard tad-dijarea bi 43 fil-mija,” tgħid The Economist. “Dan jistaʼ saħansitra jnaqqas ħafna r-riskju taʼ l-infezzjonijiet fil-pajp tan-nifs, l-iktar tip taʼ infezzjonijiet li joqtol lit-tfal. Fi studju kbir li sar għall-armata Amerikana nstab li meta t-truppi bdew jaħslu idejhom ħames darbiet kuljum, l-irjiħat u s-sogħla naqsu b’45 fil-mija.” Fil-pajjiżi li qed jiżviluppaw bosta familji jaffordjaw jixtru s-sapun. Għalhekk, mhux taʼ b’xejn li dan huwa deskritt bħala “tilqima li tagħti lilek innifsek.” U barra minn hekk ma tweġġax!
Il-Bibbja wkoll tinkuraġġixxi l-indafa. “Ħalli . . nitnaddfu minn kull ħaġa li tistaʼ tħammeġ il-ġisem jew l-ispirtu,” jgħid it-2 Korintin 7:1. (The New English Bible) Għalkemm Alla jimpurtah l-iktar mill-indafa spiritwali tagħna, hu jimpurtah ħafna wkoll mill-indafa fiżika. (Levitiku, kapitli 12-15) M’għandniex xi ngħidu, hu ma jistenniex minna li mmorru fl-estrem. Xorta waħda, għandna nagħmluha drawwa li naħslu idejna wara li nużaw it-tojlit, wara li naħslu jew inbiddlu l-ħrieqi lil xi tarbija, qabel ma nħejju jew nieklu xi ikla, u f’kull okkażjoni oħra meta jkun hemm ir-riskju li ngħaddu l-mikrobi taʼ ħsara jew xi virus lil oħrajn. Meta naħslu idejna regolarment, inkunu qegħdin nuru mħabba Kristjana lejn il-familja tagħna u lejn dawk kollha li jistaʼ jkollna kuntatt magħhom.—Mark 12:31.