Għal ġo Dinja Ħarxa!

TARBIJA titwieled f’dinja ħarxa, dinja kollha stress. Għalkemm tarbija ma tistax verament tgħid x’inhi tħoss, xi xjenzati jemmnu li anki qabel it-​twelid, il-​fetus ikun jaf x’inhu jseħħ.

Il-ktieb The Secret Life of the Unborn Child (Il-Ħajja Sigrieta taʼ Tarbija Mhix Imwielda) jgħid: “Aħna nafu li t-​tarbija li għadha ma twilditx hija persuna f’sensiha li tirreaġixxi għall-​affarijiet taʼ madwarha u minn meta jkollha sitt xhur (u forsi anki qabel) tgħix ħajja attiva emozzjonalment.” Għalkemm it-​tarbija għandha mnejn ma tiftakarx, xi xjenzati jaħsbu li l-​esperjenza stressanti fit-​twelid għandha mnejn teffettwalha ħajjitha iktar ’il quddiem.

Wara t-​twelid, l-​istress ikompli. Barra l-​ġuf t’ommha, it-​tarbija ma tibqax tiġi mitmugħa awtomatikament. Il-​kurdun li kien jagħtiha l-​ossiġnu u s-​sustanzi issa m’għadux hemm. Biex issalva, trid tibda tieħu n-​nifs u s-​sustanzi waħedha. Għandha bżonn lil xi ħadd biex jitmagħha u jieħu ħsieb il-​bżonnijiet fiżiċi l-​oħra tagħha.

It-tarbija li tkun għadha kif twieldet trid ukoll tiżviluppa mentalment, emozzjonalment, u spiritwalment. Għal din ir-​raġuni, xi ħadd irid jieħu ħsieb din iċ-​ċkejkna. Min l-​aħjar li jagħmel dan? It-​tarbija x’għandha bżonn mill-​ġenituri tagħha? Kif jistgħu dawn il-​bżonnijiet jiġu provduti bl-​aħjar mod? L-​artikli li jmiss se jgħinuk twieġeb dawn il-​mistoqsijiet.