Il-Ġilda Tiegħek—“Sur taʼ Belt”
Il-Ġilda Tiegħek—“Sur taʼ Belt”
Ir-residenti fil-bliet tal-qedem kienu jibnu s-swar bħala difiża biex ma jħallux lill-invażuri jidħlu. Is-sur kien magħmul biex iwaqqaf lill-għadu milli jidħol u anki bħala post minfejn id-difensuri setgħu jipproteġu l-belt. Ġismek ukoll huwa mżejjen b’“sur” protettiv—il-ġilda tiegħek. Din kif tipproteġik mill-invażuri?
Il-wiċċ tal-ġilda tiegħek hu miksi bil-batterji u organiżmi żgħar oħra. Xi ftit minnhom jistgħu jikkaġunaw infezzjoni u mard. Milli jidher, il-ġilda tiegħek m’hijiex biss bħal ilqugħ li ma jagħmel xejn. Jidher ukoll li tbiegħed l-invażuri billi tipproduċi proteini li jaħdmu bħala difensuri kontra l-mikrobi. Xi wħud minn dawn jaħdmu l-ħin kollu. Oħrajn jitfaċċaw meta l-ġilda jkollha xi ħsara fiha.
L-ewwel żewġ gruppi taʼ proteini kontra l-mikrobi li nstabu (defensins u cathelicidins) urew li huma difensuri lesti biex jaġixxu meta jkun hemm bżonn. Iż-żewġ gruppi jifformaw miċ-ċelluli fl-ewwel saff tal-ġilda meta jkun hemm xi feriti jew infjammazzjoni. Dawn joqtlu l-invażuri billi jtaqqbulhom toqob fil-qoxra taċ-ċellula.
Fl-2001 tim taʼ riċerkaturi fl-Università taʼ Tübingen, il-Ġermanja, sab tip ieħor taʼ proteina li tiġġieled kontra l-mikrobi (dermicidin) u li hija attiva l-ħin kollu. Għall-kuntrarju taż-żewġ gruppi l-oħra, id-dermicidin hija prodotta minn ġilda b’saħħitha fil-glandoli taʼ l-għaraq. Għadhom ma jafux kif taħdem din il-proteina. Iżda l-fatt li l-għaraq jgħin biex iżomm il-mard ’il bogħod jistaʼ jispjega għala dawk l-uħud li jinħaslu żżejjed huma iktar suxxettibbli għall-infezzjonijiet fil-ġilda u l-ekżema.
Bħal sur taʼ belt tal-qedem, il-ġilda tagħna hi lqugħ kontra l-invażuri. Bla dubju, int taqbel mas-salmista meta qal: “Kemm huma kotrana l-għemejjel tiegħek, Mulej! Kollha bl-għerf għamilthom.”—Salm 104:24.