Ikampaw mat-​Trawma t’Attakk Terroristiku

MINN KITTIEB GĦAL STENBAĦ! FI SPANJA

FIL-​ĦDAX taʼ Marzu, 2004, il-​belt taʼ Madrid, fi Spanja, theżżet bil-​ħoss minn splużjonijiet t’għaxar bombi fi tliet stazzjonijiet tal-​ferrovija differenti. Dan l-​attakk, li sar fl-​istess ħin fuq erbaʼ ferroviji tal-​passiġġieri, ħalla 190 ruħ mejta u 1,800 ruħ feruta.

 Peress li l-​bombi splodew fil-​għodu, fil-​ħin meta n-​nies kienu sejrin għax-​xogħol, il-​ferroviji kollha kienu ppakkjati bin-​nies u l-​ħerba kienet tal-​biżaʼ. “Rajt vagun sħiħ jogħla fl-​arja għoli taʼ metru, daqshekk kienet qawwija s-​saħħa taʼ l-​isplużjoni,” qalet Aroa, mara li rat dak li ġara b’għajnejha stess. “Meta ħriġt mill-​vagun li kont fih, il-​post kollu kien qisu żona tal-​gwerra. Titwaħħax tara dan il-​massakru fir-​realtà.” L-​istess ġrajjiet tal-​biżaʼ seħħew fuq erbaʼ ferroviji differenti u f’għaxar vaguni differenti. It-​terroristi kienu ħallew barżakki mimlijin bl-​isplussivi fuq il-​ferroviji, u mbagħad splodewhom permezz taʼ telefons ċellulari.

Xi passiġġieri kellhom ix-​xorti li ma setgħux jiftakru l-​ġrajjiet terribbli li għaddew minnhom. Imma mijiet minnhom, bħal Aroa, iridu jkampaw kemm mal-​ħsara fiżika u kemm maʼ dik emozzjonali. “L-​isplużjoni għamlitli ħsara kbira fis-​smigħ,” qalet Aroa, “iżda l-​iktar li jeffettwawni huma l-​memorji tal-​biżaʼ li ma jridux jitilqu minn moħħi.”

“Jien grata li, bħala waħda mix-​Xhieda taʼ Ġeħova, ngħatajt ħafna appoġġ emozzjonali,” żiedet Aroa. “Telefonati u messaġġi minn madwar id-​dinja kollha fakkruni li aħna verament fratellanza globali. Barra minn hekk, il-​Bibbja tgħinna nifhmu għala jseħħu dawn l-​atti vjolenti u krudili. Jien spjegajt lil xi wħud minn sħabi fuq ix-​xogħol li l-​Iskrittura bassret li ‘fl-​aħħar jiem,’ in-​nies se jkunu feroċi u bla mħabba naturali. Sibt ukoll li l-​ministeru tiegħi full-time kien imprezzabbli biex itaffili l-​uġigħ.”​—2 Timotju 3:​1-3.

Pedro kien wieħed mill-​ħafna passiġġieri li weġġgħu serjament. Kien wieqaf inqas minn erbaʼ metri ’l bogħod mill-​bomba li splodiet fil-​vagun li kien riekeb fih. L-​isplużjoni tefgħetu maʼ l-​art u ġarrab feriti f’rasu u problemi respiratorji serji. Wara ħamest ijiem taʼ kura intensiva, beda jaqleb għall-​aħjar. L-​għadd kbir taʼ Xhieda sħabu li żaruh kien taʼ inkuraġġiment kbir għalih, u kien taʼ sorpriża kbira għall-​infermieri. Waħda minnhom qalet: “F’26 sena qatt ma rajt pazjent ikollu daqstant viżitaturi u jaqlaʼ daqstant rigali!” Mill-​banda l-​oħra, Pedro tkellem b’entużjażmu dwar l-​istaff taʼ l-​isptar. “Kienu meraviljużi,” qal hu. “Kienu t’għajnuna kbira għalija biex infiq.”

Ħafna mill-​vittmi kienu emigranti li kienu għadhom kif ġew joqogħdu Spanja. Manuel, li hu Kuban, weġġaʼ fl-​ewwel splużjoni fl-​istazzjon t’Atocha, u mbagħad tħalla mitluf minn sensih mit-​tieni splużjoni. “Fil-​paniku, in-​nies bdew jgħaddu minn fuqi hekk kif jien kont mixħut maʼ l-​art fuq il-​pjattaforma taʼ l-​istazzjon,” hu spjega. “Meta ġejt f’sensija, kelli żewġ kustilji miksurin u kont imweġġaʼ f’riġli, kif ukoll tlift is-​smigħ kollu minn widna waħda.”

“Il-​ħaddiema taʼ l-​emerġenza​—pulizija, taʼ l-​ambulanza, u tat-​tifi tan-​nar​—ġew fuq il-​post fi ftit minuti, u tawni l-​aħjar għajnuna possibbli,” żied Manuel. “Kienu jafu eżatt x’għandhom jagħmlu, u billi kienu effiċjenti u professjonali għenu biex jonqos il-​paniku. Minbarra li ħadu ħsieb li ningħata l-​attenzjoni medika meħtieġa, huma ttrattawni b’qalb tajba u mogħdrija.”

Ir-​Reazzjoni taʼ Wara t-​Trawma

Bħal Aroa, Manuel ġarrab ħafna ħsara emozzjonali. “Meta dan l-​aħħar tlajt fuq ferrovija, qabadni attakk taʼ paniku,” hu stqarr. “Kelli naqbad u ninżel. U għadni naħseb ħażin meta nara lil xi ħadd fuq it-​trasport pubbliku li jkollu xi barżakka jew xi ħaġa simili. Iżda kelli ħafna iżjed għajnuna minn oħrajn, avolja ħadd mill-​membri tal-​familja tiegħi ma joqgħod Spanja. Letteralment mijiet taʼ Xhieda ċempluli, u familja taʼ Xhieda stidnitni f’darha għal ftit ġranet biex ma nħossnix waħdi. Dan l-​appoġġ imprezzabbli mingħand il-​fratellanza tagħna minn madwar id-​dinja għenni biex nikkalma.”

Sergio, passiġġier li ma weġġax fiżikament, xorta għadu jsofri kuljum mix-​xeni li ra madwaru. Bomba splodiet fil-​vagun taʼ quddiemu u oħra fil-​vagun li kien eżatt warajh. Bħal Manuel, hu grat taʼ l-​appoġġ u l-​imħabba li wrew il-​familja tiegħu u x-​Xhieda sħabu.  “Mhux biss ġagħluni nħossni maħbub iżda wkoll fakkruni li jien nappartjeni lil fratellanza magħquda li tieħu ħsieb lil kull wieħed mill-​membri tagħha,” hu qal. “Ngħatajt dan l-​appoġġ jum wara l-​ieħor, u l-​ħafna telefonati li rċivejt għenuni nesprimi s-​sentimenti tiegħi, xi ħaġa li spiss insibha diffiċli biex nagħmilha.”

Xi passiġġieri fuq il-​ferroviji esperjenzaw tipi differenti t’ansjetà. Diego, bla ma kien jaf, kien bil-​qiegħda ħdejn waħda mill-​erbaʼ bombi li ma splodewx. Hu rnexxielu joħroġ mill-​ferrovija mingħajr ma ġralu xejn. “Imma issa nħossni ħati li ma tajtx l-​għajnuna lil dawk li kienu feruti,” hu stqarr. “Fil-​paniku, tkaxkart mal-​mijiet taʼ nies li ġrew bl-​aħjar mod li setgħu ’l barra mill-​istazzjon.”

L-isplużjoni li seħħet fuq il-​ferrovija tiegħu ħalliet lil Ramón, żagħżugħ mill-​Brażil, fi stat taʼ xokk tant kbir li bilkemm setaʼ jiċċaqlaq. Minkejja dan, jumejn wara l-​attakk, hu ddeċieda li jmur ixandar il-​messaġġ tas-​Saltna lil oħrajn. Iltaqaʼ maʼ raġel mill-​Portugall u dan qal lil Ramón li kien qed ifittex ir-​reliġjon vera. Ramón irnexxielu jibda studju tal-​Bibbja maʼ dan ir-​raġel, li mill-​ewwel beda jattendi l-​laqgħat Kristjani. “Meta tistaʼ tgħin lil oħrajn spiritwalment, int stess tħossok aħjar,” osserva Ramón.

Bla dubju, il-​vittmi kollha se jkollhom bżonn taż-​żmien biex ifiqu mill-​ħsara fiżika u emozzjonali li ġarrbu. Hija ħasra li llum qed ngħixu f’perijodu meta vjolenza bla sens tistaʼ tinqalaʼ kullimkien, ikun fejn ikun. U għalkemm il-​valuri spiritwali jistgħu jgħinu lill-​vittmi jkampaw mat-​trawma, is-​Saltna t’Alla biss finalment se telimina dawn it-​traġedji.​—Rivelazzjoni 21:​3, 4.

[Kaxxa/Stampi f’paġna 15]

SAĦĦA SPIRITWALI BIEX IKAMPAW MAT-​TRAWMA

Manuel Suárez

“Waqt li kont għadni xxokkjat, nistenniehom jiħduni l-​isptar, bdejt niftakar fil-​kliem taʼ Proverbji 18:10: ‘Isem il-​Mulej hu torri qawwi; fih jistkenn il-​ġust b’moħħu mistrieħ.’ Dak il-​kliem tani s-​saħħa.”

Aroa San Juan

“Meta tgħaddi minn xi ħaġa bħal din, tirrealizza iktar minn qatt qabel li dawn huma l-​aħħar jiem u li għandna nikkonċentraw fuq il-​valuri spiritwali. Bl-​għajnuna tal-​ministeru tiegħi full-time, bil-​mod il-​mod qed infiq mit-​trawma.”

Fermín Jesús Mozas

“Minkejja li ġarrabt feriti f’rasi, jien stajt noffri l-​għajnuna u nqawwi qalb xi wħud mill-​passiġġieri l-​oħra li kienu feruti. Naħseb li bqajt kalm minħabba t-​tama taʼ l-​irxoxt li tana Alla, tama li ssaħħaħna f’mumenti bħal dawn.”

Pedro Carrasquilla

“Meta kont fis-​sala tal-​kura intensiva, b’uġigħ qawwi f’sidri, beda ġej f’moħħi darba wara l-​oħra l-​kliem taʼ l-​1 Timotju 6:​19. Dan jinkuraġġina biex, bħala t-​teżor tagħna, inqiegħdu pedament tajjeb għall-​futur sabiex naqbdu qabda soda mal-​ħajja vera. Dan il-​vers fakkarni fit-​tama tal-​Ġenna taʼ l-​art li Alla wiegħed lil dawk li jħobbuh. Huwa għal dan li qed naħdmu.”

[Stampa f’paġna 13]

Fuq: Ħaddiema tas-​salvataġġ jagħtu l-​għajnuna lill-​feruti u lill-​moribondi fuq il-​linji tal-​ferrovija barra l-​istazzjon t’Atocha

[Sors]

Fuq: CORDON PRESS

[Stampa f’paġna 13]

Lemin: Mafkar li tpoġġa għal dak il-​ħin