Mingħand il-Qarrejja
Mingħand il-Qarrejja
Tfal Malli rċivejt is-serje “It-Tfal—X’Jeħtieġu mill-Ġenituri,” qrajtha b’ħerqa kbira. (1 taʼ Jannar, 2004) Bħala omm taʼ ħamest itfal, l-artikli messewli qalbi profondament. Nixtieq li jistgħu jaqrawhom l-ommijiet kollha madwar id-dinja.
C. M., Franza
L-artikli li tippubblikaw donnhom jiġu fil-waqt għalija. Meta jien u żewġi sirna nafu li kont tqila, ippubblikajtu informazzjoni għan-nisa tqal. (8 taʼ Jannar, 2003) Issa li aħna l-ġenituri ferħanin taʼ tifel li għandu tliet xhur, ippubblikajtu suġġerimenti taʼ l-għaġeb dwar kif trabbi lit-tfal. Dawn l-artikli kienu t’għajnuna kbira għalija bħala omm żagħżugħa.
D. K., Polonja
Bijografija Nirringrazzjakom taʼ l-artikli kollha, imma l-iktar li nieħu gost naqra huma l-bijografiji. Ir-rakkont taʼ Eileen Brumbaugh “Ix-Xkiel Tiegħi Kien l-Ilbies u d-Dehra” messli qalbi. (8 taʼ Jannar, 2004) X’ħerqa ġenwina kellha biex issib ir-reliġjon vera!
L. M., Russja
Kont interessata partikolarment fil-bijografija taʼ Eileen Brumbaugh għax fejn noqgħod jien hawn popolazzjoni kbira taʼ familji mir-reliġjonijiet Amish u Mennonin. Fil-passat kont nirraġuna li għalxejn inkellimhom dwar il-Bibbja għax jidhru konvinti ħafna mill-fidi tagħhom. Mill-esperjenza tagħha nistaʼ nara li jekk nuru interess persunali u sinċier, nistgħu ngħinu lil kull tip taʼ individwu biex jieħu għarfien eżatt dwar Alla.
M. H., Stati Uniti
Jien ukoll kelli l-idea li l-makeup u l-ġojjelli kienu “tad-dinja.” Kienet l-imħabba bla ipokrisija tax-Xhieda taʼ Ġeħova, kif ukoll ir-rispett li għandhom għall-Iskrittura Mqaddsa, li għenuni nara iktar milli sempliċement id-dehra taʼ barra.
A. C., Stati Uniti
Mediċini Magħmulin mill-Ħxejjex Jien ħadt gost naqra l-artiklu “Mediċini Magħmulin mill-Ħxejjex—Jistgħu Dawn Jgħinuk?” (1 taʼ Jannar, 2004) Jien infermiera kwalifikata u nuża diversi mediċini magħmulin mill-ħxejjex biex insaħħaħ l-għadam tiegħi. Sibthom taʼ benefiċċju ħafna għalija. Madankollu, ma semmejtux li xi ħxejjex jistgħu jikkaġunaw telf kbir taʼ demm f’xi operazzjonijiet. Huwa importanti li x-Xhieda taʼ Ġeħova jkunu jafu li xi ħxejjex m’għandhomx jintużaw qabel xi operazzjoni kbira.
J. H., Stati Uniti
“Stenbaħ!” iwieġeb: Aħna napprezzaw din it-tfakkira importanti. Qabel xi operazzjoni, huwa essenzjali li l-pazjent jgħid lit-tabib tiegħu bil-mediċini kollha li jkun qed jieħu—inkluż dawk magħmulin mill-ħxejjex. Dan huwa importanti partikolarment għal dawk li jobdu l-kmand tal-Bibbja biex ‘nitbiegħdu mid-demm.’—Atti 15:29.
Kelliemi fil-Pubbliku Verament ħadt pjaċir naqra l-artiklu “Iż-Żgħażagħ Jistaqsu . . . Kif Nistaʼ Nirnexxi Bħala Kelliemi fil-Pubbliku?” (1 taʼ Jannar, 2004) Jien ilni naħdem fil-qasam tal-ġurnaliżmu għal dawn l-aħħar għaxar snin, imma xorta niċċita ruħi meta nkun se nagħmel preżentazzjoni quddiem grupp kbir taʼ nies. It-taħriġ kollu li ħadt mill-iskola u mix-xogħol ma jitqabbilx maʼ l-istruzzjoni li tispikka li ħadt bħala student fl-Iskola tal-Ministeru Teokratiku, li tinżamm fis-Swali tas-Saltna tax-Xhieda taʼ Ġeħova. Dan it-taħriġ mhux biss għenni biex nitjieb fil-ministeru minn bieb għal bieb imma wkoll biex ikolli suċċess fix-xogħol sekulari tiegħi.
L. B., Stati Uniti