Meta Naġixxu b’Kuxjenza Tajba Nigglorifikaw lil Alla

MINN KITTIEB GĦAL STENBAĦ! FL-​UKRAINA

FI TRIQITHOM lejn id-​dar wara laqgħa Kristjana, il-​familja Chibisov, li huma Xhieda taʼ Ġeħova fl-​Ukraina, sabu portmoni bil-​flus, kif ukoll liċenzja tas-​sewqan, xi credit cards, u madwar Lm160. F’din il-​familja taʼ ħamsa, ir-​raġel biss kellu impjieg. Kien jaqlaʼ madwar Lm20 fix-​xahar. Għalhekk, dawn il-​flus setgħu kienu t’għajnuna kbira għalihom. X’għamlu?

L-omm tgħid: “It-​tfal bniet tagħna mill-​ewwel bdew jiddiskutu x’jistgħu jagħmlu biex jirritornaw il-​portmoni lil sidu, li mil-​liċenzja tas-​sewqan indunaw li kienet mara. Jien u r-​raġel tiegħi konna ferħanin ħafna naraw it-​tfal tagħna juru bl-​azzjonijiet li l-​kuxjenza tagħhom kienet imħarrġa tajjeb. L-​għada ċempilt lill-​mara li kienet tilfet il-​portmoni. Olha bdiet tibki bil-​ferħ, u ġiet tgħidilna li hi u r-​raġel tagħha kellhom xi ħwienet fejn konna noqogħdu aħna. Il-​flus li kien hemm fil-​portmoni kienu l-​paga tax-​xahar għall-​impjegati tagħhom. Barra minn hekk, wieħed mid-​dokumenti finanzjarji li kien hemm fil-​portmoni kien importanti ħafna għar-​rekords tan-​negozju tagħha.

“Olha staqsietna fejn konna sibna l-​portmoni. Għednielha fejn, u spjegajnielha wkoll li konna hemm għax konna ġejjin lura mil-​laqgħa Kristjana tagħna. Meta offrejnielha xi letteratura mill-​Bibbja, hi aċċettat b’rispett.

“Ftit tal-​ġimgħat wara, waħda Xhud fil-​kongregazzjoni tagħna qaltilna li waqt li kienet qed toffri xi letteratura mill-​Bibbja lil xi ħadd li kien għaddej fit-​triq, waħda mara spjegatilha li qabel ma kinitx toqgħod tismaʼ lix-​Xhieda taʼ Ġeħova. Imma issa mhux biss kienet lesta li tismaʼ iżda wkoll biex tieħu l-​letteratura. Hi qalet li dan kien minħabba li xi Xhieda kienu rritornaw portmoni lit-​tifla tagħha.”

[Stampa f’paġna 31]

Il-​familja Chibisov