Il-​Ħarsa tal-​Bibbja

Għandu Jkun Hemm Distinzjoni Bejn il-​Kleru u l-​Lajċi?

Wisq Reverendu, Reverendissimu, “Father,” Wisq Qaddis, Rabbi, l-​Eminenza Tiegħu, l-​Eċċellenza Tiegħu, il-​Qdusija Tiegħu, il-​Qdusija Kollha Tiegħu—dawn huma ftit mit-​titli li jiddistingwu lill-​kleru taʼ diversi reliġjonijiet mil-​lajċi. F’ħafna reliġjonijiet issir distinzjoni bejn il-​kleru u l-​lajċi, imma kien Alla li għamel dan l-​arranġament, jew huwa tradizzjoni tal-​bnedmin? Fuq kollox, Alla japprovah?

“FIT-​TESTMENT IL-​ĠDID u matul iż-​żminijiet appostoliċi tal-​bidu ma jissemmew la l-​kleru u lanqas il-​lajċi,” kiteb Cletus Wessels, professur tat-​teoloġija. L-​Encyclopedia of Christianity tgħid: “Bil-​mod il-​mod bdiet issir differenza bejn dawk li kellhom kariga, il-​kleru, u l-​bqija tan-​nies, il-​lajċi . . . Il-​membri ‘komuni’ tal-​knisja bdew jitqiesu bħala l-​popolin mhux kwalifikat.” Din id-​differenza saret prominenti matul it-​tielet seklu E.K.—iktar minn mitejn sena wara Ġesù Kristu!

Jekk, mela, id-​distinzjoni bejn il-​kleru u l-​lajċi mhijiex ibbażata fuq ix-​xempju li ħallew l-​appostli taʼ Ġesù u l-​Kristjani l-​oħrajn tal-​bidu, ifisser li hi ħażina? Skont il-​Bibbja, iva. Ikkunsidra għala.

“Intom Ilkoll Aħwa”

Il-​Kelma t’Alla tgħidilna li l-​Kristjani kollha jaqdu bħala ministri t’Alla u li ħadd mhu superjuri jew inferjuri għal ħaddieħor. (2 Korintin 3:5, 6) Il-​Kristjani tal-​bidu “kienu jinsistu ferm li ma jkunx hemm klassijiet,” jgħid Alexandre Faivre, kittieb tar-​reliġjon. Din l-​insistenza biex “ma jkunx hemm klassijiet” taqbel mal-​kliem taʼ Ġesù lis-​segwaċi tiegħu: “Intom ilkoll aħwa.”—Mattew 23:8.

M’għandniex xi ngħidu, irġiel anzjani spiritwalment kienu jaqdu bħala indokraturi. Dan kien jinkludi li jkunu rgħajja u għalliema. (Atti 20:28) Madankollu, dawn l-​irġiel ma kinux kleru li kien jitħallas. Fil-​biċċa l-​kbira minnhom kienu rġiel komuni li kienu jaħdmu—irġiel miżżewġin u missirijiet. Iktar minn hekk, huma kkwalifikaw biex jaqdu bħala indokraturi, mhux billi attendew xi seminarji reliġjużi, imma billi kienu studenti ħabrieka tal-​Kelma t’Alla u billi kkultivaw il-​kwalitajiet spiritwali li jirrikjedi Alla. Dawn il-​kwalitajiet jinkludu li wieħed ikun “moderat fi drawwietu, għandu moħħu f’loku, jimxi bl-​ordni, juri l-​ospitalità, ikun kwalifikat biex jgħallem, . . . raġunevoli, mhux ġellied, mhux wieħed li jħobb il-​flus, raġel li jippresiedi fuq dawk taʼ daru bl-​aħjar mod.”—1 Timotju 3:1-7.

Għala Hu Għaqli li Nżommu Sod mal-​Bibbja

“Tmorrux lil hinn minn dak li hemm miktub,” tgħid il-​Bibbja. (1 Korintin 4:6) B’sogħba, meta n-​nies jinjoraw l-​istruzzjonijiet imnebbħin minn Alla, ġeneralment jispiċċaw iġarrbu ħsara spiritwali, u dan hu minnu fil-​każ tal-​arranġament taʼ kleru u lajċi. Dan kif? Jekk jogħġbok ikkunsidra s-​sitt punti li ġejjin.

1. Il-​fatt li jkun hemm klassi tal-​kleru separata jimplika li wieħed irid ikollu sejħa speċjali biex ikun ministru t’Alla. Madankollu, il-​Bibbja tgħid li l-​Kristjani veri kollha għandhom jaqdu lil Alla u jfaħħru lil ismu. (Rumani 10:9, 10) L-​irġiel Kristjani inġenerali huma inkuraġġiti jirsistu għall-​privileġġ li jaqdu fil-​kongregazzjoni, bħalma hi d-​drawwa fost ix-​Xhieda taʼ Ġeħova.—1 Timotju 3:1.

2. Id-​distinzjoni bejn il-​kleru u l-​lajċi tgħolli l-​klassi tal-​kleru, u waħda mill-​evidenzi taʼ dan hija t-​titli reliġjużi li jesiġu l-​ammirazzjoni taʼ  ħaddieħor. Madankollu, Ġesù qal: “Min iġib ruħu bħal wieħed mill-​iżgħar fostkom ilkoll, dan ikun il-​kbir.” (Luqa 9:48) Fi qbil maʼ dan l-​ispirtu t’umiltà, hu qal lis-​segwaċi tiegħu biex ma jadottawx titli reliġjużi.—Mattew 23:8-12.

3. Klassi tal-​kleru mħallsa tistaʼ tqiegħed piż finanzjarju kbir fuq il-​lajċi, speċjalment meta l-​kleru jgħix fil-​lussu. Mill-​banda l-​oħra, l-​indokraturi Kristjani jieħdu ħsieb il-​bżonnijiet finanzjarji tagħhom billi jagħmlu xogħol sekulari normali, u b’hekk jagħtu eżempju tajjeb lil oħrajn. a—Atti 18:1-3; 20:33, 34; 2 Tessalonikin 3:7-10.

4. Peress li xi membru tal-​kleru jistaʼ jiddependi minn oħrajn għall-​appoġġ finanzjarju, jistaʼ jkollu t-​tentazzjoni li jgħawweġ il-​messaġġ tal-​Bibbja biex jogħġob lill-​parruċċani. Tabilħaqq, l-​Iskrittura bassret li proprju din il-​ħaġa kellha tiġri. “Ikun hemm perijodu taʼ żmien meta ma jittollerawx it-​tagħlim mimli saħħa, imma, fi qbil max-​xewqat tagħhom, jiġbru għalliema madwarhom biex jgħarrxulhom widnejhom.”—2 Timotju 4:3.

5. Id-​distinzjoni bejn il-​kleru u l-​lajċi tagħti x’tifhem lil-​lajċi li r-​reliġjon għandhom iħalluha f’idejn il-​kleru, waqt li l-​lajċi sempliċement jattendu s-​servizzi reliġjużi taʼ kull ġimgħa. Madankollu, il-​Kristjani kollha għandhom ikunu konxji tal-​bżonn spiritwali tagħhom u jkunu studenti tajbin tal-​Bibbja.—Mattew 4:4; 5:3.

6. Meta l-​lajċi ma jkunux jafu x’tgħid il-​Bibbja, huma jistgħu faċilment jiġu żvijati mill-​membri tal-​kleru, u saħansitra sfruttati minnhom. Tabilħaqq, l-​istorja fiha ħafna eżempji t’abbużi bħal dawn. b—Atti 20:29, 30.

Sabiex jimxu mill-​qrib maʼ dak li tgħid il-​Bibbja, ix-​Xhieda taʼ Ġeħova m’għandhomx klassi tal-​kleru imma rgħajja u għalliema spiritwali li ma jitħallsux u li jaqdu l-​merħla t’Alla minn jeddhom. Għala ma tarax dan b’għajnejk stess billi żżur Sala tas-​Saltna fil-​lokalità tiegħek?

[Noti taʼ taħt]

QATT ĦSIBT DWAR DAN?

◼ Dawk kollha li huma parti mill-​poplu t’Alla kif għandhom iqisu lil xulxin?—Mattew 23:8.

◼ L-​irġiel Kristjani kif jikkwalifikaw biex jaqdu bħala indokraturi fil-​kongregazzjoni?—1 Timotju 3:1-7.

◼ L-​arranġament taʼ kleru u lajċi għala m’għandux il-​barka t’Alla?—1 Korintin 4:6.

[Kumment f’paġna 23]

Kuntrarju għall-​kleru, Ġesù ġab ruħu bħal “wieħed mill-​iżgħar”