‘Kexxun li Ġeħova Biss Jistaʼ Jiftħu’

◼ Fl-​2007, Erika, tifla taʼ sitt snin, u Mattia, tifel t’erbaʼ snin, tilfu lil missierhom fil-​mewt. Madankollu, it-​tama tal-​irxoxt isserraħ lil dawn it-​tfal mill-​uġigħ.—Atti 24:15.

Erika tħobb taqsam it-​tama tagħha bbażata fuq il-​Bibbja m’oħrajn, speċjalment fl-​iskola tagħha fi Sqallija. Pereżempju, meta l-​ħabiba tagħha Beatrice qalet li issa missier Erika kien fis-​sema, Erika bil-​ħlewwa wiġbitha li l-​Bibbja tgħid mod ieħor. “Allura fejn hu?” staqsiet Beatrice.

“Fil-​qabar,” wieġbet Erika. Malli qaltilha hekk, Beatrice riedet tkun taf x’inhu qabar.

“Huwa bħal kexxun li jinfetaħ u jingħalaq,” spjegatilha Erika. “Imma meta dan il-​kexxun jingħalaq, ma tkunx tistaʼ tiftħu. Ġeħova biss jistaʼ jiftħu meta tiġi d-​dinja l-​ġdida.”

Erika mbagħad spjegat lill-​ħabiba tagħha li Ġeħova hu l-​isem t’Alla, li se jġib ġenna fuq l-​art, li mhux se jkun hawn iżjed mard, u li l-​mejtin se jerġgħu jieħdu l-​ħajja. Imbagħad Erika staqsiet lil Beatrice biex tiċċekkja jekk ommha tħallihiex taċċetta bħala rigal ktieb li jitkellem fuq dawn l-​affarijiet.

Meta ġiet aċċertata li omm Beatrice tatha l-​permess, Erika tat kopja tal-​ktieb Tgħallem mill-​Għalliem il-​Kbir lill-​ħabiba tagħha. Erika għadha titkellem m’oħrajn dwar l-​affarijiet li qed titgħallem mill-​Bibbja u saħansitra tat kopja tal-​ktieb imsemmi hawn fuq lill-​għalliema tagħha.

M’għandniex xi ngħidu, Erika u ħuha ż-​żgħir xorta jgħaddu minn mumenti taʼ dwejjaq minħabba li tilfu lil missierhom. Imma t-​tama tal-​irxoxt iġġegħelhom iħossuhom aħjar. Dawn it-​tfal, bħal ħafna oħrajn madwar id-​dinja, jirringrazzjaw lil Ġeħova, l-​Alla tal-​faraġ veru.—Mattew 21:16; 2 Korintin 1:3, 4.

Tistaʼ titlob kopja taʼ dan il-​ktieb bi stampi sbieħ li fih 256 paġna u li l-​paġni tiegħu huma daqs il-​paġni taʼ din ir-​rivista. Sempliċement imla l-​kupun t’hawn taħt u ibagħtu fl-​indirizz provdut jew f’indirizz xieraq imniżżel f’paġna 5 taʼ din ir-​rivista.

□ Mingħajr obbligu, nixtieqkom tibagħtuli kopja tal-​ktieb muri hawnhekk.

□ Jekk jogħġobkom ikkuntattjawni rigward studju tal-​Bibbja fid-​dar bla ħlas.