Kif Rakkontata Minn Karl-​Erik Bergman

Kont inħossni veru tajjeb meta niġri b’saħħti kollha. Kelli l-​abbiltà naturali, allura li nisprintja sar l-​iktar ħaġa importanti f’ħajti.

FL-​1972, meta kelli 17-​il sena, dħalt membru fi klabb tal-​isports. Ma domtx ma rrealizzajt kemm kelli naqdef jekk ridt insir atleta mill-​aħjar. Mhuwiex biżżejjed li jkollok l-​abbiltà naturali biex tirbaħ il-​kampjonat tal-​isprinting [tiġrijiet żgħar taʼ xi mitt metru]. Imma kont lest biex naħdem iebes.

Meta kelli 22 sena, irnexxieli nidħol fit-​tim nazzjonali tal-​Finlandja. Is-​sena taʼ wara kelli l-​aħjar medja taʼ ħin fost l-​atleti kollha fil-​Finlandja għall-​ġiri taʼ mitt metru. Madankollu, minħabba li weġġajt l-​għerq t’Akille u l-​għeruq taʼ taħt l-​irkoppa ma stajtx nilħaq l-​aqwa potenzjal tiegħi. Imma l-​entużjażmu tiegħi għall-​ġiri tant kien qawwi li ddeċidejt li nibda naħdem bħala kowċ għall-​atleti li jkollhom talent. Fl-​1982, ippjanajt li mmur ngħix f’Kalifornja, l-​Istati Uniti, biex nistudja f’università u minħabba li t-​temp hemmhekk huwa aħjar, stajt nirsisti biex ikolli karriera fl-​isports. Saħansitra xtrajt il-​biljett tal-​ajruplan.

Dak li Bidilli Ħajti

Darba minnhom filgħaxija, ftit qabel ma wasal iż-​żmien tal-​vjaġġ tiegħi lejn Kalifornja, daqqet il-​qanpiena tal-​bieb. Meta ftaħt il-​bieb, kien hemm żewġ nisa li kienu Xhieda taʼ Ġeħova. Kienu kalmi ħafna u rpożati, żewġ kwalitajiet li jien infittex f’atleta. Stidinthom jidħlu ġewwa, u poġġejna bilqiegħda biex nitkellmu. Wara diskussjoni informattiva ħafna, ħallewli ktieb intitolat Int Tistaʼ Tgħix Għal Dejjem Fil-​Ġenna Fuq L-​Art. a Bdejt naqrah. Meta kont wasalt kważi f’nofsu, irrealizzajt li dak li kien hemm miktub kien il-​verità. In-​nisa reġgħu ġew, u jien staqsejthom dwar kif stajt insir wieħed mix-​Xhieda taʼ Ġeħova. Huma wiġbuni li kelli bżonn studju tal-​Bibbja.

Mhux talli aċċettajt studju tal-​Bibbja persunali imma wkoll bdejt nattendi l-​laqgħat max-​Xhieda fis-​Sala tas-​Saltna f’Vantaa, fejn kont ngħix. Bdejt nara li dak li kont qed nitgħallem kien ibbażat fuq il-​Bibbja. Fil-​fatt, il-​veritajiet Bibliċi li bdejt nitgħallem bdew jibdlu bil-​mod il-​mod il-​ħarsa tiegħi lejn dak li hu tassew importanti fil-​ħajja. Għalhekk, mort fl-​aġenzija tal-​ivvjaġġar, ħassart it-​titjira u ġibt lura l-​flus tal-​biljett. Użajt ftit mill-​flus biex nixtri qalziet u ġlekk ħalli nilbishom fil-​laqgħat  u bagalja biex inġorr il-​Bibbja u l-​letteratura Biblika tiegħi fiha. Tgħammidt bħala wieħed mix-​Xhieda taʼ Ġeħova f’konvenzjoni f’Ħelsinki fl-​1983.

Atleti Oħrajn Jingħaqdu Miegħi

Hekk kif bdejt nitgħallem il-​veritajiet Bibliċi, qsamthom maʼ sħabi bil-​ħeġġa. Huma għall-​ewwel ma ridux jemmnu. Fil-​fatt, malajr beda jinxtered għajdut li kont tlaqt minn moħħi. Wieħed wara l-​ieħor, sħabi bdew jevitawni. Wara l-​magħmudija tiegħi, kont niltaqaʼ m’atleti sħabi fil-​korsa tat-​tlielaq, minħabba li kont neżerċita ruħi regolarment biex nibqaʼ f’saħħti. Id-​diskussjonijiet tagħna għenuhom jaraw li għalkemm kont inbdilt, ma kontx iġġennint.

Maż-​żmien, xi wħud minn dawn l-​atleti bdew jifhmu li dak li għedtilhom kien raġunevoli u taʼ min jaħseb fuqu. Huma nnotaw li la kont għadni nitkellem ħażin u lanqas ma kont għadni aggressiv. Xi wħud minnhom kienu lesti jitgħallmu iktar dwar il-​Bibbja. Kont nieħu gost nuri lil oħrajn li l-​Bibbja tqabbel il-​ħajja taʼ Kristjan maʼ ġrajja atletika. Aħna ninsabu fil-​ġirja għall-​premju tal-​ħajja taʼ dejjem.—2 Timotju 2:5; 4:7, 8.

Il-​verità hi li biex ikollok sinifikat u hena veri f’ħajtek trid tagħmel dak li jogħġob lill-​Ħallieq tagħna u mhux tirbaħ xi attivitajiet atletiċi. Id-​diskussjonijiet tiegħi m’atleti oħrajn ġiegħlu lil xi ftit biex jerġgħu jeżaminaw il-​miri tagħhom, u xi wħud minnhom ħaddnu l-​veritajiet tal-​Bibbja li kienu bidluli ħajti. B’ferħ, xi wħud minnhom urew l-​istess żelu f’li jaqdu lil Alla bħalma kienu wrew fl-​atletika.

Waħda minnhom kienet Yvonne, ġerrejja tas-​sengħa li kienet tikkompeti fit-​tlielaq taʼ 800 metru. Hi kienet l-​iktar ġerrejja ħafifa li kienet teżisti fl-​Iskandinavja f’dik il-​kategorija u kienet kisbet ir-​rekord nazzjonali tal-​Finlandja. Hi rrappreżentat b’suċċess lill-​Finlandja f’attivitajiet atletiċi fl-​Ewropa. Minħabba d-​diskussjonijiet tagħna, Yvonne bdiet tara kemm hu fieragħ li tirsisti għall-​fama fid-​dinja tal-​lum. Hi tgħallmet, bħalma tgħallem il-​Bibbja, li din id-​dinja se tgħaddi, u meta dan iseħħ Alla se jġib dinja ġdida.—1 Ġwanni 2:17.

Yvonne ma damitx m’aċċettat studju tal-​Bibbja. Dak iż-​żmien kienet qed toħroġ maʼ Jouko, li kien membru b’talent kbir tat-​tim nazzjonali tal-​ġiri tal-​Finlandja. Fil-​fatt, hu kien irrappreżenta lill-​Finlandja f’attivitajiet atletiċi tal-​kampjonat Ewropew u dinji. Maż-​żmien, Yvonne u Juoko marru jgħixu l-​Istati Uniti biex ikomplu l-​karrieri atletiċi tagħhom.

Meta kienu hemm, Yvonne kompliet tistudja l-​Bibbja, u Jouko ngħaqad magħha. Hu għamel dan biex jipprova jsib xi ħaġa ħażina u jġib lil Yvonne f’sensiha. Imma ftit ftit, il-​verità tal-​Bibbja laħqet qalb Jouko wkoll. Yvonne u Jouko żżewġu u iktar tard iddedikaw ħajjithom lil Alla, u ssimbolizzaw dan permezz tal-​magħmudija fl-​ilma. Illum, it-​tnejn li huma jaqdu bħala pijunieri, ministri full-​time tax-​Xhieda taʼ Ġeħova.

Stajt ukoll nibda studju tal-​Bibbja maʼ Barbro, li kienet rebbieħa Finlandiża tal-​ġirja tan-​nisa tʼ400 metru. Kienet għadha kif irrappreżentat lill-​Finlandja f’attivitajiet atletiċi fl-​Ewropa. Wara dan, Barbro u żewġha, Jarmo, li kien jieħu sehem fl-​isport li fih taqbeż fl-​għoli permezz taʼ lasta, marru jgħixu fl-​Isvezja. Hemmhekk Barbro kompliet l-​istudju tal-​Bibbja tagħha, u Jarmo ngħaqad magħha. It-​tnejn li huma kienu qed ifittxu skop f’ħajjithom, u wara li tgħallmu l-​veritajiet tal-​Bibbja tgħammdu t-​tnejn fl-​Isvezja. Maż-​żmien, Jarmo sar fiżjoterapista, u bħala koppja huma komplew jaqdu biż-​żelu fil-​ministeru. Jarmo jaqdi bħala anzjan fil-​kongregazzjoni Kristjana.

Imbagħad, kien hemm Heidi, li wkoll kienet ġerrejja tas-​sengħa, li kienet għadha kif saret adoloxxenti. Bħala l-​kowċ tagħha, innotajt li kienu jinteressawha l-​affarijiet spiritwali. Allura, darba minnhom kellimtha dwar it-​tagħlim tal-​Bibbja fuq is-​Saltna t’Alla u l-​barkiet li se ġġib fuq l-​art. Staqsejtha, “Temmen li nistgħu naraw it-​twettiq taʼ dawn il-​barkiet imwegħdin?”—Salm 37:11, 29; Mattew 6:9, 10.

“Iva,” wieġbet hi. Riedet tistudja l-​Bibbja. Allura, għamilt arranġamenti biex oħt Kristjana  tistudja magħha. Wara ftit snin, Heidi wkoll issimbolizzat id-​dedikazzjoni tagħha lil Alla permezz tal-​magħmudija fl-​ilma. Maż-​żmien, hi kibret f’mara spiritwali mill-​isbaħ u saret marti. Hi kienet u għadha sieħba eċċellenti, waqt li għadha determinata għall-​aħħar li taqdi lil Alla—determinazzjoni li kieku kienet iffokata fuq l-​isports kienet twassalha biex tkun atleta mill-​aħjar.

Ħija ż-​żgħir Peter li wkoll kien involut fl-​isports, għall-​ewwel irreaġixxa ħażin ħafna meta bdejt nistudja l-​Bibbja. Imbagħad, tajtu kopja tal-​ktieb Tgħix Għal Dejjem. Iktar tard ġie fuqi u qalli: “Bdejt naqra dan il-​ktieb, imma mhux qed nifhem kollox. Tistaʼ tgħinni?” Irranġajt biex Xhud ieħor jistudja miegħu, u wara erbaʼ xhur jistudja, tgħammed. Iktar tard iżżewweġ, u martu taqdi bħala pijuniera.

It-​Tiġrija Tkompli

Anki qabel tgħammidt, kont daħħaltha f’rasi li nsir missjunarju. Ftit wara l-​magħmudija bdejt naqdi bħala pijunier. Jien fhimt li jekk wieħed ikun fit-​tiġrija għall-​ħajja, irid iħabrek kemm jiflaħ. Jien u marti, Heidi, applikajna biex immorru Gilegħad, l-​iskola tal-​missjunarji tax-​Xhieda taʼ Ġeħova li ssir fi New York, u fl-​1994 ġejna aċċettati. Wara li ggradwajna ġejna inkarigati naqdu fil-​Latvja fejn ġeneralment jitkellmu bir-​Russu.

Il-​waqgħa tal-​Unjoni Sovjetika ħalliet lin-​nies diżappuntati. Il-​fiduċja tan-​nies fil-​Bibbja tnaqqset u din saħansitra ġiet projbita, imma sibna li ħafna kienu interessati f’dak li tgħid. Waħda mill-​akbar sfidi li qatt iffaċċjajt kienet li nitgħallem ir-​Russu. Imma wara sitt snin taʼ servizz missjunarju fil-​Latvja, ġejt maħtur biex inżur u ninkuraġġixxi l-​kongregazzjonijiet tax-​Xhieda taʼ Ġeħova bħala indokratur li jivvjaġġa. Għadni nagħmel dan ix-​xogħol sal-​lum, akkumpanjat mill-​mara leali tiegħi.

Tul is-​snin, stajt inħarreġ lil diversi wħud biex jagħmlu progress fil-​ġirja għall-​ħajja, “il-​ħajja vera” fid-​dinja l-​ġdida t’Alla. (1 Timotju 6:19) Biex tkun kowċ tal-​atleti u tgħinhom jagħtu l-​aħjar tagħhom hemm bżonn li tifhimhom. Il-​kowċ irid jgħinhom jiżviluppaw it-​talenti tagħhom u jnaqqsu d-​dgħufijiet. Irid iqanqalhom jibqgħu jissaportu u jilħqu l-​aqwa potenzjal tagħhom.

Bqajt skantat meta rajt kemm il-​ħajja taʼ Kristjan tixbah lil dik t’atleta bħalma enfasizza l-​appostlu Pawlu fl-​ewwel ittra tiegħu lill-​Korintin. Atleta li jirnexxi jibqaʼ ffokat fuq it-​taħriġ fiżiku tiegħu u ma joqgħodx biss joħlom dwar li jirbaħ. Hu jagħmel miri realistiċi għalih innifsu u jaħdem pass pass biex jilħaqhom. Jekk ma jibqax iffokat fuq il-​mira tiegħu u jieqaf jaħdem għaliha, hu jġib fix-​xejn ix-​xogħol iebes kollu li jkun għamel. Kristjan veru jrid jibqaʼ ffokat b’mod simili.

Ukoll, atleta li jirnexxi jrid iżomm maʼ skeda taʼ taħriġ strett, u jżomm id-​dixxiplina fejn jidħol l-​ikel tiegħu. Nistgħu ngħidu l-​istess dwar il-​ħajja taʼ Kristjan veru. Hu ma jitmax lilu nnifsu tagħlim mill-​agħar, ma jiħux “mill-​mejda tad-​demonji,” kif poġġieha l-​appostlu Pawlu. Minflok, hu jiekol ikel spiritwali nutrittiv provdut minn Alla fil-​Kelma tiegħu, il-​Bibbja. (1 Korintin 10:21) Iktar minn hekk, meta jinqalgħu d-​diffikultajiet, atleta li jirnexxi jibqaʼ pożittiv. Hu jammetti l-​iżbalji tiegħu u jagħmel bidliet. Pawlu kiteb: “M’iniex niġri b’mod inċert.” “Imma,” hu qal, “insawwat lil ġismi,” ħalli ma jiġix skwalifikat.—1 Korintin 9:24-​27.

 Jien u marti għadna nieħdu gost inżommu ruħna f’saħħitna fiżikament billi neżerċitaw ruħna regolarment fil-​gym. Però, ma nħallux dan itellifna milli naqdu lil Ġeħova li ħalaq lill-​bnedmin b’mod tant tal-​għaġeb. (Salm 139:14) Flimkien, aħna ninsabu ffokati fuq li nilħqu l-​premju tal-​“ħajja vera”—“dik li ġejja” fid-​dinja l-​ġdida t’Alla.—1 Timotju 4:8.

Wara li ddeskriva s-​‘sħaba taʼ xhiedaʼ taʼ qabel il-​Kristjanità, l-​appostlu Pawlu ħeġġeġ: “Ħa nneħħu aħna wkoll kull piż u dak id-​dnub li faċilment ifixkilna, u ħa niġru bis-​sabar it-​tiġrija li tqiegħdet quddiemna.” (Ebrej 12:1) M’hemm xejn li jistaʼ jkun iktar taʼ ġid għalina milli niġru din it-​tiġrija. Dan hu minħabba li jekk jirnexxilhom jispiċċawha, il-​ġerrejja kollha se jkollhom barkiet dejjiema.—2 Timotju 4:7, 8.

[Nota taʼ taħt]

[Stampa f’paġna 12]

F’nofs is-​snin 80, jien u Heidi maʼ Yvonne (fuq) u Juoko u binthom (taħt)

[Stampa f’paġna 13]

Maʼ Heidi fil-​ministeru llum

[Stampa f’paġna 13]

Fil-​konvenzjoni tax-​Xhieda taʼ Ġeħova fl-​2009 f’Ħelsinki. Yvonne u Juoko fuq ix-​xellug tagħna u Jarmo u Barbro fuq il-​lemin

[Sors tal-Istampa f’paġna 10]

Pubblikat fʼAamulehti 8/21/1979