Kif Nistaʼ Nagħmel il-Qima lil Alla Pjaċevoli?
Iż-Żgħażagħ Jistaqsu
Matt, a li għandu 16-il sena, jinsab mixħut fuq is-sodda tiegħu. Ommu tinsab fil-bieb. “Matthew, qum minn hemm!” tgħidlu b’mod sod. “Taf li għandna l-laqgħa llejla!” Matt qed jitrabba bħala wieħed mix-Xhieda taʼ Ġeħova, u l-attendenza għal-laqgħat Kristjani hija parti regulari mill-qima tal-familja. Imma, dan l-aħħar, Matt m’għandux aptit imur.
“Uff, ma!” jeqred hu. “Bilfors irrid niġi?”
“Aqtagħha u qum ilbes,” twieġbu hi. “Ma rridx nerġaʼ nasal tard!” Hi ddur u tibda miexja ’l hemm.
“Ara ma,” jgħid Matt waqt li ommu għadha fil-qrib. “Jistaʼ jkun li din hi r-reliġjon tiegħek, imma dan ma jfissirx li għandha tkun ir-reliġjon tiegħi wkoll.” Hu jaf li ommu semgħetu, għaliex il-passi tagħha jieqfu. Imbagħad mingħajr ma twieġbu tibqaʼ sejra ’l hemm.
Matt iħoss ftit sens taʼ ħtija. Fil-fatt, mhijiex l-intenzjoni tiegħu li jweġġaʼ lil ommu. Imma lanqas ma jrid jiskuża ruħu. L-unika ħaġa li jistaʼ jagħmel hi . . .
Matt jieħu nifs ’il ġewwa, iqum mis-sodda u jibda jilbes. Imbagħad jgħid, iktar lilu nnifsu milli lil ommu: “Xi darba jien se jkolli nagħmel deċiżjoni. Jien m’iniex bħall-oħrajn fis-Sala tas-Saltna. Forsi lanqas biss irrid inkun Kristjan!”
ĠIELI ħassejtek bħalma jħossu Matt f’din is-sitwazzjoni? Ġieli tħoss li għalkemm tara li oħrajn jieħdu gost bl-attivitajiet Kristjani, int sempliċement tagħmilhom għax taʼ bilfors? Pereżempju:
◼ L-istudju tal-Bibbja tqisu bħala xi ħowmwerk ieħor li trid tagħmel?
◼ Tħoss li ma jkollokx aptit tmur fil-ministeru minn bieb għal bieb?
◼ Spiss tħossok tixbaʼ waqt il-laqgħat Kristjani?
Jekk it-tweġiba tiegħek għal mistoqsijiet bħal dawn hija iva, taqtax qalbek. Bi ftit aġġustamenti tistaʼ titgħallem tieħu gost taqdi lil Alla. Ejja naraw kif.
L-Ewwel Sfida: Tistudja l-Bibbja
Għala mhux faċli. Forsi tħoss li m’intix it-tip li tħobb tistudja. Donnok ma ddumx tiffoka l-attenzjoni tiegħek—issibha iebsa wisq li toqgħod bilqiegħda u tikkonċentra! Mhux talli hekk, imma mhux diġà għandek ħafna x’tistudja għall-iskola?
Għala għandek tagħmel dan. Il-Bibbja mhux biss hija ispirata minn Alla imma wkoll “tiswa biex tgħallem, twiddeb, tikkoreġi, tiddixxiplina fis-sewwa.” (2 Timotju 3:16) Meta tistudja l-Bibbja u timmedita fuq dak li taqra tistaʼ tiġi megħjun tifhem l-affarijiet kif qatt ma fhimthom qabel. Ejja ngħiduha kif inhi, jekk ma tagħmilx daqsxejn sforz ma se tikseb xejn tassew tajjeb. Jekk trid tkun tajjeb f’xi sport, trid titgħallem ir-regoli u tipprattika l-logħba. Jekk trid tkun f’saħħtek, trid tagħmel l-eżerċizzju. Jekk trid titgħallem dwar il-Ħallieq tiegħek, trid tistudja l-Kelma t’Alla.
Dak li jgħidu xi wħud tamparek. “Meta dħalt fil-kulleġġ kelli nieħu deċiżjonijiet importanti. It-tfal tgħidx kemm kienu jagħmlu affarijiet ħżiena u kelli nagħżel: ‘Jien irrid nagħmel bħalhom? Il-ġenituri tiegħi tassew qed jgħallmuni l-verità?ʼ Kelli niskopri t-tweġibiet għalija nnifsi.”—Tshedza.
“Minn dejjem kont nemmen li dak li tgħallimt kien il-verità, imma ridt nuri dan lili nnifsi. Kien il-mument li nagħmilha r-reliġjon tiegħi stess—u mhux sempliċement ir-reliġjon tal-familja.”—Nelisa.
Dak li tistaʼ tagħmel. Oħloq pjan tal-istudju persunali skont l-interessi u l-bżonnijiet tiegħek stess. Int se tagħżel liema suġġetti se tistudja. Minn fejn tistaʼ tibda? Għala ma tistudjax bir-reqqa l-Bibbja tiegħek u teżamina t-twemmin tiegħek, forsi billi tuża ktieb bħal Il-Bibbja X’Tgħallem Verament? b
X’azzjoni se tieħu. Biex tibda, immarka tnejn jew tlieta mis-suġġetti Bibliċi mniżżlin hawn taħt li tixtieq titgħallem iktar dwarhom—jew, jekk trid, ikteb xi ftit li tagħżel int stess.
□ Jeżisti Alla?
□ Kif nistaʼ nkun ċert li l-kittieba tal-Bibbja ġew ispirati minn Alla?
□ Għala għandi nemmen fil-ħolqien minflok fl-evoluzzjoni?
□ X’inhi s-Saltna t’Alla, u kif nistaʼ nuri li teżisti tassew?
□ Kif nistaʼ nispjega t-twemmin tiegħi dwar dak li jiġri fil-mewt?
□ Għala għandi nkun konvint li se jkun hemm irxoxt?
□ Kif nistaʼ nkun ċert dwar liema hi r-reliġjon vera?
□ ․․․․․
It-Tieni Sfida: Tieħu Sehem fil-Ministeru
Għala mhux faċli. Tistaʼ tħossok imbeżżaʼ biex tkellem lil oħrajn dwar il-Bibbja—jew li tiltaqaʼ maʼ xi sieħeb tal-iskola meta tkun qed tagħmel dan.
Għala għandek tagħmel dan. Ġesù ta l-istruzzjoni lis-segwaċi tiegħu: “Agħmlu dixxipli . . . , u għallmuhom josservaw dak kollu li ordnajtilkom.” (Mattew 28:19, 20) Imma hemm iktar raġunijiet għala għandek tagħmel dan. L-istudji jissuġġerixxu li f’xi postijiet il-maġġuranza tal-adoloxxenti jemmnu f’Alla u fil-Bibbja. Però, dawn l-istess żgħażagħ m’għandhom ebda tama ġenwina għall-futur. Permezz tal-istudju tiegħek tal-Bibbja int għandek dik l-istess informazzjoni li ħafna minn sħabek qed ifittxu għaliha u għandhom bżonn!
Dak li jgħidu xi wħud tamparek. “Jien u seħibti ppreparajna introduzzjonijiet effettivi, u tgħallimna kif negħlbu l-oġġezzjonijiet u kif nagħmlu żjajjar lura. Malli bdejt nagħmel iktar sforz fil-ministeru, bdejt nieħu iktar pjaċir.”—Nelisa.
“Waħda oħt Kristjana veru għenitni! Hi sitt snin akbar minni u toħroġni magħha fil-ministeru u kultant toħroġni biex nieħdu l-kolazzjon flimkien. Hi wrietni skritturi inkuraġġanti li għenuni nirranġa l-mod kif naħsibha. Issa nsib li nieħu iktar interess persunali biex ngħin lil oħrajn minħabba l-eżempju meraviljuż tagħha. Qatt ma se nkun nistaʼ npattilha kollox lura!”—Shontay.
Atti 16:1-3) Il-Bibbja tgħid: “Il-ħadid jinsenn bil-ħadid. Hekk bniedem isinn wiċċ bniedem ieħor.” (Proverbji 27:17) Tistaʼ tibbenefika ħafna jekk tissieħeb maʼ dawk li huma akbar minnek u li għandhom ħafna esperjenza. Alexis, li għandha 19-il sena, tgħid: “Inħoss li hu iktar faċli li tkun maʼ min hu akbar minnek.”
Dak li tistaʼ tagħmel. Bil-permess tal-ġenituri, sib lil xi ħadd fil-kongregazzjoni tiegħek li hu akbar minnek u li miegħu tistaʼ tieħu sehem fil-ministeru. (X’azzjoni se tieħu. Hawn taħt ikteb l-isem taʼ xi ħadd fil-kongregazzjoni minbarra l-ġenituri tiegħek li jistaʼ jgħinek fil-ministeru.
․․․․
It-Tielet Sfida: Tattendi l-Laqgħat Kristjani
Għala mhux faċli. Wara li tkun ilek ġurnata bilqiegħda fil-klassi, siegħa jew sagħtejn tismaʼ taħditiet ibbażati fuq il-Bibbja jistgħu jidhru qishom eternità.
Għala għandek tagħmel dan. Il-Bibbja tħeġġeġ lill-Kristjani: “Ħa nagħtu kas xulxin biex nitqanqlu għall-imħabba u l-għemejjel tajbin, u ma nabbandunawx il-laqgħat tagħna flimkien, bħalma ħaduha drawwa jagħmlu xi wħud, imma ninkuraġġixxu lil xulxin, u dan iktar u iktar hekk kif taraw joqrob il-jum.”—Ebrej 10:24, 25.
Dak li jgħidu xi wħud tamparek. “Huwa importanti ħafna li tipprepara għal-laqgħat tal-kongregazzjoni. Kultant ikollok bżonn sempliċement tikkonvinċi lilek innifsek li għandek bżonn tistudja. Meta fil-fatt tipprepara, tieħu pjaċir fil-laqgħat għaliex tkun taf x’inhu jiġi diskuss, u tistaʼ saħansitra tieħu sehem.”—Elda.
“Bdejt nirrealizza li meta nikkummenta fil-laqgħat, dawn bdew isiru ħafna iktar interessanti għalija.”—Jessica.
Dak li tistaʼ tagħmel. Warrab il-ħin biex tipprepara minn qabel, u jekk tistaʼ agħti kumment. Dan se jgħinek tħossok iktar involut f’dak li jkun qed jiġri.
Biex nagħtu eżempju: X’inhu l-iktar pjaċevoli—li tara xi sport fuq it-televixin jew li tieħu sehem fih int stess? M’għandniex xi ngħidu, iktar tħossok sodisfatt jekk tieħu sehem milli jekk tkun qed tosserva. Għala ma tħarisx lejn il-laqgħat b’dan il-mod?
X’azzjoni se tieħu. Fl-ispazju hawn taħt ikteb il-ħin meta tistaʼ tqattaʼ 30 minuta biss fil-ġimgħa biex tipprepara għal laqgħa tal-kongregazzjoni.
․․․․․
Ħafna żgħażagħ qed jesperjenzaw kemm hu minnu l-kliem taʼ Salm 34:8, li jgħid: “Duqu u araw li Ġeħova hu tajjeb.” Tieħu pjaċir li sempliċement tismaʼ dwar ikla tajba? Ma jkunx aħjar li saħansitra dduqha int stess? L-istess nistgħu ngħidu dwar il-qima lil Alla. Duq u ara għalik innifsek kemm hu premjanti li tieħu sehem f’attivitajiet spiritwali. Il-Bibbja tgħid li min jismaʼ imma wkoll jagħmel ix-xogħol se ‘jkun hieni li qed jagħmlu.’—Ġakbu 1:25.
Iktar artikli mis-serje “Iż-Żgħażagħ Jistaqsu” jistgħu jinstabu fil-Websajt www.watchtower.org/ype
[Noti taʼ taħt]
a L-isem ġie mibdul.
b Pubblikat mix-Xhieda taʼ Ġeħova.
AĦSEB DWAR DAN
◼ Għala adoloxxenti jistaʼ jiddejjaq jagħmel attivitajiet spiritwali?
◼ Liema mit-tliet aspetti tal-qima diskussi f’dan l-artiklu tixtieq taħdem fuqhom, u kif se tagħmel dan?
[Stampa f’paġna 20, 21]
Jekk trid tkun f’saħħtek fiżikament, trid tagħmel l-eżerċizzju. Jekk trid tkun f’saħħtek spiritwalment, trid tistudja l-Kelma t’Alla