Il-Verità tal-Bibbja Ħelsithom
ĠESÙ KRISTU qal lil grupp taʼ semmiegħa: “Tkunu tafu l-verità, u l-verità teħliskom.” (Ġwanni 8:32) Bħalma se juru l-eżempji li ġejjin, dan il-ħelsien jinkludi ħelsien mid-demonji, il-giddibin u l-qarriqin li hemm wara l-okkult.—Ġwanni 8:44.
Kull waħda minn dawn l-esperjenzi tenfasizza l-qawwa li teħles tal-verità Biblika. Iva, hi biss verament teħles lin-nies. Għala ma teżaminax il-Bibbja personalment. M’intix se tiddiżappunta ruħek.
[Kaxxa/Stampa f’paġna 8]
L-istampi huma reċtati
● Susanna kienet saċerdotessa f’tempju fil-Brażil. Riedet tuża l-qawwiet sopranaturali tagħha biex tgħin lil dawk fil-bżonn. Barra minn hekk, hi kienet tieħu pjaċir “titkellem m’ommha li kienet mejta.” Madankollu, maż-żmien, “ommha” bdiet titlobha bil-ħrara biex toqtol lilha nfisha ħalli tgħix magħha fid-dinja tal-ispirti. Dan itturmenta lil Susanna u kienet toħlom ikrah. Imbagħad Susanna u żewġha bdew jistudjaw il-Bibbja max-Xhieda taʼ Ġeħova. Huma kellhom ġlieda diffiċli biex ‘jopponu lix-Xitan,’ imma eventwalment hu ‘ħarab minnhom.’ (Ġakbu 4:7) Issa għandhom il-paċi, u Susanna m’għadhiex toħlom ikrah. “Għandi ħafna affarijiet għal xiex nirringrazzja lil Ġeħova,” kitbet hi, “imma l-iktar ħaġa li jien grata għaliha hi li ħariġna mid-dlam spiritwali.”
[Kaxxa/Stampa fʼpaġna 8]
● Timothy, li jgħix fl-Afrika tal-Punent, hu trux u mutu. a Minħabba li tobba normali ma setgħux jgħinuh, hu mar għand uħud li jfejqu bil-fidi (faith healers), imma għalxejn. “Qalbi kienet maqsuma minħabba l-qerq,” kiteb hu. Imbagħad Timothy studja l-Bibbja max-Xhieda taʼ Ġeħova, li spjegawlu l-iskop t’Alla li jneħħi l-mard u d-diżabilitajiet kollha. Timothy qal, “Bil-ħerqa qed nistenna dak il-jum fid-dinja l-ġdida t’Alla meta ‘jinfetħu widnejn it-torox . . . u lsien il-mutu se jgħajjat bil-ferħ.’” (Isaija 35:1-6) Sadanittant, hu jieħu pjaċir juża DVD plejer li jistaʼ jġorru miegħu biex jaqsam il-veritajiet tal-Bibbja maʼ nies oħrajn li huma neqsin mis-smigħ, u jgħinhom isibu ħelsien veru.
[Nota taʼ taħt]
a Xi ismijiet ġew mibdulin
[Kaxxa/Stampa f’paġna 9]
● Evelyn kienet involuta ħafna fl-okkult fl-Estonja. Ladarba Ġesù kien ifejjaq lin-nies, hi riedet tagħmel l-istess. B’mod speċjali riedet tgħin lil ommha li kienet marida kronikament. B’hekk, fi sforz biex tagħraf u tikkura mard serju, hi tgħallmet tuża l-pendli. Maż-żmien, eżaminat il-Bibbja. X’kien ir-riżultat? “Irrealizzajt kemm kont ġejt imqarrqa,” qalet hi. “Għalhekk, ħraqt il-letteratura u l-pendli spiritistiċi tiegħi.” Issa tgħallem lil oħrajn il-veritajiet tal-Bibbja li huma taʼ ħelsien.
[Kaxxa/Stampa f’paġna 9]
● Mary trabbiet fuq waħda mill-gżejjer tal-Papwa Ginea Ġdida, fejn in-nies jibżgħu mill-mejtin. Meta kien imut xi ħadd fir-raħal tagħha, Mary kienet torqod taħt is-sodda taʼ xi ħadd ieħor, għax kienet tibżaʼ li l-ispirtu tal-mejjet kien se jkiddha jekk tkun waħedha. Imbagħad tgħallmet mill-Bibbja li l-mejtin huma reqdin—qegħdin fil-qabar, jistennew irxoxt għall-ħajja f’Ġenna fuq l-art. (Luqa 23:43; Ġwanni 11:11-14) Minħabba f’hekk, m’għadhiex tibżaʼ mill-mejtin.
[Kaxxa/Stampa f’paġna 9]
● Alicia, li trabbiet f’dar Kristjana fl-Istati Uniti, interessat ruħha f’kotba u films tal-okkult. Imbagħad bdiet taħseb bis-serjetà dwar il-veritajiet tal-Bibbja li kienet tgħallmet. Billi rrealizzat li, fir-realtà, kienet qed tipprova ‘tieħu sehem mill-mejda taʼ Ġeħova u mill-mejda tad-demonji,’ hi għamlet ċerti bidliet u issa għandha kuxjenza nadifa quddiem Alla.—1 Korintin 10:21.