It-3 Suġġeriment—Żomm Ruħek Attiv
“Li kieku l-eżerċizzju kien pillola, kieku kien ikun l-iktar mediċina preskritta fid-dinja.” (L-Iskola tal-Mediċina fl-Università taʼ Emory) Minn dak kollu li nistgħu nagħmlu għal saħħitna, ftit hemm affarijiet li ġeneralment huma iktar t’għajnuna mill-eżerċizzju fiżiku.
◯ Agħmel l-eżerċizzju. Ħajja attiva fiżikament tistaʼ tgħinna nkunu iktar ferħanin, ikollna moħħna iktar frisk, ikollna iktar enerġija, inkunu iktar produttivi u, flimkien maʼ dieta tajba, nikkontrollaw il-piż tagħna. M’hemmx għalfejn li l-eżerċizzju jkun taʼ wġigħ jew estrem sabiex ikun effettiv. Sessjonijiet regulari taʼ eżerċizzju moderat, li jsir bosta drabi fil-ġimgħa, jistaʼ jkun ferm taʼ benefiċċju.
Jekk tiġġoggja, timxi b’pass mgħaġġel, issuq ir-rota, u tieħu sehem fi sports attiv—sakemm qalbek tibda tħabbat b’ritmu iktar mgħaġġel u tibda togħroq—tistaʼ ttejjeb ir-reżistenza tiegħek u tgħin biex tipprevieni xi attakk tal-qalb jew puplesija. Dawn l-eżerċizzji erobiċi, flimkien maʼ taħriġ moderat tal-weight lifting u eżerċizzji sempliċi, jgħinuk biex issaħħaħ għadmek, il-muskoli interni, riġlejk, u dirgħajk. Dawn l-attivitajiet jgħinuk ukoll biex ikollok metaboliżmu iktar mgħaġġel u dan awtomatikament jgħinek biex tikkontrolla l-piż tiegħek.
◯ Imxi. L-eżerċizzju hu taʼ benefiċċju għal nies taʼ kull età, u m’hemmx għalfejn tkun miktub f’xi gym biex tagħmlu. Jekk sempliċement timxi minflok tuża l-karozza, il-karozza tal-linja, jew il-lift, ikun bidu tajjeb. Għala tistenna li jrikkbek xi ħadd meta tistaʼ timxi sad-destinazzjoni tiegħek, u forsi anki tasal qabel? Ġenituri, inkuraġġixxu lil uliedkom biex jieħdu sehem f’logħob attiv, u jekk jistaʼ jkun dan jagħmluh barra. Attività bħal din issaħħilhom ġisimhom u tgħinhom jiżviluppaw koordinazzjoni maʼ ġisimhom kollu b’modi li d-divertiment taʼ bilqiegħda, bħal-logħob tal-kompjuter, ma jistax.
Ikollok kemm ikollok żmien meta tibda, int tistaʼ tibbenefika minn eżerċizzju fiżiku moderat. Jekk int ikbar fl-età jew jekk għandek problemi taʼ saħħa u ma tagħmilx eżerċizzju, ikun għaqli li tikkonsulta tabib dwar kif għandek tibda. Iżda ibda! Eżerċizzju li jinbeda bil-mod il-mod u li ma jkunx eċċessiv jistaʼ jgħin saħansitra lil uħud fostna li huma mdaħħlin fiż-żmien biex iżommu l-muskoli u l-massa tal-għadam f’saħħa tajba. Jistaʼ wkoll jgħinhom jevitaw il-waqgħat.
Kien proprju l-eżerċizzju li għen lil Rustam, li ssemma fl-ewwel artiklu taʼ din is-serje. Sebaʼ snin ilu, hu u martu bdew imorru jiġġoggjaw ftit kull filgħodu, ħamest ijiem fil-ġimgħa. Hu jgħid: “Għall-ewwel konna nġibu l-iskużi biex ma mmorrux, iżda l-fatt li kellna lil xulxin kien taʼ motivazzjoni għat-tnejn li aħna. Issa saret drawwa pjaċevoli.”
[Stampa f’paġna 6]
L-eżerċizzju jistaʼ jkun pjaċevoli