Kif Nistaʼ Nieħu Pjaċir Nistudja l-Bibbja?
Iż-Żgħażagħ Jistaqsu
Fuq kollox, għala għandi nistudja l-Bibbja? Aħseb dwar l-istudju b’dan il-mod:
Il-Bibbja tistaʼ tgħinek issib teżor. L-iktar ktieb li qatt inbiegħ fid-dinja jistaʼ
● Jurik kif tipprepara għall-aqwa ħajja li qatt jistaʼ jkollok
● Jgħidlek affarijiet dwar il-futur—u l-passat—li ma tistax tkun tafhom b’mod ieħor
● Jgħinek titgħallem dwarek innifsek u ssir persuna aħjar a
HEMM bżonn sforz biex tistudja l-Bibbja, imma l-benefiċċji huma kbar ħafna! Tixtieq tkun taf kif xi żgħażagħ qed jagħmlu dan? Aqtaʼ u itwi l-paġna li ġejja. Se jkollok referenza t’għajnuna b’erbaʼ paġni li se turik kif dawk tamparek qed jegħlbu l-ostakli u jiksbu l-akbar benefiċċju mill-istudju persunali tagħhom tal-Bibbja.
“Fil-Bibbja hemm xi ħaġa għal kulħadd. Hemm ħafna suġġetti differenti li wieħed jistaʼ jistudja u dak li jkun qatt mhu se jsir jaf kollox dwar il-Bibbja.”—Valerie. b
Iktar artikli mis-serje “Iż-Żgħażagħ Jistaqsu” jistgħu jinstabu fuq il-Websajt www.watchtower.org/ype
[Noti ta’ taħt]
a Biex issir taf iktar dwar kif il-Bibbja tistaʼ tagħmel dawn l-affarijiet kollha għalik, ikkuntattja lix-Xhieda taʼ Ġeħova lokalment jew ikteb fl-indirizz xieraq f’paġna 5.
b Xi ismijiet f’dan l-artiklu ġew mibdulin.
[Kaxxa/Stampi fʼpaġni 19, 20]
KIF TISTUDJA L-BIBBJA
Il-problema: BLA ĦEĠĠA
“Mhux dejjem ikolli aptit noqgħod siegħa bilqiegħda biex nistudja.”—Lena.
Dak li għandek bżonn: INKURAĠĠIMENT
Biex tieħu pjaċir tistudja l-Bibbja għandek bżonn twieġeb il-mistoqsija, Jien x’se niggwadanja? Tixtieq li jkollok ħbiberija m’Alla? tkabbar il-fehma tiegħek dwar x’qed jiġri fid-dinja? ittejjeb il-personalità tiegħek? Il-Bibbja tistaʼ tgħinek tagħmel dawn l-affarijiet—u iktar!
“Tqisx l-istudju tal-Bibbja bħala xogħol jew li qisek qed tistudja għall-iskola. Minflok, qisu bħala mezz kif issir eqreb lejn l-aqwa Ħabib li qatt jistaʼ kollok—Alla Ġeħova.”—Bethany.
“Sessjoni taʼ studju hi l-ħin persunali tiegħek m’Alla Ġeħova. Jekk tqattaʼ ħin maʼ xi ħadd biss meta jkun hemm il-ġenituri tiegħek, huwa dan l-individwu verament il-ħabib tiegħek jew sempliċement il-ħabib tal-ġenituri tiegħek? Jekk tistudja waħdek, Ġeħova jistaʼ jsir il-ħabib tiegħek.”—Bianca.
Ftakar: “Kull ħaġa fl-Iskrittura hi l-Kelma t’Alla. Kollha tiswa biex tgħallem u tgħin lin-nies, biex tikkoreġihom, u biex turihom kif għandhom jgħixu.” (2 Timotju 3:16, Contemporary English Version) Il-Bibbja tistaʼ tgħinek b’dawn il-modi wkoll!
“Jien nipprova niffoka fuq il-barkiet. Jekk ikolli bżonn nitjieb f’xi ħaġa, l-istudju hu l-opportunità tiegħi biex nagħmel dawn l-affarijiet u ntejjeb lili nnifsi.”—Max.
Aħseb dwar dan:
Lilek x’se jinkuraġġik tistudja l-Bibbja?
Il-problema: TIDDEJJAQ
“Wara 10 minuti nistudja, nibda negħja; f’20 minuta jkolli aptit nagħmel xi ħaġa oħra; sa 30 minuta nkun xbajt għalkollox!” —Allison.
Dak li għandek bżonn: KREATTIVITÀ
Uża l-immaġinazzjoni tiegħek, kemm jekk tinvolvi dak li tistudja, kif tistudja, jew fejn tistudja.
“Ħu l-ħin biex tagħmel riċerka għall-mistoqsijiet li jkollok. Meta tistudja dwar xi ħaġa li jkollok f’moħħok, tispiċċa l-istudju sodisfatt—saħansitra ferħan.” —Richard.
“Hekk kif taqra dwar xi ħaġa, poġġi lilek innifsek fil-ġrajja. Immaġina li int il-karattru prinċipali jew spettatur li qed jara dak li qed jiġri. Ipprova ara l-ġrajja daqslikieku veru qed tiġri quddiemek.”—Steven.
“Agħmel l-istudju pjaċevoli. Oqgħod bilqiegħda fil-bitħa u ħu miegħek tazza luminata. Jien inħobb innaqqar xi ħaġa waqt li nkun qed nistudja. Min ma jħobbx?”—Alexandra.
Ftakar: Kultant tistaʼ tiddejjaq minħabba l-mod kif tħares lejn l-affarijiet, u mhux għax il-ħaġa tkun verament taʼ dwejjaq. Għalhekk, minflok ma tgħid “l-istudju hu taʼ dwejjaq,” għid “jien iddejjaqt.” Ħu r-responsabbiltà għal kif tqis l-istudju tiegħek. B’hekk, int se jkollok kontroll u se tissaħħaħ biex tagħmel xi ħaġa dwaru.—Proverbji 2:10, 11.
“L-istudju persunali m’għandux għalfejn ikun taʼ dwejjaq. Jistaʼ jkun dak kollu li int tridu jkun.”—Vanessa.
Aħseb dwar dan:
Int kif tistaʼ tkun kreattiv fl-istudju tiegħek?
Il-problema: M’GĦANDEKX ĦIN
“Jien nixtieq li nistudja l-Bibbja iktar, imma bi skeda mimlija daqs bajda, l-akbar sfida tiegħi hi li nsib il-ħin biex inpoġġi bilqiegħda u nagħmel l-istudju!”—Maria.
Dak li għandek bżonn: PRIJORITAJIET
Biex issir adult trid titgħallem kif ‘taċċerta ruħek minn dak li hu iktar importanti.’—Filippin 1:10.
“Ommi għenitni nirrealizza li qatt ma kien se jkolli ħin żejjed. Jien kelli nagħmel il-ħin. Meta ħdimt fuq ix-xewqa tiegħi biex nistudja, warrabt il-ħin għalih.”—Natanya.
“Hekk kif kbirt, tgħallimt li għandi nagħmel skeda biex nistudja, u mbagħad nagħmel l-istudju f’dak il-ħin, minkejja dak li jkun qed jiġri.”—Yolanda.
“Jekk tpoġġi l-istudju qabel ir-rikreazzjoni, nassigurak li se tieħu iktar pjaċir tistudja, u mbagħad meta jkollok ir-rikreazzjoni ma tħossokx ħati.”—Diana.
Ftakar: Jekk ma tagħmilx prijoritajiet, se titlef il-kontroll fuq il-ħin tiegħek u ssir l-iskjav tiegħu. Ikun ħafna aħjar jekk tieħu l-inizjattiva u tagħmel il-ħin għall-istudju.—Efesin 5:15, 16.
“Bħala student fi skola sekondarja, faċilment nistaʼ nibda nitħasseb dwar affarijiet oħrajn! Madankollu, għalija hu prijorità li nagħmel sforz kuxjenzjuż biex ninkludi l-istudju tal-Bibbja persunali fl-iskeda tiegħi.”—Jordan.
Aħseb dwar dan:
Int liema skeda għall-istudju tistaʼ tagħmel?
[Kaxxa/Stampi f’paġna 19]
SUĠĠERIMENTI MINN DAWK TAMPAREK
Zachary—Tistudjax sempliċement dak li qed jistudjaw il-ġenituri tiegħek u oħrajn. Ikun verament studju persunali meta jkun dwar xi ħaġa li int trid titgħallem dwarha.
Kaley—Ibda bi ftit. Jekk ikun hemm bżonn, agħmel biss ħames minuti, imma agħmlu kuljum. Imbagħad bil-mod il-mod tistaʼ żżid il-ħin tiegħek għal 10 minuti, 15-il minuta, . . . eventwalment tibda tieħu pjaċir!
Daniela—Dettalji żgħar jistgħu wkoll jagħmlu differenza kbira. Lesti bajrows b’kuluri differenti u pitazz sabiħ, jew oħloq fajl bl-isem Studju Persunali fuq il-kompjuter tiegħek.
Jordan—Jekk nagħżel suġġett li jogħġobni, inkun nistaʼ ndum nistudja iktar. Ukoll ikolli bżonn post għall-kwiet. Ma nkunx nistaʼ nistudja jekk ikun hemm ħafna storbju.
[Dijagramma f’paġna 18]
(Għall-formazzjoni sħiħa tat-test, ara pubblikazzjoni)
Aqtaʼ
Itwi