Kif Tistaʼ Tagħmel Paċi m’Oħrajn?
Il-Ħarsa tal-Bibbja
DWAR il-bnedmin, il-Bibbja tgħid: “Kollha dinbu u jonqsu milli jilħqu l-glorja t’Alla.” (Rumani 3:23) Minħabba li l-iktar minn sebaʼ biljun ruħ fid-dinja huma imperfetti, ma jistax ma jkunx hemm differenzi fil-personalitajiet. Kif nistgħu nagħmlu paċi f’ċirkustanzi bħal dawn?
Il-Bibbja toffri pariri tajbin. Tiddeskrivi lill-Ħallieq bħala “l-Alla tal-paċi,” li ismu hu Ġeħova. (Ebrej 13:20; Salm 83:18) Alla jrid li wliedu fuq l-art igawdu l-paċi bejniethom. U f’dan ir-rigward, hu jieħu t-tmexxija. Meta l-ewwel koppja umana dinbu kontra Alla, u b’hekk kisru l-paċi taʼ bejniethom, hu mill-ewwel ħa passi biex jerġaʼ jħabbeb lill-ħlejjaq umani miegħu. (2 Korintin 5:19) Ikkunsidra tliet passi li tistaʼ tieħu biex tagħmel paċi m’oħrajn.
Aħfer mill-Qalb
Il-Bibbja x’tgħid? “Komplu ssaportu lil xulxin u aħfru lil xulxin mill-qalb jekk xi ħadd għandu għalxiex jilmenta kontra ħaddieħor. Bħalma Ġeħova ħafrilkom mill-qalb, agħmlu hekk intom ukoll.”—Kolossin 3:13.
X’inhi l-isfida? Forsi jkollok ‘għalxiex tilmenta’ u tħoss li għandek raġun tiksirha minn maʼ dak li offendiek. Għandek mnejn tirraġuna wkoll li dak li offendiek għandu jiskuża ruħu hu l-ewwel. Imma jekk l-individwu ma jkunx konxju tal-offiża tiegħu, jew jemmen li int il-wieħed li żbaljajt, x’aktarx li n-nuqqas taʼ qbil mhux se jitranġa.
X’tistaʼ tagħmel? Agħti kas il-parir tal-Bibbja billi taħfer lill-individwu mill-qalb, speċjalment jekk il-problema tkun żgħira. Ftakar, jekk Alla jżomm kont tal-iżbalji tagħna, qatt ma nkunu nistgħu nżommu weqfin quddiemu. (Salm 130:3) Il-Bibbja tgħid li “Ġeħova ħanin u grazzjuż, bil-mod biex jirrabja u għani fil-qalb tajba bl-imħabba. Għax hu jaf tajjeb kif aħna msawrin, u jiftakar li aħna trab.”—Salm 103:8, 14.
Ikkunsidra wkoll il-proverbju tal-Bibbja: “Id-dehen taʼ bniedem itaffilu r-rabja tiegħu, u hija ħaġa sabiħa min-naħa tiegħu li jħalli nuqqas għaddej.” (Proverbji 19:11) Id-dehen jgħinna naraw lil hinn minn dak li jidher minn barra u jgħinna nifhmu għala n-nies jitkellmu jew jaġixxu b’ċertu mod. Allura staqsi lilek innifsek, ‘Il-persuna li weġġgħetni kienet għajjiena, marida, jew stressata?’ Il-fatt li tifhem il-motivi, is-sentimenti, u ċ-ċirkustanzi veri t’oħrajn, għandu mnejn jikkontrolla r-rabja tiegħek u jgħinek tħalli n-nuqqasijiet tagħhom jibqgħu għaddejjin.
Tkellimha
Il-Bibbja x’tgħid? “Jekk ħuk jagħmel dnub, mur sibu waħdu u urih l-iżball tiegħu. Jekk jismaʼ minnek, tkun ksibt lura lil ħuk.”—Mattew 18:15.
X’inhi l-isfida? Emozzjonijiet negattivi bħall-biżaʼ, ir-rabja, u l-mistħija jistgħu jżommuk milli tavviċina lill-individwu biex tirranġaw il-problema. Għandek mnejn ukoll titħajjar tfittex l-appoġġ t’oħrajn billi tgħidilhom dwar il-problema, u hemm ċans li n-nuqqas taʼ qbil jikber jew jiggrava.
X’tistaʼ tagħmel? Meta problema tkun serja u tħoss li ma tistax tħalliha għaddejja, avviċina lill-persuna u tkellmuha. Ipprova ttratta l-kwistjoni b’dan il-mod:
(1) Fil-pront: Titnikkirx. Jekk tagħmel hekk, il-problema tistaʼ tiggrava. Ipprova applika l-parir taʼ Ġesù meta qal: “Jekk waqt li tkun qed iġġib l-għotja tiegħek lejn l-artal tiftakar Mattew 5:23, 24.
li ħuk għandu xi ħaġa kontrik, itlaq l-għotja tiegħek hemmhekk quddiem l-artal, u mur l-ewwel agħmel paċi maʼ ħuk, u mbagħad, meta tkun ġejt lura, offri l-għotja tiegħek.”—(2) Fil-privat: Irreżisti t-tentazzjoni li sseksek m’oħrajn dwar il-problema. “Iddefendi l-kawża tiegħek m’għajrek, u tikxifx id-diskors kunfidenzjali taʼ ħaddieħor.”—Proverbji 25:9.
(3) Bil-paċi: Irreżisti t-tendenza li tanalizza min għandu raġun u min le. L-għan tiegħek hu li tagħmel paċi, mhux li tirbaħ l-argument. Ipprova uża l-kelma “jien” minflok “int.” Jistaʼ jkun ħafna iktar effettiv jekk tgħid lill-individwu “Nħossni mweġġaʼ għax . . . ” milli jekk tgħid: “Int weġġajtni!” Il-Bibbja tpoġġiha b’dan il-mod: “Ħa niġru wara l-affarijiet li jġibu l-paċi u l-affarijiet li bihom nibnu lil xulxin.”—Rumani 14:19.
Uri s-Sabar fit-Tul
Il-Bibbja x’tgħid? “Troddu lil ħadd ħsara bi ħsara. . . . Imma, ‘jekk l-għadu tiegħek hu bil-ġuħ, itimgħu; jekk hu bil-għatx, agħtih jixrob.’”—Rumani 12:17, 20.
X’inhi l-isfida? Jekk l-individwu għall-ewwel jirrifjuta li jagħmel paċi, għandek mnejn tkun trid taqtaʼ qalbek.
X’tistaʼ tagħmel? Kun paċenzjuż. In-nies għandhom karattri u livelli taʼ maturità differenti. Xi wħud idumu iktar biex jikkalmaw; oħrajn għadhom qed jitgħallmu kif juru kwalitajiet divini. Ibqaʼ urihom qalb tajba u mħabba. Il-Bibbja tgħid: “Tħallix il-ħażen jirbħek, imma dejjem irbaħ il-ħażen bit-tajjeb.”—Rumani 12:21.
Biex nagħmlu paċi m’oħrajn, irridu nistinkaw biex nuru l-umiltà, id-dehen, il-paċenzja, u l-imħabba. Imma hu taʼ min jagħmlu dan l-isforz għall-paċi!
QATT ĦSIBT DWAR DAN?
● X’jistaʼ jgħinek taħfer lil xi ħadd mill-qalb?—Kolossin 3:13.
● X’jistaʼ jgħinek tavviċina lill-persuna ħalli titkellmu dwar il-problema?—Mattew 5:23, 24.
● X’tistaʼ tagħmel jekk l-individwu għall-ewwel jirrifjuta l-isforzi tiegħek biex tagħmel paċi?—Rumani 12:17-21.
[Kumment f’paġna 11]
“Id-dehen taʼ bniedem itaffilu r-rabja tiegħu, u hija ħaġa sabiħa min-naħa tiegħu li jħalli nuqqas għaddej.”—PROVERBJI 19:11