KULL sena għaxriet t’eluf taʼ nies fl-​Istati Uniti biss jipprovaw itemmu ħajjithom. Il-​Bibbja tagħti raġuni prinċipali għala ħafna jinsabu fi stat daqstant taʼ niket. Tispjega li ngħixu fi “żminijiet kritiċi li diffiċli biex issib tarfhom.” In-​nies iħossu l-​pressjonijiet tal-​ħajja b’intensità kbira. (2 Timotju 3:1; Ekkleżjasti 7:7) Meta individwu jħossu maħkum mill-​ansjetajiet tal-​ħajja, għandu mnejn jaħseb li s-​suwiċidju hu mezz biex jaħrab l-​uġigħ. X’tistaʼ tagħmel jekk ikollok ħsibijiet bħal dawn?

M’Intix Waħdek!

Għalkemm is-​sitwazzjoni tiegħek forsi tidher bla tama, ftakar li m’intix waħdek u li b’dispjaċir illum kważi kulħadd qed ikampa  maʼ xi tip taʼ problema. Il-​Bibbja tgħid: “Il-​ħolqien kollu għadu jokrob u jħoss l-​uġigħ flimkien.” (Rumani 8:22) Filwaqt li għall-​ewwel forsi jidher li l-​problema tiegħek qatt ma se titranġa, spiss l-​affarijiet imorru għall-​aħjar hekk kif jgħaddi ż-​żmien. Sadanittant, x’jistaʼ jgħinek?

Iftaħ qalbek maʼ ħabib matur li tafdah. Il-​Bibbja tgħid: “Ħabib veru jħobb il-​ħin kollu; huwa ħu mwieled għal meta jkun hemm in-​niket.” (Proverbji 17:17) Ir-​raġel ġust Ġob, li nsibu r-​rakkont dwaru fil-​Bibbja, fetaħ qalbu m’oħrajn matul il-​perijodu diffiċli tiegħu. Meta ħass li kien qed ‘jistkerrah lil ħajtu,’ hu qal: “Irrid nisfoga t-​tħassib tiegħi dwari nnifsi. Nitkellem fl-​imrar taʼ ruħi!” (Ġob 10:1) Meta tiftaħ qalbek m’oħrajn, l-​emozzjonijiet tiegħek forsi jittaffew, u forsi tkun tistaʼ tħares lejn il-​problemi li tkun qed tiffaċċja b’lenti oħra. a

Iftaħ qalbek m’Alla fit-​talb. Xi wħud jaħsbu li t-​talb huwa biss xi ħaġa li tgħin psikoloġikament, imma l-​Bibbja tgħid mod ieħor. Salm 65:2 isejjaħ lil Alla Ġeħova “Semmiegħ it-​talb,” u l-​1 Pietru 5:7 jgħid: “Jimpurtah minnkom.” Il-​Bibbja darba wara l-​oħra tenfasizza l-​importanza taʼ li nistrieħu fuq Alla. Pereżempju:

“Afda f’Ġeħova b’qalbek kollha u tistrieħx fuq fehmtek stess. Agħti kasu fil-​mogħdijiet tiegħek kollha, u hu jiddrittalek triqatek.”—PROVERBJI 3:5, 6.

“[Ġeħova] se jwettaq ix-​xewqa taʼ dawk li jibżgħu minnu, u se jismaʼ l-​għajta tagħhom għall-​għajnuna u jsalvahom.”—SALM 145:19.

“Din hi l-​fiduċja li għandna fih, li, kulma nitolbuh skond ir-​rieda tiegħu, hu jismagħna.”—1 ĠWANNI 5:14.

“Ġeħova huwa ’l bogħod min-​nies mill-​agħar, imma t-​talba tal-​ġusti jismagħha.”—PROVERBJI 15:29.

 Jekk tiftaħ qalbek m’Alla dwar id-​diffikultajiet li tiffaċċja, hu se jagħtik l-​għajnuna. Mhux taʼ b’xejn li l-​Bibbja tinkuraġġik biex ‘tafda fih dejjem. Ferraʼ qalbek quddiemu.’—Salm 62:8.

Meta Jkun Meħtieġ Iktar

Xi studji jikxfu li l-​biċċa l-​kbira min-​nies li jieħdu ħajjithom b’idejhom ikunu batew bid-​dipressjoni. b Dan jenfasizza l-​fatt li jistaʼ jkun hemm bżonn t’attenzjoni medika. Tabib għandu mnejn jordna xi mediċina jew jirrikkmanda li jsiru xi aġġustamenti fid-​dieta. F’xi każi, programm t’eżerċizzju jistaʼ jkun effettiv u jgħin fil-​kura. Ħafna bbenefikaw minn kura medika professjonali. c

Il-​Bibbja fiha ħafna informazzjoni li tistaʼ tagħtik appoġġ u tama. Pereżempju, f’​Rivelazzjoni 21:4, il-​Bibbja tgħid rigward Alla Ġeħova: “Jixxottalhom kull demgħa minn għajnejhom, u ma jkunx hemm iżjed mewt, u la niket u la għajat u lanqas uġigħ. L-​affarijiet taʼ qabel ikunu spiċċaw.” Din hi wegħda divina, u nistgħu nsibu serħan jekk nimmeditaw fuqha.

Ix-​Xhieda taʼ Ġeħova qed jaqsmu din it-​tama bbażata fuq il-​Bibbja maʼ miljuni taʼ nies madwar id-​dinja. Minħabba f’hekk, ħafna qed isibu tama ġenwina f’dawn iż-​żminijiet taʼ niket. Għal iktar informazzjoni, ikkuntattja lix-​Xhieda taʼ Ġeħova fl-​inħawi tiegħek billi żżur is-​Sala tas-​Saltna lokali, jew ikteb fl-​indirizz adattat għalik f’paġna 5 taʼ din ir-​rivista. Tistaʼ wkoll iżżur il-​Websajt tagħna www.watchtower.org.

[Noti ta’ taħt]

[Kaxxa f’paġna 12]

GĦAJNUNA MILL-​BIBBJA

[Caption f’paġna 12]

● “Tkunu ansjużi fuq xejn, imma f’kollox b’talb u b’suppliki flimkien maʼ radd il-​ħajr ħallu lil Alla jkun jaf x’teħtieġu; u l-​paċi t’Alla li tisboq kull ħsieb tgħasses lil qalbkom u l-​qawwa mentali tagħkom permezz taʼ Kristu Ġesù.”—Filippin 4:6, 7.

● “Jien staqsejt lil Ġeħova, u hu wiġibni, u mill-​biżaʼ kollu tiegħi ħelisni.”—Salm 34:4.

● “Ġeħova hu qrib dawk li għandhom qalbhom maqsuma; u lil dawk bi spirtu miksur isalvahom.”—Salm 34:18.

● “Qed ifejjaq lil dawk taʼ qalbhom maqsuma, u qed jinfaxxalhom il-​ġrieħi li juġgħuhom.”—Salm 147:3.

[Kaxxa f’paġni 13, 14]

JEKK TIBDA TAĦSEB DWAR IS-​SUWIĊIDJU . . .

Iftaħ qalbek maʼ ħabib li tafdah

Iftaħ qalbek m’Alla fit-​talb

Fittex għajnuna medika

[Kaxxa/​Stampa f’paġna 14]

GĦALL-​ĦBIEB U L-​FAMILJA

Membri tal-​familja u ħbieb tal-​qalb spiss ikunu l-​ewwel uħud li jindunaw li individwu mnikket qed jaħseb dwar is-​suwiċidju. Jekk jieħdu azzjoni jistgħu jsalvaw il-​ħajja taʼ dak li jkun! Kun semmiegħ li jagħder. Agħraf ir-​realtà tad-​diffikultajiet li qed jesperjenza. Il-​Bibbja tgħid: “Ikkonslaw lid-​dipressi.” (1 Tessalonikin 5:14) Ħeġġeġ lill-​imnikket biex ifittex l-​għajnuna, u meta jkun hemm bżonn, ħu azzjoni biex tkun ċert li tingħata għajnuna bħal din.