Il-​Ħarsa tal-​Bibbja

ĦAFNA nies iħossu li l-​isforzi li jagħmlu ma jiġux notati minn oħrajn. Pereżempju, ħafna drabi xi ħaddiema jħossuhom mhux apprezzati mill-​imgħallmin tagħhom. Bosta wħud miżżewġin iħossu li s-​sieħeb jew is-​sieħba tagħhom ma tapprezzahomx biżżejjed. Jerġaʼ, xi tfal jaħsbu li qatt ma jistgħu jogħġbu biżżejjed lill-​ġenituri tagħhom. Ċertament li nistgħu ntaffu ħsibijiet bħal dawn jekk minn żmien għal żmien ilkoll inkunu lesti li nfaħħru lil xulxin.

Kliem sinċier taʼ tifħir mhuwiex komuni fid-​dinja tal-​lum u dan m’għandux jissorprendina għax il-​Bibbja bassret: “Fl-​aħħar jiem ikun hawn żminijiet kritiċi li diffiċli biex issib tarfhom. Għax in-​nies ikunu jħobbu lilhom infushom, . . . ingrati, żleali.”—2 Timotju 3:1, 2.

Ġieli ġejt imfaħħar b’mod sinċier? Mela taf kemm tifħir bħal dan jistaʼ jferraħ il-​qalb u jqawwi l-​ispirtu. Il-​Bibbja tgħid: “Kemm hi tajba kelma f’waqtha!” (Proverbji 15:23) L-​Iskrittura Mqaddsa tistaʼ tgħinna nittrattaw lil xulxin b’qalb tajba.

Fittex it-​Tajjeb f’Oħrajn

Peress li Alla jinteressah profondament minna, hu jinnota u japprezza l-​kwalitajiet u l-​għemejjel tajbin tagħna. Il-​Bibbja tassigurana: “Għajnejn Ġeħova jiġru ’l hemm u ’l hawn maʼ l-​art kollha biex juri s-​saħħa tiegħu għan-​nom taʼ dawk li qalbhom hi sħiħa lejh.” (2 Kronaki 16:9) Meta nuru l-​imħabba tagħna għal Alla, billi nobdu l-​liġijiet tiegħu, nistgħu nibqgħu ċerti li hu se jinnotaha.

Alla Ġeħova ma joqgħodx ifittex għan-​nuqqasijiet tagħna. Li kieku jagħmel hekk, ebda wieħed minna ma jistaʼ jżomm wieqaf. (Salm 130:3) Minflok, Ġeħova hu bħal dak il-​minjier li bil-​paċenzja kollha jeżamina bir-​reqqa gozz ġebel ħalli jfittex ħaġar prezzjuż. Meta l-​minjier isib ħaġra prezzjuża, hu jifraħ. Il-​ħaġra mhix irfinuta għandha mnejn ma tkunx tidher prezzjuża, imma l-​minjier jara l-​valur potenzjali taʼ dik il-​ħaġra. Bl-​istess mod, meta Alla jfittex fi qlubna, hu jfittex għal kwalitajiet prezzjużi u mhux għan-​nuqqasijiet. Meta jsibhom, hu jifraħ. Hu jaf li dawn il-​kwalitajiet, meta jiġu fformati u ppolixjati, jistgħu jipproduċu xi ħaġa verament taʼ valur—aduratur devot u leali taʼ Ġeħova.

Aħna nistgħu nitgħallmu mill-​eżempju t’Alla. Meta nħarsu lejn oħrajn, għandna mnejn ikollna t-​tendenza li niffokaw fuq in-​nuqqasijiet tagħhom. Madankollu, jekk aħna nħarsu lejn in-​nies bħalma jħares lejhom Ġeħova, se nfittxu l-​kwalitajiet tajbin li jkollhom. (Salm 103:8-​11, 17, 18) Meta nsibu dawn il-​kwalitajiet prezzjużi tagħhom, aħna nistgħu nfaħħruhom. X’se jkun ir-​riżultat? Kliemna żgur li se jkun rifreskanti daqs tazza ilma kiesħa fis-​sajf! Dan ukoll għandu mnejn jgħinhom biex jaħdmu iktar iebes ħalli jagħmlu dak li hu sewwa. Mill-​banda l-​oħra, aħna se nesperjenzaw il-​ferħ li jiġi milli nagħtu lil oħrajn.—Atti 20:35.

Irrikonoxxi l-​Għemejjel Tajbin

Ħafna drabi Ġesù nnota u rrikonoxxa l-​għemejjel tajbin t’oħrajn. Darba minnhom, meta mara mbeżżgħa u marida b’mod diskret messitlu ħwejġu sabiex tfiq, Ġesù faħħarha billi qalilha: “Binti, il-​fidi tiegħek fejqitek.”—Marku 5:34.

F’okkażjoni oħra, waqt li Ġesù kien qed jgħallem fit-​tempju taʼ Ġerusalemm, hu ra ħafna nies għonja jitfgħu l-​flus fil-​kaxxi tat-​teżor. Imbagħad ra waħda armla fil-​bżonn titfaʼ “żewġ muniti żgħar taʼ valur żgħir ferm.” In-​nies l-​oħrajn kienu tefgħu iktar flus minnha. Madankollu,  Ġesù faħħar pubblikament is-​sinċerità tal-​armla billi qal: “Ngħidilkom il-​verità, Din l-​armla, għalkemm fqira, tefgħet iktar minnhom ilkoll. Għax dawn kollha tefgħu għotjiet miż-​żejjed tagħhom, imma din il-​mara, min-​nieqes tagħha, tefgħet il-​mezz t’għajxien kollu li kellha.”—Luqa 21:1-​4.

Kif nistgħu nimitaw lil Ġesù? Il-​Bibbja tgħid: “Iżżommx lura milli tagħmel il-​ġid lil min hu dovut, meta f’idejk ikollok il-​qawwa li tagħmlu.”—Proverbji 3:27.

It-​Tifħir Għandu Qawwa

Fid-​dinja ingrata tal-​lum, ilkoll kemm aħna għandna l-​ħtieġa li nħossuna apprezzati u maħbubin. Meta b’mod sinċier infaħħru lil oħrajn, inkunu qed insaħħuhom u ninkuraġġuhom. It-​tifħir sinċier tagħna jqanqalhom biex jibqgħu jagħmlu l-​aħjar tagħhom.—Proverbji 31:28, 29.

Il-​Bibbja tħeġġeġ lil Kristjani kollha: “Ħa nagħtu kas xulxin biex nitqanqlu għall-​imħabba u l-​għemejjel tajbin.” (Ebrej 10:24) Li kieku kulħadd juri interess personali f’oħrajn, ifittex għal kwalitajiet tajbin f’oħrajn, u jirrikonoxxi l-​għemejjel tajbin tagħhom, kieku d-​dinja tkun post differenti minn kif inhi llum. Tassew li t-​tifħir għandu qawwa!

QATT ĦSIBT DWAR DAN?

● Għala għandna nfaħħru lil oħrajn għall-​għemejjel tajbin tagħhom?​—Proverbji 15:23.

● Meta Ġeħova jeżaminana, għal xiex ifittex?​—2 Kronaki 16:9.

● Meta għandna nfaħħru lil oħrajn?​​—Proverbji 3:27.

[Stampa f’paġna 15]

Tinnota int u tirrikonoxxi l-​għemejjel tajbin t’oħrajn?