Kif Rakkontata Minn Egidio Nahakbria

Jien trabbejt inħossni abbandunat u mhux maħbub. Madankollu, issa nħossni maħbub u għandi paċi ġewwinija ġenwina. Din il-​bidla kif seħħet? Ħa nispjega.

JIEN twilidt fl-​1976 ġo għarix bl-​art tal-​ħamrija fuq il-​muntanji taʼ Timor tal-​Lvant, li dak iż-​żmien kien jagħmel parti mill-​Indoneżja. Kont it-​tmien wieħed minn għaxart itfal u l-​ġenituri tagħna kienu fqar ħafna. Peress li l-​ġenituri tiegħi ma setgħux jitimgħuna lkoll, huma żammew lil ħija t-​tewmi u talbu lill-​kuġin tiegħi biex irabbini hu.

F’Diċembru tal-​1975, ftit qabel ma twilidt, l-​Indoneżja invadiet lil Timor tal-​Lvant, u dan ta bidu għal gwerra tal-​gwerilli li damet sejra iktar minn għoxrin sena. B’hekk, l-​ewwel memorji tiegħi huma taʼ vjolenza u sofferenza. Għadni nara ċar quddiem għajnejja s-​suldati jattakkaw lir-​raħal tagħna u minħabba f’hekk kulħadd kellu jaħrab biex jibqaʼ ħaj. Jien u l-​kuġin tiegħi tlaqna bil-​mixi lejn ġenb imwarrab taʼ muntanja fejn eluf taʼ nies minn Timor kienu fittxew il-​kenn.

Madankollu, is-​suldati skoprew fejn konna mistoħbijin, u malajr bombi tal-​għadu niżlu bħal xita fuqna. Għandi memorji orribbli tat-​terrur, il-​mewt, u l-​qerda li segwew. Meta fl-​aħħar morna lura fir-​raħal tagħna, għext imwerwer il-​ħin kollu. Ħafna mill-​ġirien tagħna għabu jew inqatlu, u bdejt nibżaʼ li kien imiss lili.

Meta kelli għaxar snin, il-​kuġin tiegħi marad u miet, u għalhekk il-​ġenituri tiegħi bagħtuni ngħix maʼ nannti. Din kienet armla, li l-​esperjenza tal-​ħajja ħallitilha togħma qarsa u kienet tqisni bħala piż. Kienet tittrattani bħala lsir. Darba minnhom, meta kont marid wisq biex naħdem, sawtitni u ħallietni għal mejjet. Fortunatament, wieħed miz-​zijiet tiegħi ħadni biex ngħix mal-​familja tiegħu.

Fl-​aħħar, meta kelli 12-​il sena, bdejt immur l-​iskola. Ftit wara, il-​mara taz-​ziju mardet u zijuwi qabditu dipressjoni qawwija. Billi ma ridtx inkun taʼ piż iktar għalihom, ħrabt u ngħaqadt maʼ grupp taʼ suldati Indoneżjani li kellhom il-​bażi fil-​ġungla. Sirt l-​ajjutant tagħhom—naħslilhom il-​ħwejjeġ, insajrilhom l-​ikel, u nnaddfilhom il-​kamp. Huma ttrattawni tajjeb, u jien ħassejtni utli. Imma wara diversi xhur, qrabati sabuni u għamlu pressjoni fuq is-​suldati biex jibagħtuni lura fir-​raħal tiegħi.

 Attivist Politiku

Wara li spiċċajt l-​iskola sekondarja, mort ngħix Dili, il-​belt kapitali taʼ Timor tal-​Lvant, u dħalt l-​università. Hemmhekk iltqajt maʼ ħafna żgħażagħ li kellhom sfond simili għal tiegħi. Ikkonkludejna li l-​uniku mod kif niksbu indipendenza nazzjonali u bidla soċjali kien permezz taʼ azzjoni politika. Il-​grupp tagħna, ifformat mill-​istudenti, organizza ħafna dimostrazzjonijiet politiċi li l-​biċċa l-​kbira minnhom spiċċaw f’rewwixti. Ħafna mill-​ħbieb tiegħi weġġgħu. Xi wħud saħansitra nqatlu.

Meta, fl-​2002, Timor tal-​Lvant kiseb l-​indipendenza, il-​pajjiż kien f’rovina, għaxriet taʼ eluf taʼ nies kienu mietu, u mijiet taʼ eluf tilfu djarhom. Jien ittamajt li l-​kundizzjonijiet se jitjiebu. Imma l-​qgħad, il-​faqar, u t-​taqlib politiku kontinwu komplew jinfirxu maʼ kullimkien.

Direzzjoni Ġdida

Dak iż-​żmien kont qed ngħix maʼ xi qraba, inkluż qarib iżgħar minni, Andre, li kien jiġi minni mill-​bogħod u kien qed jistudja l-​Bibbja max-​Xhieda taʼ Ġeħova. Bħala Kattoliku Ruman devot, jien ma ħadtx pjaċir li qarib tiegħi kien involut f’reliġjon oħra. Xorta waħda, kont kurjuż dwar il-​Bibbja u kultant kont naqra l-​kopja li Andre kien iżomm fil-​kamra tas-​sodda tiegħu. Dak li kont naqra, iktar qajjimli interess.

Meta, fl-​2004, Andre tani invit stampat għat-​Tifkira tal-​mewt taʼ Ġesù, iddeċidejt li nattendi. Peress li qrajt l-​invit ħażin, wasalt fil-​post tal-​laqgħa sagħtejn qabel. Meta waslu x-​Xhieda, kemm dawk lokali kif ukoll dawk barranin, ħaduli b’idi u ġegħluni nħossni milqugħ. Kont impressjonat. Matul it-​taħdita tat-​Tifkira ktibt f’pitazz kull skrittura ċitata u iktar tard iċċekkjajthom fil-​Bibbja Kattolika tiegħi biex nara jekk dak li qal il-​kelliemi kienx veru. Kien veru!

Il-​ġimgħa taʼ wara attendejt għall-​quddiesa fil-​knisja tiegħi. Peress li jien u xi oħrajn wasalna tard, il-​qassis qabad biċċa injama u bir-​rabja keċċiena ’l barra mill-​knisja. Hekk kif konna barra, il-​qassis spiċċa l-​quddiesa billi qal lill-​kongregazzjoni, “Jalla l-​paċi taʼ Ġesù tkun magħkom.” Waħda mara qalbenija għajtet, “Kif tistaʼ titkellem dwar il-​paċi meta int għadek kif keċċejt lil dawn in-​nies ’il barra mill-​knisja?” Il-​qassis injoraha. Jien tlaqt mill-​knisja u qatt ma rġajt mort lura.

Ftit wara bdejt nistudja l-​Bibbja u nattendi għal-​laqgħat tax-​Xhieda flimkien maʼ Andre. Qrabatna allarmaw ruħhom u bdew jopponuna. In-​nanna taʼ Andre wissietna: “Se nħaffer ħofra u nidfinkom it-​tnejn jekk tkomplu tistudjaw maʼ dik ir-​reliġjon ġdida.” Madankollu, it-​theddid tagħha ma beżżagħniex. Konna determinati li nagħmlu progress spiritwali.

Nagħmel Xi Bidliet

Hekk kif studjajt il-​Bibbja bdejt inħoss li qatt ma kont naf tassew x’inhi l-​imħabba. Ma kontx inċedi u kont difensiv u kont insibha iebsa biex nafda lin-​nies. Iżda, ix-​Xhieda ħadu interess ġenwin fija. Meta mradt ħafna u qrabati injorawni, ix-​Xhieda żaruni u għenuni. Imħabbithom ma kinitx ‘bil-​kliem u bl-​ilsien, imma bl-​għemil u l-​verità.’—1 Ġwanni 3:18.

Minkejja li kelli apparenza u karattru li jintimidaw, ix-​Xhieda ttrattawni billi ‘ħassew għalija u wrewni affezzjoni’ daqslikieku kont ħuhom. (1 Pietru 3:8) Għall-​ewwel darba f’ħajti, bdejt inħossni maħbub. Il-​personalità tiegħi rtabet, u bdejt niżviluppa mħabba għal Alla u għall-​proxxmu tiegħi. Għaldaqstant, f’Diċembru tal-​2004, issimbolizzajt id-​dedikazzjoni tiegħi lil Ġeħova permezz tal-​magħmudija fl-​ilma. Andre tgħammed ftit wara.

Barkiet Fost l-​Inkwiet

Wara l-​magħmudija tiegħi kelli xewqa qawwija li ngħin lil nies oħrajn li qatt ma kienu jafu x’inhi l-​imħabba vera jew il-​ġustizzja. Għalhekk, bdejt naqdi bħala ministru Kristjan full-​time, jew fix-​xogħol taʼ pijunier, kif isejħulu x-​Xhieda taʼ Ġeħova. Li naqsam maʼ ħaddieħor il-​messaġġ edifikanti tal-​Bibbja kien ferm iktar rifreskanti milli nieħu sehem f’dimostrazzjonijiet u rewwixti politiċi. Sa fl-​aħħar, kont verament qed ngħin lin-​nies!

Fl-​2006, reġgħu feġġew it-​tensjonijiet politiċi u reġjonali f’Timor tal-​Lvant. Gruppi partiġjani ġġieldu minħabba lmenti li kien ilhom  għaddejjin żmien twil. Il-​belt taʼ Dili ġiet assedjata, u ħafna nies mil-​Lvant tal-​pajjiż ħarbu biex jibqgħu ħajjin. Flimkien maʼ Xhieda oħrajn, jien ħrabt lejn Baucau, belt kbira ħafna madwar 120 kilometru lejn il-​Lvant taʼ Dili. Hemmhekk, il-​prova iebsa tagħna nbidlet f’barka, ladarba stajna nistabbilixxu kongregazzjoni ġdida—l-​ewwel waħda ’l barra minn Dili.

Tliet snin wara, fl-​2009, irċivejt invit biex nattendi skola speċjali għal ministri Kristjani full-​time f’Ġakarta, l-​Indoneżja. Ix-​Xhieda f’Ġakarta daħħluni fi djarhom u fi qlubhom. L-​imħabba ġenwina tagħhom impressjonatni profondament. Ħassejt li kont parti minn “fratellanza” globali, “familja” internazzjonali, li verament kien jimpurtaha minni.—1 Pietru 2:17.

Paċi sa fl-​Aħħar!

Wara l-​iskola mort lura Baucau, fejn għadni ngħix sal-​ġurnata tal-​lum. Hawnhekk nitgħaxxaq ngħin spiritwalment lin-​nies, sewwasew bħalma oħrajn darba għenu lili. Pereżempju, f’raħal iżolat ’il barra minn Baucau, jien u oħrajn ngħallmu l-​Bibbja lil xi 20 ruħ, inkluż ħafna xjuħ li ma jafux jaqraw jew jiktbu. Il-​grupp kollu kemm hu jattendi għal-​laqgħat taʼ kull ġimgħa, u tliet individwi ngħaqdu mal-​“familja” spiritwali tagħna bħala membri mgħammdin tal-​kongregazzjoni Kristjana.

Diversi snin ilu ltqajt maʼ Felizarda, tfajla qalbha tajba li aċċettat il-​verità Biblika u malajr għamlet progress biex titgħammed. Iżżewwiġna fl-​2011. Nifraħ ukoll li Andre, il-​qarib tiegħi, qed jaqdi fl-​uffiċċju tax-​Xhieda taʼ Ġeħova f’Timor tal-​Lvant. Anki l-​biċċa l-​kbira minn qrabati, inkluż in-​nanna taʼ Andre, li darba riedet tidfinna, issa jirrispettaw il-​fidi tiegħi.

Fl-​imgħoddi, ħassejtni rrabjat, mhux maħbub, u li kien impossibbli li xi ħadd iħobbni, imma grazzi għal Ġeħova, sa fl-​aħħar sibt imħabba u paċi veri!

[Stampa f’paġna 20]

Egidio bħala attivist politiku

[Stampa f’paġna 22]

Egidio u Felizarda flimkien maʼ membri tal-​Kongregazzjoni taʼ Baucau, f’Timor tal-​Lvant