Min Jistaʼ Jbiddel id-Dinja Tagħna?
Il-Ħarsa tal-Bibbja
“In-nies tad-dinja jridu tweġibiet mill-mexxejja tagħhom. Huma jistennew soluzzjonijiet, mhux sforzi taʼ nofs kedda jew skużi.”—IS-SEGRETARJU ĠENERALI TAL-ĠNUS MAGĦQUDA BAN KI-MOON.
AĦNA ngħixu fi żminijiet li l-Bibbja ssejħilhom “żminijiet kritiċi li diffiċli biex issib tarfhom.” (2 Timotju 3:1) L-aħbarijiet huma miżgħudin b’rapporti tal-biżaʼ taʼ gwerer, terroriżmu, taqlib ekonomiku, u qerda imminenti tal-ambjent.
Hemm xi tama li l-affarijiet se jmorru għall-aħjar? Jistgħu l-gvernijiet umani jirranġaw il-problemi tad-dinja? Jew għandna bżonn induru lejn ħaddieħor għall-għajnuna?
Dak li Jsostnu Ħafna Ġnus
Ħafna ġnus isostnu li għandhom l-appoġġ t’Alla. Pereżempju, fil-Wegħda t’Alleanza tagħha, l-Istati Uniti tal-Amerika tgħid li hi “ġens wieħed taħt Alla,” u l-muniti u l-flus tal-karti f’dak il-pajjiż fuqhom hemm miktub “F’Alla Nafdaw.”
M’għandniex xi ngħidu, ħafna li jgħixu fl-Istati Uniti lanqas biss jemmnu li Alla jeżisti—u l-istess hu minnu f’pajjiżi oħrajn li jsostnu li għandhom l-appoġġ t’Alla. Anki nies li jemmnu f’Alla għandhom opinjonijiet differenti rigward kemm jinvolvi ruħu fi kwistjonijiet tal-bnedmin.
● Xi wħud jgħidu li Alla xejn m’għandu interess fil-bnedmin u li ħalliehom imexxu lilhom infushom.
● Oħrajn jgħidu li Alla jaħdem permezz taʼ gvernijiet umani u li jistaʼ jbierek l-isforzi tagħhom biex ibiddlu d-dinja tagħna.
Liema stqarrija minn dawn, jekk hemm xi waħda, tesprimi dak li temmen int?
Ikkunsidra: Jekk l-ewwel stqarrija hi minnha, aħna nkunu vera msieken. Jekk it-tieni stqarrija hi minnha, mela jkollna nistaqsu lilna nfusna: ‘Jippreferi Alla xi ġens minn ieħor? Jekk żewġt iġnus jiggwerraw kontra xulxin u t-tnejn jitolbu bil-ħerqa biex jirbħu, Alla maʼ min iżomm?’ Huwa possibbli li ma jżomm maʼ ħadd?
Dak li Tgħallem il-Bibbja
1. Il-bniedem ma ġiex maħluq biex imexxi lilu nnifsu. Il-Bibbja tgħid: “Lanqas min jimxi ma jistaʼ jidderieġi l-passi tiegħu.” (Ġeremija 10:23) L-istorja tikkonferma kemm hi minnha din l-istqarrija. Il-ħakma mill-bniedem ma ġabitx dinja aħjar, anki meta l-ħakkiema kellhom prinċipji għoljin u l-aħjar intenzjonijiet. Minflok, “il-bniedem iddomina lill-bniedem bi ħsara għalih.”—Ekkleżjasti 8:9.
2. Alla jimpurtah minn dak li jiġrilna. Hu konxju tas-sitwazzjoni tagħna u sensittiv għal dak li ngħaddu minnu. Barra minn hekk, hu se jieħu azzjoni biex jgħinna. Kif? Permezz tas-Saltna tiegħu, li “qatt ma tinqered.”—Danjel 2:44.
3. Is-Saltna t’Alla hi gvern taʼ veru. Hu l-istess gvern li miljuni taʼ nies sinċieri spiss jitolbu għalih fit-Talba tal-Missierna. F’din it-talba, in-nies jitolbu lil Alla bil-ħrara: “Ħa tiġi saltnatek. Ħa jkun li trid int, kif fis-sema, ukoll fuq l-art.” (Mattew 6:10) Innota li s-Saltna t’Alla ma teffettwax biss lis-sema, imma tagħmilha possibbli wkoll li r-rieda t’Alla titwettaq fuq l-art.
4. Permezz taʼ Saltnatu, Alla jistaʼ—u se—ibiddel id-dinja tagħna. Jekk dan tiddubitah, ikkunsidra x’tgħallem il-Bibbja.
● Alla ta lir-razza umana bidu perfett f’ambjent paċifiku.—Ġenesi 1:27-31.
● Minkejja l-problemi li naraw, Alla m’abbandunax l-iskop tiegħu għad-dinja tagħna.—Salm 37:11, 29.
● Alla diġà ħa passi biex jagħmilha possibbli għal artna—u għar-razza umana—biex tiġi restawrata għall-kundizzjoni li ried oriġinarjament.—Ġwanni 3:16.
Tixtieq titgħallem iktar dwar is-Saltna t’Alla u kif din se tbiddel id-dinja tagħna? Ix-Xhieda taʼ Ġeħova, il-pubblikaturi taʼ din ir-rivista, minn qalbhom jixtiequ jgħinuk. Għala ma tiddiskutix magħhom is-suġġetti li ġejjin meta jerġgħu jiġu jħabbtulek?
● X’inhi s-Saltna t’Alla?
● Liema bidliet se ġġib?
● Is-Saltna t’Alla meta u kif se ġġib dawn il-bidliet?
QATT ĦSIBT DWAR DAN?
● Il-gvernijiet umani għala huma limitati f’dak li jistgħu jwettqu?—Ġeremija 10:23.
● Alla kif wera li jimpurtah minna?—Ġwanni 3:16.
● Is-Saltna t’Alla x’se tagħmel possibbli għal artna u għal dawk li jgħixu fiha?—Salm 37:11, 29.
[Kumment f’paġna 13]
Jistgħu l-gvernijiet umani jirranġaw il-problemi tad-dinja? Jew għandna bżonn induru lejn ħaddieħor għall-għajnuna?
