Waqt li qed titkellem wiċċ imb wiċċ ma’ ħabib, tirċievi messaġġ. X’għandek tagħmel?

1. Taqra l-messaġġ waqt li tkompli titkellem ma’ ħabibek.

2. Tiskuża ruħek ma’ ħabibek u taqra l-messaġġ.

3. Tinjora l-messaġġ u tkompli titkellem ma’ ħabibek.

Tagħmel differenza x’tagħżel? Iva, tagħmel differenza!

Meta tibgħat messaġġ lil ħabib waqt li titkellem ma’ ħabib ieħor, huwa bħal meta tilgħab il-logħba favorita tiegħek mingħajr ma toqgħod għar-regoli tal-logħba. Forsi tgħid: ‘Imma dawn il-ħbieb tiegħi.’ Allura iktar u iktar għandek turi manjieri tajbin. Ma jfissirx li għandek tkun skrupluż jew strett iżżejjed. Imma kkunsidra dan il-fatt tal-ħajja: Jekk ma tużax manjieri tajbin ma’ ħbiebek, mhux se ddum ma tispiċċa bla ħbieb!

Għala ngħidu dan? Għax in-nies ma jħobbux min jittrattahom b’mod pastaż. Mara żagħżugħa li jisimha Beth * tgħid, “Nittika ruħi meta nkun qed nitkellem ma’ ħabiba li toqgħod il-ħin kollu tiċċekkja l-mowbajl bħallikieku qed tistenna xi ħaġa aħjar milli nkunu qed ngħidu!” Kemm taħseb li Beth se ddum tissaporti ħabiba bħal din?

Erġa’ kkunsidra s-sitwazzjoni taħt “L-isfida.” Liema għażla taħseb li hi l-aħjar? Probabbilment, tirrealizza li jekk tagħżel il-A ma tkunx qed tuża manjieri tajbin. Imma xi ngħidu dwar l-Għażliet B u Ċ? Tkun maledukat jekk twaqqaf konversazzjoni biex sempliċement tara messaġġ? Jew tkun qed turi nuqqas ta’ rispett jekk tinjora l-messaġġ biex sempliċement tkompli bil-konversazzjoni?

Kif tista’ tinnota, kultant tiġi bejn ħaltejn dwar kif turi manjieri tajbin. Imma l-Bibbja tista’ tgħin. Tgħid: “Bħalma tridu li l-bnedmin jagħmlulkom, agħmlu l-istess lilhom.” (Luqa 6:31) Int tista’ tapplika dan il-parir meta tibgħat jew tirċievi l-messaġġi. Kif?

Ibgħat messaġġ f’ħinijiet addattati biss. “Ġieli nirċievi messaġġ tard billejl,” jgħid żagħżugħ jismu Richard. “Apparti li ma jkunx importanti, itellifli raqda!” Saqsi lilek innifsek, ‘Nibgħat messaġġi lin-nies meta forsi jkunu qed jistrieħu?’—Prinċipju Bibliku: Ekkleżjasti 3:1.

Kun edukat. Aħna nikkomunikaw permezz ta’ kliem, ton tal-leħen, espressjoni tal-wiċċ, u mossi. Sfortunatament, ħafna minn dawn l-elementi jintilfu meta niktbu messaġġ. Allura kif nistgħu npattu għal dawn? “Uża manjieri tajbin,” tissuġġerixxi żagħżugħa jisimha Jasmine. “Saqsi, ‘Kif int?’ u uża kliem bħal ‘jekk jogħġbok’ u ‘grazzi.’”—Prinċipju Bibliku: Kolossin 4:6.

Uża l-għaqal. Erġa’ kkunsidra s-sitwazzjoni taħt “L-isfida.” Jekk qed tistenna xi messaġġ importanti, forsi jkun neċessarju li tiskuża ruħek ħalli tara l-messaġġ. Imma spiss, mhix se taqa’ d-dinja mbilli taqra l-messaġġ iktar tard. “Il-mowbajl tiegħek se jibqa’ hemm meta ħabibek ikun spiċċa milli jkun qed jgħid,” tgħid Amy li għandha 17-il sena, “imma l-ħabib tiegħek jista’ jkun li ma jibqax jistenniek sakemm tilħaq tibgħat il-messaġġ.” Tista’ tuża l-għaqal ukoll waqt xi get-together. “Toqgħodx tibgħat messaġġi l-ħin kollu,” tgħid Jane li għandha 18-il sena. “Meta tagħmel hekk tkun qisek qed tgħid, ‘Ma jimpurtaniex mill-kumpanija tiegħek; nippreferi nkun xi mkien ieħor.’”

Aħsibha sew qabel tibgħat messaġġ. Żgur li se jinftiehem sew il-messaġġ tiegħek? Biex tagħti s-sens li trid, tista’ forsi tagħmel xi smiley? “Jekk qed tiċċajta, agħmel smiley,” tgħid Amber li għandha 21 sena. “In-nies jistgħu jieħdu għalihom—u saħansitra jistgħu jaqilgħu ġlieda—għax jieħdu ċajta bis-serjetà.”—Prinċipju Bibliku: Proverbji 12:18.

Bla dubju ta’ xejn, il-manjieri tiegħek ta’ meta tibgħat jew tirċievi messaġġ jagħmlu differenza!

Aħseb dwar dan: Manjieri tajbin huma bbażati fuq l-imħabba. Din il-kwalità kif tintwera? Il-Bibbja tgħid: “L-imħabba tistabar fit-tul u qalbha tajba. L-imħabba ma tgħirx, ma tiftaħarx, ma tintefaħx, ma ġġibx ruħha b’mod indeċenti, ma tfittixx l-interessi tagħha, ma tiġix provokata.” (1 Korintin 13:4, 5) Int liema aspett tal-imħabba trid taħdem fuqu?