KIF TISTAʼ TWAQQAF IĊ-ĊIKLU TAL-MIBEGĦDA
3 | Biddel il-Mod Kif Taħseb
X’Tgħallem il-Bibbja:
“Inbidlu billi ġġeddu moħħkom, biex tagħtu prova lilkom infuskom dwar x’inhi r-rieda tajba u aċċettabbli u perfetta t’Alla.”—RUMANI 12:2.
Xi Jfisser:
Dak li naħsbu huwa importanti għal Alla. (Ġeremija 17:10) Irridu nagħmlu iżjed milli sempliċement nevitaw kliem u azzjonijiet li jweġġgħu. Il-mibegħda tibda f’moħħna u f’qalbna. Għalhekk, irridu nieqfu naħsbu dwar affarijiet li jġegħluna nobogħdu. B’dan il-mod biss nistgħu ‘nġeddu moħħna,’ jiġifieri ninbidlu u ma nibqgħux nobogħdu.
X’Tistaʼ Tagħmel:
Aħseb sew kif tħossok dwar oħrajn—speċjalment dawk li huma taʼ razza jew nazzjonalità differenti. Saqsi lilek innifsek: ‘Kif inħares lejhom? L-opinjoni tiegħi hi bbażata fuq dak li jien naf dwarhom? Jew hi bbażata fuq preġudizzju?’ Evita social media, films, u divertiment li fihom il-mibegħda u l-vjolenza.
Il-Kelma t’Alla tistaʼ tgħinna nneħħu l-mibegħda minn moħħna u qalbna
Kultant huwa diffiċli biex neżaminaw sew dak li naħsbu u nħossu. Imma l-Kelma t’Alla tistaʼ tgħinna nagħrfu “l-ħsibijiet u l-intenzjonijiet tal-qalb.” (Ebrej 4:12) Mela kompli ara x’tgħid il-Bibbja. Qabbel it-tagħlim tagħha ma’ kif taħseb int. Imbagħad aħdem iebes biex taħseb bil-mod kif jogħġob lil Alla. Il-Kelma t’Alla tgħinna negħlbu mibegħda li tistaʼ tkun ġejja minn dak li naħsbu u nħossu.—2 Korintin 10:4, 5.
