B’mod simili, ilkoll kemm aħna dalwaqt se niffaċċjaw “maltempata kbira,” li Ġesù sejħilha “tribulazzjoni kbira.” (Mattew 24:21) Ma nistgħu mmorru mkien biex nevitaw din it-​tribulazzjoni. Imma hemm xi ħaġa li nistgħu nagħmlu biex nipproteġu lilna infusna. X’inhi?

Fil-​Prietka taʼ fuq il-​Muntanja, Ġesù Kristu qal: “Ibqgħu fittxu l-​ewwel is-​saltna [t’Alla] u s-​sewwa tiegħu.” (Mattew 6:33) Kif nistgħu nagħmlu dan?

Fittex l-​ewwel is-​Saltna t’Alla. Dan ifisser li s-​Saltna t’Alla għandha tkun iktar importanti għalina minn kwalunkwe ħaġa oħra. (Mattew 6:25, 32, 33) Għala? Għax il-​bnedmin ma jistgħu jagħmlu xejn biex isolvu l-​problemi tan-​nies. Is-​Saltna t’Alla biss tistaʼ tagħmel din il-​biċċa xogħol diffiċli.

Fittex is-​sewwa tiegħu. Għandna nagħmlu l-​almu tagħna biex ngħixu skont il-​liġijiet u l-​prinċipji ġusti t’Alla. Għala? Għax jekk niddeċiedu għalina nfusna x’inhu tajjeb u x’inhu ħażin, se nieħdu deċiżjonijiet ħżiena u mbagħad ikollna riżultati ħżiena. (Proverbji 16:25) Mill-​banda l-​oħra, jekk ngħixu skont il-​livelli t’Alla, mhux biss nogħġbu lil Alla, imma jkollna ħajja aħjar.—Isaija 48:17, 18.

Ibqgħu fittxu l-​ewwel is-​Saltna t’Alla u s-​sewwa tiegħu. Ġesù wissa li xi wħud jistgħu jiġu aljenati għax jaħsbu li biex jgħixu fis-​sigurtà  għandhom jaqilgħu ħafna flus. Oħrajn tant jużaw ħin u enerġija biex isolvu l-​problemi taʼ kuljum, li ma jkollhomx ċans ifittxu s-​Saltna t’Alla.—Mattew 6:19-​21, 25-​32.

Madankollu, Ġesù wiegħed li dawk li jappoġġjaw is-​Saltna t’Alla se jkollhom dak li għandhom bżonn issa, u se jgawdu ħafna barkiet fil-​futur.—Mattew 6:33.

Għalkemm id-​dixxipli taʼ Ġesù fl-​ewwel seklu kienu jfittxu l-​ewwel is-​Saltna t’Alla u s-​sewwa tiegħu, fi żmienhom ma rawx l-​uġigħ jew it-​tbatija jispiċċaw. Imma xorta kienu protetti. Kif?

Huma għexu skont il-​livelli ġusti t’Alla, u dan ipproteġiehom minn diffikultajiet li għaddew minnhom dawk li ma tawx kas x’qal Alla. Peress li kellhom fidi b’saħħitha li kienet se tiġi s-​Saltna t’Alla, huma setgħu jissaportu anki l-​iktar problemi diffiċli. U Alla tahom “qawwa iktar min-​normal” biex ikunu jistgħu jkampaw.—2 Korintin 4:7-​9.

Il-​Kristjani tal-​ewwel seklu obdew il-​kmand li tahom Ġesù biex ifittxu s-​Saltna l-​ewwel. Huma ppritkaw l-​aħbar tajba tas-​Saltna fil-​parti tad-​dinja fejn kienu jgħixu huma. (Kolossin 1:23) Illum, hemm xi ħadd li qed jagħmel dan?

Iva! Ix-​Xhieda taʼ Ġeħova jirrealizzaw li din is-​sistema dalwaqt se tispiċċa. Allura, huma jużaw l-​enerġija tagħhom biex jagħmlu x-​xogħol li ddeskriva Ġesù: “Din l-​aħbar tajba tas-​saltna tiġi pridkata fl-​art abitata kollha bħala xiehda lill-​ġnus kollha; u mbagħad jiġi t-​tmiem.”—Mattew 24:14.

Kif se tirreaġixxi għall-​aħbar tajba? Aħna nħeġġuk timita lil dawk tal-​ewwel seklu li kienu joqogħdu fil-​belt taʼ Berea, il-​Maċedonja. Meta semgħu l-​aħbar tajba dwar is-​Saltna mingħand l-​appostlu Pawlu, huma aċċettaw il-​messaġġ tiegħu “bl-​akbar ħeġġa.” Imbagħad, biex ikunu ċerti li dak li semgħu kien veru, ‘eżaminaw bir-​reqqa l-​Iskrittura’ u aġixxew fuq dak li tgħallmu.—Atti 17:11, 12.

Int tistaʼ tagħmel l-​istess. Jekk tfittex l-​ewwel is-​Saltna t’Alla u s-​sewwa tiegħu, se jkollok protezzjoni issa, u fil-​futur se tgawdi paċi u sigurtà għal dejjem.