1. X’inhi l-​ogħla forma taʼ mħabba, u kif tiddeskriviha? (Ara l-​ewwel stampa.)

ĠEĦOVA hu s-​Sors tal-​imħabba. (1 Ġwanni 4:7) L-​ogħla forma taʼ mħabba hi bbażata fuq prinċipji tajbin. Fil-​Bibbja, din it-​tip taʼ mħabba hi deskritta bil-​kelma Griega agape. Din l-​imħabba tistaʼ tinkludi affezzjoni u sentimenti teneri għal xi ħadd, imma tinvolvi iktar minn sempliċi sentimenti. Din tintwera b’azzjonijiet mhux egoistiċi għall-​benefiċċju t’oħrajn. Hija mħabba li timmotivana nagħmlu affarijiet tajbin għal ħaddieħor. Din it-​tip taʼ mħabba tagħtina ferħ u skop fil-​ħajja.

2, 3. Ġeħova kif wera mħabba bla egoiżmu għall-​bnedmin?

² Ġeħova wera li jħobb lill-​bniedem saħansitra qabel ħalaq lil Adam u Eva. Hu għamel l-​art b’tali mod li jkollha dak kollu li l-​bniedem kien se jkollu bżonn biex jgħix. Iżjed minn hekk, hu għamilha bħal dar fejn verament inkunu nistgħu ngawdu l-​ħajja. Ġeħova m’għamilx dan għalih innifsu. Hu għamel kollox għalina. Ladarba d-​dar tagħna kienet lesta, hu ħalaq il-​bnedmin u tahom it-​tama li jgħixu għal dejjem f’art magħmula ġenna.

 ³ Iktar tard, Ġeħova esprima l-​imħabba bla egoiżmu tiegħu għall-​bnedmin bl-​aqwa mod possibbli. Għalkemm Adam u Eva kienu rribellaw, Ġeħova tant kien ċert li wħud mid-​dixxendenti tagħhom kienu se jħobbuh li għamel arranġament għas-​sagrifiċċju taʼ fidwa t’Ibnu biex isalvahom. (Ġenesi 3:15; 1 Ġwanni 4:10) Minn dak il-​waqt li Ġeħova wiegħed il-​fidwa, kien bħallikieku dak is-​sagrifiċċju kien diġà sar. Imbagħad, 4,000 sena wara, Ġeħova ta lill-​Iben uniġenitu tiegħu għall-​bnedmin. (Ġwanni 3:16) Kemm aħna grati għall-​imħabba taʼ Ġeħova!

4. Kif nafu li bnedmin imperfetti jistgħu juru mħabba bla egoiżmu?

⁴ Nistgħu aħna nuru mħabba bla egoiżmu għalkemm imperfetti? Iva, nistgħu. Ġeħova ħalaqna fix-​xbieha tiegħu, jiġifieri, bl-​abbiltà li nimitawh. Mhux dejjem faċli nuru mħabba bla egoiżmu, iżda hu possibbli. Abel wera mħabba għal Alla meta mingħajr egoiżmu offra l-​aħjar taʼ dak li kellu. (Ġenesi 4:3, 4) Noè wera mħabba bla egoiżmu meta kompla jipprietka l-​messaġġ t’Alla għal ħafna snin avolja n-​nies ma semgħux. (2 Pietru 2:5) U Abraham wera li mħabbtu għal Alla kienet b’saħħitha iżjed minn kull ħaġa oħra billi kien lest li jissagrifika lill-​iben maħbub tiegħu Iżakk. (Ġakbu 2:21) L-​istess bħal dawn l-​irġiel leali, aħna wkoll irridu nuru mħabba, saħansitra meta ma jkunx faċli li nagħmlu dan.

5. B’liema modi nistgħu nuru mħabba ġenwina?

⁵ Il-​Bibbja tgħidilna li aħna nuru mħabba ġenwina “la bil-​kliem u lanqas bl-​ilsien, imma bl-​għemil u l-​verità.” (1 Ġwanni 3:18) Ifisser dan li ma nistgħux nesprimu l-​imħabba b’dak li ngħidu? Le. (1 Tessalonikin 4:18) Ifisser li mhux dejjem ikun biżżejjed li sempliċement ngħidu “nħobbok.” Għandna bżonn nuru dan bil-​fatti. Pereżempju, jekk ħutna ma jkollhomx biżżejjed ikel jew ilbies, ikollhom bżonn iżjed minn sempliċement kliem ħelu. (Ġakbu 2:15, 16) B’mod simili, peress li nħobbu lil Ġeħova u l-​proxxmu tagħna, aħna mhux biss nitolbu biex iktar nies jippritkaw magħna imma wkoll naħdmu iebes fix-​xogħol tal-​ippritkar aħna stess.—Mattew 9:38.

6, 7. (a) X’inhi “l-​imħabba ħielsa mill-​ipokrisija”? (b) Semmi xi eżempji taʼ mħabba li mhix ġenwina.

⁶ L-​appostlu Ġwanni qal li għandna nħobbu “bl-​għemil u l-​verità.” Allura mħabbitna għandha tkun “mingħajr ipokrisija,” jew “ħielsa mill-​ipokrisija.” (Rumani 12:9; 2 Korintin 6:6) Kultant xi ħadd għandu mnejn jagħmel tabirruħu li juri mħabba. Imma hija vera u sinċiera mħabbtu? X’inhuma l-​mottivi tiegħu? L-​imħabba u l-​ipokresija ma joqogħdux flimkien. Imħabba li ma tkunx ġenwina ma tiswa xejn.

 ⁷ Ejja nikkunsidraw xi eżempji taʼ mħabba mhix ġenwina. Meta Satana kellem lil Eva fil-​ġnien tal-​Għeden, dak li qal instemaʼ bħallikieku hu xtaqilha l-​ġid. Iżda l-​azzjonijiet tiegħu wrew li dan ma kienx minnu. (Ġenesi 3:4, 5) Meta David kien sultan, kellu ħabib jismu Aħitofel. Imma Aħitofel ittradixxa lil David biex jibbenefika hu stess. L-​azzjonijiet tiegħu wrew li ma kienx ħabib veru. (2 Samwel 15:31) Illum, apostati u oħrajn li joħolqu firdiet fil-​kongregazzjoni jużaw “kliem melliesi u diskors kumplimentuż.” (Rumani 16:17, 18) Huma jistgħu jagħmlu tabirruħhom li jimpurtahom minn oħrajn, imma fir-​realtà jkunu egoisti.

8. X’mistoqsija għandna nistaqsu lilna nfusna?

⁸ Imħabba mhix ġenwina hi speċjalment taʼ mistħija għax tintuża biex tqarraq bin-​nies. Aħna forsi jirnexxilna nidħqu bin-​nies, imma ma nistgħux nidħqu b’Ġeħova. Ġesù qal li dawk li jaġixxu bħall-​ipokriti se jiġu kkastigati “bl-​akbar ħruxija.” (Mattew 24:51) Bħala qaddejja taʼ Ġeħova, qatt ma rridu nuru wiċċ b’ieħor. Allura għandna nistaqsu lilna nfusna, ‘Hi l-​imħabba tiegħi ġenwina jew jien egoist u diżonest?’ Ejja nikkunsidraw disaʼ modi kif aħna nistgħu nuru mħabba li hi “ħielsa mill-​ipokrisija.”

9. Imħabba ġenwina x’se timmotivana nagħmlu?

⁹ Kun ferħan li tgħin anke jekk ħadd ma jinnota x’tagħmel. Aħna għandna nkunu lesti li nagħmlu affarijiet bi mħabba u qalb tajba għal oħrajn, affarijiet li ħadd qatt mhu se jkun jaf li għamilniehom. (Aqra Mattew 6:1-​4.) Ananija u Safira kellhom attitudni differenti. Meta taw donazzjoni, huma riedu li oħrajn ikunu jafu dwarha. Huma gidbu dwar l-​ammont li taw, u ġew ikkastigati għall-​ipokresija tagħhom. (Atti 5:1-​10) Imma jekk verament inħobbu lil ħutna, se nkunu ferħanin li nagħmlu affarijiet b’qalb tajba għalihom mingħajr ma nkunu rridu li ħaddieħor ikun jaf x’għamilna. Aħna nistgħu nitgħallmu mill-​aħwa rġiel li jgħinu lill-​Ġemgħa li Tiggverna biex jiġi ppreparat l-​ikel spiritwali. Huma ma jiġbdux attenzjoni lejhom infushom, u ma jgħidux lil oħrajn fuq liema proġetti ħadmu.

10. Kif nistgħu nonoraw lil oħrajn?

¹⁰ Onora lil oħrajn. (Aqra Rumani 12:10.) Ġesù onora lill-​appostli tiegħu meta ħaslilhom saqajhom. (Ġwanni 13:3-​5, 12-​15) Aħna għandna naħdmu iebes biex insiru umli bħal Ġesù u naqdu lil oħrajn. Kien biss meta l-​appostli rċivew l-​ispirtu qaddis li huma fehmu għalkollox dak li Ġesù kien għamel. (Ġwanni 13:7) Aħna nonoraw lil oħrajn billi ma naħsbux li aħna aħjar minnhom minħabba li għandna iżjed edukazzjoni, aħna iktar  sinjuri, jew għandna inkarigi speċjali. (Rumani 12:3) Ma ngħirux meta oħrajn jiġu mfaħħrin, imma nifirħu magħhom anke jekk inħossu li kellna niġu mfaħħrin xi ftit aħna wkoll.

11. It-​tifħir li nagħtu għala għandu jkun sinċier?

¹¹ Faħħar sinċerament. Fittex opportunitajiet biex tfaħħar lil oħrajn. Ilkoll nafu li t-​tifħir huwa “tajjeb biex jibni” wieħed lil ieħor. (Efesin 4:29) Imma rridu nkunu ċerti li dak li ngħidu jkun sinċier u ma ngħiduhx sempliċement biex infaħħru żżejjed lil oħrajn. M’għandniex ngħidu xi ħaġa li ma tiġix mill-​qalb jew naħarbu mir-​responsabbiltà li nagħtu parir meħtieġ. (Proverbji 29:5) Inkunu ipokriti jekk infaħħru lil oħrajn u mbagħad iktar tard nikkritikawhom minn wara daharhom. L-​imħabba tal-​appostlu Pawlu kienet ġenwina. Meta kiteb lill-​Kristjani f’Korintu, hu faħħarhom għat-​tajjeb li kienu qed jagħmlu. (1 Korintin 11:2) Iżda meta kellhom bżonn jiġu kkoreġuti, hu spjegalhom ir-​raġuni b’qalb tajba u b’mod ċar.—1 Korintin 11:20-​22.

12. Kif nistgħu nuru mħabba ġenwina meta nkunu ospitabbli?

¹² Kun ospitabbli. Ġeħova jikkmandana nkunu ġenerużi maʼ ħutna. (Aqra l-​1 Ġwanni 3:17.) Imma għandu jkollna l-​mottiv it-​tajjeb meta nkunu ospitabbli. Nistgħu nistaqsu lilna nfusna: ‘Jien nistieden f’dari lill-​ħbieb tal-​qalb biss jew lil dawk biss li nqishom importanti fil-​kongregazzjoni? Nistieden biss lil dawk in-​nies li naħseb li mbagħad se jagħmlu xi ħaġa għalija? Jew inkella jien ġeneruż m’aħwa li ma nafhomx sew jew li ma jistgħux jagħmlu xi ħaġa għalija?’ (Luqa 14:12-​14) Immaġina dawn is-​sitwazzjonijiet: Xi ngħidu jekk ħu jkollu bżonn l-​għajnuna minħabba xi deċiżjonijiet mhux għaqlin li jkun ħa? Jew xi ngħidu jekk xi ħadd li stidinna f’darna qatt ma rringrazzjana? Ġeħova jgħidilna: “Uru l-​ospitalità maʼ xulxin mingħajr tgergir.” (1 Pietru 4:9) Aħna se nkunu ferħanin meta nagħtu bil-​mottiv it-​tajjeb.—Atti 20:35.

13. (a) Meta għandu mnejn neħtieġu iktar paċenzja mad-​dgħajfin? (b) X’nistgħu nagħmlu biex ngħinu lid-​dgħajfin?

¹³ Għin lid-​dgħajfin. Il-​kmand li nsibu fil-​Bibbja biex ‘inwieżnu lid-​dgħajfin [u] nuru sabar fit-​tul lejn kulħaddʼ jistaʼ juri jekk imħabbitna hix ġenwina. (1 Tessalonikin 5:14) Ħafna aħwa li kienu dgħajfin saru b’saħħithom fil-​fidi iktar tard. Iżda oħrajn jibqaʼ jkollhom bżonn jiġu murijin sabar fit-​tul, jew paċenzja, u għajnuna bi mħabba. Kif nistgħu  ngħinuhom? Aħna nistgħu nużaw il-​Bibbja biex ninkuraġġuhom, nistgħu nistidnuhom jaħdmu magħna fil-​ministeru, jew nistgħu sempliċement nisimgħuhom. Ukoll, m’għandniex naħsbu dwar ħutna bħala li huma biss “b’saħħithom” jew “dgħajfin.” Minflok, għandna nirrealizzaw li lkoll għandna aspetti li fihom aħna b’saħħitna u oħrajn fejn aħna dgħajfin. Anke l-​appostlu Pawlu ammetta li kellu dgħufijiet. (2 Korintin 12:9, 10) Ilkoll kemm aħna neħtieġu l-​għajnuna u l-​inkuraġġiment minn xulxin.

14. X’għandna nkunu lesti li nagħmlu sabiex inżommu l-​paċi maʼ ħutna?

¹⁴ Żomm il-​paċi. Il-​paċi fost l-​aħwa hija prezzjuża ferm. Anke jekk inħossu li ġejna mifhumin ħażin jew trattati inġustament, għandna nagħmlu kulma nistgħu biex nagħmlu paċi. (Aqra Rumani 12:17, 18.) Jekk weġġajna s-​sentimenti taʼ xi ħadd, sempliċement ikollna bżonn nitolbu skuża. Imma għandna nkunu sinċieri. Pereżempju, minflok ma ngħidu, “Jiddispjaċini li tħossok b’dan il-​mod,” ikun aħjar li nammettu l-​ħtija tagħna billi ngħidu, “Jiddispjaċini li weġġajtek b’dak li għedt.” Il-​paċi hi speċjalment importanti fiż-​żwieġ. Ikun ħażin li raġel u mara miżżewġin jaġixxu bħallikieku jħobbu lil xulxin quddiem oħrajn filwaqt li jirrifjutaw li jkellmu lil xulxin fil-​privat, jgħidu affarijiet li jweġġgħu lil xulxin, jew saħansitra jkunu vjolenti.

15. Kif nistgħu nuru li l-​maħfra tagħna tkun ġenwina?

¹⁵ Aħfer mill-​qalb. Jekk xi ħadd iweġġagħna, aħna naħfrulu u neħilsu mis-​sentimenti mweġġgħin tagħna. Għandna nagħmlu dan anke jekk ma jirrealizzax li weġġagħna. Aħna naħfru mill-​qalb billi ‘nissaportu lil xulxin bl-​imħabba, u nagħmlu ħilitna biex bil-​ħeġġa kollha nħarsu l-​unità taʼ l-​ispirtu  fir-​rabta li tgħaqqad tal-​paċi.’ (Efesin 4:2, 3) Sabiex naħfru ġenwinament, m’għandniex nibqgħu naħsbu dwar dak li għamlet il-​persuna. L-​imħabba “ma żżommx kont tal-​ħsara.” (1 Korintin 13:4, 5) Fil-​fatt, jekk inżommu f’qalbna kontra xi ħadd, nistgħu nagħmlu l-​ħsara lir-​relazzjoni tagħna maʼ ħuna jew oħtna kif ukoll maʼ Ġeħova. (Mattew 6:14, 15) Aħna nuru li l-​maħfra tagħna tkun sinċiera meta nitolbu għall-​persuna li weġġgħetna.—Luqa 6:27, 28.

16. Kif għandna nħossuna dwar inkarigi speċjali fis-​servizz taʼ Ġeħova?

¹⁶ Ċedi vantaġġi personali. Meta ningħataw inkarigu speċjali fis-​servizz taʼ Ġeħova, nistgħu nuru li mħabbitna hi ġenwina billi ma ‘nfittxux dak li jaqbel lilna, imma dak li jaqbel lil ħaddieħor.’ (1 Korintin 10:24) Pereżempju, fl-​assembleat u l-​konvenzjonijiet tagħna, l-​attendants jidħlu fis-​sala qabel oħrajn u tistaʼ tiġihom it-​tentazzjoni biex jerfgħu l-​aħjar postijiet għalihom u għal familthom. Minflok, ħafna minnhom jagħżlu postijiet li ma jkunux jippreferu fis-​sezzjoni assenjata lilhom. Billi jagħmlu dan ikunu qed juru mħabba bla egoiżmu. Kif tistaʼ timita l-​eżempju tajjeb tagħhom?

17. Jekk Kristjan jagħmel dnub serju, x’se timmotivah jagħmel imħabba ġenwina?

¹⁷ Stqarr dnubiet moħbijin u tibqax tagħmilhom. Xi Kristjani li għamlu dnub serju pprovaw iżommuh moħbi. Huma forsi jistħu jew ma jridux jiddiżappuntaw lil oħrajn. (Proverbji 28:13) Iżda meta midneb jaħbi dnub ma jkunx qed juri mħabba għax dan ikun taʼ ħsara kemm għalih kif ukoll għal oħrajn. Kif? Ġeħova għandu mnejn ma jkomplix ibierek lill-​kongregazzjoni bl-​ispirtu qaddis tiegħu, u l-​kongregazzjoni ma jkollhiex paċi. (Efesin 4:30) Allura jekk Kristjan jagħmel dnub serju, imħabba ġenwina se timmotivah ikellem lill-​anzjani u jikseb l-​għajnuna li għandu bżonn.—Ġakbu 5:14, 15.

18. Kemm hi importanti l-​imħabba ġenwina?

¹⁸ Fost il-​kwalitajiet kollha, l-​imħabba hija l-​ikbar waħda. (1 Korintin 13:13) Din tgħin lin-​nies jaraw min huma s-​segwaċi veri taʼ Ġesù u min tassew jimita lil Ġeħova, is-​Sors tal-​imħabba. (Efesin 5:1, 2) Pawlu qal li kieku ma kellux l-​imħabba, ma kien ikun xejn. (1 Korintin 13:2) Jalla kull wieħed u waħda minna jkompli juri mħabbtu, mhux biss “bil-​kliem” imma wkoll “bl-​għemil u l-​verità.”