1. Oħt single liema mistoqsijiet għandha tistaqsi qabel tiddeċiedi li tiżżewweġ?

IL-​KRISTJANI kollha huma taħt l-​awtorità taʼ Ġesù Kristu li hu kap perfett. Però, meta mara Kristjana tiżżewweġ trid tkun sottomessa lejn l-​awtorità taʼ raġel imperfett. Dan mhux dejjem faċli. Mela meta tkun qed taħseb biex tiżżewweġ lil xi ħu, hi għandha tistaqsi lilha nfisha: ‘X’juri li dan il-​ħu se jkun kap taʼ familja tajjeb? Li jaqdi lil Ġeħova, hija l-​iktar ħaġa importanti għalih? Jekk le, xi jġegħelni naħseb li se jkun kap li jgħin il-​familja żżomm ħbiberija tajba maʼ Ġeħova wara li niżżewġu?’ Barra dawn il-​mistoqsijiet, oħt għandha tistaqsi wkoll: ‘Xi kwalitajiet għandi jien biex ikollna żwieġ tajjeb? Jien paċenzjuża u ġeneruża? Għandi ħbiberija b’saħħitha maʼ Ġeħova?ʼ (Ekk. 4:9, 12) Jekk mara tieħu deċiżjonijiet tajbin qabel tiżżewweġ, dan jistaʼ jgħin biex iż-​żwieġ tagħha jirnexxi u tkun ferħana.

2. X’se nikkunsidraw f’dan l-​artiklu?

² Miljuni taʼ nisa Kristjani huma eżempju eċċellenti billi jkunu ubbidjenti lejn ir-​raġel tagħhom. Huma taʼ min jammirahom! Aħna ferħanin ħafna li naqdu lil Ġeħova flimkien maʼ dawn in-​nisa leali! F’dan l-​artiklu se nikkunsidraw it-​tweġibiet tal-​mistoqsijiet li ġejjin: (1) X’inhuma xi sfidi li nisa miżżewġin jaf ikollhom jiffaċċjaw? (2) Mara għala għandha tagħżel li tkun sottomessa lejn żewġha? (3) Irġiel u nisa Kristjani miżżewġin x’jistgħu jitgħallmu dwar is-​sottomissjoni mill-​eżempji taʼ Ġesù, Abigajl, u Marija, il-​mara taʼ Ġużeppi u omm Ġesù?

3. Għala l-​koppji miżżewġin kollha jiffaċċjaw l-​isfidi?

³ Iż-​żwieġ huwa rigal perfett mingħand Alla, imma l-​bnedmin huma imperfetti. (1 Ġw. 1:8) Huwa għalhekk li l-​Kelma t’Alla twissi lill-​koppji miżżewġin li se jiffaċċjaw sfidi li huma deskritti bħala “tribulazzjoni f’laħamhom.” (1 Kor. 7:28) Issa se niddiskutu xi affarijiet li mara miżżewġa tistaʼ ssib diffiċli.

4. Għala mara tistaʼ tqisu taʼ diżunur li tobdi lil żewġha?

⁴ Kultant, minħabba t-​trobbija tagħha, mara tistaʼ tħoss li jkun diżunur jekk tkun sottomessa lejn żewġha. Marisol, li tgħix l-​Istati Uniti, tgħid: “Fejn trabbejt jien, kienu jgħidu li n-​nisa għandhom ikunu ugwali daqs l-​irġiel. Jien naf li Ġeħova ta l-​awtorità lir-​raġel bħala kap u li l-​mara għandha tkun ubbidjenti, imma n-​nisa wkoll jixirqilhom ir-​rispett. Mhux dejjem ikun faċli biex nirrispetta l-​awtorità tar-​raġel għax id-​dinja tgħid li m’għandix għalfejn nagħmel hekk.”

5. Liema ideat żbaljati għandhom xi rġiel dwar in-​nisa?

⁵ Mill-​banda l-​oħra, mara taf tkun miżżewġa lil raġel li jaħseb li n-​nisa mhumiex importanti daqs l-​irġiel. Ivon, oħt li tgħix l-​Amerika t’Isfel, tgħid: “Fejn ngħix jien, l-​irġiel jieklu qabel in-​nisa. Il-​bniet iridu jnaddfu u jsajru, imma s-​subien jiġu servuti minn ommhom u ħuthom, u huma meqjusin bħala ‘r-​rejiet tad-​dar.’” Oħt oħra jisimha Yingling, li tgħix l-​Asja, tgħid: “Fil-​lingwa tiegħi hemm espressjoni li tgħid li n-​nisa m’għandhomx għalfejn ikunu intelliġenti jew ikollhom l-​abbiltajiet. Xogħolhom hu li jagħmlu l-​faċendi tad-​dar, u ma jistgħux jagħtu l-​opinjoni tagħhom lir-​raġel.” Raġel li ma jurix imħabba u ma jagħmilx dak li tgħid il-​Bibbja jagħmel il-​ħajja tal-​mara tiegħu diffiċli, ma jkunx qed jimita lil Ġesù, u ma jogħġobx lil Ġeħova.—Efes. 5:28, 29; 1 Pt. 3:7.

6. In-​nisa miżżewġin x’għandhom jagħmlu biex isaħħu l-​ħbiberija tagħhom maʼ Ġeħova?

⁶ Kif semmejna fl-​artiklu taʼ qabel, Ġeħova jistenna li l-​irġiel miżżewġin jipprovdu għall-​familja u jgħinu lill-​familja tibni ħbiberija maʼ Ġeħova. (1 Tim. 5:8) Però, nisa miżżewġin għandhom isibu l-​ħin mill-​iskeda mimlija tagħhom biex jaqraw il-​Kelma t’Alla, jimmeditaw fuqha, u biex jitolbu lil Ġeħova mill-​qalb. Dan jaf ma jkunx faċli. In-​nisa miżżewġin ikollhom ħafna x’jagħmlu, u forsi jħossu li m’għandhomx ħin u enerġija biex jagħmlu dawn l-​affarijiet. Imma għala huwa importanti ħafna li jsibu l-​ħin? Għax Ġeħova jrid li kull wieħed u waħda minna jibni u jżomm ħbiberija miegħu.—Atti 17:27.

7. X’se jgħin lil mara biex tkun sottomessa lejn żewġha?

⁷ Huwa normali li mara jaf ikollha tagħmel sforz biex tkun sottomessa lejn ir-​raġel imperfett tagħha. Però, hi se ssibha iktar faċli biex twettaq l-​inkarigu li Ġeħova taha jekk tifhem u taċċetta l-​prinċipji Skritturali għala għandha tkun sottomessa lejn żewġha.

8. Skont Efesin 5:22-​24, għala mara Kristjana għandha tagħżel li tkun sottomessa lejn żewġha?

⁸ Mara Kristjana tagħżel li tkun sottomessa lejn żewġha għax Ġeħova hekk jitlob minnha. (Aqra Efesin 5:22-​24.) Hi  tafda lil Missierha tas-​sema għax taf li hu jħobbha u mhux se jitlobha tagħmel xi ħaġa li ma tkunx tajba għaliha.—Dt. 6:24; 1 Ġw. 5:3.

9. X’jiġri meta mara tobdi lil Ġeħova billi tirrispetta l-​awtorità taʼ żewġha?

⁹ Id-​dinja tħeġġeġ lin-​nisa biex jinjoraw il-​livelli taʼ Ġeħova. Ukoll, tpinġi s-​sottomissjoni bħala xi ħaġa li tbaxxi lin-​nisa. Bla dubju, dawk li jippromwovu dawn l-​ideat ma jafux lil Alla tagħna kollu mħabba. Ġeħova qatt mhu se jagħti kmand li jbaxxi lill-​aħwa nisa li huma prezzjużi għalih. Oħt li taħdem iebes biex tobdi lil Ġeħova billi tkun sottomessa lejn żewġha se tgħin biex ikollha l-​paċi fil-​familja. (Salm 119:165) Se tibbenefika hi, ir-​raġel, u t-​tfal tagħha.

10. X’lezzjonijiet nistgħu nitgħallmu minn dak li qalet Carol?

¹⁰ Mara li hija sottomessa lejn żewġha li hu imperfett turi li tħobb u tirrispetta lil Ġeħova, il-​wieħed li għamel dan l-​arranġament. Carol, li tgħix l-​Amerika t’Isfel, tgħid: “Jien naf li żewġi se jiżbalja. Naf ukoll li l-​mod kif nittrattah meta jiżbalja juri kemm napprezza l-​ħbiberija tiegħi maʼ Ġeħova. Għalhekk, nipprova nibqaʼ sottomessa għax irrid nogħġob lil Missieri tas-​sema.”

11. X’jgħin lil oħt jisimha Aneese biex taħfer, u x’nitgħallmu minn dak li qalet?

¹¹ Jistaʼ jkun diffiċli għal mara li tirrispetta u tkun sottomessa lejn żewġha jekk hi tħoss li hu ma jagħtix kas is-​sentimenti tagħha. Imma ara x’tagħmel oħt jisimha Aneese meta jiġrilha hekk. Hi tgħid: “Nipprova ma nirrabjax u niftakar li kulħadd jiżbalja. Inżomm f’moħħi li għandi naħfer mill-​qalb bħalma jagħmel Ġeħova. Meta naħfer, nerġaʼ nħossni kalma.” (Salm 86:5) Mara li tkun lesta li taħfer, spiss se ssibha eħfef biex tkun sottomessa.

12. X’eżempji fiha l-​Bibbja?

¹² Xi wħud jaħsbu li meta persuna tkun sottomessa tkun dgħajfa. Imma dan mhux veru. Il-​Bibbja fiha ħafna eżempji taʼ wħud li minkejja li kellhom karattru  sod kienu sottomessi. Ejja naraw x’nistgħu nitgħallmu minn Ġesù, Abigajl, u Marija.

13. Ġesù għala jirrispetta l-​awtorità taʼ Ġeħova? Spjega.

¹³ Ġesù jirrispetta l-​awtorità taʼ Ġeħova, imma dan ma jfissirx li hu mhux kapaċi jew mhux intelliġenti. Fil-​fatt, il-​mod sempliċi u ċar kif Ġesù kien jgħallem juri li kien intelliġenti ħafna. (Ġw. 7:45, 46) Ġeħova kien jaf li Ġesù kien kapaċi ħafna tant li ħallieh jaħdem miegħu meta ħalaq kollox fis-​sema u fuq l-​art. (Prov. 8:30; Ebr. 1:2-​4) U wara li Ġeħova rxoxta lil Ġesù, hu tah “kull awtorità fis-​sema u fuq l-​art.” (Mt. 28:18) Għalkemm Ġesù kapaċi ħafna, hu xorta jistaqsi lil Ġeħova għall-​gwida. Għala? Għax iħobb lil Missieru.—Ġw. 14:31.

14. Raġel miżżewweġ x’jistaʼ jitgħallem (a) minn kif Ġeħova jqis lin-​nisa? (b) minn Proverbji 31?

¹⁴ Raġel miżżewweġ x’jistaʼ jitgħallem? L-​arranġament taʼ Ġeħova biex mara tkun sottomessa lejn żewġha ma jfissirx li Ġeħova jqis lin-​nisa inferjuri mill-​irġiel. Ġeħova wera dan meta hu stess għażel irġiel kif ukoll nisa biex imexxu maʼ Ġesù. (Gal. 3:26-​29) Ġeħova wera li jafda lil Ibnu meta fdah b’awtorità. Bl-​istess mod, raġel għaqli mhux se jiddejjaq jagħti xi responsabbiltajiet lill-​mara tiegħu. Il-​Bibbja tiddeskrivi affarijiet li mara kapaċi tagħmel. Pereżempju, hi taf tieħu ħsieb id-​dar tagħha, taf tixtri jew tbigħ propjetà, u taf taħdem fin-​negozju. (Aqra Proverbji 31:15, 16, 18.) Hi mhix skjava, u għalhekk għandha dritt tagħti l-​opinjoni tagħha. B’hekk, ir-​raġel tagħha jafdaha u jismaʼ l-​ideat tagħha. (Aqra Proverbji 31:11, 26, 27.) Meta raġel jirrispetta lil martu b’dan il-​mod, hi se tieħu pjaċir tkun sottomessa.

15. Mara miżżewġa x’tistaʼ titgħallem minn Ġesù?

¹⁵ Mara miżżewġa x’tistaʼ titgħallem? Minkejja li Ġesù għamel affarijiet kbar, hu ma jħossux inferjuri għax jissottometti ruħu għall-​awtorità taʼ Ġeħova. (1 Kor. 15:28; Flp. 2:5, 6) Bl-​istess mod, mara kapaċi li ssegwi l-​eżempju taʼ Ġesù mhux se tħossha inferjuri għax tkun sottomessa lejn żewġha. Hi tappoġġja lil żewġha mhux biss għax tħobbu imma wkoll għax tħobb u tirrispetta lil Ġeħova.

16. Skont l-​1 Samwel 25:3, 23-​28, liema sfidi ffaċċjat Abigajl? (Ara l-​istampa tal-​qoxra.)

¹⁶ Abigajl kellha raġel jismu Nabal. Hu kien egoist, kburi, u ma japprezza xejn. Kieku riedet ittemm iż-​żwieġ tagħha, Abigajl setgħet ħalliet lil David joqtol lil Nabal, imma ma għamlitx hekk. Minflok, hi għamlet dak li setgħet biex tipproteġi lil Nabal u lil taʼ darha. Immaġina l-​kuraġġ li wriet biex tmur quddiem 400 raġel armat u tkellem lil David b’rispett. Hi kienet lesta wkoll tieħu t-​tort tal-​iżball li għamel żewġha. (Aqra l-​1 Samwel 25:3, 23-​28.) David mill-​ewwel irrealizza li Ġeħova kien qed juża lil din il-​mara kuraġġuża biex twaqqfu milli jagħmel żball kbir.

17. Raġel miżżewweġ x’jistaʼ jitgħallem mir-​rakkont taʼ David u Abigajl?

¹⁷ Raġel miżżewweġ x’jistaʼ jitgħallem? Abigajl kienet mara għaqlija. David għamel sew meta semaʼ mill-​parir tagħha. U grazzi għal dan, hu ma qatel lil ħadd innoċenti. Bl-​istess mod, raġel għaqli se jismaʼ u jikkunsidra l-​opinjoni taʼ martu qabel ma jieħu deċiżjoni importanti. Jistaʼ jkun li l-​opinjoni tagħha tgħinu jevita jieħu deċiżjoni ħażina.

18. Mara miżżewġa x’tistaʼ titgħallem mill-​eżempju taʼ Abigajl?

 ¹⁸ Mara miżżewġa x’tistaʼ titgħallem? Mara li tħobb u tirrispetta lil Ġeħova jistaʼ jkollha effett tajjeb fuq il-​familja tagħha, anki jekk ir-​raġel ma jaqdix lil Ġeħova jew ma jgħixx skont il-​prinċipji tiegħu. Hi mhux se tipprova ttemm iż-​żwieġ tagħha. Minflok, billi turi rispett u tkun ubbidjenti, hi tistaʼ tħajjar lir-​raġel tagħha jitgħallem dwar Ġeħova. (1 Pt. 3:1, 2) Imma anki jekk ir-​raġel jiddeċiedi li ma jaqdix lil Ġeħova, Ġeħova se jkun ferħan bil-​lealtà tagħha meta jara li qed tobdi lil żewġha.

19. Oħt meta m’għandhiex tobdi lil żewġha?

¹⁹ Oħt sottomessa lejn żewġha mhix se tappoġġa lir-​raġel tagħha jekk hu jitlobha tagħmel xi ħaġa li tmur kontra l-​liġijiet jew il-​prinċipji tal-​Bibbja. Ejja ngħidu li raġel mhux Xhud jitlob lil martu tigdeb, tisraq, jew tagħmel xi ħaġa li ma togħġobx lil Ġeħova. Il-​Kristjani kollha, inkluż l-​aħwa nisa miżżewġin, l-​ewwel għandhom jobdu lil Alla Ġeħova. Jekk oħt tiġi mitluba biex tikser il-​prinċipji tal-​Bibbja, hi għandha tirrifjuta u tispjega b’mod sod imma b’rispett għala ma tistax tagħmel dak li jrid hu.—Atti 5:29.

20. Kif nafu li Marija kellha ħbiberija b’saħħitha maʼ Ġeħova?

²⁰ Marija kellha ħbiberija b’saħħitha maʼ Ġeħova. Hi kienet taf l-​Iskrittura sew. Waqt konversazzjoni li kellha maʼ Eliżabetta, omm Ġwanni l-​Battista, Marija kkwotat mill-​Iskrittura Ebrajka iktar minn 20 darba. (Lq. 1:46-​55) U aħseb dwar dan: Għalkemm Marija kienet se tiżżewweġ lil Ġużeppi, l-​anġlu taʼ Ġeħova deher lilha l-​ewwel. L-​anġlu l-​ewwel kellem direttament lil Marija u qalilha li kien se jkollha tifel u dan kien se jkun l-​Iben t’Alla. (Lq. 1:26-​33) Ġeħova kien jafha sew lil Marija u kien ċert li kienet se tħobb u tieħu ħsieb lil Ibnu. U aħna m’għandniex dubju li Marija baqgħet issaħħaħ il-​ħbiberija tagħha maʼ Ġeħova anki wara li Ġesù miet u ġie rxoxtat għas-​sema.—Atti 1:14.

21. Raġel miżżewweġ x’jistaʼ jitgħallem minn dak li tgħid il-​Bibbja dwar Marija?

 ²¹ Raġel miżżewweġ x’jistaʼ jitgħallem? Raġel għaqli jkun ferħan meta l-​mara tiegħu tkun taf l-​Iskrittura sew. Hu ma jiddejjaqx jew jaħseb li hi trid tkun aħjar minnu. Hu jirrealizza li jekk il-​mara tiegħu tkun taf il-​Bibbja u l-​prinċipji tagħha, hi tistaʼ tgħin lill-​familja. Però, anki jekk il-​mara taf iżjed skola, hija r-​responsabbiltà tar-​raġel li jieħu ħsieb il-​qima bħala familja u attivitajiet teokratiċi oħra.—Efes. 6:4.

22. Mara miżżewġa x’tistaʼ titgħallem minn Marija?

²² Mara miżżewġa x’tistaʼ titgħallem? Mara għandha tkun sottomessa lejn żewġha, imma hi xorta għandha r-​responsabbiltà biex iżżomm il-​fidi tagħha b’saħħitha. (Gal. 6:5) Għalhekk, hi għandha ssib il-​ħin għall-​istudju persunali tagħha u l-​meditazzjoni. Dan se jgħinha biex iżżomm l-​imħabba u r-​rispett lejn Ġeħova u biex issib il-​ferħ meta tkun sottomessa lejn żewġha.

23. Nisa li huma sottomessi lejn l-​irġiel tagħhom, kif jibbenefikaw huma, il-​familja tagħhom, u l-​kongregazzjoni?

²³ Nisa li jibqgħu sottomessi lejn ir-​raġel tagħhom għax iħobbu lil Ġeħova, se jkunu iktar ferħanin u kuntenti minn dawk li ma jappoġġjawx l-​arranġament taʼ Ġeħova. Ukoll, huma taʼ eżempju tajjeb għat-​tfajliet u l-​ġuvintur. U jgħinu biex ikun hemm l-​imħabba u l-​paċi mhux biss fil-​familja imma anki fil-​kongregazzjoni. (Titu 2:3-​5) Illum, il-​biċċa l-​kbira mill-​qaddejja taʼ Ġeħova huma nisa. (Salm 68:11) Ilkoll kemm aħna, kemm irġiel u kemm nisa, nistgħu ngħinu biex fil-​kongregazzjoni tagħna jkun hemm il-​ferħ. Fl-​artiklu li jmiss se niddiskutu kif nistgħu nagħmlu dan.